དགེ་བཤེས་ཚུལ་ཁྲིམས་རྒྱ་མཚོ་སྐུ་གྲོངས་འདུག

ལོ་སྔོན་མར་རྒྱ་གཞུང་ཉེན་རྟོག་པས་བཙན་ཁྲིད་མནར་གཅོད་འོག་གཟུགས་གཞི་གཅོང་ནད་ཆགས་པའི་དགེ་བཤེས་ཚུལ་ཁྲིམས་རྒྱ་མཚོ་ལགས། ཟླ་འདིའི་ཕྱི་ཚེས་ ༢༢ ཉིན་གློ་བུར་དུ་སྐུ་གྲོངས་འདུག

མདོ་སྨད་སྤྱི་འཐུས་རྨོག་རུ་བསྟན་པ་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་ ༢༢ ཉིན་གྱི་སྔ་དྲོ་དགེ་བཤེས་ཚུལ་ཁྲིམས་རྒྱ་མཚོ་ལགས་ཀྱི་ནད་གཞི་གློ་བུར་ཇེ་སྡུག་ཏུ་གྱུར་ཏེ་སྐུ་གྲོངས་ཡོད་པ་དང་། ཁོང་སྐུ་གྲོངས་སྐབས་སྐུ་མདོག་ཆ་ཚང་ནག་པོ་ཆགས་ཡོད་པར་བརྟེན། ས་གནས་མང་ཚོགས་ཀྱིས་རྒྱ་གཞུང་ཉེན་རྟོག་པས་ཁོང་ལ་དུག་ཕོག་བཅུགས་ཡོད་པའི་དོགས་གཞི་བྱེད་ཀྱི་ཡོད་འདུག དེ་སྔོན་སྨན་ཁང་དུ་སྨན་བཅོས་སྐབས་སྨན་པ་རྣམས་ཀྱིས་ཁོང་གི་ནད་གཞི་ནི་གློ་བུར་གཟུགས་པོར་ཆུ་གསོག་པ་དང་སྙིང་གི་འགུལ་བསྐྱོད་ཞན་པའི་ན་ཚ་ཞིག་ཡིན་སྐོར་ཙམ་ལས། ནད་གཞིའི་དོན་དངོས་གནས་སྟངས་ཁ་གསལ་འགྲེལ་བརྗོད་གང་ཡང་གནང་མེད་པ་རེད།

༢༠༡༡ ལོའི་ཕྱི་ཟླ་ ༡༠ ཚེས་ ༡༤ ཉིན་མཚོ་སྔོན་ཞིང་ཆེན་གྱི་ཉེན་རྟོག་པ་ཁག་ཅིག་ཡོང་སྟེ་དགེ་བཤེས་ཚུལ་ཁྲིམས་རྒྱ་མཚོ་ལགས་ཁྲི་ཀ་རྫོང་སྟོང་ཆེ་སློབ་གྲྭ་ནས་བཙན་ཁྲིད་བྱས་ཤིང་། ཟི་ལིང་གི་ས་ཁུལ་ཞིག་ཏུ་ཉིན་གྲངས་ ༡༥ རིང་ཉིན་མཚན་བསྟུད་མར་འདྲི་གཅོད་བཀག་ཉར་བྱས་ཡོད་པར་མ་ཟད། སྡུག་སྦྱོང་མནར་གཅོད་སྣ་ཚོགས་བཏང་སྟེ་གཟུགས་གཞི་གཅོང་ནད་ཅན་ཆགས་བཅུགས་རྗེས། ཟླ་གསུམ་རིང་ཕྱི་ཕྱོགས་ཀྱི་མི་ལ་འབྲེལ་བ་བྱེད་མི་ཆོག་པ་དང་། ཕྱོགས་བསྐྱོད་སྐབས་ས་གནས་ཉེན་རྟོག་ལས་ཁུངས་སུ་ཐོ་འགོད་བྱ་རྒྱུའི་ཁས་ལེན་མིང་རྟགས་དང་ནང་མིར་འགན་ལེན་བྱེད་བཅུགས་ཏེ་སྨན་བཅོས་ཆེད་ཕྱིར་གློད་པའི་རྗེས།   ཟི་ལིང་ཞིང་ཆེན་སྨན་ཁང་གཉིས་པའི་ནང་ཟླ་གཉིས་ལྷག་རིང་སྨན་བཅོས་གནང་མཐར་གཟུགས་གཞི་ཅུང་ཙམ་དྲག་སྐྱེད་བྱུང་སྟེ་ཕ་ཡུལ་དུ་ལོག་ཡོད་ནའང་། ཉེ་སྔོན་གློ་བུར་དུ་ནད་གཞི་ཇེ་སྡུག་ཏུ་གྱུར་ཏེ་སྐུ་གྲོངས་ཡོད་འདུག

དགེ་བཤེས་ཚུལ་ཁྲིམས་རྒྱ་མཚོ་ལགས་ནི་མདོ་སྨད་མཚོ་སྔོན་མཚོ་ལྷོ་ཁུལ་རྨོག་རུ་སྡེ་བ་ནས་ཡིན་པ་དང་། ད་ལྟ་དགུང་ལོ་ ༤༧ ཡིན་འདུག  ཁོང་ནི་མདོ་སྨད་དྷཱིཿཚ་དགོན་ཆེན་གྱི་བཀའ་བཅུ་རབ་འབྱམས་པའི་མཚན་བཏགས་བཞེས་མཁན་གྱི་དགེ་བཤེས་དང་པོའི་གྲས་ཡིན་པ་དང་། དྷཱིཿཚ་དགོན་དུ་ཕྱག་མཛོད་ཀྱི་འགན་ཁུར་ལོ་ངོ་བཅུ་གྲངས་ལྷག་ལ་ཁུར་མྱོང་ཡོད་ལ། ཤར་ཙོང་ཁའི་སྐྱེས་རི་སྙིང་རྗེའི་རོགས་སྐྱོར་ཚོགས་པའི་ཚོགས་གཞོན་གྱི་འགན་ཁུར་ཏེ་ས་གནས་ཁག་གི་དབུལ་ཕོངས་སློབ་མ་དང་རྒན་རྒོན་བདག་མེད་བཅས་ལ་རོགས་སྐྱོར་གྱི་ཕྱག་ལས་གང་མང་གནང་ཡོད་པ་མ་ཟད། ས་གནས་སོ་སོའི་སློབ་གྲྭ་ཆུང་འབྲིང་གི་གདན་ཞུས་ལྟར་ལོ་མང་རིང་དགེ་རྒན་གྱི་ཕྱག་ལས་གནང་པ་དང་། ལོ་ཤས་གོང་ནས་ཨེ་ཤ་ཡའི་ཚོགས་པ་ཞིག་གི་བརྒྱུད་ལམ་ཐོག་མཚོ་སྔོན་ཁྲི་ཀ་རྫོང་སྟོང་ཆེ་སློབ་གྲྭའི་དགེ་རྒན་དུ་གདན་ཞུ་གནང་སྟེ་སློབ་ཁྲིད་གནང་བཞིན་ཡོད་འདུག

དགེ་བཤེས་ཁོང་ ༢༠༠༦ ལོར་རྒྱ་གར་དུ་འབྱོར་ཏེ་༸གོང་ས་མཆོག་གི་མདུན་ནས་དུས་འཁོར་དབང་ཆེན་ཞུས་ཡོད་པ་དང་། ཕྱིར་ཕ་ཡུལ་དུ་ལོག་རྗེས་སེམས་ཅན་གྱི་པགས་རིགས་མཚམས་འཇོག་དགོས་པའི་ཐད་ས་གནས་དེ་ཕྱོགས་སུ་ནུས་པ་ཆེན་པོ་བཏོན་ཡོད་པ་མ་ཟད།  ༢༠༠༩ ལོར་ཉེ་འབྲེལ་ཁྱིམ་ཚང་ཁག་གི་དངུལ་གྱི་འདོགས་ཆས་ཡོད་ཚད་དངུལ་རྡོག་ཏུ་བཞུས་ཏེ་༸གོང་ས་མཆོག་ལ་དད་རྟེན་དུ་འབུལ་ཆེད་བསྐྱར་དུ་རྒྱ་གར་ལ་ཕེབས་ཡོད་འདུག ད་དུང་། དགེ་བཤེས་ཁོང་གིས་ཉེ་ཆར་རྒྱ་གཞུང་གིས་ས་གནས་འབྲོག་པ་མང་ཚོགས་ལ་དངུལ་གྱི་བསླུ་བྲིད་དང་དྲག་སྤྱོད་འཇིགས་སྐུལ་སོགས་བྱས་ཏེ་རྩྭ་ཐང་བཙན་འཕྲོག་བྱེད་བཞིན་པར་ངོ་རྒོལ་བྱས་ཡོད་པ་དང་། ༢༠༡༡ ལོའི་༸གོང་ས་མཆོག་གི་འཁྲུངས་སྐར་སྐབས་ཁོང་གི་སྣེ་ཁྲིད་ལམ་སྟོན་ལྟར་ས་གནས་མང་ཚོགས་ཀྱིས་ར་ལུག་དང་། ཉ་སོགས་སེམས་ཅན་ཁྲི་ཕྲག་མང་པོ་ཚེ་ཐར་བཏང་སྟེ་༸གོང་ས་མཆོག་སྐུ་ཚེ་བརྟན་ཞིང་མཛད་འཕྲིན་རྒྱས་པ་དང་།  མ་འོངས་པར་མཚོ་སྔོན་པོའི་འགྲམ་དུ་༸གོང་ས་མཆོག་གིས་དཔལ་དུས་ཀྱི་འཁོར་ལོའི་དབང་ཆེན་ཞིག་སྩོལ་གནང་ཡོང་བའི་གསོལ་འདེབས་སྨོན་ལམ་སོགས་གནང་ཡོད་འདུག

གསར་འགོད་པ། ཚེ་རིང་རྒྱལ།