རེབ་གོང་ས་ཁུལ་གྱི་གྲོང་སྡེ་ཁག་གི་སྐུ་ཚབ་དང་མི་སྒེར་ཧ་ཅང་མང་པོ་ཉིན་འདི་འགར་རང་ལུས་མེར་བསྲེགས་གཏོང་མཁན་དག་ལ་མྱ་ངན་ཐུགས་གསོར་སྐྱོད་བཞིན་ཡོད་འདུག
འདི་གར་གནས་ཚུལ་བཏང་འབྱོར་བྱུང་བ་ལྟར་ན། གཟའ་ལྷག་པའི་ཉིན་སྐུ་ལུས་མཆོད་འབུལ་གནང་མཁན་རེབ་གོང་རོང་བོ་དགོན་ཆེན་གྱི་གྲྭ་འཇམ་དབྱངས་དཔལ་ལྡན་ལགས་སུ་གདུང་སེམས་མཉམ་སྐྱེད་ཆེད་སྙུན་འདྲིར་སྐྱོད་མཁན་ས་ཕྱོགས་གང་ས་ནས་ཕེབས་བཞིན་ཡོད་པ་མ་ཟད། དེ་ཡང་སྒེར་ངོས་དང་སྡེ་བ་དང་སྡེ་བའི་ཚབ་དང་རེབ་གོང་སྤྱིའི་ཚབ་བྱས་ཏེ་ཕེབས་བཞིན་ཡོད་འདུག
མཚོ་སྔོན་ཞིང་ཆེན་གྱི་ལས་བྱེད་རུ་ཁག་ཅིག་དང་ས་གནས་ཀྱི་ལས་བྱེད་བཅས་ཡོང་སྟེ། འཇམ་དབྱངས་དཔལ་ལྡན་ལགས་ཀྱི་སྤུན་མཆེད་དགེ་བཤེས་དགེ་ལེགས་ལ་ཁོང་འདི་ལྟར་བཞག་མི་ཆོག་པ་དང་སྨན་བཅོས་ཆེད་རྒྱ་གཞུང་ལ་རྩིས་སྤྲོད་བྱ་དགོས་པ། འདི་ལྟར་རང་ཤག་དུ་ཉར་བ་ནི་སངས་རྒྱས་ཆོས་ལུགས་དང་འགལ་བ་མ་ཟད་རྒྱལ་ཁབ་གྱི་རྩ་ཁྲིམས་ལའང་འགལ་ཡོད་སྐོར་བརྗོད་ཡོད་ཀྱང་། སེར་སྐྱ་མང་ཚོགས་ཀྱིས་ཁོང་རྒྱ་ལག་ཏུ་མི་ཤོར་ཆེད་ཉིན་མཚན་བསྟུད་མར་སྲུང་སྐྱོབ་བྱེད་བཞིན་ཡོད་པ་དང་། རྒྱ་གཞུང་གི་ཁ་ལ་མ་ཉན་པས་རེབ་ཁོང་ས་གནས་སྨན་ཁང་གི་འགན་འཛིན་ཨོ་རྒྱན་དང་སྨན་པ་རྡོ་རྗེ་སོགས་སྨན་པ་ཁག་ཅིག་ནས་སྨན་བཅོས་བྱེད་བཞིན་ཡོད་འདུག སྨན་པས་སྲོག་ལ་ཉེན་ཁ་མེད་ཚུལ་བརྗོད་ཀྱི་འདུག
དེ་མཚུངས་སུ་ཞིང་གི་ལས་བྱེད་དང་ས་གནས་ཀྱི་རྗོང་དཔོན་སོགས་སྔ་དགོང་གཉིས་ཀར་རེབ་གོང་༸ཤར་སྐལ་ལྡན་རྒྱ་མཚོའི་མདུན་ལ་བཅར་སྟེ་མི་དམངས་དང་། གྲྭ་མང་སོགས་ལ་བསླབ་བྱ་རྒྱག་དགོས་ཚུལ་སྐུལ་མ་གཏོང་བཞིན་ཡོད་འདུག
ཕྱི་ཚེས་ ༡༧ ཉིན་རང་ལུས་མེར་བསྲེགས་བཏང་མཁན་མི་སྐྱ་བསོད་ནམས་དར་རྒྱས་ལགས་ཀྱི་ནང་མིར་ཐུགས་གསོིའི་མྱ་ངན་འཚམས་འདྲིར་རེབ་གོང་སྤྱིའི་སྐུ་ཚབ་དང་སྡེ་བ་སྡེ་བའི་སྐུ་ཚབ་སྒེར་སོ་སོ་བཅས་ནས་ཕེབས་བཞིན་པ་མ་ཟད། གཅན་ཚ་ནང་ར་སོགས་ས་གནས་ཁག་མང་པོ་ནས་རླངས་འཁོར་ནང་འབྲུ་རིགས་སྐྱེལ་འདྲེན་གྱིས་སྟེང་དུ་རས་དར་ཐོག་གྲོང་སྡེ་དང་མི་སྒེར་སོ་སོའི་མིང་བཀོད་དེ་འབུལ་བཞིན་ཡོད་འདུག
གཞན་ཡང་རེབ་གོང་སྒོ་དམར་སྡེ་བ་ཁག་ཅིག་ནས་ཁྱིམ་ཚང་རེར་ནས་རྒྱ་སྒོར་ ༡༠༠ རེ་བསྡུས་ཏེ་མྱ་ངན་སེམས་གསོར་སྐྱོད་འདུག་ལ། གཞན། མི་སྒེར་དང་ཚོང་པ་ཁག་ནས་རྒྱ་སྒོར་སྟོང་ཕྲག་འགའ་རེ་བཅས་དེ་རིང་འདས་བོ་ཤ་སྦྲང་སོད་ནསམ་དར་རྒྱས་ལགས་ཀྱི་གྲོང་སྡེའི་ནང་སྦག་སྦག་དང་རླངས་འཁོར་མང་པོས་ཁེངས་འདུག ཅེས་དངོས་སུ་མཐོང་ཞིག་ཞིག་གིས་བརྗོད་འདུག
བསོད་ནམས་དར་རྒྱས་ལགས་ཀྱི་སྐུ་ལུས་མེ་སྦར་བཞིན་པའི་སྐབས། དམག་མི་ཞིག་གིས་མེ་གསོད་རྩིས་བྱས་དུས་མགྲོན་ལུང་སྡེ་བའི་རྡོ་རྗེ་ཐར་ཟེར་བ་རང་ལོ་༤༠ ཡིན་པ་ཁོང་གིས་མེ་མ་གསོད་རོགས་ཞེས་བརྗོད་དེ། དམག་མི་དེའི་རྒྱབ་ལོག་ནས་ལག་པས་འཐམ་པར། དམག་མི་གཞན་ཞིག་གིས་རྒྱབ་ལོགས་ནས་མེ་འདའ་རྒྱབ་སྟེ་རྨས་སྐྱོན་ཚབས་ཆེན་ཕོག་སྟེ། ད་ལྟ་ཟི་ལིང་གྲོང་ཁྱེར་གྱི་སྙིང་རྗེ་སྨན་ཁང་དུ་སྨན་བཅོས་བྱེད་ཀྱིན་ཡོད་འདུག
དེ་ལ་རྒྱ་དམར་འཁྱོག་བརྗོད་བྱས་ཏེ། བསོད་ནམས་དར་རྒྱས་ཀྱིས་རང་ལུས་མེར་བསྲེགས་སྐབས་སྣུམ་ཧ་ཅང་མང་པོ་འཐུང་ཡོད་སྟབས། མེ་འབར་ནས་སྐར་མ་གཅིག་གཉིས་རྗེས་སྐུ་ལུས་གས་འཐོར་བྱུང་སྟེ། གྲོད་ཁོག་ནས་དངོས་པོ་ཞིག་གིས་ཁོང་གི་འཆན་ཁུང་ལ་ཕོག་སྟེ་རྨས་སྐྱོན་བཟོས་ཚུལ་བསྒྲགས་འདུག་མོད། འོན་ཀྱང་ཁ་སང་ཕྱི་དྲོར་སྨན་ཁང་ནང་མེ་མདའི་མདེའུ་བཏོན་འདུག་ཅིང་ཚེ་སྲོག་ལ་ཉེན་ཁ་མེད་ཚུལ་བརྗོད་ཡོད་འདུག
དེ་རིང་ཁ་སང་བོད་རང་བཙན་ཡིན་དགོས་པའི་སྐད་ཤུགས་ཀྱི་འབོད་སྒྲ་ངར་མོ་འདི་བོད་ཁམས་ཐམས་བཅད་ལ་ཁྱབ་པའི་རླུང་བུ་བཞིན་དུས་ནས་དུས་སུ་ཇེ་འཚུབ་དང་ཇེ་ཆེ་ལ་འགྲོ་བཞིན་པའི་དཔང་རྟགས་ངོ་མ་ཞིག་ནི་ཧ་ཅང་ཧ་ཅང་གི་གྲོང་གསེབ་ཅིག་ནས་འཚར་བའི་ལོ་བཞི་བཅུ་ཅན་གྱི་གོང་འཁོད་དཔའ་བོ་རྡོ་རྗེ་ཐར་ལགས་ཀྱི་སྙིང་སྟོབས་དེ་ལས་ཀྱང་གསལ་བོ་མཐོང་ངེས་པ་ཡིན། དཀོན་མཆོག་གིས་མཁྱེན། ཤི་བོ་ལ་འཇིགས་སྣང་དང་གསོན་པོ་ལ་བར་ཆད་མེད་པར་ཤོག
ད་ལྟ་དངོས་གནས་ཉིན་རེའི་གསར་འགྱུར་ལ་ལྟ་བར་ཡང་སྐྲག་སྣང་ཡོང་ནི་ཞིག་རེད།
གསར་འགོད་པ་ལགས། ཁྱེད་ཀྱི་གསར་འགྱུར་ནང་བཀོད་པའི་གཤམ་གསལ་དུམ་བུ་གང་རུང་ཞིག་ནང་བྲིས་ནོར་ཤོར་ཡོད་པ་འདྲ།
“འདས་པོ་འཇམ་དབྱངས་དཔལ་ལྡན་ལགས་ཀྱི་སྤུན་མཆེད་དགེ་བཤེས་དགེ་ལེགས་ལ་ཁོང་འདི་ལྟར་བཞག་མི་ཆོག་པ་དང་སྨན་བཅོས་ཆེད་རྒྱ་གཞུང་ལ་རྩིས་སྤྲོད་བྱ་དགོས་པ།”
“སྨན་པས་སྲོག་ལ་ཉེན་ཁ་མེད་ཚུལ་བརྗོད་ཀྱི་འདུག”
མེ་རྒོལ་དམར་པོ་སྟོབས་ཀྱིས་དགུང་ལ་འཕྱོ་དུས
དམར་པོའི་དར་དམར་ལྷབ་ལྷུབ་དུ་འདར་ཞིང
དམར་སྲུང་དམག་ཤུགས་ཅིག་ཅིར་དུ་ཉམས་འགྲོ
ཁོང་ཚོ་ལ་སྐར་ལྔའི་དར་དམར་འདེགས་ཐུབ་མེད་ལ
ཚེགས་སྒྲ་རྐང་གཅིག་གི་ནུས་བ་ཡང་གསོད་ཐུབ་མེད
དེ་དུས་བདེན་པའི་རྒྱབ་ལངས་བྱེད་མཁན་གྱི་མགྲོན་ལུང་ཚང་གི་མི་བུ་རྡོ་རྗེ་མཁར་ཁྱེད་ཀྱིས་ཀྱང་རང་ཉིད་ཀྱིས་འཁུར་འོས་བའི་དམར་སྲུང་དམག་གི་མེ་མདའི་སོ་ཁ་ནས་གསེད་པའི་ན་ཟུག་དེ་བཀྱགས་ནས་གང་སེང་གི་དར་ཆ་ལ་གུས་འདུད་ཞུས་ཆོག་ཆོག་ཡིན།
དངོས་དོན་གྱི་དཔའ་པོ་དང་དངོས་དོན་གྱི་འཐབ་རྩོད་བ་ནི་རེབ་གོང་རིགས་བའི་གྲོང་གྱི་སེར་མོ་བ་དང་སྙན་ངག་པ་སྒྱུ་སྩལ་པ་གཞས་པ་དག་ཡིན་ཞིང་འདི་དག་གི་མི་ཚེའི་རྒྱུ་རིམ་གྱི་དཀའ་སྡུག་ཁྲོད་ཆེས་མངར་སྐྱིར་གྱི་འཚོ་བ་དེ་ཡང་རྒྱུན་ལྡན་ཡིན་་་་་་ཡིན་ན་ཡང་དུས་རྟག་ཏུ་མི་རིགས་དང་རིག་གཞུང་ཁོར་ཡུག་རང་དབང་སོགས་ཀྱི་ཆེད་དུ་ཐུན་གསུམ་གྱི་སྨྲ་ལྕེ་དེ་ལ་ལྷོད་པ་མེད
རྒྱ་འདི་ཚང་གི་ཁ་ཐལ་གྱིས་ཆོད།
བོད་པ་བསྟན་ཆབ་སྲིད་ཀྱི་ཆེད་དུ་རང་ལུས་མཆོད་མེར་ཕུལ་མཁན་འཇམ་དབྱངས་དཔལ་ལྡན་ལགས་ལ་སྨན་བཅོས་ལམ་འགྲོ་བའི་སྨོན་འདུན་དང་བཅས་སྙིང་ཁོང་རུས་བའི་གཏིང་ནས་གུས་མདུད་ཞུ།
རྒྱལ་གཅེས་དཔའ་བོ་འདས་བོ་བསོད་ནམས་དར་རྒྱས་ལ་མྱ་ངན་གུས་མདུད་དང་་་ཁྱད་པར་དུ་ཁོང་གི་ཤུལ་ལུས་ནང་མི་རྣམས་ལ་སྙིང་ཁོང་ནས་ཁྱེད་རྣམས་ཀྱི་བྱ་ལམ་འགྲོ་ཡོངས་བའི་སྨོན་འདུན་ཞུ།
བོད་དད་པ་ཅན་དང་དམ་ཚིག་ཅན།།
བོད་ཕྲེང་བ་ཅན་དང་གོང་བ་ཅན།།
བོད་སྙིང་རྗེ་ཅན་དང་བླ་སྲོག་ཅན།།
བོད་ཡིད་ཆེས་ཅན་ཕྱི་ཐག་ཅན།།
གཅིག་རྒྱབ་གཅིག་ལང་གི་མཐུན་སྒྲིལ་ལ་བསྟོད་བསྔགས་དང་བོད་ཀྱི་དཔའ་བོ་དཔའ་མོ་རྣམ་པར་སྙིང་ཐག་པ་ནས་མྱ་ངན་གུས་འདུད་ཞུ།