བོད་
འདས་པའི་ལོ་བཅུ་གྲངས་ཤིག་གི་རིང་བོད་རྒྱ་འབྲེལ་མོལ་གྱི་གོས་རྐྱང་འོག དམར་པོ་རྒྱ་དང་ཆོས་ལྡན་བོད་གཉིས་ཀྱིས་རེ་བའི་ལག་པ་གཏོང་རེ་དང་འགལ་ཟླའི་ཁ་མཆུ་བདར་རེ་བྱས་ཏེ། ད་ལྟའི་བར་རྒྱལ་སྤྱིའི་མཐོང་ལམ་ནས་འགྲུལ་བཞུད་ཐེངས་དགུ་ལ་བྱས་མཐར། བོད་ཀྱི་གཞོན་སྐྱེས་ཚོ་དམར་པོ་མེ་ལ་འབར་དགོས་བྱུང་སོང་ལ། རྒྱ་ཡི་དཔོན་ཆེན་ཚོ་དམར་པོའི་ཁྲིམས་ཁར་ལྷུང་མགོ་ཚུགས་ཡོད། ད་ལྟའི་དུས་སྐབས་འདི་ནི་བོད་རྒྱ་མི་རིགས་གང་ལ་མཚོན་ནའང་། ནམ་རིང་ན་རྨི་ལམ་མང་ཞེས་པའི་དཔེ་ལྟར། ཁ་མིག་རྣ་གསུམ་སངས་དུས་དང་གློ་སྙིང་མཆིན་གསུམ་གདུ་དུས་ཤིག་ཆགས་ཡོད་ལ། ས་སྒང་འདིའི་ཆབ་སྲིད་པ་དག་གིས་ཀྱང་ཚ་ཁུ་དང་གཡེར་མ་ལག་ལ་བཟུང་སྟེ། རྨི་ལམ་དང་འཆར་གཞི་སེམས་ལ་སྙལ་ནས། མ་འོངས་པར་སེམས་ལྷོད་ལྷོད་ངང་གཉིད་ཡུར་ཆོག་པའི་དགོང་ཐུག་ཞིམ་པོ་ཞིག་འཐུང་འདོད་ཀྱི་འགྲམ་ཆུ་ལྡང་བཞིན་པའི་དུས་ཤིག་ཏན་ཏན་ཡིན་ངེས།
པེ་ཅིན་དང་དྷ་ས་གཉིས་ཀྱི་ས་ཐག་དང་སེམས་ཐག་ཧ་ཅང་རིང་ནའང་། སྟོན་མཇུག་གི་དུས་ཚིགས་འདིའི་པང་ཁ་ལ་ཚོགས་ཆེན་གཉིས་ཀྱི་མགོ་བོ་མཉམ་སྙེས་ཡོད་པ་འདིས། རྒྱབ་ལྗོངས་མི་འདྲ་བའི་སྤྱི་ཚོགས་གཉིས་ཀྱི་འགྱུར་ལྡོག་གི་དཀྱོགས་མཚམས་ན། འབར་གས་བྱེད་བཞིན་པའི་མི་རབས་གསར་པའི་སྟོབས་ཤུགས་གཉིས་གདུང་ཐུག་རྒྱག་བཞིན་པ་མངོན་ཡོད། པེ་ཅིན་ལ་མཚོན་ན་ཚོགས་ཆེན་གྱི་སྐབས་འདི་དག་ནི་ནང་ཁུལ་ཁྱོ་ཤི་ང་གསོན་གྱི་འབར་གས་ཆེན་པོ་ཞིག་གི་འོག ཁྱིམ་རྒྱུད་ཁེ་ཕན་དང་སྐབས་འཚོལ་གོ་གནས་ཀྱི་མཚོ་གཏིང་ལ་ནུབ་ཀྱིན་པའི་ཏང་གི་གྲུ་གཟིངས་ཆེན་པོ་དེའི་འཐབ་ཕྱོགས་གཅིག་གི་ལྷུ་ལག་འཐོར་མིན་གྱི་འགག་རྩ་ཞིག་ལ་སླེབས་ཡོད་སྟབས། འདི་ནི་རང་དབང་འཐབ་རྩོད་བྱེད་མཁན་བོད་དང་ཡུ་གུར། སོག་པོ་གསུམ་ལ་མཚོན་ན་དུས་རླུང་གིས་དེད་པའི་གོ་སྐབས་ཤིག་ཡིན་པར་མ་ཟད། ཁྲག་དྲི་ཐུལ་སྲིད་པའི་ཉེན་འཇིགས་ཀྱི་དུས་སྐབས་ཤིག་ཀྱང་ཆགས་སྲིད།
དེར་བརྟེན། མེ་ལྕེ་ཡི་ཚ་རླབས་དང་འགྲོགས་ཤིང་། མི་རབས་གསར་རྙིང་གི་དཀྱོགས་མཚམས་ནས་འཚོགས་ཀྱིན་པའི་དྷ་སའི་ཚོགས་ཆེན་འདི་ལའང་། གཞིས་ལུས་མི་མང་གིས་ཀྱང་རྣ་བ་ཅོར་ཅོར་དང་མིག་ཟུང་རིག་རིག་གིས་གྱེར་ཡོད་པ་ནི་བརྗོད་མ་དགོས་ལ། ཕྱོགས་ལྷུང་གིས་མིག་ཟུང་མ་སྒྲིབ་པའི་འཛམ་གླིང་གི་ཚོགས་སྡེ་དག་གིས་ཀྱང་ཁ་ལྟ་མིག་ལྟ་བྱེད་བཞིན་ཡོད་ངེས། དེར་བརྟེན། ཐེངས་འདིའི་ཚོགས་ཆེན་སྟེང་རྒད་པོ་རྒོད་མོ་འགའི་མགོ་བོ་རུབ་རུབ་དང་། གཞོན་སྐྱེས་མགོ་སྟོང་འགས་ཁ་ལྕེ་རླུང་ལ་བདར་རྗེས། སོ་སོའི་རྐུབ་ཤ་དཀྲུག་དཀྲུག་བྱེད་བཞིན་བཀྲ་ཤིས་ལོ་ལེགས་ཀྱི་ཁ་གཡང་དང་ཞལ་ངོ་འཛུམ་འཛུམ་གྱི་གྱེས་ཕྱག་ཁྲོད་ཡལ་མི་འཇུག་པར། མེ་ལ་འབར་མཁན་དང་། ཆུ་ལ་མཆོངས་མཁན། མཚོན་ལ་ཞ་མཁན་དག་གི་རྣམ་ཤེས་ཚོས་ཚོར་ཐུབ་པ་ཞིག་དང་། དཀའ་སྡུག་དང་གཉའ་གནོན་འོག་ཡོད་པའི་གཞིས་ལུས་མི་མང་གི་སེམས་ནང་གི་འདོད་དོན་དང་བསམ་འཆར་ངོ་མ་གཞི་ལ་བཞག་པའི་ཐོག་ནས། དེ་སྔོན་གྱི་ཆུ་ལོག་ལྟ་བུའི་ཚོགས་ཆེན་གྱི་འཁྲབ་སྟོན་ཙམ་མ་ཡིན་པར། ཚོགས་འདུ་ཚོགས་པའི་ཤུལ་དང་རྐང་པ་སྤོས་སའི་ལམ་ཡོད་པ་ཞིག་གནང་རྒྱུ་གནད་ཀྱི་དོན་པོ་ཡིན།
