དེ་རིང་ཕྱི་དྲོའི་བོད་ནང་གི་ཆུ་ཚོད་ ༥ ཙམ་ལ་མདོ་སྨད་རྔ་པ་ཀིརྟི་དགོན་པའི་རྒྱུད་པ་གྲྭ་ཚང་གི་གྲྭ་བློ་བཟང་ཚུལ་ཁྲིམས། རང་ལོ་ ༢༠ ། ཕ་མིང་ལ་ཡེ་ཤེས། མ་མིང་ལ་ཚེ་སྒྲོན་ཡིན་པ་ཁོང་གིས་རྔ་པ་རྫོང་མཁར་སྟོད་ཕྱོགས་ཀྱི་གཞུང་ལམ་སྟེང་ངོ་རྒོལ་སྐད་འབོད་བྱེད་བཞིན་རང་ལུས་མེར་བསྲེགས་བཏང་འདུག
འདི་གར་བཏང་བའི་གནས་ཚུལ་ནང་བཀོད་དོན། “ ཁོང་གིས་རང་ལུས་མེར་བསྲེགས་གཏོང་ས་ནས་ཡར་གོམ་བགྲོད་བྱེད་བཞིན་པའི་སྐབས་དེར། ཁོང་གི་མདུན་ཕྱོགས་ནས་དྲག་ཆས་ཉེན་རྟོག་པ་སོགས་རྒྱུགས་ཡོང་སྐབས་ཁོང་མར་འཁོར་ནས་སྐད་འབོད་བྱེད་བཞིན་རྒྱུགས་ཡོད་ཀྱང་། སྐབས་དེར་དེའི་ཕྱོགས་ཀྱི་ཉེན་རྟོག་པ་ཞིག་གིས་གཞུས་ནས་ཐང་ལ་འགྱེལ་བཅུག་ཡོད་འདུག
ཉེན་རྟོག་པས་ཁོང་གི་སྐུ་ལུས་ལ་འབར་བཞིན་པའི་མེ་བསད་དེ་བཙན་ཁྲིད་བྱས་ཡོད་ཅིང་། རླངས་འཁོར་གྱི་སྒམ་ཤིང་ནང་དུ་གཡུགས་ཏེ་དྲག་ཆས་ཉེན་རྟོག་པ་སོགས་ཀྱིས་མནན་ནས་འགྲོ་སྐབས་ཀྱང་ལག་པ་གནམ་ལ་བཀྱགས་ཏེ་སྐད་འབོད་བྱེད་ཀྱིན་ཡོད་པ་དངོས་སུ་མཐོང་འདུག འོན་ཀྱང་ཁོང་གིས་འབོད་ཚིག་ཅི་ཞིག་སྒྲོག་ཡོད་མེད་ཤེས་རྟོགས་ཐུབ་མི་འདུག
ཁོང་ནི་རྔ་པ་རྫོང་ཆོས་རྗེ་མ་ཞང་སོ་རུ་མ་སྡེ་བའི་ཡེ་ཤེས་ཚང་ཡིན་ཞིང་། མིང་སྲིང་བཞི་ཡོད་པའི་ནང་གི་ཆེ་ཤོས་ཡིན་འདུག་ལ། ཁོང་ལོ་ན་བརྒྱད་ཙམ་ནས་རྔ་པ་ཀིརྟི་དགོན་པར་ཆོས་ཞུགས་བྱས་ནས་སྐབས་དེར་ཀིརྟིའི་དགོན་ནང་བསྟན་གཞོན་ནུའི་རིགས་སློབ་ཁང་ཞེས་པའི་ཀིརྟི་དགོན་པའི་སློབ་གྲྭའི་ནང་འཛུལ་ཞུགས་བྱས་ཤིང་། ༢༠༠༣ ལོར་སློབ་གྲྭ་སྒོ་རྒྱབ་རྗེས་གསང་སྔགས་རྒྱུད་པ་གྲྭ་ཚང་དུ་ཞུགས་ནས་འདོན་ཆོས་སྤྱོད་སོགས་ལ་སློབ་སྦྱོང་རྩེར་སོན་གྱི་གྲས་ཤིག་དང་།
གཉོམ་ཆུང་ཚུལ་མཐུན་ཞིག་ཡིན་འདུག
དེ་རིང་སྔ་དྲོ་ནས་སྔར་དང་མི་འདྲ་བར་རྔ་པ་ཀིརྟི་དགོན་པའི་སྒོ་ཆེན་ཁག་གི་འགྲམ་དུ་དྲག་ཆས་ཉེན་རྟོག་པ་སོགས་ཀྱིས་དམ་དྲག་ཆེན་པོ་བྱས་ཡོད་པ་དང་། རྔ་པ་རྫོང་མཁར་དུ་ཡོང་སའི་ལམ་ཆེ་ཆུང་ཚང་མར་ཞིབ་བཤེར་ས་ཚིགས་བཙུགས་ནས་དམ་དྲག་བྱས་ཡོད་འདུག དེ་བཞིན་ཕྱི་ལོ་ ༢༠༡༡ ཟླ་ ༡༠ ཚེས་ ༢ ཉིན་འཛིན་བཟུང་བྱས་པའི་རྔ་པ་ཀིརྟི་དགོན་པའི་གྲྭ་ལྷ་བཟོ་བློ་གྲོས་ད་བར་གང་དུ་བཀག་ཉར་བྱས་ཡོད་མེད་ཙམ་ཡང་ཤེས་རྟོགས་རྩ་བ་ནས་ཐུབ་མེད།
དེ་རིང་ནི་སྔར་ལོའི་ཕྱི་ཟླ་ ༣ ཚེས་ ༡༦ ཉིན་རྔ་པ་ཀིརྟི་དགོན་པའི་རང་ལོ་ ༢༡ ཡིན་པའི་དགེ་འདུན་པ་ཕུན་ཚོགས་ལགས་ཀྱིས་བོད་རྒྱལ་ཁབ་དང་མི་རིགས་ཆེད་རང་ལུས་མཆོད་འབུལ་གནང་སྟེ་ལོ་གཅིག་ཏག་ཏག་འཁོར་བའི་ཉིན་མོ་དེ་ཆགས་ཡོད།
གནས་ཚུལ་གཏོང་མཁན། གྲྭ་བློ་བཟང་ཡེ་ཤེས་དང་ཀ་ཉག་ཚེ་རིང་།
ཨ་ཧ་ཧ་གཞིས་བཞུགས་སྤུན་སྟག་ཕྲུག་ཚོ་གཅིག་རེ་གཉིས་རེ་བྱས་ནས་མཆོངས་ཚར་སོང་། ད་ཅི་བྱེད། བོད་བཙན་བྱོལ་བས་སྨོན་ལམ་འདོན་པ་ཙམ་ཞིག་སྐུ་གཤེགས་དཔའ་པོའི་དགོས་དམིགས་མིན་ལ། གདུང་སེམས་མཉམ་བསྐྱེད་བྱེད་པ་ཙམ་ཞིག་དེ་བས་ཀྱང་ག་ལ་ཡིན། ཁོང་ཚོའི་་ཁ་ཆེམས་དེ་སྒྲུབ་དགོས། ཁོང་ཚོའི་སྲོག་གི་རིན་ཐང་དེ་ནམ་ཡང་བརྗེད་མི་རུང་།
ང་ཡི་སྙིང་ཁོང་གི་དཔའ་བོ་ལགས། ང་ཚོས་ནམ་ཡང་ཁྱེད་ཀྱི་རེ་འབོད་དེ་བརྗེད་མི་སྲིད་ལ། ཇི་སྲིད་བོད་མི་རིགས་འདི་རྩ་མེད་དུ་མ་ཕྱིན་བར་ང་ཚོས་བློ་ཞུམ་མི་སྲིད་ལ། ནམ་ཡང་བོད་མི་རིགས་འདི་མཐོ་སྒང་དུ་གཟི་བརྗིད་ཀྱིས་འགྱིང་ངེར་ལངས་མ་ཐུབ་བར་དུ་ང་ཚོས་ཡོད་ཚད་བློས་གཏོང་བྱེད་པའི་དམ་བཅའ་རྡོ་རྗེ་བྲག་ལ་བརྐོས་ཡོད་ལགས། ང་ཡི་སྙིང་ཁོང་གི་དཔའ་བོ་ཁྱེད་རྣམས་བློ་བདེ་མོར་ཕྱི་མའི་ལྔ་ལམ་དུ་ཕེབས་ཤིག །བླ་མ་འོད་དཔག་མེད་ཀྱི་ཞིང་དུ་འཕགས་མཆོག་ཕྱག་ན་པད་མོས་དགྱེས་བཞིན་དུ་ཁྱེད་རྣམས་སྐྱོང་བར་ཤོག །ང་ཡི་སྙིང་ཁོང་གི་དཔའ་བོ་ལགས། ངས་དཔའ་རྒོད་རེ་རེ་འདི་ལྟརགཟི་བརྗིད་དཔའ་སྐད་འཐེན་བཞིན་བཤེགས་པ་མཐོང་སྙིང་རྡོག་དམར་པོ་ལས་མཆེད་པའི་མིག་ཆུའི་ཐིགས་པ་རེ་རེས་ཕེབས་སྐྱེལ་བྱས་ཡོད། ང་སྙིང་ཁོང་གི་དཔའ་བོ་ལགས། ང་ཚོས་ནམ་ཡང་དམ་ཚིག་མཐུན་པའི་མི་འགྱུར་རྡོ་རྗེ་སྤུན་གྲོགས་སུ་སྐྱེ་བར་ཤོག །།
བོད་མི་རིགས་དང་རྒྱལ་ཁབ་ཀྱི་ཆེད་དུ་རང་སྲོག་བློས་གཏོང་མཁན་གྱི་རྒྱལ་གཅེས་དཔའ་བོ་རྣམས་པ་ལགས་་་་་་་་་་་་་་ངོ་མ་ཁྱེད་ཚོས་མི་རིགས་ལ་བཅང་བའི་རྩེ་སེམས་དང་སྙིང་སྟོབས་དང་ལ་ཞེན་སོགས་ལ་ང་ཚོས་ཇི་ལྟར་གུས་འདུད་ཞུ་དགོས་པ་ཡང་ཤེས་ཀྱིན་མི་འདུག་་་་་་་་་་་་་་་་་་་་་་གང་ལྟར་ཕྱི་སྡོད་བོད་རིགས་ཚོ་་་་་་་ད་ང་ཚོ་ཚང་མ་ལང་རན་རེད་་་་་་་་་་་་་་ཡར་ལ་ལོངས་ཤོག་
ངའི་སེམས་ཁྱོད་དང་མཉམ་དུ་ཡོད་ཁྱོད་ཀྱི་བསམ་དོན་ཐམས་ཅད་ཡིད་བཞིན་དུ་འགྲུབ་པས་སྨོན་འདུན་ཞུ།བོད་རྒྱལ་ལོ་བོད་རྒྱལ་ལོ་བོད་རྒྱལ་ལོ།
བསམ་བསམ་དུས། མི་འདི་མི་དང་མི་འདྲ་ཞིང་། མི་འདི་མི་ཡུལ་གྱི་འཚོ་བ་ལའང་སྲེད་ཀྱི་མི་འདུག དངོས་གནས་མི་ཡིན་ནམ།
གནས་ཚུལ་འདི་ཚོ་ཚང་མ་ཚ་ཐོག་ལ། རྒྱལ་སྤྱིའི་བརྒྱུད་ལམ་ཁག་ལ་ཐབས་བརྒྱ་ཇུས་གཏོང་གིས་ཁྱབ་ཐབས་བྱ་དགོས། ནུབ་ཕྱོགས་ཁག་གི་རྒྱ་ཡིག་གི་བརྒྱུད་ལམ་ཁག་དང་།དབྱིན་ཡིག་གི་བརྒྱུད་ལམ་ཁག་ལ་བཀྲམས་པར་དྲིལ་བསྒྲགས་དང་། བོད་མིའི་གསར་འགོད་མཐུན་ཚོགས་ཀྱིས་འགན་བཞེས་དགོས། བོད་ཀྱི་རྩོམ་པ་པོ་དེ་དག་གིས་ཀྱང་དཔྱད་བརྗོད་སྤེལ་དགོས། དཔྱད་བརྗོད་དེ་རིགས་བཙན་བྱོལ་ནང་གི་དབྱིན་དགེ་ཚད་ལྡན་ཚོས་ཕབ་བསྒྱུར་གྱིས་གསར་ལམ་ཁག་ལ་བཀྲམས་དགོས། ཕྱོགས་ཡོང་ནས་མཉམ་རུབ་ཀྱི་མགོ་འཛུགས་ཤིག་བྱ་དགོས། བཀའ་ཤག་གིས་དམིགས་བསལ་ལས་འགུལ་བཀོད་སྒྲིག་ཚོགས་ཆུང་ཞིག་ཀྱང་འཛུགས་དགོས་པ་མིན་ནམ།
བུ་རྒོད་པོ། དཔའ་བོའི་གདུང་རྒྱུད། མི་རིགས་ཀྱི་བླ་སྲོག མི་རབས་ནས་མི་རབས། ཚེ་རབས་ནས་ཚེ་རབས། བོད་མི་ཁོག་གི་སྙིང་གསོན་པོ། ཁྱེད་ཅག་གི་བྱས་རྗེས་ཀྱི་ཤུལ་ང་ཚོས་ནམ་ཡང་མི་ཟུབ། ཁྱེད་ཅག་གཤེགས་ས་བོད་མི་ཁྲི་དྲུག་བརྒྱའི་སེམས་ངོགས་ན་ཅི་འདྲའི་གསེར་མདོག་ཅིག་་་་་་་་་་་་་་་་
ད་ང་ཚོས་ཅི་བྱེད་དགོས་སམ་ཅི་བྱེད་རྒྱུ་ཡོད་གི བོད་ནས་འདི་ལྟར་བྱས་ན་ང་ཚོ་ཡང་རང་དགར་སྡོད་དུ་མེད་ཁོ་ཐག་རེད།