ཕྱི་ལོ་ ༢༠༠༧ ལོ་ནས་བཟུང་ངྷ་ས་ནང་ཆོས་ངོ་སྤྲོད་ཚོགས་ཆུང་དང་ངྷ་སྟེང་བོད་ཁྱིམ་གཉིས་ཀྱིས་༸གོང་ས་མཆོག་ལ་གསོལ་འདེབས་ཞུས་པ་ལྟར། ལོ་རེའི་ཕྱི་ཟླ་དྲུག་པའི་ནང་ ༸གོང་ས་མཆོག་གིས་རྒྱ་གར་རྒྱལ་ཡོངས་ཀྱི་མཐོ་སློབ་ཁག་ཏུ་ཡོད་པའི་བོད་རིགས་སློབ་ཆེན་པ་རྣམས་དང་། བཞུགས་སྒར་ཉེ་འཁྲིས་སུ་ཡོད་པའི་ངྷ་སྟེང་དང་ངྷ་ཤོད། གྷོ་པཱ་པུར། སུ་ཇཱ་བཅས་ཀྱི་འཛིན་རིམ་བཅུ་གཅིག་དང་བཅུ་གཉིས་ཀྱི་སློབ་མ། ཤེས་རབ་དགའ་ཚལ་སློབ་གླིང་བཅས་གཙོས། ནང་ཆོས་དོན་གཉེར་བ་རྣམས་དང་བཞུགས་སྒར་མི་མང་བཅས་ལ་དམིགས་བསལ་ནང་ཆོས་ངོ་སྤྲོད་གནང་བཞིན་པ་ལྟར། འདི་ལོའི་ནང་ཆོས་ངོ་སྤྲོད་དེ་ཕྱི་ཟླ་ ༦ པའི་ཚེས་ ༡ ནས་ ༣ བར་ངྷ་སྟེང་བོད་ཁྱིམ་སློབ་གྲྭའི་ཚོགས་ཁང་དུ་གནང་གཏན་འཁེལ་ཡོད་འདུག
ཉེ་ལམ་ངྷ་ས་ནང་ཆོས་ངོ་སྤྲོད་ངོ་སྤྲོད་ཚོགས་ཆུང་གིས་ཐེངས་འདིའི་ནང་ཆོས་ངོ་སྤྲོད་ཀྱི་བརྗོད་གཞི་༸གོང་ས་མཆོག་གིས་རྩོམ་གནང་མཛད་པའི་༼ལེགས་བཤད་བློ་གསར་མིག་འབྱེད༽ ཀྱི་གསུང་ཆོས་གནང་རྒྱུའི་གསོལ་འདེབས་ཞུས་ཡོད་པ་མ་ཟད། ནང་ཆོས་ངོ་སྤྲོད་ཀྱི་སྐབས་དང་སྟབས་བསྟུན་ཏེ། སྐྱེ་བུ་དམ་པའི་སྐུ་རུས་ལས་འཁྲུངས་པའི་རང་བྱོན་དང་རིང་བསྲེལ། འཕེལ་གདུང་བཅས་ཀྱི་མཇལ་ཁ་གཏོང་རྒྱུ་དང་། ཉིན་གསུམ་རིང་སློབ་མ་རྣམས་ཞལ་ལག་དང་སྡོད་གནས་ཀྱི་མཐུན་རྐྱེན་མེད་པའི་རིགས་ལ་སྡོད་གནས་བཅས་ཀྱི་མཐུན་རྐྱེན་སྦྱོར་རྒྱུ་ཡིན་འདུག་ལ། ཐེངས་འདིར་སྔར་ལོ་ལྟར་རྒྱ་གར་རྒྱལ་ཡོངས་ཀྱི་མཐོ་རིམ་སློབ་གྲྭ་ཁག་གི་སློབ་མ་ ༡༠༠༠ མ་ཟིན་ཙམ་དང་། བཞུགས་སྒར་ཉེ་འཁྲིས་ཀྱི་སློབ་གྲྭ་ཁག་གི་དགེ་ལས་སློབ་ཕྲུག་དང་མི་མང་བཅས་བསྡོམས་མི་གྲངས་ ༣༠༠༠ ལྷག་འཛོམས་རྒྱུའི་ཚོད་དཔག་བྱེད་ཀྱི་ཡོད་འདུག
གསར་འགོད་པ། དོན་གོ
ནང་ཆོས་ངོ་སྤྲོད་ཀོད་སྒྲིག་པ་རྣམས་ལ་སྔགས་བརྗོད་དང་འབྲེལ་ཟས་དུག་ལ་ཡིད་ཟབ་གནང་རོགས། སྤྱིར་གཏང་སློབ་མ་ཚོས་ཀྱང་ཟས་རིན་མེད་ཡིན་ཡང་། ན་ཚ་ལ་ཐུགས་སྣང་གནང་རོགས།