གཟའ་མིག་དམར་ཉིན་ཊ་ལེ་བྷན་ཤོག་ཁག་གིས་ཨ་རིའི་གཞུང་དང་ཞི་མཐུན་གྲོས་མོལ་མགོ་འཛུགས་རྒྱུར་མོས་མཐུན་ཡོད་པ་བསྒྲགས་འདུག
ཕྱི་ཚེས་ ༣ ཉིན་ཊ་ལེ་བྷན་ (Taliban) ཤོག་ཁག་གིས་ཨ་རིའི་གཞུང་དང་གྲོས་མོལ་བྱ་རྒྱུར་མོས་མཐུན་ཡོད་པ་མ་ཟད། རྒྱལ་སྤྱི་རང་བཞིན་གྱི་ལས་ཁུངས་གསར་འཛུགས་བྱ་འཆར་ཡོད་པའི་ཁྱབ་བསྒྲགས་བྱས་འདུག ཐེངས་འདིར་ཊ་ལེ་བྷན་ཤོག་ཁག་གིས་ཨ་རི་དང་མཉམ་དུ་ཞི་མཐུན་གྲོས་མགོ་འཛུགས་རྒྱུར་མོས་མཐུན་ཡོད་པར་བསྒྲགས་པ་དེ་ནི་ཨ་རིར་ ༩༡༡ ་དོན་རྐྱེན་བྱུང་རྗེས་ཀྱི་ལོ་ ༡༠ རིང་ཚུར་གྲོས་མགོ་བཏོན་པ་ཐོག་མ་ཆགས་ཡོད་ཅིང་། ཨབ་གྷན་ནང་གི་ཊ་ལེ་བྷན་ཤོག་ཁག་གི་མགྲིན་ཚབ་པ་ཡིན་ཟེར་མཁན་མུ་ཇ་ཧེ་ཌི(Mujaheed) ཞེས་པ་ཞིག་གིས་ཁོང་ཚོས་ཁཱ་ཊར་(Qatar) ཚུད་པའི་འབྲེལ་ཡོད་སྲིད་གཞུང་ཁག་ཅིག་དང་གྲོས་བསྡུར་བྱས་ཟིན་པ་ལྟར། རྒྱལ་སྤྱི་རང་བཞིན་གྱི་ལས་ཁུངས་ཤིག་གསར་འཛུགས་བྱ་འཆར་ཡོད་པ་དང་། གཅིག་བྱས་ན་ལས་ཁུངས་དེ་ཁཱ་ཊར་ནང་འཛུགས་རྒྱུ་ཡིན་པར་བརྗོད་འདུག་ལ། དེ་བཞིན་ཊ་ལེ་བྷན་ཤོག་ཁག་གིས་ཨ་རི་དང་ཞི་མཐུན་གྲོས་མགོ་འཛུགས་རྒྱུར་ཆ་རྐྱེན་གཅིག་བཏོན་ཏེ། ཕྱོགས་གཉིས་བར་གྱི་ཞི་མཐུན་གྲོས་མོལ་ཡོང་རྒྱུར་ད་སྔ་ཨ་རིས་འཛིན་བཟུང་བྱས་ཡོད་པའི་ཊ་ལེ་བྷན་ཤོག་ཁག་གི་མི་རྣམས་གློད་དགོས་པ་བརྗོད་འདུག
གསར་འགོད་པ། བནྡེ་སྐྱབས།
ད་ལན་ཏ་ལི་བྷན་གྱིས་ཨ་རི་དང་ལྷན་དུ་ཞི་བའི་གྲོས་མོལ་བྱ་རྒྱུའི་གྲོས་འདུན་སྟོན་པ་དེས། ང་ཚོ་བོད་ཀྱི་གནད་དོན་དེ་ཞི་བའི་ལམ་ནས་མ་གཏོགས་སེལ་མི་ཐུབ་པའི་རྣམ་པ་ཞིག་ཤུགས་ཀྱིས་མངོན་པ་མ་ཡིན་ནམ། དེ་ལྟར་ཡིན་ན་གཞོན་ལྷན་གྱི་གྲོས་ཆོད་ཁག་ལ་ཞིབ་འཇུག་ཡག་པོ་ཞིག་བྱས་ན་མ་གཏོགས་མ་འོངས་པར་དཀའ་ངལ་ཞིག་འཕྲད་མི་ཡོང་ངམ་སྙམ། ལྷག་བསམ་གྱིས་ཞེན་སྐུལ་ཙམ་ཡིན།
ཐོ་རེངས་ཀྱི་དག་སྣང་དེ་སྲོད་རུབ་དུས་སུ་འཇའ་མ་ཡལ་བའི་རེ་སྨོན་ཡོད་ལགས།
ཀརྨ་རྡོ་རྗེ་ལགས། བདག་ལ་ཨ་རི་དང་རྒྱ་ནག་གཉིས་ལ་དམིགས་བསལ་ཆགས་ལྡང་བྱེད་དགོས་དོན་གང་ཡང་མེད་མོད།
ཉིད་ཀྱིས་རང་སྣང་དགྲ་རུ་ལང་ནས་འཛམ་གླིང་ན་ཆེས་རྩེར་སོན་པའི་རྒྱལ་ཁབ་གཉིས་ལ་ཟུར་ཟ་བྱེད་འདོད་ན་དེ་བཞིན་གྱིས།
དེ་མིན་ཁྱེད་ཀྱི་མིག་སྔོན་ན་ཡག་པོ་གཅིག་ཀྱང་མེད་པ་དེ་རང་གི་སྣང་བ་ཕྱི་རོལ་ལ་ཤར་བའི་གཟུགས་བརྙན་ཉིད་རེད་ལགས། །
ཐོ་རེངས་ལགས།
ངས་ག་དུས་བསམས་ཀྱང་ཨ་རི་ལ་གདུག་རྩུབ་དཀར་པོ་དང་། རྒྱ་ནག་ལ་གདུག་རྩུབ་ནག་པོ་ཡོད་པ་ཙམ་མ་གཏོགས་གཉིས་ཀ་ལ་གདུག་རྩུབ་ཅན་ཡིན་པ་གཅིག་མཚུངས་སུ་ལྟ་བཞིན་ཡོད། འོན་ཀྱང་ནོར་སྲིད་པ་རེད་ལགས།
ཀརྨ་རྡོ་རྗེ་ལགས། ཐུགས་རྗེ་ཆེ། ཨ་རིའི་སྲིད་གཞུང་ལ་སེམས་ཁུར་བྱ་རྒྱུ་འདི་ནི། རྫི་བོ་ལྟ་བུའི་སེམས་བསྐྱེད་རེད། བོད་མི་སྐྱབས་བཅོལ་བ་ཞིག་གི་ངོས་ནས་མཚོན་ན།
ཊ་ལེ་བྷན་ཤོག་ཁག་གིས་ཨ་རིའི་གཞུང་དང་ཞི་མཐུན་གྲོས་མོལ་མགོ་འཛུགས་རྒྱུར་མོས་མཐུན་བྱས་པ་ནི། ཤིན་ཏུ་འོས་དང་ཨ་རིའི་ངོས་ནས་ཀྱང་དྲང་བདེན་ཁྲིམས་ཐག་གཅོད་སྟངས་མ་ནོར་དགོས་ངེས་ཆེ་ལགས།