གཟའ་མིག་དམར་ཉིན་སེ་རི་ཡའི་ནང་མུ་མཐུད་ཟིང་འཁྲུག་ཤུགས་ཆེར་བྱུང་སྟེ་མི་༨༠ ཙམ་དམར་གསོད་བཏང་ཡོད་པའི་ཁྲོད་ཀྱི་ཕལ་ཆེ་བ་མི་སེར་དཀྱུས་མ་རྐྱང་ཡིན་འདུག
ཁ་སང་ཕྱི་ཚེས་ ༣ ཉིན་སེ་རི་ཡའི་ནུབ་བྱང་ཊཱ་ཧྥི་ཊཱ་ནཱ་ཛི་(Taftanaz) ས་གནས་སུ་གཞུང་དམག་དང་གྱེན་ལངས་པའི་བར་ཟིང་འཁྲུག་ཤུགས་ཆེར་བྱུང་སྟེ་མི་སེར་དཀྱུས་མ་ ༥༨ ཙམ་རྐྱེན་ལམ་དུ་བཏང་ཡོད་པ་དང་། དེ་བཞིན་ཧོམ་སི་(Homs) གྲོང་ཁྱེར་ནང་མི་ ༡༥ ཙམ་རྐྱེན་ལམ་དུ་བཏང་ཡོད་པ་མ་ཟད། ས་གནས་གཞན་ཁག་ཅིག་ཏུ་ཡང་དམར་གསོད་དོན་རྐྱེན་གྱི་གནས་ཚུལ་བྱུང་ཡོད་ཀྱང་གྲངས་ཚད་ཁ་གསལ་ཤེས་རྟོགས་བྱུང་མི་འདུག ཐེངས་འདིའི་ཟིང་འཁྲུག་ཁྲོད་དམག་མི་མང་པོ་ཞིག་ཀྱང་ཤི་རྨས་ཐེབས་ཡོད་འདུག
ཚེས་ ༣ ཉིན་གྱི་དམར་གསོད་དོན་རྐྱེན་དེ་ནི་སེ་རི་ཡའི་སྲིད་འཛིན་བྷ་ཤར་གྱིས་ཀོ་ཧྥེ་ཨན་ནན་བརྒྱུད་ཨ་རབ་མཐུན་ཚོགས་ཀྱི་གྲོས་དོན་ལ་ཁས་ལེན་ཐོག ཟླ་འདིའི་ཕྱི་ཚེས་ ༡༠ ནང་ཚུད་སེ་རི་ཡའི་གྲོང་ཁྱེར་ཁག་ནང་ཡོད་པའི་གཞུང་གི་དྲག་ཆས་དམག་མི་ཕྱིར་འཐེན་བྱ་རྒྱུ་དང་། གཞུང་དང་གྱེན་ལངས་ཤོག་ཁག་བར་ཞི་འགྲིག་གྲོས་མོལ་བྱ་རྒྱུར་ཁས་ལེན་བྱས་པའི་རྗེས་སུ་བྱུང་པ་ཞིག་ཡིན་སྟབས། ཨ་རིའི་གཞུང་གིས་སྲིད་འཛིན་བྷ་ཤར་གྱིས་ཞི་འགྲིག་གྲོས་མོལ་བྱ་རྒྱུ་དང་དྲག་ཆས་དམག་མི་ཕྱིར་འཐེན་བྱ་རྒྱུའི་ཁས་ལེན་ལ་རྩིས་མེད་ཐོག མང་ཚོགས་སྟེང་མུ་མཐུད་དྲག་གནོན་བྱས་པའི་སྐྱོན་བརྗོད་ཤུགས་ཆེར་བྱས་ཡོད་འདུག
ད་ལྟའི་ཆར་རྒྱལ་ཚོགས་དྲུང་ཆེ་ཟུར་པ་ཀོ་ཧྥེ་ཨན་ནན་ཨ་རབ་མཐུན་ཚོགས་དང་རྒྱལ་ཚོགས་ཀྱི་དམིགས་བསལ་ཞི་འགྲིག་འཐུས་མི་བྱས་ཏེ། ཨ་རབ་མཐུན་ཚོགས་ཀྱི་གྲོས་དོན་གཞིར་བཞག་ཐོག་གཞུང་དང་གྱེན་ལངས་ཤོག་ཁག་བར་ཞི་འགྲིག་གྲོས་མོལ་ཡོང་ཐབས་བྱེད་ཀྱི་ཡོད་པ་རེད།
མཉམ་འབྲེལ་རྒྱལ་ཚོགས་ཀྱིས་བསྒྲགས་པ་ལྟར་ན། སེ་རི་ཡའི་གྱེན་ལངས་ཟིང་འཁྲུག་བྱུང་པ་ནས་ད་ལྟའི་བར་མི་ ༩༠༠༠ ལྷག་རྐྱེན་ལམ་དུ་ཕྱིན་ཡོད་འདུག
གསར་འགོད་པ། བནྡེ་སྐྱབས།
དོན་རྐྱེན་མང་བོའི་རྗེས་སུ་བྱ་མང་བོ་འབྱུང་གི་རེད་ལ། བྱ་བ་གང་ཡིན་ཀྱང་དྲང་བདེན་དང་མི་མང་གི་བདེ་སྐྱིད་ཀྱི་ཆེད་དུ་རང་སྲོག་བློས་གཏོང་གནང་མཁན་ཚོ་དྲན་བཞིན་དུ་སྒྲུབ་དགོས།