འབོ་ར་ཡར་ལངས་བརྒྱབ་འདུག

དེ་རིང་སྔ་དྲོར་མདོ་སྨད་འབོ་ར་དགོན་པའི་དགེ་འདུན་པ་རྣམས་ཀྱིས་རྒྱ་གཞུང་ལ་ངོ་རྒོལ་སྐད་འབོད་བྱེད་བཞིན་ས་གནས་ཞང་སྲིད་གཞུང་གི་སྒོ་ཁར་ཕྱིན་ཡོད་ཅིང་། ད་ཆར་རྒྱ་དམག་གིས་དགོན་པའི་ཕྱོགས་ཡོངས་དམ་དྲག་བྱས་ཡོད་འདུག  

ད་ལྟ་རང་གནས་ཚུལ་འབྱོར་བ་ལྟར་ན། དེ་རིང་ཕྱི་ཚེས་ ༢༠ ཉིན་གྱི་སྔ་དྲོའི་བོད་ནང་གི་ཆུ་ཚོད་ ༡༢ ཙམ་ལ་བོད་མདོ་སྨད་བླ་བྲང་བཀྲ་ཤིས་འཁྱིལ་གྱི་ལྷ་སྡེ། འབོ་ར་དགོན་པའི་གྲྭ་མང་རྣམས་ཀྱིས་ལག་ཏུ་བོད་ཀྱི་རྒྱལ་དར་འཕྱར་བཞིན། བོད་ལ་འགྲོ་བ་མིའི་ཐོབ་ཐང་དང་ཆོས་དད་རང་དབང་། སྐད་ཡིག་རང་དབང་དགོས་པ་སོགས་སྐད་འབོད་བྱེད་ཀྱིན། འབོ་ར་ཞང་སྲིད་གཞུང་གི་སྒོ་ཁར་བསྐྱོད་དེ་ངོ་རྒོལ་སྐད་འབོད་བྱས་ཡོད་འདུག

གནས་ཚུལ་མཁོ་སྤྲོད་པས་བརྗོད་པ་ལྟར་ན། ད་ཆར་འབོ་ར་དགོན་པའི་ཕྱོགས་ཡོངས་རྒྱ་ནག་གི་དྲག་ཆས་དམག་མིས་བསྐོར་ཡོད་པ་ཙམ་ལས། ངོ་རྒོལ་སྐད་འབོད་ཁྲོད་གནས་ཚུལ་ག་རེ་བྱུང་ཡོད་མེད་ཀྱི་ཞིབ་ཕྲའི་གནས་ཚུལ་ད་སྔ་ཤེས་རྟོགས་ཐུབ་ཀྱི་མི་འདུག་ཟེར།

འདི་ལོའི་ལོ་གསར་སྐབས་རྒྱ་གཞུང་གིས་འབོ་རའི་ཁྱིམ་ཚང་རེ་ལ་རྒྱ་སྒོར་ ༥༠༠༠ རེ་སྤྲད་དེ་ལོ་སར་གཏོང་རྒྱུར་སྐུལ་འདེད་བྱས་ཡོད་པ་དང་། ཉེ་ཆར་བཅོ་ལྔའི་མཆོད་པའི(ཆོ་འཕྲུལ་དུས་ཆེན།) ཉིན་འབོ་ར་དགོན་པའི་ནང་༧གོང་ས་མཆོག་གི་སྐུ་པར་སྒྲིག་ཤོམ་བྱས་པར་དམ་དྲག་བྱུང་ཡོད་སྟབས། ས་གནས་སྲིད་གཞུང་དང་དགོན་པའི་བར་འགལ་བ་ཛ་དྲག་ཏུ་གྱུར་ཡོད་འདུག

༢༠༠༨ ལོའི་ཞི་རྒོལ་ཆེན་མོའི་ནང་འབོ་ར་སེར་སྐྱ་མི་མང་གིས་རྒྱ་གཞུང་ལ་ངོ་རྒོལ་ཤུགས་ཆེན་བྱས་པ་ནས་མགོ་བཙུགས་ཏེ་ད་བར་ངོ་རྒོལ་སྔ་རྗེས་སུ་བྱུང་ཡོད་སྟབས། རྒྱ་གཞུང་གིས་དུས་རྒྱུན་འབོ་ར་དགོན་གྲོང་གཉིས་ལ་དམ་དྲག་ནན་མོ་བྱེད་ཀྱི་ཡོད་འདུག

གསར་འགོད་པ། བནྟེ་སྐྱབས།