ཁ་སང་ཕྱི་ཚེས་ ༡༠ ཉིན་༸གོང་ས་མཆོག་ལ་ནོ་སྦེལ་ཞི་བདེ་གཟེངས་རྟགས་འབུལ་བཞེས་གནང་ནས་ལོ་ ༢༢ འཁོར་བའི་དུས་དྲན་གྱི་མཛད་སྒོའི་སྐབས་དང་བསྟུན་ནས། དབུ་མའི་ལམ་མི་མང་ལས་འགུལ་ཁང་གི་གོ་སྒྲིག་འོག ཕྱི་དྲོའི་ཆུ་ཚོད་ ༣ སྟེང་བཞུགས་སྒར་མཚན་ཉིད་གྲྭ་ཚང་གི་ཚོགས་ཁང་དུ་༸གོང་ས་མཆོག་གི་མཛད་རྗེས་གླེང་བའི་བགྲོ་གླེང་ཞིག་ཚོགས་ཏེ། གདན་ཞུའི་བགྲོ་གླེང་པ་མཚན་ཉིན་གྲྭ་ཚང་གི་དགེ་བཤེས་བློ་བཟང་ཟླ་བ་ལགས་ཀྱིས་༼ ༸གོང་ས་མཆོག་དང་ནང་ཆོས༽ཞེས་པའི་བརྗོད་གཞི་དང་། བོད་ཀྱི་དུས་བབ་གསར་ཁང་གི་སྤྱི་ཁྱབ་རྩོམ་སྒྲིག་པ་དོན་གྲུབ་བཀྲ་ཤིས་ལགས་ཀྱིས་༼ ༸གོང་ས་མཆོག་དང་དམངས་གཙོ༽དང་། ནོར་གླིང་མཐོ་སློབ་ལོ་རྒྱུས་དགེ་རྒན་ལྷ་ལུང་རྒྱལ་ལགས་ཀྱིས་༼ ༸གོང་ས་མཆོག་དང་བོད་ཀྱི་ལོ་རྒྱུས༽། བོད་གནས་ཉམས་ཞིབ་པ་ཚེ་རིང་རྡོ་རྗེ་ལགས་ཀྱིས་༼ ༸གོང་ས་མཆོག་དང་རྒྱ་ནག་མི་མང་༽བཅས་ཀྱི་བརྗོད་གཞིའི་ཐོག་གཏམ་བཤད་དང་མང་ཚོགས་ཀྱི་དྲི་བར་ལན་འདེབས་གནང་རྗེས། བགྲོ་གླེང་ལ་མཉམ་ཞུགས་གནང་མཁན་དག་གིས་༸གོང་ས་མཆོག་གི་མཛད་རྗེས་ལ་བསྔགས་པའི་སྙན་ངག་གྱེར་འདོན་བཅས་གནང་སོང་།
བགྲོ་གླེང་གི་ཐོག་མར་དབུ་མའི་ལམ་ལས་འགུལ་ཁང་གི་དྲུང་ཡིག་བློ་བཟང་ཆོས་འབྱོར་ལགས་ཀྱིས་མགོ་འཛིན་གཏམ་བཤད་དང་སྦྲགས། དེ་སྔོན་༸གོང་ས་མཆོག་གིས་ནོར་ཝེ་རྒྱལ་ས་ཨོ་སི་ལོར་ཞི་བདེ་གཟེངས་རྟགས་བཞེས་སྐབས་ཀྱི་གསར་འགོད་ལྷན་ཚོགས་སྟེང་། དེ་རིང་ང་ལ་ནོ་སྦེལ་ཞི་བདེ་གཟེངས་རྟགས་ཕུལ་བ་འདི་ནི། ངོས་དང་བོད་མི་ས་ཡ་དྲུག་གི་སྙིང་སྟོབས་ཡིན་པ་དང་། འདི་ལ་བརྟེན་ནས་རྒྱལ་སྤྱི་སྒང་བོད་དོན་རྒྱབ་སྐྱོར་ཐད་ཚ་རླབས་ཤིག་འཕྱུར་གྱི་རེད་ཅེས་གསུངས་པ་ལྟར། བཙན་བྱོལ་བོད་མིའི་འཐབ་རྩོད་ཀྱི་བརྒྱུད་རིམ་ནང་༸གོང་ས་མཆོག་ལ་ནོ་སྦེལ་ཞི་བདེ་གཟེངས་ཕུལ་བ་དེས། བོད་དོན་འཛམ་གླིང་སྒང་ཁྱབ་བསྒྲགས་དང་རྒྱལ་སྤྱིའི་སྒང་བོད་ཀྱི་འཐབ་རྩོད་ལ་སྔར་ལས་ལྷག་པར་རྒྱབ་སྐྱོར་ཡོང་བའི་སྒུལ་ཤུགས་གཙོ་བོ་ཞིག་ཏུ་གྱུར་ཡོད་པའི་སྐོར་ངོ་སྤྲོད་བྱས་སོང་།
དེ་རྗེས་དབུ་མའི་ལས་འགུལ་ཁང་གི་སྤྱི་ཁྱབ་དྲུང་ཆེ་དང་བོད་མི་མང་སྤྱི་འཐུས་རྨོག་རུ་བསྟན་པ་ལགས་ཀྱིས། “ཕར་བལྟས་ཡོང་དུས་སྒང་ལ་དེ་རིང་གི་བགྲོ་གླེང་འདི་མི་ཉུང་ཉུང་ཤིག་དང་། གལ་ཆུང་བ་ལྟ་བུའི་བཟོ་ཞིག་འདུག་སྟེ། ཡིན་ནའང་། ང་ཚོའི་ངོས་ནས་ཆེ་བ་བཞི་ལྡན་ཞིག་ལ་ངོས་འཛིན་གནང་གི་ཡོད” ཅེས་བརྗོད་དེ། བགྲོ་གླེང་བྱེད་སའི་གནས་ཀྱི་ཆ་ནས་༸གོང་ས་མཆོག་གིས་བྱིན་གྱིས་བརླབས་ཤིང་ཞབས་ཀྱིས་བཅགས་པའི་བཞུགས་སྒར་ཕོ་བྲང་གི་མཐའ་འཁོར་གྱི་གནས་ཁྱད་པར་ཅན་དང་། དུས་ཀྱི་ཆ་ནས་ནོ་སྦེལ་ཞི་བདེ་གཟེངས་རྟགས་ཀྱི་དུས་དྲན་ཉིན་མོ་སྟེ་འཛམ་བུ་གླིང་ལ་རིན་ཐང་དང་བརྗོད་རིན་ཡོད་པའི་དུས་ཁྱད་པར་ཅན། བརྗོད་གཞི་ཡི་ཆ་ནས་ཀྱང་༸གོང་ས་མཆོག་གི་མཛད་པ་འཕྲིན་ལས་ཀྱི་སྒང་ལ་བགྲོ་གླེང་གི་བརྗོད་གཞི་ཁྱད་པར་ཅན། བགྲོ་གླེང་བྱེད་པོའི་ཆ་ནས་དགེ་བཤེས་ཟླ་བ་ལགས་གཙོས་ཁོང་མཁས་དབང་རྣམ་པ་ནི་ང་ཚོ་བཙན་བྱོལ་ནང་ཡོངས་གྲགས་ཤིག་ཆགས་བསྡད་ཡོད་པ་བཅས། དེ་རིང་གི་བགྲོ་གླེང་དེ་ནམ་ཞག་རྒྱུན་གཏན་གྱི་བགྲོ་གླེང་དང་མ་འདྲ་བར་གལ་ཆེན་པོ་ཆགས་ཡོད་པར་མ་ཟད། བོད་ནང་ལ་ཆ་བཞག་ན་༸གོང་ས་ཆོག་གི་མཛད་རྗེས་སྐོར་བགྲོ་གླེང་གནང་རྒྱུའི་གོ་སྐབས་མེད་པར། ཐ་ན་༸གོང་ས་མཆོག་གི་སྐུ་པར་བཤམས་པ་ཙམ་གྱིས་ཀྱང་འཛིན་བཟུང་བཙོན་འཇུག་བྱེད་བཞིན་པའི་གནས་སྟངས་དེ་འདྲ་ཞིག་ཆགས་བསྡད་ཡོད་སྟབས། ང་ཚོའི་ངོས་ནས་འདི་འདྲའི་བགྲོ་གླེང་གནང་རྒྱུ་བྱུང་བ་འདི་ནི་རྨད་དུ་བྱུང་བའི་སྐལ་བ་བཟང་པ་ཞིག་ཡིན་པར་ངོས་འཛིན་དང་། འདི་འདྲའི་སྐལ་བ་བཟང་པོའི་རྣམ་དཀར་དགེ་བའི་མཐུ་ལ་བརྟེན་ནས་༸གོང་ས་མཆོག་གི་སྐུ་ཚེ་སྐལ་བརྒྱར་བརྟན་པ་དང་། ཁོང་གི་ཐུགས་ཀྱི་དགོངས་བཞེད་ལྟར་བོད་གཞིས་བྱེས་ལྷན་འཛོམས་ཡོང་ཆེད། ང་ཚོ་ཚང་མས་བསམ་པ་བཟང་པོའི་སྒོ་ནས་རེ་བ་དང་སྨོན་ལམ་འདེབས་དགོས་པ་དེ་གལ་ཆེན་པོ་ཡིན་པའི་སྐོར་བརྗོད་སོང་།
རྩོམ་རིག་གི་སློབ་དཔོན་དམ་པ་རྒན་ལྷ་མོ་སྐྱབས་དང་། ཨ་ལགས་ཡེ་ཤེས་ཚང་སོགས་ཕེབས་ཏེ་དགོངས་ཚུལ་ལམ་སྟོན་གནང་བར་ཐུགས་རྗེ་ཆེ་ཞུ་རྒྱུ་དང་། དབུ་མའི་ལམ་གྱི་མི་མང་ལས་འགུལ་ཁང་གི་ལས་དྲུང་འདི་ནི་ཤར་ཕྱོགས་ཁུག་རྟ་རེད། ཤར་ཕྱོགས་ཁུག་རྟ་ལ་མཚོན་ན་རང་ཉིད་ལ་རང་བདག་གི་འདུན་ལམ་དང་། རང་དབང་གི་བསམ་ཚུལ་གྱི་གླེང་སྟེགས་སོགས་གལ་ཆེ་བ་སྨྲོས་མེད་རེད།
ཁོང་ཉིད་དབུ་མའི་ལམ་དུ་ཕེབས་ཏེ་རང་ཉིད་ཀྱི་གདོད་མའི་དམིགས་ཡུལ་མ་དོར་བའི་ཐོག་བོད་མི་རིགས་ཀྱི་ལས་དབང་ལ་བསམ་ཤེས་བྱེད་བཞིན་པར་ང་ཚོས་རྗེས་སུ་ཡི་རང་བྱེད་དགོས་པ་ཞིག་ཡིན།
དེ་བཞིན་དྲ་གྲོགས་ཀརྨ་རྡོ་རྗེ་ལགས་ཕེབས་པར་འཚམས་འདྲི་ཞུ།
མའོའི་རོ་འཇལ་འགྲོ་མཁན་ཉུང་ཉུང་མིན་པ་འདྲ། ༸གོང་ས་མཆོག་གི་མཛད་རྗེས་དང་བསྟོད་ཚིག་བྲིས་པ་དེ་བས་ཀྱང་ད་དུང་ཉུང་དྲགས་པའི་སྐྱོན་མི་འདུག་གམ། ལེགས་སོ་ལེགས་སོ་རིགས་ཀྱི་བུ་ཚོ། དེ་དེ་བཞིན་ནོ། ཞེས་བཟླ་རྒྱུ་ལས་མ་འདས་ལགས།
དྲུང་ཡིག་འདི་ཤར་ཕྱོགས་ཁུག་རྟ་མཆོག་ཨེ་རེད། ཡིན་ན་ཕྱག་ལས་གནང་བདེ་ས་ཞིག་ཐོབ་པར་སྙིང་ནས་རྟེན་འབྲེལ་ཞུ། སྨྱུག་ཐོགས་པ་ཚོས་གཅིག་གིས་གཅིག་ལ་རྒྱབ་སྐྱོར་བྱེད་རྒྱུ་གལ་ཆེ། ཡིན་ཡང་གཞི་རྩའི་བསམ་བློའི་ཕྱོགས་ནས་བློ་རྩེ་གཏོད་ས་མི་འདྲ་བ་ཡོད་ཆོག་པ་ཞིག་རེད།
ད་དུང་བརྗོད་གཞིའི་ནང་ལ། ༸རྒླ་བ་རིན་པོ་ཆེ་དང་ཆོས་ལུགས་ཁག ༸གོང་ས་མཆོག་དང་ཚན་རིག་པ། ལྷག་པར་དུ་ཡང་ཡིད་བཞིན་ནོར་བུ་དང་འཛམ་གླིང་ཞི་བདེ་ཟེར་བའི་བརྗོད་གཞི་འདི་ཡོད་ན་ཅི་འདྲ་བཟང་ཨང་སྙམ་པ་བྱུང། གང་ལྟར་དུས་ཚེས་བརྩི་སྲུང་གནང་བར་རྗེས་སུ་ཡི་རང་ཞུ།
ཐབས་མཁས་ཐུགས་རྗེས་ཆོས་ལུགས་རིས་མེད་མཛད།
རྣམ་དཔྱོད་མཆོག་གིས་ཚན་རིག་གྲོགས་སུ་བསུས།
བྱམས་བརྩེ་ཆེན་པོས་འཛམ་གླིང་ཞི་བདེར་འཁྲིད།
རླབས་ཆེན་མཛད་པ་འདི་གསུམ་གཞན་གྱིས་མིན།