བོད་ནས་འབྱོར་བའི་བུད་མེད་མཐོ་རིམ་སློབ་མ་ཞིག་གིས་བརྗོད་ན། བོད་ནང་ལ་མཚོན་ན། གཞོན་སྐྱེས་ཚོ་རང་གི་སྐད་ཡིག་རིག་གཞུང་ལ་དགའ་ཞེན་དང་མི་རིགས་ཀྱི་འདུ་ཤེས། འཐབ་རྩོད་ཀྱི་སེམས་ཤུགས་དང་སྙིང་སྟོབས་ཚད་མཐོན་པོར་སླེབས་ཡོང་གི་འདུག་ཟེར།
ཉེ་ལམ་མཚོ་སྔོན་ཞིང་ཆེན་མཚོ་ལྷོ་ཁུལ་ཆབ་ཆ་གྲོང་རྡལ་ནས་ཡིན་ཞིང་། མཚོ་སྔོན་མི་རིགས་སློབ་ཆེན་མཐར་ཕྱིན་རྗེས་པེ་ཅིན་དང་ཟི་ལིང་། མཚོ་ལྷོ་ཁུལ་བཅས་ས་གནས་ཁག་ཅིག་ཏུ་ལས་ཀ་བྱས་མྱོང་མཁན་གྱི་བུད་མེད་ཅིག་བཞུགས་སྒར་ངྷ་རམ་ས་ལའི་དབུས་སྣེ་ལེན་ཁང་དུ་འབྱོར་ཡོད་ཅིང་། ཕྱི་ཚེས་ ༢༧ ཉིན་འདི་གའི་གསར་འགོད་པས་ཁོང་མོར་ཆབ་ཆ་ས་ཆའི་གནས་སྟངས་དང་བོད་ནང་གི་གཞོན་སྐྱེས་ཚོའི་བསམ་བློའི་འཁྱེར་སོ་བཅས་ཀྱི་སྐོར་ལ་བཅར་འདྲི་བྱས་པ་ཡིན།
སྐལ་བཟང་ལྷ་མོ་ལགས་ཀྱིས་བརྗོད་དོན་ལྟར་ན། ༢༠༠༨ ལོའི་ཡར་སྔོན་དུ་མཚོ་ལྷོ་ཁུལ་ཆབ་ཆ་གྲོང་རྡལ་དུ་དམག་མིས་མེ་མདའ་ཁུར་ཏེ་སྲང་ལམ་དུ་མྱུལ་ཞིབ་བྱེད་པ་དང་། དམིགས་བསལ་བོད་མི་ཚོ་གང་བྱུང་འཛིན་བཟུང་བྱས་པའི་གནས་ཚུལ་མཐོང་ཐོས་མེད་ཀྱང་། ཉིས་སྟོང་བརྒྱད་ལོར་ཞི་རྒོལ་བྱུང་བ་དང་། མཚོ་ལྷོ་ཁུལ་གྱི་ས་གནས་ཁག་ཅིག་ནང་ངོ་རྒོལ་སྐད་འབོད་བྱུང་རྗེས་རྒྱ་གཞུང་གིས་ཆབ་ཆ་གྲོང་རྡལ་གྱི་ས་གནས་གང་སར་དམག་མི་འགྲེམས་འཇོག་གིས་ལྟ་རྟོག་ནན་མོ་བྱས་ཡོད་པ་མ་ཟད། ཁུལ་དང་གྲོང་རྡལ་གྱི་ས་གནས་སུ་བོད་དོན་དང་འབྲེལ་བའི་སྐད་འབོད་ཁྲོམ་སྐོར་ཕར་ཞོག ཐ་ན་བོད་མི་རེ་ཟུང་དུས་མཉམ་དུ་བསྡད་དེ་སྐད་ཆ་བཤད་པར་ཡང་ལྟ་རྟོག་སྟངས་འཛིན་བྱེད་ཀྱི་ཡོད་འདུག་ལ། གྲོང་གསེབ་ཁག་ཏུ་༸གོང་ས་མཆོག་གི་སྐུ་པར་བཤམ་པའི་གནས་ཚུལ་རེ་ཟུང་ཡོད་སྲིད་པ་ལས། གྲོང་ཁྱེར་ནང་སྡོད་མཁན་བོད་རིགས་ལས་བྱེད་ཚོའི་ནང་༧གོང་ས་མཆོག་གི་སྐུ་པར་བཤམ་མི་ཆོག་ཅིང་། མང་ཚོགས་དགོནཔར་མཆོད་མཇལ་དུ་འགྲོ་བ་དང་། དགོན་སྡེ་ཕན་ཚུན་ནང་སློབ་གཉེར་ཏུ་སྐྱོད་མཁན་གྲྭ་བཙུན་བཅས་ཀྱིས་ཀྱང་སྲིད་གཞུང་གི་ཆོག་མཆན་ཞུ་དགོས་པ། ལྷ་སར་མཆོད་མཇལ་འགྲོ་མཁན་ཚོས་ཞང་དང་རྫོང་རིམ་པར་ཐོ་འགོད་བྱས་ཏེ་འགྲོ་དགོས་པ་སོགས་ཀྱི་གནས་སྟངས་ངོ་སྤྲོད་གནང་བྱུང་།
དེ་བཞིན། ལོ་སྔ་ཕྱིར་རྔ་པ་གཙོས་བོད་ཀྱི་ས་ཁུལ་ཁག་ཏུ་བོད་མི་མང་པོས་རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་བྱས་ཡོད་པའི་གནས་ཚུལ་དག་ཀྱང་། རྒྱ་གཞུང་གིས་གསར་ལམ་དང་ཁ་པར་བརྒྱུད་ལམ་རིགས་བཀག་སྡོམ་བྱས་ཏེ། ས་གནས་མང་ཚོགས་ཚོས་ཐད་ཀར་མཐོང་ཐོས་ཐུབ་ཀྱི་མེད་ཀྱང་། རྒྱ་གར་དང་ཕྱི་རྒྱལ་ཁག་ཏུ་ཡོད་པའི་སྤུན་མཆེད་གྲོགས་པོ་ཚོ་བརྒྱུད་དེ་གནས་ཚུལ་གོ་བཞིན་ཡོད་པ་དང་། གནས་ཚུལ་དེ་རིགས་ཀྱང་གྲོང་གསེབ་ནས་གྲོང་ཁྱེར་ནང་བརྒྱུད་སྒྲོག་བྱེད་ཀྱི་ཡོད་འདུག གནས་ཚུལ་དེ་དག་གི་རྐྱེན་པས་རྒྱ་གཞུང་གིས་དམ་དྲག་ཇི་ཙམ་ཆེ་ཡང་གཞོན་སྐྱེས་ཚོར་མི་རིགས་ཀྱི་ལར་ཞེན་སྔར་ལས་ཆེ་རུ་འགྲོ་བཞིན་ཡོད་པ་དང་། བོད་དོན་སྐོར་གླེང་སློང་དང་དོ་སྣང་ཤུགས་ཆེ་རུ་འགྲོ་བཞིན་ཡོད་ཅིང་། ༸རྒྱལ་བ་རིན་པོ་ཆེ་དང་བཙན་བྱོལ་བོད་གཞུང་ལ་དོ་སྣང་ཤུགས་ཆེ་རུ་འགྲོ་བཞིན་ཡོད་འདུག
དེ་སྔ་མཚོ་སྔོན་དང་ལྷ་སའི་བར་རྒྱ་མིའི་ཐོབ་ཐང་ལག་འཁྱེར་ཡོད་པའི་བོད་མི་གཅིག་གིས་མི་མང་པོའི་མེ་འཁོར་འཛིན་བྱང་ཉོས་ཆོག་ཀྱང་། ༢༠༠༨ལོའི་རྗེས་ནས་བཟུང་དེ་ལྟར་ཐུབ་ཀྱི་མེད་པ་དང་། ད་དུང་མེ་འཁོར་ནང་འཛུལ་སྐབས་བོད་མི་ཚོས་མིང་དང་ས་གནས། ལྷ་སར་འགྲོ་དགོས་པའི་རྒྱུ་རྐྱེན་སོགས་འགེང་ཤོག་ཅིག་བསྐང་དགོས་ཀྱི་ཡོད་ཅིང་། ལྷ་སར་གཉེན་ཉེ་ཡོད་མེད་དང་མགྲོན་ཁང་གང་དུ་འདུག་མིན། ཁ་པར་ཨང་གྲངས་སོགས་ཐོ་འགོད་བྱེད་དགོས་ཀྱི་ཡོད་འདུག
གསར་འགོད་པས་ཁོང་ལ་བཙན་བྱོལ་དུ་ཡོང་དགོས་པའི་རྒྱུ་རྐྱེན་དང་། ད་ལྟའི་བར་བོད་ནང་གི་ས་གནས་འདྲ་མིན་དུ་ལས་ཀ་བྱེད་པའི་ཉམས་མྱོང་དང་གཞོན་སྐྱེས་ཚོར་འབྲེལ་འདྲིས་བྱས་པའི་ཉམས་མྱོང་ལས་མ་འོངས་གཞིས་བྱེས་མཉམ་འཛོམས་ལ་རེ་བ་གང་འདྲ་མཐོང་གི་ཡོད་མེད་དྲིས་པར་ཁོང་གིས། “ ང་རང་ལ་མཚོན་ན་ཆུང་དུས་བོད་ཡིག་སྦྱངས་བ་དང་། བོད་ཀྱི་སློབ་ཆེན་འགྲིམ་མྱོང་མཁན་ཞིག་ཡིན་ཡང་། ད་ལྟའི་ཆར་བོད་ནང་བོད་ཡིག་བོད་སྐད་ཀྱི་ཁོར་ཡུག་ཧ་ཅང་ཆུང་དུ་འགྲོ་བཞིན་འདུག སྔོན་མ་ངས་གློག་བརྙན་སྐད་བསྒྱུར་གྱི་ལས་ཀ་བྱས་པ་ཡིན། རྒྱ་གཞུང་གིས་གུང་ཁྲན་ཏང་དང་གོ་མིན་ཏང་སྐོར་གྱི་གློག་བརྙན་དང་རྒྱ་ནག་གི་འཚོ་བའི་སྐོར་གྱི་གློག་བརྙན་རྐྱང་སྐད་བསྒྱུར་བྱེད་དུ་འཇུག་གི་རེད། དེ་མིན། བོད་དང་འབྲེལ་བའི་གློག་བརྙན་རིགས་བསྒྱུར་མི་ཆོག་པ་མ་ཟད། ནུབ་ཕྱོགས་ཀྱི་གློག་བརྙན་རིགས་ཀྱང་སྐད་བསྒྱུར་བྱེད་ཆོག་གི་མ་རེད། ༢༠༠༨ ཡས་མས་ལ་སུའུ་ཀི་ལན་གྱི་ ༼རང་དབང་གི་ཆེད་དུ༽ ཞེས་པའི་གློག་བརྙན་སོགས་ནུབ་ཕྱོགས་ཀྱི་རང་དབང་འཐབ་རྩོད་དང་དམངས་གཙོ། སྲིད་གཞུང་ལ་ཁ་གཏད་གཅོག་པའི་གློག་བརྙན་སོགས་བཀག་འགོག་བྱས་པ་རེད། དེ་དང་དེ་འདྲ་བའི་དཀའ་ངལ་དང་བཀག་རྒྱ་མང་པོ་ཞིག་གི་དབང་གིས་བོད་ནང་སྡོད་འདོད་མེད་པ་ཆགས་སོང”ཞེས་བརྗོད་བྱུང་།
ཁོ་མོས་མུ་མཐུད་དུ་བརྗོད་དོན། “བཙན་བྱོལ་ནང་གི་གཞོན་སྐྱེས་ཚོའི་སློབ་སྦྱོང་གི་གནས་སྟངས་མི་རིགས་ལ་ཞེན་སྐོར་ངས་ད་དུང་ཤེས་ཀྱི་མེད། བོད་ནང་ལ་མཚོན་ན། གཞོན་སྐྱེས་ཚོ་རང་གི་སྐད་ཡིག་རིག་གཞུང་ལ་དགའ་ཞེན་དང་མི་རིགས་ཀྱི་འདུ་ཤེས། འཐབ་རྩོད་ཀྱི་སེམས་ཤུགས་ཚད་མཐོན་པོར་སླེབས་ཡོང་གི་འདུག ང་རང་ལ་མཚོན་ན་འདིར་མ་ཡོང་སྔོན་ནས་གནས་ཚུལ་མང་པོ་ཞིག་དཔེ་ཆ་བཀླགས་ཏེ་ཧ་གོ་སོང་ལ། བོད་ནང་གི་གཞོན་སྐྱེས་གཞན་དག་ཚོས་ཀྱང་དེ་བཞིན་དུ་བོད་པའི་གནས་ཚུལ་དང་མི་རིགས་ཀྱི་འདས་པའི་ལོ་རྒྱུས་རིམ་གྱིས་ཧ་གོ་ཡོང་གི་རེད། དེ་དག་ལ་བསམ་བློ་བཏང་ན་གཞིས་བྱེས་ལྷན་འཛོམས་ལ་རེ་བ་ཆེན་པོ་འདུག་བསམ་གྱི་འདུག ཡིན་ནའང་བོད་པར་དེ་འདྲའི་ཉི་མ་ཞིག་འཆར་བར། ཨང་དང་ཤོས་བོད་པ་ནང་ཁུལ་མཐུན་སྒྲིལ་བྱ་རྒྱུ་དང་། བོད་པ་མི་རེ་ངོ་རེ་ནས་མགོ་བརྩམས་ཏེ་བོད་པའི་རྩ་དོན་ཐོག་འགན་འཁུར་དགོས་པ་རེད་སྙམ།”ཞེས་བརྗོད་བྱུང་།
གསར་འགོད་པ། དོན་གོ
ཁྱེད་ཀྱི་ཕེབས་ལམ་ནང་དུ་བར་ཆད་མ་བྱུང་བར་དགའ་པོ་བྱུང་ཞུ་རྒྱུ་དང་ང་ཚོའི་བཙན་བྱོལ་ནང་དུ་མདོ་སྨད་པ་ཚོ་ཆོལ་ཁའི་ཕྱོགས་ཞེན་ཇེ་ཆེན་འགྲོ་བཞིན་འདུག་ལགས། དེ་ནི་ཕན་ཐོག་མེད་པ་ཞིག་ཡིན་པས་དེ་འདྲ་མ་བྱེད། གཅིག་སྒྲིལ་དགོས་ཟེར་ནས་སློབ་བྱ་བཟང་པོ་རེ་གནང་རོགས།
དགའ་བྱུང་། འཐབ་རྩོད་དོན་ལྡན་དང་ལམ་ཁ་མི་ནོར་བར་ཤོག།
བོད་ནང་གི་བོད་མི་ཚོ་ནི་ང་ཚོའི་རེ་བ་གཅོལ་ཡུལ་དེ་ཡིན།