ཁ་སང་རྒྱལ་ས་ལྡི་ལིར་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་འཇམ་དཔལ་ཡེ་ཤེས་ལགས་ཀྱིས། དོན་ཚན་ ༥ ཅན་གྱི་ཞལ་ཆེམས་ཡི་གེ་ཞིག་བཞག་འདུག
དེ་རིང་ཕྱི་ཚེས་ ༢༧ རྒྱལ་གཅེས་དཔའ་བོ་འཇམ་དཔལ་ཡེས་ལགས་ཀྱིས་བཞག་པའི་དོན་ཚན་ ༥ ཅན་གྱི་ཞལ་ཆེམས་ཡི་གེ་ཞིག རྒྱལ་ས་ལྡི་ལི་བསམ་ཡས་གླིང་བོད་མིའི་གཞིས་སྒར་གྱི་རྩིག་ངོས་དག་དང་། རྒྱ་སྤྱིའི་གནས་འཕྲིན་དྲ་རྒྱ་ངོ་དེབ་སོགས་ཀྱི་སྟེང་དུ་སྦྱར་འགྲེམས་བྱས་འདུག་པས། འདི་ག་གསར་འགོད་པས་རྒྱལ་གཅེས་དཔའ་བོ་ཁོང་གི་ཞལ་ཆེམས་དེ་ཅི་ལྟར་ལག་སོན་བྱུང་ཡོད་མེད་ཐད། ཁོང་གི་གྲོགས་པོ་བཀྲ་ཤིས་དོན་འགྲུབ་ལགས་སུ་སྐད་དྲིས་སྐབས། ཞལ་ཆེམས་ཡི་གེ་དེ་ནི་དེ་རིང་སྔ་དྲོ་རྒྱལ་གཅེས་དཔའ་བོ་ཁོང་གི་སྤུན་མཆེད་ཚེ་རིང་ལོ་བརྒྱ་ལགས་ཀྱིས་རྙེད་སོན་བྱུང་སྟེ་ལྡི་ལི་ས་གནས་གཞོན་ནུ་ལ་ཕུལ་བ་ཞིག་ཡིན་འདུག
དོན་ཚན་ ༥ ཅན་གྱི་ཞལ་ཆེམས་ཡི་གེ་དེའི་ནང་། “ གཅིག འཛམ་གླིང་ཞི་བདེ་དེད་དཔོན་༸སྤྱི་ནོར་༸གོང་ས་སྐྱབས་མགོན་ཆེན་པོ་སྐུ་ཚེ་ཁྲི་ཕྲག་ནས་ཁྲི་ཕྲག་བརྟན་པར་ཤོག བོད་ལ་གདན་འདྲེན་ཞུ་དགོས། ཤ་རུས་གདོང་རྒྱུད་གཅིག་པའི་སྤུན་ཟླ་ཚོ་མཉམ་འཛོམས་བྱས་ནས། བོད་རྒྱལ་ཁབ་ཆེན་པོའི་རྒྱལ་གླུ་ཕོ་བྲང་པོ་ཏ་ལའི་མདུན་དུ་འབྲུག་སྒྲ་གྲགས་པ་ནང་བཞིན་ཡོང་བའི་སྨོན་ལམ་དང་ཡིད་ཆེས་བརྟན་པོ་ཡོད། གཉིས། སྤུན་ཟླ་ཚོ། མ་འོངས་བདེ་བ་དང་མདུན་ལམ་བསམས་ན་ལ་རྒྱ་དགོས། ལ་རྒྱ་ནི་མི་རིགས་ཤིག་གི་བློ་སྲོག་ཡིན། ད་དུང་དྲང་བདེན་འཚོལ་བའི་སྤོབས་པ་ཡིན། མ་འོངས་བདེ་བའི་སྣ་འདྲེན་ཡང་ཡིན། སྤུན་ཟླ་ཚོ། འཛམ་གླིང་མི་མང་འདྲ་མཉམ་འཚོལ་བའི་བདེ་སྐྱིད་བསམ་ན། ལ་རྒྱ་ཟེར་བའི་ཚིག་འདི་སེམས་ལ་བཅངས་དགོས། བྱ་བ་ཆེ་ཆུང་སོགས་ལ་འབད་བརྩོན་གནང་དགོས། སྤྱིར་ལ་རྒྱ་ནི་བདེན་རྫུན་འབྱེད་བའི་ཤེས་རབ་ཡིན། གསུམ། རང་དབང་ནི་སྲོག་ལྡན་ཡོངས་ཀྱི་བདེ་སྐྱིད་གཞི་མ་ཡིན། རང་དབང་མེད་ན་རླུང་ནང་མར་མེ་འབར་བ་ནང་བཞིན་ཡིན། བོད་མི་ས་ཡ་དྲུག་གི་ཁ་ཕྱོགས་འདྲ་བོ། ཆོས་ཁ་གསུམ་གྱི་སྤྲུན་ཟླ་ཚོས་ནུས་ཤུགས་གཅིག་ཏུ་བསྒྲུབ་པ་ལ་འབྲས་བུ་ཐོབ་པ་ང་ཚོས་ཤེས་གསལ་རེད། སེམས་ཤུགས་མ་ཆགས་རོགས། བཞི། གུས་པས་བརྗོད་པ་ནི་བོད་མི་ས་ཡ་དྲུག་གི་གནས་དོན་ཞིག་ཡིན། མི་རིགས་ཀྱི་མཐའ་བརྩོད་སྐབས་དགོས་པ་ནི། དཔའ་འབྱོར་ཡོད་ན་བེད་སྤྱོད་གཏང་བའི་དུས་ཚོད་རེད། ཡོན་ཏན་ཡོད་ན་ནུས་པ་སྒྲིལ་དགོས་པའི་ཛ་དྲག་གི་དུས་ཚོད་ལ་སླེབས་པ། སྲོག་ཡོད་ན་རང་སྲོག་བློས་གཏང་བའི་ཉིན་མོ་རེད་དྲན་གྱི་ཡོད། དུས་རབས་ཉི་ཤུ་རྩ་གཅིག་ནང་ལ་མི་ལུས་རིན་ཆེན་མེ་ལ་འཕུལ་བ་ནི། འཛམ་གླིང་མི་མང་ལ་བོད་མི་ས་ཡ་དྲུག་གི་སྡུག་བསྔལ་དེ་འགྲོ་བ་མིའི་ཐོབ་ཐང་འདྲ་མཉམ་མེད་པའི་རྟགས་མཚན་ཡིན། ཤ་ཚ་སྙིང་རྗེ་ཡོད་ན་ཉམས་ཆུང་བོད་མི་ལ་གཟིགས་རོགས་གནང་། ལྔ། ང་རང་ཚོའི་ཕ་མའི་ཆོས། རིགས་པའི་གཞུང་ལུགས་དང་སྐད་ཡིག་སོགས་ལ་རང་དབང་དགོས། འཛམ་གླིང་མི་མང་ཐོབ་ཐང་འདྲ་མཉམ་དགོས། འཛམ་གླིང་མི་མང་ང་ཚོའི་རྒྱབ་ཏུ་ལངས་ཤོག བོད་ཀྱི་བདག་པོ་བོད་མི་ཡིན། བོད་རྒྱལ་ལོ།” ཞེས་བྲིས་འདུག
གཞན་ཡང་། ཞལ་ཆེམས་ཡི་གེ་དེའི་མཇུག་ཏུ་རྟའུ་འཇམ་དཔལ་ཡེ་ཤེས་ནས་ཕུལ་ཞེས་རྒྱལ་གཅེས་དཔའ་བོ་ཁོང་གི་མཚན་བཀོད་ཡོད་པ་མ་ཟད། ཡི་གེ་དེའི་སྟེང་ཕྱོགས་མཐའ་ཟུར་དུ་ཕྱི་ལོ་ ༢༠༡༢ ཟླ་ ༣ ཚེས་ ༡༦ ཉིན་བྲིས་པའི་ཟླ་ཚེས་ཀྱང་གསལ་བོར་འཁོད་འདུག གནས་ཚུལ་མཁོ་འདོན་པ་རྨེའུ་དཀོན་རྒྱམ་ལགས་ཀྱིས་རྒྱལ་གཅེས་དཔའ་བོ་ཁོང་གི་གྲོགས་པོ་བཀྲ་ཤིས་དོན་གྲུབ་ལགས་སུ་ཁ་བརྡ་བརྒྱུད་ཤེས་རྟོགས་བྱུང་བ་ལྟར་ན། རྒྱལ་གཅེས་དཔའ་བོ་ཁོང་གིས་རང་ལུས་མེར་བསྲེགས་ཀྱིས་རྒྱ་གཞུང་ལ་ངོ་རྒོལ་བྱ་འཆར་གྱི་བསམ་བློ་སྔོན་ནས་བཏང་ཟིན་ཡོད་པར་མ་ཟད། ཁོ་རང་གང་ཞིག་ལ་ཕེབས་དགོས་ཚུལ་དང་ཉིན་འགར་ཕྱིར་སླེབས་ཐུབ་ཀྱི་མེད་སྐོར་གསུངས་ཏེ། རང་ཉིད་ཀྱི་སྒོར་མོ་རྣམས་ཀྱང་ཁོང་གི་སྤུན་མཆེད་ལ་སྤྲད་དེ་སྔོན་ནས་གྲ་སྒྲིག་བྱས་ཟིན་ཡོད་འདུག
རྒྱལ་གཅེས་དཔའ་བོ་འཇམ་དཔལ་ཡེ་ཤེས་ལགས་ཀྱི་སྐུ་གཟིགས་ཀྱི་བརྒྱ་ཆ་ ༩༧ མེར་བསྲེགས་ཐེབས་ཡོད་སྟབས། ཁོང་གི་སྐུ་སྲོག་ཉེན་ཁ་ལས་སྐྱོབ་ཐུབ་རྒྱུར་སྨན་ཁང་ལ་གདེང་ཚོད་མེད་པར་གྱུར་ཡོད་འདུག ཡིན་ནའང་། ད་ལྟའི་ཆར་རྒྱལ་གཅེས་དཔའ་བོ་ཁོང་སྐུ་གྲོངས་མི་འདུག
རྒྱལ་གཅེས་དཔའ་པོ་དཔའ་མོ་རྣམས་ཀྱི་ལ་རྒྱ་དང་སྙིང་སྟོབས་ལ་ཧ་ལས་ཡག་རེད་དེ། ལུས་སྲེག་གི་ཐབས་ལམ་འདི་ཡག་པོ་རེད་མི་འདུག་པའི་བོད་ཕྱི་ནང་གཉིས་ལ་བཞུགས་པའི་བོད་མི་རྣམས་ཀྱི་མཚམས་འཇོག་གནང་བའི་རེ་བ་ཡོད།
།གཅེས་པའི་ལུས་ལ་མེ་ཡི་མཆོད་འབུལ་བྱས། །རིན་ཆེན་ཚེ་སྲོག་ལ་རྒྱའི་ཆེད་དུ་དོར། །རེ་འདུན་ཞལ་ཆེམས་ཕྱིས་རབས་པ་ལ་བཞག །དཔའ་བོ་ཁྱེད་ཉིད་ཕྱི་མའི་ཡུལ་དུ་གཤེགས། །དཔའ་བོའི་ཞལ་ཆེམས་ཡིད་ལ་བསམ་པ་ན། །བཟོད་མེད་སྐྱོ་བས་མིག་ལ་མཆི་ཞགས་འཁོར། །མི་འགྱུར་རྡོ་རྗེ་བྲག་གི་རི་མོ་བཞིན། །ང་ཚོས་སྙིང་གི་རུས་པར་འབྲི་ངེས་ཡིན། །སྒང་པ་བོད་ཀྱི་གླིང་གི་དཔའ་ཐུལ་ཚོའི། །ཁྲག་དང་རུས་ཀྱིས་བརྒྱུད་པའི་ཕྱིས་རབས་པར། །རང་གི་ལུས་སྲོག་ཐེངས་མ་སྟོང་ཕྲག་ལ། །གཏོང་དགོས་བྱུང་ནའང་ཞུམ་པ་ག་ལ་མཆིས། །
རང་གིས་མ་འཇོན་ཀྱང་དཔའ་བོ་ཁྱེད་ཚོར་རྗེས་དྲན་བྱ་རྒྱུ་བརྗེད་སོང་ན་ང་མྱི་མ་རེད། ཨ་རོ་ཆི་ག་འགྱུར་མེད་བསྟན་འཛིན་ཟེར་ནོ་དེ་སྙན་ངག་རྐུ་མཁན་དེ་མིན་འགྲོ།
དཔའ་བོ་ཁྱེད་ཀྱིས་ཞལ་ཆེམས་སོགས་ང་ཚོའི་བོད་མི་ཡོད་དོ་ཅོག་གི་ལག་ལེན་འཁེལ་ཐུབ་པའི་རེ་བ་ཡོད།
འགྱུར་མེད་བསྟན་འཛིན་ཞེས་པའི་མི་འདི་ལ་ཚང་མས་གཟབ་གཟབ་བྱོས་རོགས། ག་དུས་ཡིན་ན་སྐད་ཆ་འདྲ་མིན་བཤད་མཁན་ཞིག་རེད།
སྙིང་སྟབས་ཀྱི་མེ་ལྩེ་འཛིམ་གླིང་གང་ས་བསྐྱོད་བཞིན་པའི་དུས་འདིར། །
དཔའ་བོ་དཔའ་མོ་རྣམས་་དང་གདུང་རྒྱུད་གཅིག་ལས་ཆགས་པའི་སྐྱ་སེར་ཀུན་གྱིས། །
དུས་དེ་རིང་ནས་ང་ཚོའི་བདེན་མཐའ་མ་སེལ་བར་ཡོངས་ཀྱིས་རང་ནུས་ཅི་ཅོག་གིས། །
ལས་འགན་གང་མང་ཞིག་ལ་མཉམ་ཞུགས་གནང་རོགས་ཞེས་སྙིང་ནས་འབོད། །
༡ ་ལན་གཅིག་བརྙེད་པའི་དལ་རྟེན་དང།།
ལོངས་སྤྱོད་གཉེན་ཉེ་ཀུན་ལ་ཡང།།
ཞེན་ཆགས་མེད་པར་རང་རིགས་ཀྱི།།
བདེན་དོན་ཆེད་དུ་རྟེན་འདི་བསྔོས།།
༢ གང་གི་ཤུལ་བཞག་ཞལ་ཆེམས་ལ།།
ཀུན་གྱིས་གཟིགས་ནས་སེམས་ཁུང་དུ།།
ནམ་ཡང་ཉམས་མེད་གནས་གྱུར་ནས།།
འབད་བརྩོན་གང་ཙམ་གནང་བར་འོས།།
༣ ཆོལ་ཁ་ཆོས་ལུགས་རེས་མེད་ཅེས།།
ཁ་གཡང་ཙམ་གྱིས་མི་ཕན་པར།།
རྒྱུན་གྱི་ལུས་ངག་སྤྱོད་པ་ཀུན།།
དོན་དམ་རེས་མེད་ཕྱོགས་ལ་འབད།།
༤ ཁ་བརྡ་ཟིན་བྲིས་ཀུན་གྱི་ངོར།།
རྒྱུ་གཏོང་ལུས་གཏོང་ལ་རྒྱ་དགོས།།
ཞེས་སོགས་བྲིས་པ་མང་མོད་ཀྱང།།
དོན་དུ་ལག་བསྟར་ཉུང་བར་ངེས།།
རྒྱལ་གཅེས་དཔའ་བོ་ཁོང་གིས་ཞལ་ཆེམས་ཚན་པ་གཉིས་བའི་ནང་དུ་ལ་རྒྱ་ནི་མ་འོངས་བའི་བོད་མི་རིགས་ཀྱི་མདུན་ལམ་དང་ཕུགས་སེམས་འཚོལ་བའི་གཞི་རྩ་ཡིན་པ་དང་། ལ་རྒྱ་ནི་མི་རིགས་བླ་སྲོག་ཡིན་པ་དང་དྲང་བདེན་འཚོལ་བའི་སྤོབས་པ་ཡིན་པ་སོགས་གཙོ་བོ་བྱས་ནས་གསུངས་འདུག དེར་བརྟེན་དཔའ་བོ་ཁོང་ཉིད་མཚོན་ན་ཇི་འདྲའི་མི་རིགས་ཀྱི་ལ་རྒྱ་དང་རིགས་ཞེན་གཏིང་ཟབ་ཡོད་པ་རྟོགས་ཐུབ་ཀི ཁོང་འདི་འདྲའི་མི་རིགས་ཀྱི་ལ་རྒྱ་དང་རིགས་ཞེན་ཀྱི་དབང་གིས་ཁོང་ཉིད་ཀྱི་སྐུ་སྲོག་མི་རིགས་འདིའི་དོན་དུ་ཕུལ་བ་རེད་བསམ། དངོས་གནས་ཁོང་བཤད་པ་དོན་དངོས་རེད། དེང་སྐབས་བོད་མི་རིགས་ཀྱི་ལ་རྒྱའི་ཁྲག་དྲོད་དེ་ཇེ་སྐམ་ནས་ཇེ་སྐམ་རེད་བསམ་ཀི ཁ་ནས་ལ་རྒྱ་ཡོད་རབས་དང་རིགས་ཞེན་ཆེ་རབས་བཤད་ཀི་རེད་ཡིན་ན་ཡང་དོན་དངོས་བཤད་ཕལ་ཆེས་བ་བྲང་ཁོག་བརྒྱུད་བའི་བོད་མི་རིགས་ཀྱི་ལ་རྒྱ་དང་རིགས་ཞེན་ཟེར་བ་དེ་ཞ་བོ་ཆགས་འདུག
ཞལ་ཆེམས་ཀྱི་ནང་དོན་ལྟར་ལག་སྟར་ཐུབ་པ་བྱེད་དགོས། དེ་ལས་ད་ལས་རྒྱུ་ཅང་ལྷག་ཡོད་མ་རེད། རྒྱལ་གཅེས་པ་འཇམ་དཔལ་ཡེ་ཤེས་ལ་སྙིང་ནས་གུས་འདུད་ཞུ། བོད་རྒྱལ་ལོ། རྒྱལ་གཅེས་པའི་སྙིང་སྟོབས་རྒྱལ་ལོ།
རང་ལུས་མེར་བསྲེགས་པའི་སྙིང་སྟོབས་ལ་ཡིད་རངས་ཡོད་ཀྱང་འདི་ལ་གྲུབ་འབྲས་ཤིག་ཐོན་པའི་ཡིད་ཆེད་མེད་ངས་སྔོན་མ་ནས་བཤད་མྱོང་།
ཤུལ་ལུས་ང་ཚོ་ལ་དཔའ་བོ་འདི་དག་ལྟ་བུའི་སྙིང་སྟོབས་མེད་ན་ཡང། དཔའ་བོ་ཁོང་ཁོང་འདྲ་བ་དག་གི་ཞལ་ཆེམས་གཞིར་བྱས་ཏེ། བདེན་པ་རྩོད་པའི་སེམས་ཤུགས་ངེས་པར་དུ་དགོས།
རྒྱལ་གཅེས་དཔའ་བོ་འཇམ་དཔལ་ཡེ་ཤེས་ལགས་ཀྱིས་བོད་མི་རིགས་ཀྱི་ཆེད་དུ་བློས་གཏོང་འདི་འདྲ་གནང་བར་བཀའ་དྲིན་རྗེས་དྲན་ཞུ་བཞིན་ཡོད།
གསར་འགོད་པ་ལགས།
གུས་པས་རྩོམ་ཡིག་༼མགོ་རུལ་བ་སྣ་བས་མི་ཚོར།༽ཞེས་པ་ཞིག་ཉིན་ཤས་གོང་ནས་བསྐུར་བ་ཡིན་ད་དུང་བཏོན་མ་སོང་། རྒྱུ་མཚན་ཞིག་གསུངས་རོགས་གནང།
ཞལ་ཆེམས་འདི་ཡིག་རིགས་མང་པོ་ལ་བསྒྱུར་ཏེ་གང་སར་བཀྲམ་དགོས་ལ། ང་ཚོས་ངེས་པར་དུ་ཁོང་གི་ཐུགས་རེ་དེ་དག་གཙུགས་སུ་འཛིན་རྒྱུ་དང་། ད་དུང་ཁོང་གི་སྐུ་མདུན་ལ་སོང་ནས་སྐུ་ཉིད་ཀྱིས་ཐུགས་ཚགས་གནང་མི་དགོས་ང་ཚོས་སྐུ་ཉིད་ཀྱི་ཞལ་ཆེམས་ཡི་གེ་ནང་བཞིན་ཧུར་ཐག་བྱེད་རྒྱུ་ཡིན་ཚུལ་ཞུ་དགོས་པ་རེད། ད་དུང་གང་མགྱོགས་དགོས་ང་ཚོའི་འདོད་དོན་འགྲུབ་ཡོང་གི་རེད་ལ། ང་ཚོ་ནམ་ཡང་སེམས་ཤུགས་ཆག་མེད་ཚུལ་ཡང་ཞུ་དགོས་པ་རེད།
དྲ་གྲོགས་ཇོ་རུ་ཚེ་རིང་ལགས་གནས་ཚུལ་གསལ་བཤད་གནང་བར་ཐུགས་རྗེ་ཆེ།
དྲ་གྲོགས་ལྗང་སྨུག་ལགས། རྒྱལ་གཅེས་དཔའ་བོ་ཁོང་ད་ལྟ་ད་དུང་འདས་གྲོངས་སུ་གྱུར་མི་འདུག དེའི་སྐོར་གྱི་གནས་ཚུལ་གསར་འགྱུར་སྔོན་མའི་ནང་བཀོད་ཟིན་སྟབས་བསྐྱར་མ་བྱས་པ་ཡིན། ཁོང་གི་ཞལ་ཆེམས་དེ་ག་དུས་དྲིས་མིན་གྱི་གནས་ཚུལ་དེ་འབྲེལ་ཡོད་མི་སྣར་ཁ་པར་བརྒྱུད་སྐད་ཆ་དྲིས་སྐབས། སྔོན་ནས་བྲིས་ཟིན་ཡོད་པར་བརྗོད་བྱུང་ལ། ཞལ་ཆེམས་ཡི་གེ་ཡི་ཤོག་ལྷེ་རང་གི་སྟེང་ཟུར་དུ་ཟླ་ཚེས་གསལ་བོར་བཀོད་འདུག
དུས་བབ་རྩོམ་སྒྲིག་པ་ལགས་སུ་བཀའ་འདྲི་ཞུ་རྒྱུ་ཞིག་ལ། རྒྱལ་གཅེས་དཔའ་བོ་ཁོང་ད་ལྟ་གྲོངས་ཚར་རེད་བས། ཁོང་ཞལ་ཆེམས་རེད་ཟེར་བའི་ཡི་གེ་དེ་སྤྱི་༣ ཚེས ༡༦ ཉིན་བྲིས་པ་རེད་འདུག་བས། ཞིབ་ཚགས་པོ་དང་ཁ་གསལ་བོ་བཀོད་རོགས་ཞུ།
དཔའ་བོའི་ཞལ་ཆེམས་བཞིན་ང་ཚོ་གཅིག་ཏུ་བསྒྲིལད་ཏེ་ལག་ལེན་དུ་རེམ་འགྲོ། བོད་རྒྱལ་ལོ།།
ད་ལྟ་བོད་གཞུང་དྲ་ལམ་བརྒྱུད་དེ་འདིར་སླེབས། ཞུགས་འབུལ་སོགས་ཀྱི་གནས་ཚུལ་ཅི་ཡང་གོ་ཐལ་མི་འདུག་པས་ཚང་མ་མགྱོགས་ཙམ་ཕེབས་དང་།
བོད་པའི་གསར་འགྱུར་བརྒྱུད་ལམ་ཁག་ཏུ་བཀོད་པ་འདི་སེམས་ཤུགས་སྤར་སྤྱད་ཅིག་ལས་ཕན་ཐོག་གཞན་མེད་པ་རེད། དེ་བས་དང་པོར་རྒྱལ་སྤྱིའི་གསར་ལམ་ཁག་ཏུ་བཀྲམས། དེ་ནས་འདི་དག་ཏུ་བཀྲམས་པ་ཡིན་ན་ཡག་པོ་ཡོང་གི་རེད། དཔེར་ན་ཁ་སང་རེབ་གོང་གི་མེར་སྲེག་ལས་འགུལ་དེ་ཉམས་མྱོང་བླངས་ཆོག་པ་ལྟ་བུ་ཞིག་རེད། དཔའ་བོ་ཁོང་གི་འདོད་དོན་འགྲུབ་པའི་སྐྱབས་སྨོན་བཅས།