ཇོ་ནང་འགྲོ་ཕན་ལྷན་ཚོགས་ཀྱི་ཚོགས་གཙོ་ཚངས་དབྱངས་རྒྱ་མཚོ་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། ཟླ་འདིའི་ཕྱི་ཚེས་ ༡༩ ཉིན་ཇོ་ནང་ཛམ་ཐང་དགོན་བསམ་འགྲུབ་ནོར་བུའི་གླིང་གི་ཉེ་འཁྲིས་སུ། འཛམ་ཐང་བར་མ་ཡུལ་ཚོའི་རང་ལོ་ ༢༥ ཡིན་པའི་ཆོས་འཕགས་སྐྱབས་དང་རང་ལོ་ ༢༤ ཡིན་པའི་བསོད་ནམས་གཉིས་ཀྱིས། རང་ལུས་མེར་བསྲེགས་ཀྱིས་རྒྱ་ནག་གཞུང་གིས་བོད་མི་རིགས་རྩ་མེད་དུ་གཏོང་བཞིན་པའི་དྲག་རྩུབ་ཀྱི་སྲིད་བྱུས་ལ་ངོ་རྒོལ་སྐད་འབོད་བྱས་ཏེ་སྐུ་གཤེགས་ཡོད་པ་ལྟར། ཉེ་ལམ་ཁོང་གཉིས་ཀྱིས་རང་ལུས་མེར་བསྲེགས་མ་བཏང་སྔོན་དུ་ལག་ཁྱེར་ཁ་པར་ཞིག་གི་ནང་ཁ་ཆེམས་ཞིག་བཞག་ཡོད་པ་ལག་སོན་བྱུང་སྟེ། མི་མང་པོ་ཞིག་གིས་ཁ་པར་བརྒྱུད་དེ་ཕན་ཚུན་ལ་གཏོང་རེས་བྱས་ཏེ་རྒྱ་ཁྱབ་ཏུ་འགྲོ་བཞིན་ཡོད་འདུག
ལག་སོན་བྱུང་བའི་ཁོང་གཉིས་ཀྱི་ཁ་ཆེམས་ནང་། “ ཁོང་གཉིས་ཀྱི་རང་ལུས་མེར་བསྲེགས་གཏོང་དགོས་དོན་ནི། སྤྱིར་སངས་རྒྱས་ཀྱི་བསྟན་པ་དང་སེམས་ཅན་གྱི་བདེ་སྐྱིད། བྱེ་བྲག་བོད་མི་རིགས་ཀྱི་རང་དབང་གི་ཆེད་དུ་ཡིན་ཚུལ་དང་། ཡང་ངེད་གཉིས་མི་ཡུལ་འདིར་ཕ་མ་སྤུན་མཆེད་དང་། གཉེན་ཉེ་དུ་རྣམས་དང་ལྷན་དུ་འདུག་འདོད་མེད་པ་མིན་མོད། འདུག་པའི་རང་དབང་མི་འདུག་ཅེས་དང་། དེ་བཞིན་དུ་ཁོང་གཉིས་ཀྱིས་རང་ལུས་མེར་བསྲེགས་བཏང་རྗེས་ཁོང་གཉིས་ཀྱི་ཕུང་པོ་རྒྱ་མིས་འཁྱེར་ངེས་ཀྱང་། ནང་མི་སྤུན་མཆེད་དང་སྡེ་མི་སུས་ཀྱང་དེ་ལ་བཀག་འགོག་བྱེད་མི་དགོས། ཁོང་ཚོར་ག་རེ་བྱེད་ན་བྱེད་དུ་ཆུགས། ”ཞེས་སོགས་བཀོད་ཡོད་འདུག
གནས་ཚུལ་མཁོ་སྤྲོད་པར་འབྲེལ་ཡོད་ཀྱིས་བརྗོད་དོན་ལྟར་ན། ཉེ་སྔོན་རང་ལུས་མེར་བསྲེགས་བཏང་སྟེ་འདས་གྲོངས་སུ་ཕྱིན་པའི་རྒྱལ་གཅེས་དཔའ་བོ་སྣང་གྲོལ་ལགས་དང་ཆོས་འཕགས་སྐྱབས། བསོད་ནམས་བཅས་ཀྱི་ཁ་ཆེམས་དང་དཔའ་བོའི་སྙིང་སྟོབས་སོགས་ཀྱིས་འཛམ་ཐང་གི་བོད་མི་ཚོ་གཉིད་ལས་སད་པ་ལྟ་བུར་གྱུར་ཏེ། འཛམ་ཐང་གི་ཇོ་ནང་དགོན་པ་ཁག་གཙོས་སྐྱ་སེར་དབྱེར་མེད་ཀྱིས་ཁོང་གཉིས་ལ་གདུང་སེམས་མཉམ་སྐྱེད་ཆེད་མཆོད་འབུལ་སྨོན་ལམ་འཚོགས་དང་ཚོགས་བཞིན་པ་མ་ཟད། མི་སྐྱ་ཚོས་ནང་འཛིང་དང་ནང་རྐུན་མི་བྱ་བའི་དམ་བཅའ་འབུལ་བཞིན་ཡོད་འདུག་ལ། ཕྱི་ཚེས་ ༢༣ ཉིན་བོད་མི་སྐྱ་སེར་ ༥༠༠༠ ལྷག་ཇོ་ནང་དགོན་ཆེན་དུ་འཛོམས་ཏེ། ཉེ་སྔོན་ནས་མི་མང་གིས་དགོན་པར་ཕུལ་ཡོད་པའི་མཚོན་ཆ་ཚང་མ་ མེར་བསྲེགས་བཏང་ཡོད་འདུག
གསར་འགོད་པ། དོན་གོ
སྐུ་ཞབས་ཚངས་དབྱངས་ལགས་རྒྱལ་གཅེས་དཔའ་པོ་དེ་གཉིས་ཀྱིས་ཁ་ཆེམས་ཚངས་མ་དྲྭ་ཐོག་ཏུ་འགོད་རོགས་གནང་།
ཕྱི་སྡོད་སྤུན་ཟླ་ཚོ། ང་ཚོས་ཁྲོམས་སྐོར་རེ་དང་མཆོད་འབུལ་སྨོན་ལམ་ཙམ་རེའི་རྒྱལ་གཅེས་དཔའ་བོ་དང་དཔའ་མོ་འདི་དག་ལ་གདུང་སེམས་མཉམ་བསྐྱེད་ཇི་ལྟར་ཡོང་། གླིང་ཚ་མ་བུ་གསུམ་གྱི་ཆོད་སེམས་འདྲ་བ་སུར་ཡོད་ཀྱང་དོན་ཐོག་ཏུ་འགེལ་རན་འདུག ངར་མཚོན་ན་འདི་དག་གི་ཆེད་དུ་མཆོད་འབུལ་ཙམ་དང་ཁྲོམས་སྐོར་མི་ཉུང་བ་ཙམ་ལས་གཞན་པའི་ལས་འགུལ་གང་ཡང་འཇོན་མེད། ད་ནི་འདི་ཙམ་གྱིས་ནི་ངས་གང་ཡང་མ་བྱས་པའི་ཚོར་སྣང་ཡོང་གི་འདུག
འཆར་གཞི་ལྡན་པ་ཞིག་གི་ལས་འགུལ་སྤེལ་སྟངས་དེ་མི་འདྲ་བ་འདུག
དམར་པོ་མེ་ཡིས་སྲེག་ལ་ཡ་མི་ང་།།
དམར་དམག་སྔུན་ནས་མཆོང་ལ་ཐེ་མི་ཚོམ།།
དམར་ཡག་སྟག་འདྲའི་རྒྱལ་གཅེས་སྤུན་གཉིས་ཀྱི།།
དམར་བའི་གཏམ་དེ་ཀུན་ཀྱིས་བརྗེད་མི་ཉན།།
གངས་རིའི་དབའ་རྒོད་རྣམ་གཉིས་ལ་ལྷ་ཕྱགས་གྲངས་མེད་དང་གུས་འདུད་ཞུ། ང་ཚོ་ཁ་བ་གངས་ཅན་ཡོངས་རྫོགས་ཁྱེད་གཉིས་ལྟ་བུ་ཡིན་རྒྱུ་ན་རྒྱ་དམར་མགྱོགས་ནས་མྱུར་དུ་ཕམ་ངེས་ཡིན།
སྐྱེས་པའི་མི་ལ་གྲགས་པའི་གཏམ་ཞིག་དགོས།།
དཔའ་བོའི་སྙན་གྲགས་ས་སྟེང་ཡོངས་ལ་གྲགས།།
བྱས་པའི་ལས་ལ་གྲུབ་པའི་མཐའ་ཞིག་དགོས།།
གཞི་བྱེས་མཉམ་འཛོམས་རང་དབང་ཐོབ་ངེས་ཡིན།།
གངས་ཅན་ལྗོངས་ཀྱི་ཆོས་སྲིད་བྱ་བའི་གདུགས།།
འདེགས་པའི་སྲི་ཞུར་གཏོགས་པའི་སྐྱེ་བོ་ཀུན།།
ལྷག་བསམ་རྣམ་དཔྱོད་དཔུང་པ་རབ་བརྟན་ཅིང་།།
སྐྱེ་ཀུན་ཕྱག་ན་པདྨོས་རྗེས་བཟུང་ཤོག།
ཨོཾ་མ་ཎི་པདྨེ་ཧུཾ།།
ལྟོས་དང་་་་བུ་སྙིང་སྟོབས་ཅན་པོའི་ཁ་ཆེམས་འདིས་སེམས་འགུལ་ཐེབས་སུ་བཅུགས་སོང་་་་་འཛམ་ཐང་མི་མང་ལ་གདུང་སེམས་མཉམ་བསྐྱེད་དང་རྗེས་སུ་ཡི་རང་བྱེད་ཀྱིན་ཡོད་