ལྷ་གསོལ་དང་ལྐོག་ཟ་གཉིས་འགལ་ཟླ་རེད།

ལྡི་ལིར་རྟེན་གཞི་བྱས་པའི་ཀུན་ཕན་ཐེབས་རྩ་ཚོགས་པའི་གོ་སྒྲིག་འོག ཟླ་འདིའི་ཕྱི་ཚེས་ ༢༣ ནས་ ༢༥ ཉིན་བར་རྒྱལ་ས་ལྡི་ལའི་ཨ་ཤོ་ཀ་གསོལ་མགྲོན་ཁང་དུ། ༸གོང་ས་མཆོག་གིས་རྒྱ་གར་གནད་ཡོད་མི་སྣ་ ༣༠༠ ལྷག་ལ་བདེན་བཞིའི་བཀའ་ཆོས་བསྩལ་ཡོད་འདུག་ལ། གསུང་ཆོས་མགོ་འཛུགས་མ་གནང་གོང་༸གོང་ས་མཆོག་གིས་ཆོས་ཞུ་བ་ཚོར་རྒྱ་གར་གྱི་ལྐོག་ཟ་རུལ་སུངས་སྐོར་ལ་བཀའ་སློབ་བསྩལ་འདུག

༸གོང་ས་མཆོག་གིས་བཀའ་སློབ་བསྩལ་དོན། “ ཆོས་ཁས་ལེན་མཁན་དང་མི་ལེན་མཁན་སུ་ཡིན་རུང་སོ་སོ་ཁོ་ནའི་ཆེད་བསམ་བློ་བཏང་སྟེ་མི་ཚེ་བསྐྱལ་ན།ཕུགས་རྒྱང་རིང་པོའི་ཐོག་སྤྱི་ཚོགས་ནང་གྲུབ་འབྲས་ངན་པ་འབྱུང་རྒྱུའི་ཉེན་ཁ་ཡོད། རྒྱ་གར་ནི་འཚེ་བ་མེད་པའི་ལྟ་གྲུབ་ཉམས་ལེན་བྱེད་མཁན་ཞིག་ཡིན་སྟབས།བོད་པ་ཚོས་ནམ་རྒྱུན་རྒྱ་གར་ནི་དགེ་རྒན་ལ་ངོས་འཛིན་བྱེད་ཀྱི་ཡོད་ལ། ང་རང་གིས་རྒྱ་གར་ནི་འཛམ་གླིང་གི་དགེ་རྒན་ཞིག་ཀྱང་རེད་བསམ་གྱི་ཡོད། ཡིན་ནའང་། རྒྱ་གར་གྱི་མི་མང་པོ་ཞིག་གིས་ཐེ་ཚོམ་མེད་པར་ལྐོག་ཟ་རུལ་སུངས་བྱེད་ཀྱི་ཡོད་པ་རེད།ལྐོག་ཟ་རུལ་སུངས་བྱེད་མཁན་དེ་དག་གིས་ཞོགས་པར་ལྷ་ལ་གསོལ་བ་འདེབས་ཀྱི་ཡོད་ནའང་། དོན་དངོས་ཐོག་ལྐོག་ཟ་རུལ་སུངས་དང་ལྷ་ལ་གསོལ་བ་སྨོན་ལམ་འདེབས་པ་གཉིས་འགལ་ཟླ་ཆགས་ཡོད། མི་དེ་དག་གིས་ཡང་ན་དཀོན་མཆོག་ཁས་བླངས་ཏེ་ལས་དོན་རྣམས་དྲང་པོ་དྲང་བཞག་བྱ་དགོས་པ་རེད། ཡང་ན་དཀོན་མཆོག་ཁས་མ་བླངས་པར་ལྐོག་ཟ་རུལ་སུངས་བྱ་རྒྱུ་དེ་རེད།རྒྱ་གར་ལ་རང་བཙན་ཐོབ་སྟེ་ལོ་ངོ་ ༦༠ ལྷག་འགྲོ་གི་ཡོད་སྟབས། རྒྱ་གར་མི་མང་གིས་ད་འགྲིག་སོང་བསམ་བསྡད་ན་ནོར་འཁྲུལ་ཆགས་ཡོད། རྒྱ་གར་དུས་ཚོད་དང་སྤྱི་ཚོགས་ཀྱི་འགྱུར་འགྲོས་དང་བསྟུན་ཏེ་འགྲོ་དགོས་པ་མ་ཟད།གོ་སྐབས་དམ་འཛིན་དང་ཉེན་ཁར་གདོང་ལེན་བྱ་རྒྱུ་དེ་བས་ཀྱང་ཧ་ཅང་གལ་ཆེན་ཆགས་ཡོད་ ” ཅེས་གསུངས་འདུག

མཇུག་ཏུ་༸གོང་ས་མཆོག་གིས་ཆོས་ཞུ་བ་ཚོར་སྒྲོལ་དཀར་གྱི་ཚེ་དབང་ཡང་གནང་ཡོད་འདུག