རྒྱང་ཐག་རིང་བའི་ཚེ་རྡོར་མ་བུ་གསུམ་གྱི་གོམ་བགྲོད་དང་རྩོད་རྙོག

                                                                                                            རོང་ཕྲུག

    གཞན་འདུག་ས་ནས་རང་སྡད་རང་འདུག་སར་གཞན་བཞག་སྟེ་ཁོང་ཚོ་མ་བུ་གསུམ་གྱི་སྙིང་སྟོབས་དང་བློས་གཏོང་གི་ངོས་ནས་གླེང་ན་འོས་འཚམས་ཞིག་ཏུ་མཐོང་། ད་ལོའི་ཕྱི་ཟླ་གསུམ་པའི་ཚེས་བཅུ་ཉིན་རྡ་ས་ཐེག་ཆེན་གཙུག་ལག་ཁང་དུ་ཚེ་རྡོར་མ་བུ་གསུམ་གྱིས་རྡ་ས་ནས་ལྷ་སར་བསྐྱོད་པའི་གོམ་བགྲོད་མགོ་འཛུགས་གནང་བྱུང་ཞིང་། གསུམ་དུས་ལྔ་གསུམ་པའི་རང་དབང་སྒེར་ལངས་ཀྱི་དུས་དྲན་འདུ་འཛོམས་ཀྱི་ཐོག་དགོས་འདུན་དོན་ཚན་ལྔ་དང་ཉིན་དེའི་ཁོང་གི་བསྒྲགས་གཏམ་བཅས་ཀྱིས་ལས་འགུལ་འདིའི་དམིགས་ཡུལ་དང་རེ་འདུན་གསལ་འདོན་གནང་ཡོད།

          ཉིན་དེ་ནས་བཟུང་དཀའ་ཚེགས་དུ་མའི་མདུན་ནས་བསུ་བཞིན་ཡོད་ཀྱང་། ཁོང་མ་སྨད་གསུམ་གྱིས་འཚེ་མེད་ཞི་བའི་ལས་འགུལ་འདི་མ་བསྐུལ་དང་བླང་ངང་ཕྲག་ཏུ་བླངས་ནས་རྒྱ་གར་གྱི་རྒྱལ་ས་ལྡི་བར་བསྐྱོད་པའི་བརྒྱུད་རིམ་ཁྲོད་རྡ་སའི་ཚོགས་སྐྱིད་ཁག་གི་རོགས་རམ་ལྟ་སྐྱོང་འོག་རྒྱལ་ས་ལྡི་ལི་དང་དེ་ནས་བལ་ཡུལ་ས་མཚམས་བར་ཟླ་གཉིས་ལྷག་རིང་གོམ་བགྲོད་གནང་སྟེ་ཚ་གདུང་དཀའ་སྡུག་གི་ངལ་བ་བརྒྱ་ཕྲག་ཁྱད་ཟད་ཀྱིས་མདུན་ནས་མདུན་དུ་བསྐྱོད་ཀྱི་ཡོད་མོད། ལྡི་ལི་ནས་རྒྱ་ནག་གི་རྒྱལ་དར་འཕྱར་ཏེ་བལ་ཡུལ་ས་མཚམས་བར་བསྐྱོད་སྐབས་ཐོག་མའི་ཆར་གླེང་སློང་ཆེར་མ་བྱུང་ཡང་། ལྡི་ལི་དང་བལ་བོའི་བར་གྱི་ལམ་དཀྱིལ་ནས་གླེང་སློང་ཤུགས་ཆེ་རུ་འགྲོ་སོང་བ་མ་ཟད། གཞོན་ནུ་ཚོགས་པ་དང་དབུ་མའི་ལམ་ལས་འགུལ་ཁང་གཉིས་ཀས་སོ་སོའི་ལངས་ཕྱོགས་གསལ་སྟོན་བྱས་ཏེ་རྒྱབ་སྐྱོར་དང་ངོ་རྒོལ་གྱི་གསར་འགོད་བསྒྲགས་གཏམ་སྤེལ་རེས་བྱས་པ་དང་། དུས་བབ་དང་བང་ཆེན་གྱི་གསར་འགྱུར་འགོད་ཕྱོགས་ཚུན་ནས་ཀྱང་འགྱུར་བ་མི་འདྲ་བ་བྱུང་ཞིང་། དྲ་ངོས་ཀྱི་ ཟིན་བྲིས་པ་དང་དྲ་འབུ་ཚུན་གྱིས་ཀྱང་རང་ཁྱིམ་དུ་འཛུལ་ནས་ཁ་རྡུང་གཏོང་མགོ་ཚུགས་ཤིང་རང་དབང་མང་གཙོའི་ཁེ་དབང་ལོངས་སུ་སྤྱོད་ཀྱི་ཡོད་མོད། ཆེས་ཤིན་ཏུ་མི་ལེགས་པ་ཞིག་ནི་ང་ཚོའི་ཆབ་སྲིད་པའི་བྱང་ཚད་ དང་བསམ་ཚུལ་དེ་དག་གིས་ཡ་ང་བའི་གྲོག་རོང་ཞིག་བརྐོ་ཡི་མེད་དམ་སྙམ་པའི་སེམས་ཚོར་བན་བུན་ཞིག་ཤ་གསེང་ན་རུས་དང་རུས་གསེང་ན་རྐང་ཡོད་པའི་མི་རྣམས་ལ་སེམས་ཁྲལ་ལྷག་མ་ཞིག་སྤྲད་ཡོད་ངེས།

ཁོང་མ་བུ་གསུམ་གྱི་བློས་གཏོང་གི་ཆ་ནས་བཤད་མཁན་དཀོན་ལ། ལྷག་པར་དུ་རྒྱ་ནག་གི་རྒྱལ་དར་འཁྱེར་དགོས་པའི་བསམ་བློ་ཇི་ལྟར་འཁོར་བའམ། ཡང་ན་སུ་ཞིག་གིས་བསྐུལ་སློང་བྱས་ཡོད་མེད་ཀྱི་རྒྱུས་ལོན་ཐད་གསར་འགོད་པ་ཚོར་འཁྲི་བའི་ལས་འགན་ཞིག་ཡིན་ལ། དུས་བབ་གསར་འགོད་པས་བཅར་འདྲི་བྱས་སྐབས། ཚེ་བརྟན་རྡོ་རྗེ་ལགས་ཀྱིས་ལས་འགུལ་དེ་ནི། ལམ་དབུ་མའི་ལྟ་གྲུབ་དང་མ་འགལ་བ་ཞིག་དང་། བཙན་བྱོལ་གཞུང་གི་ལངས་ཕྱོགས་དང་མ་འགལ་བ། བོད་མི་དམངས་ཀྱི་འདོད་བློ་དང་མ་འགལ་བ་ཞིག་ཡིན་ཚུལ་བརྗོད་ཡོད།

ཁོང་མ་བུ་གསུམ་གྱིས་ཟླ་གཉིས་ལྷག་གི་གོམ་བགྲོད་རིང་མོ་དེ་ཆབ་སྲིད་པ་དག་གིས་གདོང་གཏད་ས་དགྲ་བོར་མ་གཏད་པར་མ་བུ་གསུམ་གྱི་ཞི་བའི་ལས་འགུལ་ལ་གཏད་དེ་ལྟ་གྲུབ་ཉི་ཚེ་བའི་བཤད་ཡམས་དག་བཙན་བྱོལ་བོད་མིའི་ཆབ་སྲིད་ཀྱི་སྡིངས་ཆར་བེད་སྤྱད་དེ་མི་མང་རྣམས་ཧོན་འཐོར་དགོས་པར་བཟོས་ཡོད། ད་ནས་ཚོགས་པ་གང་ཞིག་གི་ལངས་ཕྱོགས་འགྲིག་པ་དང་གང་ཞིག་མི་འགྲིག་པའི་དབྱེན་ཐག་གཅོད་རྒྱུར་མི་མང་ཚོས་རང་ཉིད་ལའང་བདེན་ཁ་སྤྲོད་མི་ཐུབ་པའི་ཚོད་ཡིན། ཟིན་བྲིས་པ་ང་ལ་མཚོན་ན་དབུ་བཙན་གཉིས་ཀྱི་ཕན་ཚུན་ཁ་གཏད་ཀྱི་ཚུལ་དུ་ལན་འདེབས་བྱས་པ་ནི་སྣང་བར་ཆེས་མི་འགྲོ་བའི་བྱ་བ་ཞིག་རེད།

གཞོན་ནུ་ཚོགས་པའི་རང་བཙན་རྩོད་ཀྱི་ཡོད་པ་དེ་བོད་མིའི་སྤྱི་ཚོགས་ཙམ་མ་ཡིན་པར་འཛམ་གླིང་ཡོངས་ལ་ཤེས་རྟོགས་ཡོད་རྒྱུ་རེད། མ་བུ་གསུམ་གྱི་ལས་འགུལ་ནི་གཞོན་ནུ་དང་ལྟོས་འབྲེལ་གང་ཡང་མེད་པ་ཞིག་རེད། ཚེ་རྡོར་གྱིས་རང་ཉིད་ཀྱི་ལངས་ཕྱོགས་དང་དགོས་འདུན་དོན་ཚན་དག་བསྒྲགས་པའི་ནང་རང་བཙན་གྱི་ལྟ་བ་ཞིག་འཁུར་གྱི་མི་འདུག་ལ། གཞོན་ནུས་རྒྱབ་སྐྱོར་ཡོང་བའི་རེ་སྐུལ་བྱས་པའང་ཐོས་རྒྱུ་མེད། འོ་ན་གཞོན་ནུས་ཤིག་གི་སྒང་ལ་སྟ་རེ་འཕྱར་དགོས་པའི་རྒྱུ་མཚན་དེ་བས་མེད། གཞོན་ནུས་འབྱོན་ན་རང་ཉིད་ཀྱི་ ལངས་ཕྱོགས་ལྟར་ལས་འགུལ་སྤེལ་ནས་བལ་ཡུལ་བར་གོམ་བགྲོད་དམ་བྱེད་ཐབས་ཅི་ཞིག་ཡོད་ན་ལས་འགུལ་མི་སྤེལ་བར་མི་སྒེར་གྱི་ལས་འགུལ་ལམ་ལྷོང་མི་འབྱུང་བའི་ཁ་རྡུང་གཏོང་བས་ཕན་ཐོག་ཅི་ཞིག་ཡོད།

དབུ་མིའི་ལམ་ལས་འགུལ་ཁང་གིས་ཀྱང་འདྲེ་ཤིག་གི་རྒྱབ་རྩར་དུག་སྦྲང་ལངས་ཟེར་བའི་དཔེ་ལྟར་རྒྱབ་སྐྱོར་བྱས་པ་ནི་ཚོགས་པའི་ལངས་ཕྱོགས་དང་མཐུན་གྱི་འདུག་སྙམ་ནས་བེད་སྤྱད་པ་ལས་ཚེ་རྡོར་གྱིས་ཁོང་ཚོའི་བཀོད་མངགས་དང་རྒྱབ་སྐྱོར་བྱས་བར་བརྟེན་ནས་ལས་འགུལ་འདི་སྤེལ་མེད། ཚོགས་པ་འདིར་གཟེངས་སུ་མཐོན་པའི་ལས་འགུལ་དང་གྲུབ་འབྲས་མེད་པར་བརྟེན་གཞན་གྱི་ལས་འགུལ་རང་ཉིད་ཀྱི་ངོ་སོར་འཁྱེར་ཏེ་འབུར་གཟུགས་རྡོ་རིང་ཞིག་བཞེངས་འདོད་ཀྱི་རྔམ་སེམས་འཕྱུར་གྱི་འདུག དེ་མིན་ན་ཚེ་རྡོར་མ་བུ་གསུམ་ངྷ་ས་ནས་ལྡི་ལི་བར་བསྐྱོད་ཀྱང་ཁོང་ཚོས་རྒྱབ་སྐྱོར་བྱས་ཚུལ་གསར་འགྱུར་ནང་ཐོན་མེད།

འོན་ཀྱང་གནས་ཚུལ་འདི་གླེང་སློང་བྱས་པའི་མཐའ་མར་བོད་གཞུང་བཀའ་ཤག་གིས་བཀའ་བསྡུར་གནང་བའི་སྙིང་དོན། བཀའ་སྤྱི་ལྷན་རྒྱས་ཐོག་ནས་ང་ཚོའི་ཆབ་སྲིད་སོགས་ཀྱི་ལས་འགུལ་གང་འདྲ་ཞིག་སྤེལ་བ་ཡིན་ནའང་ལྟ་གྲུབ་གསུམ་སྟེ། ཞི་བ་དང་། ཁྲིམས་དང་མཐུན་པ། ཆེ་མཐོང་དང་ལྡན་པ་དེ་གསུམ་ངེས་པར་དུ་འཛིན་དགོས་པའི་གལ་ཆེན་ཡིན་པའི་ལམ་སྟོན་སྔ་རྗེས་གནང་ཡོད། ཅེས་པ་དང་། དེའི་ཐོག་བཀའ་ཤག་གི་དགོངས་ཚུལ་སྙིང་པོ་གོང་དུ་ཞུས་པའི་ལྟ་གྲུབ་གསུམ་གཞི་བཞག་ཐོག་ནས་རྒྱ་ནག་གི་རྒྱལ་དར་མེར་བསྲེགས་གཏོང་རྒྱུ་དང་། ཡང་ན་རྒྱ་ནག་གི་རྒྱལ་དར་ཕྱར་ཏེ་འགྲོ་མཁན་གཉིས་ཀར་མོས་མཐུན་དང་རྒྱབ་སྐྱོར་མེད། ཅེས་བཀའ་ཤག་གི་དགོངས་ཚུལ་དང་བཞེངས་ཕྱོགས་གསལ་སྟོན་གནང་ཡོད། ཚེ་རྡོར་རང་ཉིད་ཀྱིས་ཐག་གཅོད་བྱས་པའམ་གཞན་གྱིས་སྐུལ་སློང་བྱས་པ་གང་ཡིན་ཡང་རང་མོས་ངང་རྒྱ་དར་འཁྱེར་བ་དེ་ཁོང་གིས་བཤད་པའི་གཞུང་གི་ལངས་ཕྱོགས་སམ་ལྟ་གྲུབ་གསུམ་དང་མཐུན་གྱི་མེད་པའི་གནས་ཚུལ་འདི་གསར་འགོད་པ་ཚོས་བཅར་འདྲིའི་ལམ་ནས་གསལ་བོ་བཟོ་དགོས། དེ་ལྟར་བྱས་ན་སློབ་དཔོན་ཟམ་གདོང་རིན་པོ་ཆེས་ང་རང་སྒེར་ངོས་ནས་དེ་ལ་ངོ་རྒོལ་བྱ་འདོད་གང་ཡང་མེད། ངས་བལྟས་ན་ཁོ་རང་ལ་རྒྱབ་ལྗོངས་ཀྱི་དགོངས་པ་བཞེས་སྟངས་ཤིག་ཏན་ཏན་ཡོད་ཀྱི་རེད། ཁོང་གི་ཀུན་སློང་དེ་གསལ་པོ་མ་ཤེས་བར་ང་ཚོས་ཡག་སྡུག་བཤད་ས་འགྲོ་ཡི་མ་རེད། ཅེས་གསལ་པོ་གསུངས་པ་ལྟར་གཞིས་བྱེས་མི་མང་ཙམ་མིན་པར་རྒྱལ་སྤྱིའི་མི་མང་ཚོས་ཀྱང་ཤེས་ན་འདོད་པའི་དྲི་བ་ཞིག་ཏུ་གྱུར་འདུག་སྙམ།

དེ་མིན་ན་གནས་ཚུལ་འདི་དག་གི་ཐོག་ནས་ཆབ་སྲིད་པར་རློམ་པའི་གཡོ་འཁྲབ་པ་དག་གིས་འདི་མ་བུ་གསུམ་གྱི་ལས་འགུལ་དེ་རྩབ་ཧྲལ་དུ་བཏང་ཡོད། དོན་དངོས་ཐོག་ང་ཚོས་ལས་འགུལ་འདིའི་ནང་མ་བུ་གསུམ་གྱི་བློས་གཏོང་དང་སྙིང་སྟོབས་མཇུག་འབྲས་བཅས་ཀྱི་ཐོག་ནས་རིན་ཐང་གཞལ་དགོས་པར་སྙམ་ལ། དེ་མིན་གོད་ཁ་ནས་རྟ་དེད་ཟེར་བའི་དཔེ་ལྟར་ཉི་མའི་ཚ་ཟེར་དང་ཆར་རླུང་དྲག་རྩུབ་གང་ཡང་མྱོང་མི་དགོས་པར་གཞན་ལ་ཁ་རྡུང་གཏོང་བའི་འོས་བབ་ཡོད་མེད་ལ་ལག་པ་སྙིང་གར་བཞག་སྟེ་བསམ་གཞིག་གནང་རོགས་ཞུ་རྒྱུ་ལས་གཞན་མ་མཆིས།