ཉེ་བའི་ཉིན་བདུན་རིང་བོན་གཞིས་སྨན་རི་གླིང་དཔེ་མཛོད་ཁང་དུ། གཡུང་དྲུང་བོན་གྱི་སྐོར་བགྲོ་གླེང་ཐེངས་ ༡༢ པ་ཚོགས་ཤིང་། དཔལ་རྒྱལ་བ་སྨན་རི་ཁྲི་འཛིན་མཆོག་མཛད་སྒོའི་ཚོགས་མགོན་དུ་ཕེབས་ཏེ་བཀའ་སློབ་གསུང་བཤད་གནང་འདུག
ཟླ་འདིའི་ཕྱི་ཚེས་ ༣ ནས་ ༩ བར་བོན་གཞིས་ཐོབ་རྒྱལ་གསར་བའི་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་གི་དཔེ་མཛོད་ཁང་དུ། “གཡུང་དྲུང་བོན་གྱི་སྐོར་”བགྲོ་གླེང་ཐེངས་ ༡༢ པ་ཚོགས་ཡོད་པ་དང་། མཛད་སྒོའི་སྐུ་མགྲོན་གཙོ་བོར་དཔལ་རྒྱལ་བ་སྨན་རིའི་ཁྲི་འཛིན་སོ་གསུམ་པ་མཆོག་དང། དམིགས་བསལ་སྐུ་མགྲོན་སྨན་རིའི་སློབ་དཔོན་ཡང་སྟོན་འཕྲིན་ལས་ཉི་མ་རིན་པོ་ཆེ་མཆོག བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་པ་ཆེ་བ་ཟུར་པ་སྐུ་ངོ་བྱ་དུར་བསོད་ནམས་བཟང་པོ་མཆོག གཞན་ཡང་། གདན་ས་སྨན་རིའི་བཤད་སྒྲུབ་མཁན་སློབ་རྣམ་གཉིས་དང་། དབུས་གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་དྲུང་ཆེ། ས་གནས་གཞིས་དྲུང་དང་བཤད་སྒྲུབ་སློབ་གླིང་གི་དཔེ་ཁྲིད་དགེ་རྒན། ཕྱོགས་མཐའ་ཁག་ནས་ཕེབས་པའི་སློབ་ཕྲུག་བཅས་མཉམ་ཞུགས་གནང་ཡོད་འདུག
བགྲོ་གླེང་མཛད་སྒོའི་ཐོག་དཔལ་རྒྱལ་བ་སྨན་རི་ཁྲི་འཛིན་མཆོག་གིས། ཆོས་རྒྱུད་གཞན་གྱི་མི་སྣ་ཆེ་ཁག་དུ་མས་གཉའ་ཁྲིའི་ཡར་སྔོན་བོད་ཀྱི་ལོ་རྒྱུས་སྐོར་བོན་པོ་རང་གིས་ཁུངས་སྐྱེལ་དགོས་པ་མ་ཟད། སྲོང་བཙན་སྔོན་གྱི་བཙན་པོའི་རྒྱལ་རབས་སྐབས་ཀྱི་བོད་ཀྱི་ལོ་རྒྱུས་དང་ཆོས་དང་རིག་གཞུང་མཐའ་དག་ཀྱང་དེ་བཞིན་ཡིན་སྐོར་གསུངས་ཀྱིན་ཡོད་པར་བརྟེན། ང་ཚོའི་ངོས་ཀྱང་དེའི་སྐོར་ལ་དོ་སྣང་དང་བགྲོ་གླེང་བྱ་རྒྱུ་གལ་ཆེན་ཡིན་ཚུལ་དང་། བགྲོ་གླེང་གསུང་བཤད་སྐབས་ཕལ་སྐད་ལ་སྣང་ཆུང་མི་བྱེད་པར་ཕལ་སྐད་ཀྱི་ནུས་པ་ལ་བསམ་གཞིགས་དགོས་རྒྱུ་གལ་ཆེན་ཡིན་པ། དེ་བཞིན། གཞུང་ཆེན་མོའི་ཚིག་དང་བརྡ་རྙིང་སོགས་ཀྱི་རིགས་རེད་ཅེས་བཀོལ་མེད་དུ་མི་འཇོག་པར། ཡང་ནས་བསྐྱར་དུ་བེད་སྤྱོད་བྱས་ན་ག་ལེར་གོམས་རྒྱུ་ཡོད་པའི་སྐོར་བཀའ་སློབ་གསུངས་བཤད་གནང་ཡོད་པ་རེད།
ཉིན་བདུན་རིང་གི་བགྲོ་གླེང་དངོས་གཞིའི་སྐབས། སྨན་རིའི་དཔོན་སློབ་རིན་པོ་ཆེ་དང་། བཤད་སྒྲུབ་སློབ་དཔོན། སྤྱི་འཐུས་དགེ་བཤེས་སྨོན་ལམ་མཐར་ཕྱིན། སློབ་དགེ་པད་མ་དགྲ་འདུལ། བྱ་དུར་བསོད་ནམས་བཟང་པོ། ཨཅྰརྱ་བཟང་མོ་བཅས་གདན་ཞུའི་བགྲོ་གླེང་པ་དག་གིས། “གནའ་རབས་བོན་དང་ཧི་མ་ཡའི་འབྲེལ་བའི་སྐོར།”དང་། “བོན་ཕྲུག་ཁག་གི་ད་ལྟའི་འགན་འཁྲི་དང་མ་འོངས་ལངས་ཕྱོགས།” “བོད་ཀྱི་ཐུན་མིན་སྲོལ་རྒྱུན་རིག་གནས་སྐོར་གྱི་རྒྱུན་ཤེས།” “དུས་རབས་བདུན་པའི་སྔོན་གྱི་བོད་ཡིག་གི་བྱུང་ཁུངས་སྐོར།” “བོན་གཞིས་ཐོབ་རྒྱལ་གསར་པའི་བྱུང་རབས་དང་ད་ལྟའི་གནས་བབ།” “གནའ་རབས་བོན་དང་འབྲེལ་བའི་བརྡ་སྤྲོད་རིག་པ།” སོགས་བརྗོད་གཞི་ཁག་གི་ཐད། ཆུ་ཚོད་སྐར་མ་ ༤༥ རེར་གཏམ་བཤད་གནང་རྗེས། སྐར་མ་ ༣༠ རེའི་ནང་ཚོགས་བཅར་བ་དག་གི་དོགས་སློང་དང་དྲི་བར་ལན་འདེབས་དང་། མཇུག་མཐར་༼རིག་རྩལ་འགྲན་པའི་གར་སྟེགས༽ཞེས་པའི་ལེ་ཚན་གོ་སྒྲིག་གནང་སྟེ། བགྲོ་གླེང་གོ་སྒྲིག་ཚོགས་པའི་ངོས་ནས་ཚོགས་ཞུགས་པ་ཡོངས་ལ་གཡུང་དྲུང་བོན་གྱི་རྒྱུན་ཤེས་སྐོར་ནས་དྲི་བ་དྲིས་ལན་གནང་སྟེ། ནམ་རྒྱུན་གྱི་འཚོ་བའི་ཁྲོད་གནས་པའི་བོན་སྐོར་གྱི་ཤེས་བྱར་དོ་སྣང་དང་གོ་རྟོགས་སྤེལ་ཡོད་པ་རེད།
གཞན་ཡང་། བགྲོ་གླེང་དང་སྐབས་བསྟུན་ནས་ཞང་ཞུང་སྨར་ཡིག་ལ་སོགས་པའི་ཡིག་གཟུགས་དང་རྩོམ་ཡིག་འགྲན་བསྡུར་ཞིག་ཀྱང་གོ་སྒྲིག་གནང་ཡོད་པ་མ་ཟད། མཇུག་སྡོམ་མཛད་སྒོའི་ཐོག་དཔལ་རྒྱལ་བ་སྨན་རི་ཁྲི་འཛིན་མཆོག་ནས། ཡིག་གཟུགས་དང་རྩོམ་ཡིག་འབྲི་མཁན་ལེགས་གྲས་རྣམས་ལ་བྱ་དགའི་གསོལ་རས་གནང་ཡོད་པ་དང་། ཐེངས་འདིའི་བགྲོ་གླེང་ཐོག་ཝཱ་ཎཱ་བོད་ཀྱི་གཙུག་ལག་སློབ་གཉེར་ཁང་དང་། ལྡི་ལི་མཐོ་སློབ། ཅན་ལྡི་སྒར་མཐོ་སློབ། མ་སི་རི་བོད་ཁྱིམ། ས་གནས་ཉིན་སློབ་གྱི་འཛིན་རིམ་བཅུ་པ་ནས་བཅུ་གཉིས་བར་གྱི་སློབ་ཕྲུག་བཅས་ཁྱོན་བསྡོམས་མི་གྲངས་ ༢༡༨ མཉམ་ཞུགས་བྱས་ཡོད་འདུག
གཡུང་དྲུང་བོན་གྱི་སྐོར་བགྲོ་གླེང་ཚོགས་འདུ་དེ་ནི་དཔལ་རྒྱལ་བ་སྨན་རི་ཁྲི་འཛིན་མཆོག་གི་དགོངས་བཞེད་ལྟར། ༢༠༠༠ ལོ་ནས་མགོ་བཙུགས་ཏེ་ཕྱོགས་མཐའི་སློབ་གྲྭ་ཁག་གི་དབྱར་ཁའི་གུང་གསེང་དང་སྟབས་བསྟུན། ལོ་རེ་བཞིན་གཡུང་དྲུང་བོན་གྱི་ཆོས་དང་རིག་གཞུང་སྐོར་ལ་བགྲོ་གླེང་ཐེངས་རེ་ཚོགས་བཞིན་ཡོད་པ་རེད།
གསར་འགོད་པ། ཚེ་རིང་རྒྱལ།
གཡུ་དྲུང་བོན་གྱི་བགྲོ་གླེང་པ་ཡོངས་ལ་འཚམས་འདྲི་ཞུ། མ་ཟད་དེང་སྐབས་བོན་བཀའ་བསྟན་སོགས་གང་ཅིར་ཕུན་སུམ་ཚོགས་པོ་ཞེ་དྲག་འདུག་པས་དེ་ལྟ་བུའི་རིག་གཞུང་འདི་སྔར་ནས་སྟོན་པ་གཤེན་རབ་ནས་བརྒྱུད་དེ་བྱུང་ཡོད་དམ་གང་ཡིན་གསུངས་རོགས་ཞུ། དྭོགས་པར་འདི་ལྟ་བུའི་རིག་གཞུང་སྔར་ནས་བོད་ས་ཐོག་ཏུ་ཡོད་བཞིན་དུ་རྒྱ་གར་ནས་ནང་ཆོས་དར་འཕེལ་ཆེད་མི་རབས་ནས་མི་རབས་སྐུ་ལས་བསྐྱོན་དགོས་དོན་གང་ཡིན་དང་། ལྷག་པར་ད་ལྟའི་བོན་དང་ཆོས་གཉིས་ཀྱི་གཞི་ལམ་འབྲས་གསུམ་གྱི་རྣམ་གཞག་མི་འདྲ་བ་ཆེས་མི་སྣང་བས་གསལ་བཤད་ལེགས་པོ་ཞིག་ཀུན་སློང་བཟང་པོ་ཞིག་གིས་གནང་རོགས་ཞུ།
བཀུར་འོས་རྩོམ་སྒྲིག་པ་ལགས།
ཉེ་བའི་ཉིན་བཞིའི་རིང་་་་་་ཞེས་པ་དེ་ཡང་་་་་་་་་་་ཉིན་བདུན་རིང་་་་བཅོས་རོགས་ཞུ།
ཐུགས་རྗེ་ཆེ།
བོན་པོའི་ལོ་རྒྱུས་དང་རིག་གཞུང་ནི་་བོད་ས་རང་ལ་བྱུང་བའི་གཅེས་ནོར་དང་བོད་པ་ཚང་གི་གཅེས་ཉར་བྱ་དགོས་པ་ནི་ཧ་ཅང་གི་གལ་ཆེན་པོ་རེད།
ཡིན་ན་ཡང་སྟོན་པ་ཤེས་རབ་ཞེས་པའི་བོན་ཆོས་གསུངས་པ་པོ་དེ་བོད་པ་ཡིན་མིན་དང་གང་དུ་འཁྲུངས་མིན་ནི་གསལ་པོ་མེད་པ་ལྟ་བུ་སྣང་།
བོད་ཀྱི་ལོ་རྒྱུས་ནང་འཁྲུངས་ཡུལ་ལ་མི་མཐུན་པ་ཁ་ཤས་ཡོད་པ་འདྲ་། བོད་པ་ཡིན་མིན་དང་འཁྲུངས་ཡུལ་གང་ནས་ཡིན་མིན་གསལ་པོ་ཞིག་བཀའ་གནང་རོགས་ཞུ།
གཡུང་དྲུང་བོན་གྱི་བགྲོ་གླེང་ཐེངས་༡༢ པར་འཚམས་འདྲི་ཞུ། གནའ་བོན་དང་དེང་བོན་བར་མི་འདྲ་བའི་ཁྱད་ཆོས་རྣམ་གྲངས་ཅི་ཡོད་ལགས་་་་་