བཞུགས་སྒར་ངྷ་ས་གནས་སྡོད་སྐལ་བཟང་ཉི་མ་ལགས་ཀྱིས་འདི་གར་གནས་ཚུལ་བཏང་འབྱོར་བྱུང་བ་ལྟར་ན། ཟླ་འདིའི་ཕྱི་ཚེས་ ༡༧ ཉིན་མདོ་སྨད་རེབ་གོང་ཤ་སྦྲང་སྡེ་བའི་བསོད་ནམས་དར་རྒྱས་མཆོག་གིས་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་སྐད་འབོད་བྱས་ཏེ་སྐུ་གྲོངས་ཡོད་པ་ལྟར། ཉིན་དེར་ཤ་སྦྲང་སྡེ་བའི་སྡེ་མི་དང་རེབ་གོང་ས་ཕྱོགས་ཚང་མའི་མི་དམངས་མཉམ་འཛོམས་ཐོག རོང་བོ་དགོན་ཆེན་གྱི་ལྟག་རྒྱབ་གདུང་རྒྱལ་ཀླད་ཅེས་པའི་ས་གནས་སུ་སྐུ་གདུང་སྦྱིན་བསྲེགས་བྱས་རྗེས། ཁ་སང་ཕྱི་ཚེས་ ༡༨ ཉིན་གྱི་བོད་ནང་གི་ཞོགས་པའི་ཆུ་ཚོད་ ༩ བའི་ཐོག་ཤ་སྦྲང་སྡེ་བའི་མི་དམངས་དང་རེབ་གོང་ཕྱོགས་ཁ་བཅུ་གཉིས་ཀྱི་མི་མང་རླངས་འཁོར་ ༥༠ ཡས་མས་ཀྱིས་ཁོང་གི་གདུང་ཐལ་ཤ་སྦྲང་སྡེ་བར་བསྐྱལ་ཡོང་འདུག
ཁ་སང་ཉིན་གང་བོར་ཁོང་གི་ཁྱིམ་དུ་གདུང་ཐལ་མཇལ་མཁན་དང་ཁྱིམ་མི་ཚོར་གདུང་སེམས་མཉམ་སྐྱེད་མཚོན་ཆེད། རེབ་གོང་གི་སྡེ་བ་རེ་རེ་དང་དགོན་པ་རེ་རེ། མི་སྒེར། དེ་བཞིན། གཅན་ཚ་རྫོང་གི་སྡེ་བ་དང་མི་སྒེར་བ་སོགས་མཚམས་མ་ཆད་པར་ཡོང་སྟེ། མ་འོངས་པའི་ཁྱིམ་ཚང་དེའི་ཆེད་དུ་སྒོར་མོ་སྤྲོད་བཞིན་པ་དང་། འབྲུ་རིགས་རླངས་འཁོར་རེ་བྱས་ཏེ་དྲུད་ཡོང་ཡོད་འདུག་ལ། མདང་དགོང་སྡེ་བའི་དུད་ཁྱིམ་རེ་རེའི་མི་སྣས་ཤ་སྦྲང་དགོན་ཕུན་ཚོགས་ཆོས་གླིང་དུ་མཆོད་མེ་སྒྲོན་ཏེ་ཁོང་ལ་མྱ་ངན་ཞུས་ཡོད་འདུག
དེ་རིང་སྔ་དྲོ་ནས་བཟུང་རྩེ་ཁོག་དང་གཅན་ཚའི་ས་གནས་ཁག མཚོ་སྔོན་པོ་རྐང་ཚ་སོགས་ཡུལ་ལུང་འདྲ་མིན་གྱི་བོད་མི་མཚམས་མ་ཆད་པར་བཅར་ཏེ། ཁོང་གི་ཤུལ་ལུས་ནང་མི་ཚོར་གདུང་སེམས་མཉམ་སྐྱེད་བྱེད་ཀྱི་ཡོད་འདུག
གསར་འགོད་པ། དོན་གོ
བོད་ཀྱི་སྙིང་སྟོབས་རེ་རེ་འདི་ལྟར་བྲལ་ཐལ།།
བོད་ཀྱི་བདེན་དོན་རེ་རེ་འདི་ལྟར་འབར་ཐལ།།
བོད་ཀྱི་ཚེ་སྲོག་རེ་རེ་འདི་ལྟར་ཆད་ཐལ།།
བོད་ཀྱི་རེ་བ་བྱེད་ས་གང་ནས་འཚོལ་རྒྱུ།།
གཅེས་པའི་ལུས་སྲོག་དམར་པོ་མེ་ལ་བཞུར། །ཞུམ་མེད་ངར་སྐད་འཛམ་གླིང་རྩེ་ལ་བསྒྲགས། །བདེན་པའི་ཁུ་ཚུར་གུང་ཁྲན་སྙིང་ལ་འཕྱུར། །དཔའ་བོའི་མཚན་སྙན་བསྐལ་པའི་བར་དུ་གནས། །ལང་ཚོ་མེ་ཏོག་ཐ་མར་ཐལ་བར་གྱུར། །རིགས་ཀྱི་ལ་རྒྱ་མི་འགྱུར་རྡོ་ལ་བྲིས། །ཚེ་འདིའི་རྣམ་ཤེས་ཕྱི་མའི་ཡུལ་དུ་གཤེགས། །བསྲེགས་པའི་སྐུ་ཕུང་གངས་ཅན་བོད་བཞག །
རྒྱལ་གཅེས་དཔའ་བོ་ཁོང་ལ་སྙིང་ནས་འདུད། བོད་ཀྱི་རྨོངས་གཉིད་མྱུར་དུ་སངས་པར་ཤོག བོད་ཀྱི་བདེན་མཐའ་མྱུར་དུ་གསལ་བར་ཤོག
ཞིམ་མེད་སྙིང་སྟོབས་རླབས་ཀྱི་འཚོ་མོ་འཁྱུལ།།མཐའ་མེད་འཁོར་བའི་སྐྱིད་སྣང་རིང་ནས་དོར།།དགོས་མེད་ཕྱི་འཁྱམ་བུ་ལ་རེ་ཐག་ཆད།།སྐྱིད་མེད་འཇིག་རྟེན་འདི་ལས་བྲལ་ན་བསམ།།