ཉེ་ཆར་ཨ་རིའི་གསང་མྱུལ་བའི་ཉེས་མིང་འོག་རྒྱ་གཞུང་བདེ་སྲུང་ལྷན་ཁང་གི་མགོ་གཙོ་གཞོན་པའི་དྲུང་ཡིག་འཇུ་བཟུང་བྱས་ཡོད་འདུག
ཉེ་ཆར་གསར་ལམ་ཁག་ཏུ་གནས་ཚུལ་སྤེལ་དོན། ཨ་རིའི་གསང་མྱུལ་བའི་ཉེས་མིང་འོག་རྒྱ་གཞུང་བདེ་སྲུང་ལྷན་ཁང་གི་མགོ་གཙོ་གཞོན་པའི་དྲུང་ཡིག་འདི་ལོའི་ཕྱི་ཟླ་ ༡ ནས་ ༣ བར་ཙམ་ནས་འཇུ་བཟུང་བཀག་སྐྱིལ་བྱས་ཡོད་འདུག ཧོང་ཀོང་གི་བརྒྱུད་ལམ་ཁག་གིས་གསང་མྱུལ་ལས་གཞི་དེའི་ཁྲོད་ཞུགས་མཁན་མི་ ༣༥༠ བརྒལ་བ་ཡོད་པ་དང། རྒྱ་གཞུང་མཐོ་རིམ་སྡེ་ཁག་གིས་གནད་དོན་དེར་ཕྱོགས་ཡོངས་ནས་ཞིབ་བཤེར་ནན་མོ་བྱ་དགོས་པའི་གསང་བའི་བཀའ་རྒྱ་བཏང་སྐོར་བརྗོད་འདུག
འབྲེལ་ཡོད་མི་སྣས་བརྗོད་པ་ལྟར་ན། རྒྱ་གཞུང་བདེ་སྲུང་ལྷན་ཁང་གི་མགོ་གཙོ་གཞོན་པའི་དྲུང་ཡིག་གིས། ཨ་རིའི་དབུས་ཉེན་སྲུང་ལྷན་ཁང་ལ་རྒྱ་གཞུང་གི་ཆབ་སྲིད་དང་དཔལ་འབྱོར། ཐབས་ཇུས་སོགས་ཀྱི་གསང་བ་མཁོ་འདོན་བྱས་ཡོད་པ་དང་། དེ་ནི་འདས་པའི་ལོ་ ༢༠ ནང་རྒྱ་གཞུང་བདེ་སྲུང་ལྷན་ཁང་དུ་བྱུང་བའི་ཆེས་ཚབས་ཆེ་བའི་གསང་བ་ཕྱི་གྱར་གྱི་གནས་ཚུལ་ཞིག་ཆགས་ཡོད་འདུག
ད་ལྟའི་ཆར་རྒྱ་གཞུང་བདེ་སྲུང་མགོ་གཙོ་གཞོན་པ་དེ་སུ་ཡིན་མིན་དང་། ཨ་རིའི་གསང་མྱུལ་བའི་ལས་ཀ་སྒྲུབ་མཁན་གྱི་དྲུང་ཡིག་དེའི་མིང་དང་གསང་བ་ཅི་ཞིག་ཕྱི་གྱར་བྱས་ཡོད་མེད་སོགས་ཕྱིར་བསྒྲགས་བྱས་མེད་པ་རེད།
ཕྱི་ལོ་ ༡༩༨༥ ལོར་རྒྱ་གཞུང་བདེ་སྲུང་ལྷན་ཁང་གི་དཔོན་རིགས་ཡཱིས་ཆང་ཧྲིན་ཀྱང་ཨ་རིར་བྲོས་བྱོལ་གྱིས་རྒྱ་ནག་གི་གསང་བ་ཕྱི་གྱར་བྱས་ཡོད་པ་རེད།
གསང་བ་ཅི་ཞིག་ཕྱི་གྱར་བྱུང་ཡོད་དམ།