སྦྱིན་བདག་འཚོལ་ཞོར་དང་མི་གཏོང་ཞོར་བྱ་རྒྱུ་ཡིན་ཟེར།

ཉེ་ཆར་བཀའ་ཁྲི་མཆོག་དང་ནང་སྲིད་བཀའ་བློན། ནང་སྲིད་དྲུང་འཕར་བཅས་ཨ་རུ་ནཱ་ཅལ་བོད་མིའི་གཞིས་ཆགས་ཁུལ་དུ་ཕེབས་ཏེ། ས་ཁུལ་དེ་དག་གི་བོད་མི་ ༡༠༠༠ ཁཱེ་ན་ཌར་གཏོང་རྒྱུའི་ལས་གཞི་མགོ་འཛུགས་བྱས་ཡོད་པ་ལྟར། འདི་གའི་གསར་འགོད་པ་ནང་སྲིད་དྲུང་ཆེ་དོན་གྲུབ་རྡོ་རྗེ་ལགས་དང་ཐུག་འཕྲད་ཀྱིས་གནད་དོན་དེའི་སྐོར་ལ་རྒྱུས་ལོན་བྱས་ཡོད།

ཉེ་ཆར་ནང་སྲིད་དྲུང་འཕར་དོན་གྲུབ་རྡོ་རྗེ་ལགས་དང་ཐུག་འཕྲད་ཀྱིས་གནས་ཚུལ་རྒྱུས་ལོན་བྱུང་པ་ལྟར་ན། ཟླ་སྔོན་མའི་ཕྱི་ཚེས་ ༢༡ ནས་བཀའ་ཁྲི་བློ་བཟང་སེང་གེ་མཆོག་དང་ནང་སྲིད་བཀའ་བློན་རྒྱ་རི་སྒྲོལ་མ་ལགས། ནང་སྲིད་དྲུང་འཕར་དོན་གྲུབ་རྡོ་རྗེ་བཅས་གཞུང་འབྲེལ་ཕྱོགས་བསྐྱོད་གཟིགས་སྐོར་དང་འབྲེལ། རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་ནང་ཡོད་པའི་བོད་མིའི་གཞིས་སྒར་མེའོ་ཆོས་འཕེལ་གླིང་དུ་ཕེབས་ཏེ། མེའོ་དང་ཏི་ཛུ། བསྟན་འཛིན་སྒང་བཅས་ཀྱི་མགོ་འཛིན་མི་གྲངས་ ༣༠ ལྷག་བསྡུ་བསྐོང་གིས་ས་ཁུལ་དེ་དག་ནས་བོད་མི་ ༡༠༠༠ ཁཱེ་ནཱ་ཌར་གཏོང་རྒྱུའི་ལས་གཞི་དངོས་སུ་གཞུང་འབྲེལ་མགོ་འཛུགས་གནང་པའི་ཁྱབ་བསྒྲགས་དང་། ལས་གཞི་ངོ་སྤྲོད། ལས་གཞི་ལག་བསྟར་ཚོགས་ཆུང་དང་བོད་མི་ ༡༠༠༠ འདེམས་སྒྲུག་བྱ་ཕྱོགས་སོགས་ངོ་སྤྲོད་བྱས་ཡོད་འདུག

ལས་གཞི་དེ་འབྱུང་འགྱུར་ལོ་ ༥ ནང་ཚུན་ཡོངས་སུ་འགྲུབ་པར་བྱ་འཆར་ཡིན་ཞིང་། ཁཱེ་ཎ་ཌ་གཞུང་གིས་ཨ་རུ་ནཱ་ཅལ་ཁུལ་གྱི་བོད་མི་གཅིག་སྟོང་གནས་སྤོར་དུ་ཡོང་རྒྱུར་ཁྲིམས་མཐུན་བཀའ་འཕྲོད་ཐོབ་ཡོད་པ་ཙམ་ལས། དཔལ་འབྱོར་དང་སྡོད་གནས་སོགས་སྒེར་དངོས་ནས་ཐབས་ཤེས་བྱ་དགོས་སྟབས། ཐེངས་འདིའི་ལས་གཞིའི་གཙོ་འགན་ཁཱེ་ཎ་ཌ་བོད་ཀྱི་འཆར་འགོད་ཚོགས་པ་(Project Tibet Society) དང་ཁཱེ་ཎ་ཌ་བོད་རིགས་སྤྱི་མཐུན་ཚོགས་པ་བཅས་ཀྱིས་འཁུར་གྱི་ཡོད་པ་དང་། ཁོང་ཚོས་བོད་མི་གནས་སྤོར་བ་ཚོར་ཕར་ཕྱོགས་ནས་སྤྱིན་བདག་འཚོལ་རྒྱུ་དང་། སྡོད་གནས་གོ་སྒྲིག ཁཱེ་ཎ་ཌ་གཞུང་དང་འབྲེལ་ལམ་འཛིན་རྒྱུ་སོགས་ལས་གཞི་འདིའི་སྤྱི་འགན་འཁུར་ཡོད་འདུག འདི་ཕྱོགས་ནས་གནས་སྤོ་བ་འདེམས་སྒྲུག་དང་ཆ་རྐྱེན་ཚང་མིན་ཞིབ་བཤེར་སོགས་ཀྱི་འགན་འཁུར་དེ་དབུས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱིས་འཁུར་ཡོད་པ་དང་། ལས་གཞི་ལག་བསྟར་ལ་ཁཱེ་ཎ་ཌ་བོད་ཀྱི་འཆར་འགོད་ཚོགས་པའི་འཐུས་མི་གཅིག་དང་། ནང་སྲིད་ལས་ཁུངས་ཀྱི་འཐུས་མི་གཅིག བསྟན་འཛིན་སྒང་དང་ཏེ་ཛུ། མེའོ་གསུམ་གྱི་ས་གནས་མགོ་འཛིན་བཅས་མི་སྣ་ ༥ ལས་གྲུབ་པའི་ཚོགས་ཆུང་ཞིག་གཏན་འབེབས་ཟིན་ཡོད་པ་ལྟར་མི་སྣ་འདེམས་སྒྲུག་སོགས་ཀྱི་རྐང་འགན་ཚོགས་ཆུང་དེ་ཡིས་འཁུར་རྒྱུ་ཡིན་འདུག

ནང་སྲིད་དྲུང་འཕར་དོན་གྲུབ་རྡོ་རྗེ་ལགས་ཀྱིས་གསུངས་པ་ལྟར་ན། མི་སྣ་འདེམས་སྒྲུག་བྱ་ཕྱོགས་ཀྱི་ཆ་རྐྱེན་ཁཱེ་ཎ་ཌ་གཞུང་གིས་གཏན་འབེབས་བྱས་ཡོད་འདུག་ལ། མི་སྣ་འདེམས་སྒྲུག་གི་འོས་ཆོས་ཁོངས་སུ་ཚུད་རྒྱུར། གལ་ཆེ་ཤོས་ཨ་རུ་ནཱ་ཅལ་ས་ཁུལ་བོད་མིའི་གཞིས་ཆགས་ཀྱི་སྒྲིག་ཁོངས་ཡིན་པ་གང་ཞིག་ལ་གཞིས་ཆགས་ལས་ཁུངས་ཀྱི་མིང་ཐོའི་ཐོ་གཞུང་ནང་ཡོད་པ་ལྟར་ ༢༠༡༠ ཟླ་ ༡༢ ཚེས་ ༡༨ གོང་གཞིས་སུ་ཡོད་པ་མ་ཟད། ད་ལྟའང་མུ་མཐུད་གཞིས་ཁོངས་སུ་ཡོད་པ། སྐྱབས་བཅོལ་ལག་དེབ་དང་རང་བཙན་ལག་དེབ་བཅས་ཡོད་པའི་ཁར། ཁྲིམས་འགལ་དང་ནག་ཉེས་མེད་པ། ཕར་སླེབས་རྗེས་འཇིགས་སྐུལ་རིང་ལུགས་སོགས་ཁྲིམས་འགལ་དང་ཚུལ་མིན་གྱི་ལས་ཀ་བྱ་རྒྱུར་དོགས་གཞི་མེད་པ། ལོ་རྒྱུས་རྫུན་བཟོས་ཀྱི་འདེམས་སྒྲིག་ཁོངས་སུ་ཚུད་ཐབས་བྱས་མེད་པ། ཁཱེ་ཎ་ཌར་སླེབས་རྗེས་སྦྱིན་བདག་གི་གན་རྒྱ་རྫོགས་རྗེས་རང་མགོ་འཕེར་ངེས་ཡིན་པ། གཟུགས་གཞི་བདེ་ཐང་ཡིན་པ་སོགས་ཀྱི་ཆ་རྐྱེན་ཚང་དགོས་ཀྱི་ཡོད་འདུག

ཐོག་མར་ལས་གཞི་འདིར་བཙན་བྱོལ་བོད་མིའི་སྒྲིག་འཛུགས་ཀྱིས་ཐེ་བྱུས་བྱེད་ཀྱི་མེད་ཀྱང་ད་ཆར་གཞུང་འབྲེལ་དུ་གྱུར་པའི་སྐོར་དྲིས་པར་ཁོང་གིས། “ལོ་སྔོན་མའི་ནང་ཁཱེ་ཎ་ཌ་ནས་ཆེད་དུ་ས་ཁུལ་དེ་དག་ནང་རྟོག་ཞིབ་འཐུས་མི་ཡོང་རྗེས་གཞིས་ཆགས་ཁག་ནས་མི་སྣ་འདེམས་སྟངས་སོགས་ཁོང་ཚོས་བསྒྲུབ་ཁག་པོ་ཡོད་པས་བོད་མིའི་སྒྲིག་འཛུགས་ཀྱིས་འགན་འཁུར་རོགས་ཞེས་རེ་སྐུལ་གནང་པ་ལྟར། ལས་གཞི་འདི་ཐོག་མར་༧གོང་ས་མཆོག་གིས་གསལ་འདེབས་གནང་པ་ཞིག་དང་། ཕར་གཏོང་རྒྱུ་དེ་ཡང་བོད་མི་ཡིན་སྟབས། ལག་བསྟར་སྐབས་བོད་མིའི་སྒྲིག་འཛུགས་ཀྱིས་འགན་འཁུར་ཆོག་གི་རེད་ཅེས་ཞལ་བཞེས་གནང་པ་རེད”ཅེས་བརྗོད་བྱུང་།

ཁེ་ན་ཌའི་ཕྱོགས་ཀྱི་ཐག་གཅོད་ལྟར་ན། ཁཱེ་ཎ་ཌ་བོད་ཀྱི་འཆར་འགོད་ཚོགས་པ་བརྒྱུད་ཁཱེ་ཌའི་མི་སེར་ཡིན་མཁན་མི་ ༥ ལས་མ་ཉུང་པ་རེ་ཡིས་ལོ་གཅིག་རིང་ཁོང་ཚོའི་འཚོ་བ་དང་སྡོད་གནས་སོགས་མཐུན་རྐྱེན་གང་དགོས་སྦྱོར་རྒྱུའི་ཁེག་ཐག་བྱུང་རིགས་གནས་སྤོར་དུ་ཡོང་ཆོག་པ་དང་། ཆ་རྐྱེན་ཚང་སྟེ་གནས་སྤོར་བྱ་གཏན་འཁེལ་རིགས་ཀྱི་ནང་མི་རྣམས་ཁ་བྲལ་དུ་མ་སོང་པར་ལྷན་དུ་ཡོང་རྒྱུ། གལ་སྲིད་ནང་མི་ཡོང་གི་མིན་ཀྱང་མི་ ༡༠༠༠ གི་གྲངས་ཚད་ནང་བརྩི་རྒྱུ་ཡིན་པའི་ཐག་གཅོད་བྱས་ཡོད་འདུག ནང་སྲིད་དྲུང་འཕར་ལགས་ཀྱིས་ “ས་གནས་མང་ཚོགས་ཀྱི་རེ་བ་ནི་ཁྱིམ་ཚང་རེ་ནས་མི་རེ་གཏོང་ཐུབ་རྒྱུ་དེ་རེད། དེ་ནི་གཙོ་བོ་མི་ཚང་རེ་ནས་མི་རེ་ཕར་འགྲོ་ཐུབ་ཚེ་ཁྱིམ་ཚང་མང་པོ་ཞིག་ལ་ཕན་ཐོགས་ངེས་པ་དང་། དེ་མིན་མི་སུ་ཞིག་མཐའ་མིའི་ཐག་གཅོད་ནང་གཏོང་གཏན་འཁེལ་བ་དེའི་ནང་མི་ཚང་མ་ལྷན་དུ་བཏང་ཚེ། ཁྱིམ་ཚང་གང་འཚམས་ཤིག་ལས་གཞིས་ཆགས་ཁག་ཡོང་ལ་དེ་ཙམ་ཕན་ཐོགས་འབྱུང་ཐུབ་ཀྱི་མིན་པར་བརྗོད་ཀྱི་ཡོད་ཀྱང་། ད་སྔའི་ཐག་གཅོད་དེ་ཁཱེ་ཎ་ཌ་གཞུང་གི་སྲིད་བྱུས་ཤིག་ཡིན་སྟབས་འགྱུར་པ་འགྲོ་རྒྱུ་ཁག་པོ་ཡོད་པ་རེད”ཅེས་བརྗོད་བྱུང་།

ནང་སྲིད་དྲུང་འཕར་དོན་གྲུབ་རྡོ་རྗེ་ལགས་སུ་ཕར་ཕྱོགས་ནས་སྦྱིན་བདག་གི་གནས་སྟངས་གང་འདྲ་ཆགས་ཡོད་མེད་དྲིས་པར་ཁོང་གིས་ལན་འདེབས་གནང་པ་ལྟར་ན། ལས་དོན་དེའི་རིགས་ཁཱེ་ཎ་ཌ་བོད་རིགས་སྤྱི་མཐུན་ཚོགས་པ་དང་བོད་ཀྱི་འཆར་འགོད་ཚོགས་པས་འགན་ཁུར་ཡོད་པ་དང་། ད་ཆར་སྦྱིན་བདག་མ་རག་པའི་དཀའ་ངལ་ཅིག་འཕྲད་ཀྱི་འདུག་ལ། ཁཱེ་ཎ་ཌ་གཞུང་གི་གཏན་འབེབས་ནང་ལས་གཞི་དེ་ལོ་ ༥ ནང་ཚར་དགོས་སྟབས། གང་མགྱོགས་མི་སྣ་འདེམས་སྒྲུག་གིས་སྦྱིན་བདག་འཚོལ་ཞོར་དང་མི་གཏོང་ཞོར་བྱ་རྒྱུ་ཡིན་པར་བརྗོད་བྱུང་ལ། འདི་ཕྱོགས་ནས་མི་སྣ་འདེམས་སྒྲུག་ཟིན་འཕྲལ་ཐོ་གཞུང་རྣམས་ཁཱེ་ཎ་ཌ་གཞུང་ལ་ཕུལ་ཏེ་མཐའ་མའི་ཐག་གཅོད་ཁཱེ་ཎ་ཌ་གཞུང་གིས་བྱ་རྒྱུ་ཡིན་འདུག

གནས་ཚུལ་རྒྱུས་ལོན་བྱས་པར་ད་སྔའི་འཆར་གཞི་ལྟར་ན་བོད་མི་ ༡༠༠༠ ཕར་སླེབས་རྗེས་ཁཱེ་ཎ་ཌའི་བོད་རིགས་འདུས་སྡོད་གྲོང་ཁྱེར་ཊོ་རོན་ཊོ་ (TORONTO) དང་། ཝན་ཁོ་ཝར་ (VANCAUVER )།   ཨོ་ཊ་ཝ་ (OTTAWA ) ། མོན་ཊི་རིལ་ (MONTREAL) །   ཁེལ་གྷ་རི་( CANGARY ) བཅས་ཀྱི་ནང་བགོ་གྲེམས་བྱ་རྒྱུ་ཡིན་འདུག

གསར་འགོད་པ། བནྡེ་སྐྱབས།