དབུས་གཙང་ཆོལ་ཁའི་ཚོགས་ཆེན།

ད་ལོའི་ཕྱི་ཟླ་ ༩ པའི་ནང་ངྷ་སར་དབུས་གཙང་ཆོལ་ཁའི་ཚོགས་ཆེན་བསྐང་སྟེ། ༸རྒྱལ་བའི་སྐུ་ཕྱཱ་དང་བོད་ནང་རང་ལུས་མེར་བསྲེཊ། བཀའ་ཤག་གསར་པའི་སྲིད་བྱུས་ལ་རྒྱབ་སྐྱོར་གནང་ཕྱོགས་ཐོག་གྲོས་བསྡུར་གནང་རྒྱུ་ཡིན་འདུག

དེ་རིང་ཕྱི་ཚེས་ ༡༧ ཉིན་གྱི་སྔ་དྲོའི་ཆུ་ཚོད་ ༡༡ སྟེང་ངྷ་ས་མེག་གྷན་ཆིག་སྒྲིལ་ཚོགས་པའི་ཚོགས་ཁང་དུ། དབུས་གཙང་ཆོལ་ཁའི་སྤྱི་ཁྱབ་རྒྱུན་ལས་ཁང་གིས། ད་ལོའི་ཕྱི་ཟླ་ ༩ པའི་ནང་དབུས་གཙང་དབུས་ས་གཉིས་ཀྱི་འགན་འཛིན་ལྷན་ཚོགས་ཀྱི་ཚོགས་ཆེན་བསྐང་རྒྱུའི་གསལ་བསྒྲགས་སྤེལ་ཡོད་ཅིང་། ཚོགས་ཐོག་ཏུ་དབུས་རྒྱུན་ཚོགས་གཙོ་སྤྱི་འཐུས་ཟླ་བ་ཚེ་རིང་ལགས་ཀྱིས་ཐེངས་འདིའི་ཚོགས་འདུའི་དམིགས་ཡུལ་ནི། ༸རྒྱལ་བའི་སྐུ་ཕྱཱ་དང་བོད་ནང་རང་ལུས་མེར་བསྲེགས་གཏོང་བཞིན་པའི་གནས་སྟངས།  ༸གོང་ས་མཆོག་གིས་སྲིད་དབང་རྩིས་སྤྲོད་གནང་རྗེས་བོད་མིའི་སྒྲིག་འཛུགས་ལ་རྒྱབ་སྐྱོར་གནང་ཕྱོགས་ཐོག་གྲོས་བསྡུར་གནང་རྒྱུ་ཡིན་སྐོར་བརྗོད་སོང་།

གསལ་བསྒྲགས་དེའི་ནང་འཁོད་དོན་ལྟར་ན། ད་ཐེངས་ཀྱི་ཚོགས་འདིའི་གྲོས་གཞི་ཁག་ནི་༸གོང་ས་མཆོག་གི་སྐུའི་ཉེན་སྲུང་སྐོར་དང་། བོད་ནང་གི་ཛ་དྲག་གནས་སྟངས་ཐོག་ལས་འགུལ་སྤེལ་ཕྱོགས། དབུས་གཙང་མི་མང་གིས་ལོ་ ༣༦༩ རིང་དགའ་ལྡན་ཕོ་བྲང་ལ་བློ་སྙིང་མཆིན་གསུམ་གཏད་དེ་ཞབས་འདེགས་ཞུས་ཡོད་པ་ལྟར། ད་དུང་ཡང་དབུས་བོད་མིའི་སྒྲིག་འཛུགས་ལ་དབུ་འོག་དཔུང་འདེགས་ཞུ་ཕྱོགས། དབུས་གཙང་སྒྲིག་འཛུགས་ཚགས་ཚུད་སྲ་བརྟན་གཏོང་ཐབས། བོད་ཀྱི་སྐད་ཡིག་རིག་གཞུང་སྤྱི་དང་། བྱེ་བྲག་དབུས་གཙང་ཆོལ་ཁའི་ལུང་ཚན་སོ་སོའི་སྐད་ཡིག་གོམས་སྲོལ་དང་བཅས་པའི་ལོ་རྒྱུས་ཕྱོགས་སྒྲིག  དབུས་གཙང་མི་རབས་རྒན་པ་དང་བགྲེས་ཡོལ་ལས་བྱེད་སོགས་བྱས་རྗེས་ཅན་གྱི་ལོ་རྒྱུས་ཕྱོགས་སྒྲིག་དང་གཞོན་སྐྱེས་ཚོར་ལམ་སྟོན་གནང་ཕྱོགས་སྐོར་གྲོས་བསྡུར་གནང་རྒྱུ་ཡིན་འདུག

ཐེངས་འདིའི་ཚོགས་ཆེན་ལ་ཕེབས་མཁན་དག་ནི་དབུས་གཙང་ཆོལ་ཁའི་ཁོངས་གཏོགས་སྐྱིད་སྡུག་ཚོགས་པ་ཁག་གི་འཐུས་མི་དང་། མི་རབས་རྒན་པ། བཀའ་ཟུར་དང་གཞུང་ཞབས་ཟུར་པ། སྤྱི་ཟུར། དབུས་རྒྱུན་དང་ས་གནས་རྒྱུན་ལས་ཟུར་པ་སོགས་ཡིན་འདུག

དབུས་གཙང་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་ནི་ ༡༩༨༢ ལོར་གསར་དུ་བཙུགས་པ་དང་། ད་ཆར་ཚོགས་པ་འདིར་རྒྱ་བལ་འབྲུག་གསུམ་དང་། སུད་སི། ཨ་རི་བཅས་ཀྱི་ནང་ཡན་ལག་ཚོགས་པ་ ༢༥ ཙམ་ཡོད་འདུག

གསར་འགོད་པ། དཔལ་ལྡན།