ངྷ་སའི་རི་གྲོང་ཆུང་ཆུང་འདིར་ཁེ་མེད་སྤྱི་ཚོགས་ཞབས་ཞུའི་ཚོགས་པ་ཆེ་འབྲིང་ཆུང་གསུམ་དྲུག་ལྷག་གིས་དབྱིན་སྐད་གཙོ་བོར་གྱུར་པའི་སྐད་ཡིག་འཛིན་གྲྭ་སྣ་མང་ཞིག་གཉེར་བཞིན་ཡོད་པའི་ཁྲོད་བོད་ཡིག་འཛིན་ཡོད་ས་གཅིག་ལས་མེད་པ་དེ་ལའང་། བོད་ཡིག་སྦྱོང་དུ་ཡོང་མཁན་མི་འདུག་ཟེར།
ངྷ་རམ་ས་ལ་ནི་བཙན་བྱོལ་བོད་མིའི་སྤྱི་ཚོགས་ཀྱི་རྟེན་གཞི་གཙོ་བོ་དང་། བོད་ཕྱི་ནང་གཉིས་ཀྱི་བོད་མི་རྣམས་ཕར་འགྲོ་ཚུར་འོང་གི་ས་གནས་འཁྲུག་ཤོས་ཤིག་ཡིན་པའི་ཁར། རྒྱལ་སྤྱིའི་མི་རིགས་འདྲ་མིན་འཛོམས་སའི་ལྟེ་གནས་ཤིག་ཀྱང་ཆགས་ཡོད་སྟབས། མི་སུ་ཞིག་ངྷ་སའི་རི་གྲོང་ཆུང་ཆུང་འདི་བརྒྱུད་སྐབས། ཕ་ཡུལ་གྱི་དྲོད་ཁོལ་ཡལ་མེད་པའི་ཆོལ་གསུམ་ས་ཁུལ་གང་ས་ནས་ཕེབས་པའི་བོད་མི་གསར་དུ་འབྱོར་མཁན་དང་། ཕྱི་རྒྱལ་ཡུལ་གྲུ་ཁག་ནས་ཡོང་པའི་ཆ་ལུགས་འདྲ་མིན་ཅན་གྱི་ཕྱི་སྡོད་བོད་མི། དེ་བཞིན་སྐད་རིགས་མི་འདྲ་བ་དང་སྐྲ་དང་ཤ་མདོག་སོགས་ཆ་ལུགས་སྣ་ཚོགས་ཅན་གྱི་ཕྱི་གླིང་པ་བཅས་མཐོང་རྒྱུ་ཡོད་ལ། ཕྱི་གླིང་པ་ཚོས་མཚམས་རེར་ངྷ་སའི་རི་གྲོང་འདི་ལ་རྒྱལ་སྤྱིའི་གྲོང་སྡེ་(Global Villege) ཞེས་ཀྱང་འབོད། ཁོར་ཡུག་འདི་འདྲའི་འོག་བོད་མི་རྒན་གཞོན་དང་ཕོ་མོ། གྲྭ་བཙུན་དབྱེར་མེད་ཐོག་ཕྱིའི་སྐད་ཡིག་ལ་དབྱིངས་ཞུགས་ཏེ་སྔ་དགོང་ཕྱི་གསུམ་དུས་ཚོད་ཡོད་ཚད་ནང་ཕྱིའི་སྐད་ཡིག་སྦྱོང་རྒྱུར་བྲེལ་བཞིན་ཡོད་པ་རེད།
ད་ལྟ་ངྷ་སའི་རི་གྲོང་ཆུང་ཆུང་འདིར་སྒེར་དང་ཚོགས་སྡེ། སྤྱི་ཚོགས་ཞབས་ཞུའི་སྡེ་ཚན་སོགས་མང་པོ་ཞིག་གིས་སྐད་ཡིག་འཛིན་གྲྭ་གཉེར་བཞིན་པ་དང་། དེ་དག་ནང་གི་ཁྱབ་ཆེ་ཤོས་ཤིག་ནི་ལྷ་སྤྱི་ཚོགས་ཞབས་ཞུ་ཤེས་ཡོན་ལྟེ་གནས་ཁང་ཡིན་ཞིང་། ཚོགས་པ་འདི་ནི་ ༡༩༩༧ ལོར་གསར་དུ་བཙུགས་པ་ནས་ད་སྔ་སྤྱི་ཚོགས་ཞབས་ཞུའི་ལས་དོན་གང་མང་ཞིག་བསྒྲུབས་དང་སྒྲུབ་མུས་ཡིན་པའི་ནང་གི་སྐད་ཡིག་འཛིན་གྲྭའི་ལས་དོན་འདི་གལ་ཆེ་ཤོས་སུ་བཟུང་ཡོད་པ་རེད། ཚོགས་པ་འདིས་གཉེར་བཞིན་པའི་སྐད་ཡིག་འཛིན་གྲྭའི་ནང་དབྱིན་ཡིག་དང་ཧྥ་རན་སིའི་སྐད་ཡིག རྒྱ་ཡིག སི་པན་སྐད་ཡིག འཇར་མན་སྐད་ཡིག བོད་ཡིག་བཅས་ཡོད་ཅིང་། སྐད་ཡིག་དེ་དག་ལ་དམིགས་བསལ་ཁྲིད་གཞིའི་སློབ་དེབ་གཏན་འཁེལ་མེད་ཀྱང་། སློབ་ཚན་སོ་སོའི་ནང་སློབ་གཉེར་པའི་ཤེས་ཚད་གཞིར་བཟུང་ཐོག་འཛིན་གྲྭ་མཐོ་འབྲིང་རྨང་གསུམ་དུ་དབྱེ་སྟེ་ཉིན་ལྟར་འཛིན་གྲྭ་ཁག་ ༡༧ ཙམ་ལ་སློབ་ཁྲིད་བྱེད་བཞིན་འདུག
ལྷ་སྤྱི་ཚོགས་ཞབས་ཞུ་ཁང་གི་འགན་འཛིན་ངག་དབང་རབ་རྒྱས་ལགས་ཀྱིས། “ སྔོན་མ་ཡིན་ན་ཉིན་ལྟར་སློབ་མ་ ༤༠༠ ནས་ ༥༠༠ བར་སློབ་ཞུགས་བྱེད་ཀྱི་ཡོད་ཀྱང་། ད་ལོ་ ༢༠༠ ནས་ ༣༠༠ བར་ལས་མི་འདུག དེ་ནི་བོད་ནས་ཡོང་མཁན་ཉུང་དུ་ཕྱིན་པས་ཡིན་དང་། ཡང་ན་འདིར་ཡོད་རྣམས་ཕྱིའི་རྒྱལ་ཁབ་ནང་འགྲོ་མཁན་མང་དུ་ཕྱིན་པས་ཡིན་གསལ་པོ་ཤེས་མ་སོང་། བོད་ཡིག་འཛིན་གྲྭ་ལ་མཚོན་ན་དགུན་ཁའི་གུང་སེང་སྐབས་སློབ་གྲྭ་ཁག་ནས་ཡོང་པའི་སློབ་ཕྲུག་གང་འཚམ་རེ་བོད་ཡིག་སྦྱོང་དུ་ཡོང་པ་ལས། དུས་རྒྱུན་བོད་ཡིག་འཛིན་གྲྭར་ཡོང་མཁན་མི་འདུག” ཅེས་བརྗོད་སོང་ཡང་། ཚོགས་པའི་ཐོ་གཞུང་དུ་གསལ་པ་ལྟར་ན་ ༢༠༠༣ ལོ་ནས་ད་ལོའི་བར་གློག་ཀླད་སོགས་ཚུད་པའི་སློབ་ཞུགས་པ་གྲངས་ ༩༠༠༠ ལྷག་ཙམ་བྱུང་ཡོད་འདུག གྲྭ་བསམ་འགྲུབ་ནི་ལྷའི་དབྱིན་ཡིག་འཛིན་གྲྭར་ཞུགས་ནས་ལོ་གཅིག་ལྷག་ཙམ་ཕྱིན་ཡོད་ཅིང་། ཁོང་གིས་ “སྤྱི་ཡོངས་ནས་ཧ་ཅང་ཡག་པོ་འདུག འོན་ཀྱང་། དགེ་རྒན་གཏན་འཇགས་མེད་པ་དེ་དཀའ་ངལ་ཆོས་ཤོས་ཤིག་རེད། ”ཅེས་དང་། ཡང་བསྟན་འཛིན་བསོད་ནམས་ལགས་ཀྱིས་ “ང་མོན་རྟ་དབང་ནས་ཡིན། ངྷ་སར་སློབ་སྦྱོང་གི་གོ་སྐབས་དང་བེད་སྤྱོད་བྱེད་ས་མང་པོ་ཡོད་པ་དང་། སློབ་ཡོན་ཀྱང་མི་དགོས་པས། ཆེད་དུ་ངྷ་སར་སློབ་སྦྱོང་བྱེད་དུ་ཡོང་པ་ཡིན། ངའི་དམིགས་ཡུལ་ལ་བོད་ཡིག་མང་ཙམ་སྦྱང་ཐུབ་ན་འདོད་ཡོད། འོན་ཀྱང་། འདིར་བོད་ཡིག་འཛིན་གྲྭ་དམིགས་བསལ་མེད་སྟབས། སྒེར་པ་ཞིག་བོད་ཡིག་དགེ་རྒན་ལ་བསྟེན་དགོས་བསམ་བསྡད་ཡོད་”ཟེར་ལ། ཁོང་གིས་བརྗོད་པ་ལྟར་ན། མོན་རྟ་དབང་གི་བོད་མིའི་གནས་སྟངས་སྐྱོ་བོ་ཡིན་སྟབས། སློབ་སྦྱོང་བྱ་འདོད་ཡོད་ཀྱང་གོ་སྐབས་མ་རག་པར་ལྷག་ཡོད་མཁན་མང་པོ་ཡོད་འདུག
དེ་བཞིན། བོད་ཀྱི་བདེ་རྩ་ཚོགས་པ་(Tibet Charity) དང་རེ་བ་ཚོགས་པ། བོད་དོན་སླད་གོ་རྟོགས་དང་སློབ་སྦྱོང་ཚོགས་པ(LIT)། ཆུ་བཞི་སྒང་དྲུག་སོགས་མང་པོ་ཞིག་གིས་སྐད་ཡིག་འཛིན་གྲྭ་གཉེར་བཞིན་ཡོད་ཅིང་། འཛིན་གྲྭ་འདི་དག་ཕལ་ཆེ་བ་དབྱིན་ཡིག་དང་དབྱིན་སྐད་སྦྱོང་བརྡར་གྱི་འཛིན་གྲྭ་རྐྱང་ཡིན་པ་དང་། ཚོགས་པ་འདི་དག་གིས་གཉེར་བཞིན་པའི་འཛིན་གྲྭ་རེར་ཉིན་ལྟར་ཉུང་ཤོས་སློབ་ཞུགས་པ་ ༥༠ ནས་མང་ཤོས་ ༡༠༠ བར་ཡོང་གི་ཡོད་འདུག ངྷ་ས་ནི་གཙོ་བོ་བཙན་བྱོལ་བོད་མིའི་རྟེན་གཞི་ཞིག་དང་། ལྷག་པར་དུ་སྐད་ཡིག་འཛིན་གྲྭ་གཉེར་མཁན་བོད་པ་ཡིན་པ་དང་། སློབ་ཞུགས་པའི་བརྒྱ་ཆ་ ༩༠ བོད་རིགས་རྐྱང་ཡིན་ཡང་། ཕྱིའི་སྐད་ཡིག་ལས་བོད་སྐད་ཡིག་གི་འཛིན་གྲྭ་མེད་པ་དང་། ཡོད་ཀྱང་ཡོང་མཁན་མེད་པའི་ཐད། བོད་ཀྱི་བདེ་རྩ་ཚོགས་པའི་དབྱིན་དགེ་རིག་འཛིན་དབང་མོ་ལགས་ཀྱིས། “སྐད་ཡིག་འཛིན་གྲྭ་འདི་དག་གཉེར་པའི་དམིགས་ཡུལ་དངོས་ནི་གཞན་ཡུལ་གྱི་སྤྱི་ཚོགས་ནང་བོད་སྐད་ཡིག་མ་གཏོགས་མ་ཤེས་མཁན་ཚོའི་དཀའ་ངལ་སེལ་རྒྱུ་དེ་རེད། འདིར་སློབ་ཞུགས་བྱེད་མཁན་ཚོར་མཚོན་ན། དབྱིན་སྐད་ཐོག་གོ་བརྡ་འཕྲོད་ཐུབ་པ་དང་དབྱིན་ཡིག་འབྲི་ཀློག་ཤེས་རྒྱུ་ཙམ་ལས་སློབ་སྦྱོང་ཚད་ལྡན་ཞིག་བྱ་རྒྱུའི་འདུན་པ་ཡོད་མཁན་དཀོན་པོ་རེད། སློབ་ཞུགས་གསར་པ་སླེབས་སྐབས་ཀྱང་དབྱིན་སྐད་འཛིན་གྲྭ་ཡིན་པ་ཤེས་འཕྲལ་ལམ་སེང་ཐོ་འགོད་བྱེད་ཀྱི་འདུག ” ཅེས་བརྗོད་བྱུང་།
ཨ་རི་ནས་ཡིན་པ་སྐུ་ཞབས་རའེ་སི་(Rhys Lindmark) ལགས་ཀྱིས་ལྷ་དང་རེ་བ། བོད་དོན་སླད་གོ་རྟོགས་དང་སློབ་སྦྱོང་ཚོགས་པ། དགུ་བཅུ་གསུམ་སོགས་སུ་དང་བླངས་དགེ་རྒན་བྱེད་ཀྱི་ཡོད་ཅིང་། ཁོང་གིས་ངྷ་སའི་རི་གྲོང་གི་སྐད་ཡིག་འཛིན་གྲྭར་རྒྱུས་ལོན་བྱས་པའི་མྱོང་ཚོར་སྐོར་བརྗོད་དོན་ལྟར་ན། ཁོང་གིས་སྐད་ཡིག་འཛིན་གྲྭ་མང་ཆེ་བར་དབྱིན་ཡིག་སློབ་ཁྲིད་བྱེད་ཀྱི་ཡོད་འདུག་ལ། སློབ་ཞུགས་པ་ཚོ་ལོ་རྒན་པ་རྐྱང་ཡིན་ཡང་། སློབ་སྦྱོང་ལ་གཞན་དང་མ་འདྲ་བའི་ཧུར་བརྩོན་ཆེན་པོ་བྱེད་ཀྱི་ཡོད་པ་དང་། ཚོགས་པ་དག་གིས་ཀྱང་སློབ་ཡོན་ལེན་གྱི་མེད་པའམ་ཡོད་ཀྱང་ཧ་ཅང་ཉུང་ཉུང་ཡིན་སྟབས། ཁོང་གིས་ཨ་རིའི་ངོ་ཤེས་ཚོར་ངྷ་སར་དབྱིན་ཡིག་སྦྱང་གི་ཡོང་ན་སློབ་སྦྱོང་བྱ་ས་མང་པོ་ཡོད་པ་མ་ཟད། སློབ་ཡོན་ཧ་ཅང་ཉུང་ཉུང་ཡིན་པར་བརྗོད་མྱོང་ཡོད་ཟེར། འོན་ཀྱང་། ཧང་སང་པ་ཞིག་ལ། སྐད་ཡིག་འཛིན་གྲྭ་གཉེར་བཞིན་པའི་སྡེ་ཚན་ཕན་ཚུན་པར་ཆིག་སྒྲིལ་དང་མཉམ་ལས་མེད་པར། སོ་སོ་སོ་སོའི་ཐད་ན་ལངས་ཕྱོགས་རེ་བཟུང་འདུག་ཟེར།
གོང་གི་སྐད་ཡིག་འཛིན་གྲྭ་དེ་དག་གི་དགེ་རྒན་ཕལ་ཆེ་བ་ཕྱི་རྒྱལ་དང་བླངས་པ་རྐྱང་ཡིན་ཞིང་། སློབ་ཞུགས་པ་དག་ལ་མཚོན་ན་ཡང་ལོ་ཚད་དང་ཕོ་མོའི་ས་མཚམས་མེད་པར་སྐྱ་སེར་ཕོ་མོ་རྒན་གཞོན་ཅི་རིགས་ཡོད་ཀྱང་། ཁོང་ཚོའི་ཁྲོད་དུ་ཟླ་གཅིག་གཉིས་རིང་སློབ་སྦྱོང་དུ་ཡོང་མཁན་དང་། ལོ་ཕྱེད། ལོ་ཧྲིལ་བོར་སློབ་སྦྱོང་བྱེད་མཁན་རིགས་སྣ་ཚོགས་ཡོད་འདུག་ལ། ལྷ་སྤྱི་ཚོགས་ཞབས་ཞུ་ཁང་གིས་ལོ་རེར་སློབ་ཞུགས་པ་རེ་ནས་སློབ་ཡོན་དུ་ཧིན་སྒོར་ ༣༠༠ དང་། བོད་ཀྱི་བདེ་རྩ་ཚོགས་པས་ཟླ་རེར་ཧིན་སྒོར་ ༥༠། རེ་བ་ཚོགས་པས་ཟླ་རེར་ཧིན་སྒོར་ ༡༥༠ བཅས་ཡིན་ཞིང་། ཆུ་སྒང་དང་LIT སོགས་ལ་སློབ་ཡོན་མི་དགོས།
ངྷ་སའི་སྐད་ཡིག་འཛིན་གྲྭར་འགྲོ་བཞིན་པའི་སློབ་ཞུགས་པ་དག་ལ་རྒྱུས་ལོན་བྱས་སྐབས། ཁོང་ཚོ་ཕལ་ཆེ་བ་ནི་ཡིག་རྨོངས་པ་དང་། ལས་མེད། བོད་ཡིག་རྐྱང་པ་ལས་མི་ཤེས་པའི་གྲྭ་བཙུན། སློབ་ཕྲུག ཕྱི་རྒྱལ་ལ་འགྲོ་འཆར་ཡོད་མཁན་བཅས་ཀྱི་རིགས་ཡིན་ཞིང་། དེ་དག་ཁྲོད་རེ་ཟུང་ཞིག་དུས་ཚོད་མ་འཁྱོལ་པར་ཡོང་མཁན་ཡང་འདུག ཁོང་ཚོ་འཛིན་གྲྭར་ཡོང་པའི་དགོས་པ་དམིགས་ཡུལ་ཀྱང་སྣ་ཚོགས་ཏེ། ཡིག་རྨོངས་པ་ཁག་ཅིག་འབྲི་ཀློག་ཤེས་ཆེད་དང་། རིགས་གཅིག་ཕྱི་རྒྱལ་ལ་འགྲོ་འཆར་ཐོག་ཕྱི་སྐད་ལ་སློབ་སྦྱོང་བྱེད་ཀྱི་ཡོད་པ། ཡང་རིགས་གཅིག་གིས་བོད་སྐད་ཡིག་ལས་མི་ཤེས་སྟབས་ཕྱིའི་སྐད་ཡིག་སྦྱང་འདོད་ཡོད་པ། དེ་བཞིན་མི་ཁག་ཅིག་གིས་གོ་སྐབས་བཟུང་སྟེ་སྦྱིན་བདག་དང་དགའ་རོགས་འཚོལ་ཐབས་སོགས་དམིགས་ཡུལ་སྣ་ཚོགས་ཤིག་གི་འོག་སྐད་ཡིག་འཛིན་གྲྭར་ཡོང་གི་ཡོད་འདུག
གསར་འགོད་པ། བནྡེ་སྐྱབས།
༼ བོད་ཀྱི་དུས་བབ་ཚགས་ཤོག་ལས་འདིར་བཀོད། ༽
སྐད་ཡིག་འཛིན་གྲྭ་དེ་ཡག་པོ་ཡོད་ས་རེད། གཞན་སྐད་དང་རང་སྐད་གང་ཞིག་སྦྱང་ན་ཡང་དམིགས་ཡུལ་ཡོད་པ་ཞིག་བྱས་ན་བཟང་གི་་་འཛིན་གྲྭ་ཉི་མ་མ་འཁྱོལ་ནས་ཡོང་མཁན་དང་དགའ་རོགས་འཚོལ་གི་ཡོང་མཁན་ཚོ་ཡང་ཁེ་སང་གཉིས་ལྡན་རེད།
དང་བླངས་བའི་སྤྱི་ཚོགས་ཞབས་ཞུ་བ་ལ་བསྔགས་བརྗོད་ཞུ། ལྷག་དོན་ལྷ་སྤྱི་ཚོགས་ཞབས་ཞུ་ཚོགས་པས་སྤྱི་ཚོགས་ནང་ཕན་རླབས་ཆེན་ཐོག་བཞིན་འདུག་པ་མ་ཟད་རིས་མེད་ཐོག་ཕ་ཡུལ་ཁ་བྲལ་བའི་རེ་བ་རྒྱབ་ས་་མེད་པའི་གསར་འབྱོར་བ་དང་ཡང་ན་སློབ་གྲའི་གོ་སྐབས་མ་ཐོབ་པར་ཡིག་རྨོང་སེལ་བའི་གོ་སྐབས་སྤྲད་པ་དེ་ཆོས་ལྡན་གྱི་བྱ་བ་རེད་ལ་ཡ་རབ་ཀྱི་བྱ་བ་ཡིན་པ་སྨོས་ཅི་དགོས། ལྷ་ཚོགས་གཙོ་གསར་རྙིང་གཉིས་ཀྱིས་ལས་ཀ་ཧུར་ཐག་གནང་བར་རྗེས་སུ་ཡི་རང་ངོ་།
ངྷ་སར་སྐད་ཡིག་སྣ་མང་གི་འཛིན་གྲྭ་སྐོར་ཞིག་འཚོགས་ཐུབ་པར་དགའ་སྤོབས་བྱུང་སོང་ལགས།
ཧ་ཧ་ཧ་་་་་ སྐད་ཡིག་འཛིན་གྲྭ་སྐྱིད་པོ་ཟེར་ནོ་རེད།
སྤྱི་ཚོགས་ཞབས་ཞུ་ལེགས་ཤོས་རིགས་རེད། བསྔགས་བརྗོད་ཡོད། ལྷག་པར་དུ་ཡང་བོད་ནང་ལ་ཡིག་རྨོངས་སེལ་བའི་ལས་འགུལ་སྤེལ་རྒྱུར་གཞུང་དམངས་གཉིས་ནས་འབོད་སྐུལ་བྱེད་དགོས།