རྨེ་བ་འཇམ་དཔལ་ནོར་བུ།
མིའི་རིགས་ཀྱི་བསམ་བློ་དང་དེའི་ཆེ་བ་ནི་ས་ཆེན་འདིའི་སྒང་གི་མཛེས་སྡུག་གི་སྙིང་བཅུད་ཡིན་པ་ངོས་ཟིན་པའི་དུས་དེ་ནས་བཟུང་། ང་ནི་མིའི་རིགས་ཀྱི་སྐད་ཆའི་ཕྱི་ནང་ན་འཚོ་བའི་སྤྲང་བོ་ཐབས་སྡུག་ཅིག་ཡིན་པ་གཞི་ནས་རྟོགས།
གོ་རིམ་དེའི་ཁྲོད་ནས་ང་ངུ་མྱོང་ལ་དགོད་ཀྱང་མྱོང་། དེ་ནི་ཆེས་སྤྱིར་བཏང་གི་མི་ཚེའི་གོ་རིམ་ཞིག་ཡིན་པས། གོ་རིམ་འདི་ནས་ང་གཏན་དུ་རྒྱལ་དགོས་པའི་གནས་ལུགས་ཤིག་ཕྲིས་ཞེས་ཁ་ནང་དུ་འཁོར་ནས་དྲི་འགོད་བྱེད་ཀྱིན་ཡོད། དེ་ནི་དཔལ་འབྱོར་བསྡུ་གསོག་ཙམ་གྱི་ཁྲོད་ན་འཁོར་བའི་འཛམ་གླིང་ཞིག་ལ་ང་དངོས་གནས་ཞེན་པ་ལོག་ཡོད་པས་ཡིན། རྒྱ་གར་བས་ཤེས་རིག་གི་མ་ཡུམ་དུ་འབོད་པའི་ནོ་བྷེལ་རྩོམ་རིག་བྱ་དགའ་བཞེས་མཁན་ཐེ་གོར་ལགས་ཀྱིས། ནོར་རྫས་གསོག་པར་དགའ་བའི་མི་ལ་མཚོན་ན། འདོད་ཞེན་མུ་མེད་པར་ཇེ་ཆེར་འགྲོ་བས་རང་ཉིད་རང་ལ་དབང་བའི་གུ་དོག་པོའི་རྫོང་མཁར་དུ་བཅུག་པ་ཁོ་ན་ཙམ་ལས་ཆ་ཡོངས་སུ་རྫོགས་པའི་མཐུན་སྦྱོར་དང་། ཐམས་ཅད་ཤོང་བའི་བསམ་པའི་འཇིག་རྟེན་གྱི་སྒོ་ཐེམ་ལ་རྡོག་པ་འཇོག་མི་ནུས་སོ།། ཞེས་གསུངས་པ་ནི་དམ་པ་ཁོང་གིས་མིའི་རིགས་ཀྱི་བསམ་བློའི་ངོས་དག་འཚོལ་བའི་མྱོང་རྟོགས་དམར་རྗེན་ཞིག་ཏུ་འདོད། དེའི་ཕྱིར་གནད་དམ་པ་འདིའི་སྟེང་ནས་འཇིག་རྟེན་གྱི་འཚོ་བར་ཡང་མཐའ་གཉིས་དང་བྲལ་བའི་དབུ་མའི་ལམ་ཞིག་དགོས་པར་གསལ་བཤད་བྱས་ཡོད་ལ། སྟོན་པ་ཡང་དག་པར་རྫོགས་པའི་སངས་རྒྱས་ཀྱིས་ཀྱང་ཁོང་གི་རྗེས་འཇུག་རབ་བྱུང་བ་རྣམས་ལ་དམ་པའི་ཆོས་འདུལ་བ་ལས་འཚོ་བ་མཐའ་གཉིས་སུ་མ་ལྷུང་བ་ཞིག་དགོས་པར་གསུངས་ཡོད་པས། རིགས་ལམ་འདི་ཁ་སང་དེ་རིང་གི་ཕྱི་ཚུལ་རིང་ལུགས་པ་དག་ལ་བསྐོར་ནས་བཤད་ན་འཚོ་གནས་ཀྱི་སྙིང་དོན་ལ་འགྲེལ་བཤད་གསལ་བོ་ཞིག་བྱས་ཡོད་པ་ཡིན། མིའི་འཚོ་གནས་ཀྱི་སྙིང་དོན་ནི་ལྟོ་གོས་ཙམ་གྱི་ཆེད་མིན་པས་ན། ནང་རྟོགས་པའི་འཇིག་རྟེན་ཞིག་ལ་དཔུང་འཇུག་བྱེད་དགོས་པ་ནི་འཚོ་གནས་ཀྱི་སྙིང་དོན་ངོ་མ་ཞིག་ཡིན།
དེ་ལྟར་དཔུང་འཇུག་བྱེད་པ་ལ་ཐོག་མར་རང་ཉིད་ཀྱི་ཆེད་དུ་མེ་རི་བཞིན་འབར་བཞིན་པའི་འདོད་སྲེད་ཟེར་བ་དེ་ལ་དཔུང་འཇུག་བྱེད་དགོས་པ་ཡིན། ཡང་སྟོན་པ་ཡང་དག་པར་རྫོགས་པའི་སངས་རྒྱས་ཀྱིས་སེམས་ཅན་ཐམས་ཅད་ཀྱི་རྒྱུད་ལ་ཁམས་བདེ་བར་གཤེགས་པའི་སྙིང་པོ་ཞུ་བ་དེ་ཡོད་པ་དང་། དེ་ནི་སེམས་ཅན་གྱི་རྒྱུད་ཀྱི་ཉོན་མོངས་པའི་སྦུབས་སུ་མི་མངོན་པའི་ཚུལ་དུ་གནས་ཡོད་པར་གསུངས་ཡོད་ལ། དེའི་སྙིང་དོན་ལྟར་བསྟན་བཅོས་ཆེན་པོ་རྒྱུད་བླ་མ་ལས་རྟོགས་སླ་བའི་ཆེད་དུ་ཁམས་བདེ་བར་གཤེགས་པའི་སྙིང་པོ་མངོན་དུ་བྱ་ཚུལ་ལ་དཔེ་དགུ་དང་དོན་དགུ་གསུངས་ནས་སྒྲིབ་བྱེད་དགུ་བསལ་ནས་བསྒྲིབ་བྱ་དགུ་མངོན་དུ་བྱ་ཚུལ་གསལ་བོ་དག་པོ་ཞིག་གསུངས་ཡོད། དངོས་གནས་དོན་དངོས་པོའི་གནས་ཚུལ་འདི་འདྲ་ཞིག་གི་སྟེང་དུ་ཡོད་ན་ང་ཚོས་ཀྱང་ཆོས་ལུགས་བྱེ་བྲག་པ་ཞིག་གི་འཛིན་སྐྱོང་གི་ལས་ཁོ་ནར་མི་འཇོག་པར་འཚོ་གནས་ཀྱི་སྙིང་དོན་དངོས་ལ་ལྟ་བའི་སྒོ་ནས་ཕུགས་བསམ་ལ་དཔུང་འཇུག་ཅི་ལ་མི་བྱེད།
དངོས་གནས་ཞིབ་འདང་ཞིག་བརྒྱབ་ན་འགྲོ་བ་མིའི་རིགས་ཀྱི་ཕུགས་བསམ་ནི་ཅི་ཞིག་ཡིན་འོས། དེ་མངོན་དུ་བྱེད་ཐུབ་སོང་ན་ཆོས་རྣམས་ཀྱི་གནས་ལུགས་རྟོགས་སོང་བ་ཡིན་ནམ། ངས་བལྟས་ན་ང་ཚོ་འགྲོ་མིའི་རིགས་ཀྱི་ཕུགས་བསམ་ནི་མཐའ་མི་མངོན་པའི་ནམ་མཁའི་ཁྱོན་དང་ཆོས་མཚུངས་སུ་གནས་འདུག དེས་ན་འཚོ་གནས་ཀྱི་སྙིང་དོན་དུ་གྱུར་པའི་ཕུགས་བསམ་གྱི་སྒོ་ཆེན་དུ་ཇི་ལྟར་བྱས་ནས་འཛུལ་དགོས། འདི་ནི་ང་ཚོའི་མིག་སྔུན་དུ་ལྷག་པའི་ཆེས་ཞིབ་ཆ་ལྡན་པའི་དྲི་བ་དག་རེད། ཡང་སྟོན་པ་ཡང་དག་པར་རྫོགས་པའི་སངས་རྒྱས་ཀྱིས་ཡུལ་གང་ལ་ཞུགས་ཀྱང་ཐོགས་མར་ཡུལ་དེ་གང་འདྲ་ཞིག་ཡིན་མིན་ལ་དཔྱད་པ་བྱས་ནས་ཡང་དག་པར་མཐོང་ན་གཞི་ནས་ཞུགས་དགོས་པར་གསུངས་ཡོད། དོན་དངོས་དེ་བཞིན་དུ་རྒྱལ་ཚབ་མ་ཕམ་པས། སངས་རྒྱས་ཀྱི་བཀའི་དགོངས་འགྲེལ་བསྟན་བཅོས་མངོན་པར་རྟོགས་པའི་རྒྱན་གྱི་སྐབས་སུ་དབང་རྟུལ་ཡུལ་ལ་འཇུག་ཚུལ་དང་། དབང་རྣོན་ཡུལ་ལ་འཇུག་ཚུལ་གཉིས་གསུངས་ཡོད། དབང་རྟུལ་ཡུལ་ལ་འཇུག་ཚུལ་ནི་དད་པ་ཙམ་ལས་རྒྱུ་མཚན་མཐོང་བས་འཇུག་པ་མིན་པ་དང་། དབང་རྣོན་ཡུལ་ལ་འཇུག་ཚུལ་ནི་རྒྱུ་མཚན་མཐོང་ནས་འཇུག་པར་གསུངས་ཡོད། དོན་དངོས་ཀྱི་རིག་ལམ་འདི་དག་ང་ཚོས་འཚོ་གནས་ཀྱི་ཐོག་ཏུ་ཚུར་བསྒྲིལ་ནས་བསམ་ཞིབ་ཅིག་བྱས་ན། ང་ཚོའི་འཚོ་གནས་ཀྱི་སྙིང་དོན་ངོ་མ་ནི་ཅི་ཞིག་ཡིན་དགོས་པ་དང་། གང་ཞིག་ཡིན་འོས་པ་ཡིན།
ང་ཚོ་འཚོ་ཞིང་གནས་པའི་བརྒྱུད་རིམ་ཁྲོད་འབད་འབུངས་བྱས་པ་དག་དོན་དངོས་ཀྱི་ འབབ་ས་ངོ་མ་བོ་གང་ཞིག་ཡིན་དགོས། འདི་ནི་ཐོག་མ་ཉིད་ནས་བསམ་ཞིབ་བྱ་དགོས་སའི་གནས་ཏེ་རེད། ང་ཚོར་ཆབ་སྲིད་ཟེར་ནས་མི་ཆེན་རེ་ཟུང་གི་ལག་འོག་ཏུ་འཁོར་རྒྱུག་བྲིན་པའི་རིག་ལམ་ཞིག་ཅིག་ཡོད་མོད། དོན་ངོ་མར་དེས་ཅི་ཞིག་འོང་གི་འདུག དེ་ནི་ཚད་མཐོ་བའི་བསམ་བློའི་ཁྱབ་ཁོངས་ནས་ཚུར་བལྟས་ན་དངོས་གནས་རིགས་ལམ་དེས་ ང་ཚོར་ཀློང་ཡང་བའི་བསམ་བློའི་རྩེད་ར་ཞིག་འཛུགས་ཐུབ་ཀྱི་འདུག་གམ། མིའི་རིགས་ཀྱི་བསམ་བློའི་སྙིང་བཅུད་ཟེར་བ་དེ་རིགས་ལམ་འདི་འདྲ་ཞིག་གི་མངལ་ནས་འཁྲུངས་པ་རེད་དམ། དེ་ནི་གཏན་ནས་མ་རེད། དེང་གི་སྐབས་འདི་ལ་མཚོན་ནའང་ཤེས་ཡོན་པའི་བསམ་བློར་རང་དབང་མེད་ས་གང་དུ་ཡོད་ན་དེ་རུ་གཉའ་གནོན་དང་ཐུབ་ཚོད་ཀྱི་བྱ་ལས་སྡུག་པོ་དག་ཡོད་པ་ཆོས་ཉིད་ཅིག་ཏུ་གྲུབ་འདུག་ལ། གང་དུ་ཤེས་ཡོན་བསམ་བློའི་མངའ་ཐང་ལ་བརྩི་མཐོང་ལྡན་པའི་ཡུལ་དེ་རུ་ཆེས་ཞི་བདེ་དང་བག་ཕེབས་ངང་འཚོ་བཞིན་ཡོད་པའང་ཆོས་ཉིད་ཅིག་ཏུ་གྲུབ་འདུག དེས་ན་གནད་དོན་འདིའི་སྟེང་ནས་ཤེས་ཡོན་པ་དང་ཁོང་ཅག་གི་བསམ་བློ་ནི་འཛམ་གླིང་གི་སྤྱི་ནོར་ཡིན་པ་ང་ཚོས་གནས་ལུགས་དང་རྒྱུ་མཚན་ལྡན་པའི་སྒོ་ནས་ངོས་ཟིན་དགོས་པ་ཡིན་ནོ།།
འཞི་རྩའི་བསམ་བློ་དང་འདུ་ཤེས་འཛིན་སྟངས་སོགས་འདི་ཙམ་ནི་ཉིན་རེའི་འཚོ་ཐབས་ཙམ་གྱི་དོན་དག་ཅིག་རེད། འཚོ་གནས་ཀྱི་སྙིང་དོན་ནི་་ཀྱི་འཚོ་འདི་ཙམ་ཡིན་མི་འོས།
མི་རིགས་ཤིག་གི་ངོས་ནས་བལྟས་ན་བདེན་པ་རེད་དེ། དེང་གི་འཛམ་གླིང་གི་གནས་བབ་ནས་བལྟས་ན། དེ་འདྲ་ཞིག་ཞིག་ཡིན་ནི་མ་རེད་འདོད། སློབ་གསོ་ནི་དེང་གི་དུས་སྐབས་སུ་འཕྱི་མེད་ན་སྔ་ཡོད་པར་མི་འདོད། རྒྱུ་མཚན་ནི་དེང་གི་འཛམ་གླིང་གི་ཕྱིའི་དཔལ་འབྱོར་འཕེལ་རྒྱས་གཅིག་པོས་བཟོས་པའི་སྤྱི་ཚོགས་ཀྱི་སྣང་ཚུལ་མི་ལེགས་དག་གིས་མཚོན་ནོ།
འཇིག་རྟེན་སྐྱེས་འགྲོ་ཡོད་དོ་ཅོག་གིས་སྙིང་དོན་ཆེ་བའི་འཚོལ་གནས་ཤིག་ལ་རེ་ལྟོས་ཀྱིས་འབད་བརྩོན་དང་ཧུར་ཐག་བྱེད་ཀྱིན་ཡོདབ་རེད། ཡིན་ན་ཡང་། དེ་འདྲ་ཞིག་གི་ལམ་ལྷོང་དང་མདུན་སྐྱོད་བྱེད་ཐུབ་ཀྱིན་མེད་པ་དེ་རིག་གཞུང་བསམ་བློའི་ཁ་ཕྱོགས་ཀྱི་མ་མདངས་བ་ཞིག་རེད་འདོད། མི་ཞིག་གི་འཚོལ་གནས་ལ་དོན་སྙིང་ཡོད་མེད་དེ་མི་དེའི་གཞི་རྩའི་བསམ་བློ་དང་འདུ་ཤེས་འཛིན་སྟངས་རེག་ལས་བ་རེད། གཞི་རྩའི་བསམ་བློ་དང་འདུ་ཤེས་འཛིན་སྟངས་དོན་སྙིང་ལྡན་པ་ཞིག་བྱུང་ཚེ་མི་དེའི་མི་ཚེ་ལ་དོན་སྙིང་ལྡན་པ་དང་བདེ་སྐྱིད་ལྡན་པ་ཞིག་ཡོངས་རྒྱུ་ཐག་ཆོད་པ་མ་རེད་དམ།
དུས་སྐབས་འདི་ནི་སློབ་གསོའི་དུས་སྐབས་མིན་ལ་ཕན་ཚུལ་ལ་ཁ་བརྡུང་གི་དུས་སྐབས་ཀྱང་མིན། འཛམ་གླིང་གི་ཆེས་ཡ་ང་བའི་ལེས་བྷེ་ཡའི་མགོ་ལ་ཡོང་ཡོད་པ་ནང་བཞིན་ང་ཚོའི་མགོ་ལའང་ཡོང་ཡོད་པའི་སྐབས་འདིར། ངར་ཤུགས་ལྡན་པ་དང་བརྩོན་སེམས་ལྡན་པ། ཆིག་སྒྲིལ་གྱི་ནུས་པ་ལྡན་པའི་རྩོམ་ཡིག་སྤེལ་རྒྱུ་གལ་ཆེ།
གྲོགས་པོ་ལགས་ཀྱི་རྩོམ་ཡིག་ལ་ནུས་པ་མི་འདུག་ཟེར་གྱི་མེད་དེ། གཞན་ཞིག་ལ་ལེ་བདའི་རང་བཞིན་ཏོག་ཙམ་འདུག་པར་མཐོང་བས་བསམ་ཚུལ་བརྗེས་རེས་ཙམ་ཡིན།