བོད་མི་ཞིག་དམར་གསོད།

མདོ་སྨད་སྤྱི་འཐུས་སྒྲོལ་དཀར་སྐྱབས་ལགས་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན། ཟླ་འདིའི་ཕྱི་ཚེས་ ༩ ཉིན་མདོ་སྨད་ཀན་ལྷོ་བོད་རིགས་རང་སྐྱོང་ཁུལ་བསང་ཆུ་རྫོང་ཁོངས་ཀྱི་ལྷོ་རྒྱུད་དུ་ཡོད་པའི་ཨ་མཆོག་ཞང་གི་བོད་མི་ཆོས་འབྱོར་འབོད་པ་སྦག་སྦག་འཁོར་ལོར་ (འཕྲུལ་རྟ) ཞོན་ཏེ་བསང་ཆུ་རྫོང་ཐོག་ཏུ་ཡོད་པའི་བླ་བྲང་བཀྲ་ཤིས་འཁྱིལ་དུ་མཆོད་མཇལ་ཏུ་ཡོང་སྐབས། བསང་ཆུ་རྫོང་ཉེན་རྟོག་པས་བཀག་འགོག་དང་སུན་གཙེར་བཟོས་ཏེ་འུ་ཐུག་ཐབས་ཟད་ཀྱི་གནས་སུ་བསྐྱལ་མཐར། ཁོང་དང་ཉེན་རྟོག་པའི་བར་འཁྲུག་འཛིང་ཤོར་ཏེ། མཐའ་མར་ཉེན་རྟོག་མི་སྣས་ཁོང་དམར་གསོད་བཏང་ཡོད་འདུག

ཉེ་ལམ་ས་གནས་ཉེན་རྟོག་པས་ཆོས་འབྱོར་ལགས་ཀྱི་ནང་མིར་རྒྱ་སྒོར་ཁྲི་ ༡༡༠ ལྷག་སྤྲད་དེ་གནས་ཚུལ་ཞི་འཇམ་ཡོང་ཐབས་བྱས་ཡོད་ཀྱང་། ཆོས་འབྱོར་ལགས་ཀྱི་ནང་མིས་བོད་ཀྱི་ལུགས་སྲོལ་ལྟར་གྱོད་དོན་ཐག་གཅོད་བྱ་དགོས་པའི་རེ་འདུན་བཏོན་སྟེ་གནས་ཚུལ་ཐག་གཅོད་བྱས་ཡོད་འདུག    

ཡང་གནས་ཚུལ་མཁོ་སྤྲོད་པས་བརྗོད་དོན་ལྟར་ན། ཟླ་འདིའི་ཕྱི་ཚེས་ ༡༠ ཉིན་སྟེ། ༸གོང་ས་མཆོག་གིས་ནོ་བྷེལ་ཞི་བདེ་གཟེངས་རྟགས་བཞེས་ཏེ་ལོ་ ༢༢ འཁོར་བའི་དུས་དྲན་དང་སྟབས་བསྟུན་ཏེ། རྒྱ་ནག་གཞུང་གིས་མདོ་སྨད་ཀན་ལྷོ་རྨ་ཆུ་རྫོང་དུ་དམག་མི་མང་དུ་བཏང་སྟེ་དམ་དྲག་དང་གང་བྱུང་བོད་མི་འཛིན་བཟུང་གིས་བོད་མི་ཚོར་ཆབ་སྲིད་ཀྱི་ལས་འགུལ་སྤེལ་མཁན་དང་མེ་མདའ་ཡོད་པའི་ཁྱིམ་ཚང་གང་ཡིན་སོགས་ཀྱི་ཐད་གཅར་རྡུང་འདྲི་གཅོད་བྱས་ཡོད་པ་མ་ཟད། ཀན་ལྷོ་ཁུལ་གྱི་ས་གནས་གཞན་དུའང་གཅིག་མཚུངས་ཀྱིས་དམ་དྲག་བྱས་ཡོད་འདུག  

གསར་འགོད་པ། དོན་གོ