བསྟན་འཛིན་ཤེས་རབ།
དེ་རིང་ཉིན་གུང་ཆུ་ཚོད་གཉིས་པའི་སྟེང་ཚོགས་པའི་ལས་དོན་ཞིག་གི་ཆེད་དུ་གཞིས་གྲོང་གསུམ་པར་བསྐྱོད་པ་ཡིན། རླངས་འཁོར་ལམ་ལ་ཆས་ཤིང་ལས་རོགས་དུས་ཐོག་ཏུ་མ་སླེབས་པས། ང་རླུང་གིས་ཅུང་འདེགས་བཞིན་ཡོད། ངའི་ཁ་གཏད་ཀྱི་རྐུབ་སྟེགས་སྟེང་གྲྭ་བ་ཆ་མེད་ཅིག་བསྡད་འདུག ཁོང་གིས་ཅི་ཞིག་བཤད་རྩིས་ཀྱིས་ཁ་ཤ་འགུལ་ཙམ་འགུལ་ཙམ་བྱེད། བར་སྐབས་ཤིག་ནས་ཁོང་གིས། དེ་རིང་ཡང་བོད་ནས་རང་ལུས་མེར་བསྲེགས་བཏང་སོང་ཟེར། ལོ་ངོ་འདི་གཉིས་ཀྱི་རིང་ལ་རང་ལུས་མེར་བསྲེགས་ཀྱི་གནས་ཚུལ་མང་དྲགས་རྐྱེན། ད་ནི་དྲལ་ཏེ་དམིགས་བསལ་གྱི་ཚོར་བ་ཁྱད་པར་བ་མི་སྐྱེ་པའི་ཚད་དུ་བསླེབས་འདུག
ཉིན་འདི་ཚོར་གནམ་གཤིས་ཀྱི་དབང་གིས་མགོ་ན་ཞིང་གཟུགས་གཞི་མ་བདེ་བར་ཡོད་པས། ངས་ལུས་པོ་རྒྱབ་ལ་བསྙེས་ཏེ་མིག་ཟུང་བཙུམ་ནས་སྡོད་རྩིས་བྱས་པ་ཡིན། སྐུ་ཞབས་ཁོང་གིས། རང་བསྲེགས་ལས་འགུལ་སྤེལ་མཁན་ནི་ངའི་ཚ་བོ་རེད་ཟེར། ངའི་མགོ་ནང་ལ་སིང་སྒྲ་ཞིག་གྲགས་བྱུང་། ཨར་མི་བརྟན་པའི་མགོ་ནད་དེ་ཡང་གར་སོང་ཆ་མེད་དུ་གྱུར་སོང་། རང་དབང་མེད་པར་ངས་ཁོང་གི་གདོང་ལ་བསྐྱར་ལྟ་འགའ་བྱ་དགོས་བྱུང་སོང་། ཕར་ལྟ་དུས་ཁོང་གི་ངོ་གདོང་ན་སྐྱོ་གདུང་དང་སེམས་སྡུག་གི་ཉམས་འགྱུར་ཅི་ཡང་མེད་པར་མ་ཟད། ཅུང་ལྷུན་ཆགས་དང་སྤོབས་སེམས་ཀྱི་རྣམ་པ་ཞིག་མངོན་འདུག འོན་ཀྱང་ངས་ཁོང་གི་སེམས་ཁོང་གི་གདུང་ཡུས་དེ་ཚོར་གྱི་འདུག སྙིང་གི་སྟིག་སྒྲ་དེ་ཡང་ཐོས་ཀྱི་འདུག
ངའི་སེམས་ཀྱི་གཏིང་རིམ་ལ་བཟོད་མི་ཐུབ་པའི་ཟུག་གཟེར་ཞིག་བརྒྱབ་བྱུང་། གདོང་ཁུག་ལ་ན་ཟུག་དྲག་པོ་ཞིག་བཏང་བྱུང་། ཐོས་དྲལ་དུ་སོང་བའི་རྒྱང་རིང་རྒྱང་རིང་གི་གནས་ཚུལ་དེ་གློ་བུར་དུ་ཁྱོད་ཀྱི་མིག་མདུན་དུ་མངོན་ཞིང་རྣ་ལམ་ནས་གྲགས་ཡོང་སྐབས། ཁྱོད་ཀྱི་ཚོར་བ་ནི་ཅི་ཞིག་གིས་མཚོན་པར་བྱེད་ཐུབ་བམ།
སྐུ་ཞབས་ཁོང་གིས་མུ་མཐུད་དུ་འདི་ལྟར་ཟེར། ཁ་སང་ཁོས་ང་ལ་ཁ་པར་བཏང་བྱུང་། སྐབས་ཐོག་དེར་ང་ཁོམ་གྱི་མེད། འོན་ཀྱང་། ཁོས་སྐད་ཆ་མང་བོ་མང་བོ་ཞིག་བཤད་ཀྱི་འདུག ད་དུང་། དེ་རིང་འུ་གཉིས་ཀྱིས་ལྷོད་ལྷོད་བྱས་ཏེ་ཁ་བརྡ་ཞིག་བྱེད་ཟེར། ངས་ཞེ་དྲག་ཡ་བྱས་མེད། བྲེལ་བ་ཆེ་བས། ཁོམ་གྱི་མི་འདུག་ཅེས་བཤད་དེ་ཁ་པར་ཁ་བརྒྱབ་པ་ཡིན་ཟེར། སྐབས་འདིར་ཁོང་གི་སྐད་ངག་ལ་འདར་ཟུག་རྒྱག་བཞིན་འདུག ངོ་གདོང་ལ་འགྱོད་གདུང་དྲག་པོའི་ཉམས་ཤིག་ཤར་འདུག རྦ་རླབས་ལྟར་འཁྲུག་པའི་ཁོང་གི་སེམས་ཚོར་དེས་བརྫིས་པས། ངས་ཁོང་ལ་ཅི་ཞིག་བཤད་དགོས་པའང་མི་ཤེས་པར་གྱུར།
སྐབས་འདིར་ཁོང་གི་སྐྱོ་ཉམས་དང་ལྷན་དུ་ངའི་མིག་ལམ་ལ་ངོ་གདོང་གཞན་མང་བོ་ཞིག་ཀྱང་འཇིགས་སུ་རུང་བའི་ཚུལ་གྱིས་ཤར་བྱུང་། དེ་དག་ནི་གཞན་གྱི་ཚེ་སྲོག་ལ་རྩེད་སྤྱད་བྱེད་མཁན་དག་གི་ངོ་གདོང་རེད། གཞན་གྱི་སྡུག་བསྔལ་གྱིས་རང་གི་སེམས་ཚོར་སྒྲུབ་པར་བྱེད་འདོད་མཁན་དག་གི་ངོ་གདོང་རེད། མདོར་བསྡུས་ནས་བཤད་ན། རང་ཉིད་སྐྱིད་ཉལ་རྒྱག་བཞིན་གཞན་ལ་རྣམ་པ་ཅི་རིགས་པའི་སྒོ་ནས་མེར་བསྲེགས་གཏོང་བར་སྐུལ་མཁན་དག་གི་ངོ་གདོང་རེད། འདི་དག་གི་ངོ་གདོང་ནི་ཇི་འདྲའི་འཇིགས་སུ་རུང་བ་ཞིག་རེད་ཨང་། ཅི་འདྲའི་གདུག་རྩུབ་ཅིག་ལྡན་འདུག་ཨང་།
ང་ཚོའི་བདེན་དོན་རྩོད་སྟངས་ནི་ཞི་བདེ་དང་རང་གཞན་གཉིས་ཕན་གྱི་ཐབས་ལམ་ཡིན་ལ། མཐར་ཐུག་གི་དམིགས་ཡུལ་ནི་མི་ཐམས་ཅད་ཞི་བདེ་ལྷིང་འཇགས་ཀྱིས་འཚོ་གནས་བྱེད་རྒྱུ་དེ་ཡིན། འོན་ཀྱང་ད་ལྟ་མེར་བསྲེགས་ཀྱིས་གྲོངས་པའི་གྲངས་ཚད་ནི་ལྔ་ཅུ་མ་ཟིན་ཙམ་དུ་གྱུར་ཡོད། སྐུ་ཞབས་ཁོང་གིས་གདོང་བ་གནམ་ལ་འཁོར་ཏེ་སྐྱོ་ཉམས་ཆེན་པོས་གསུང་རྒྱུར། ད་ངོ་མ་དཀའ་ལས་ཁག་པོ་རེད། ང་ཚོའི་མི་འདི་ལྟར་གྲོངས་བཞིན་ཡོད་པ་རེད། ཕ་རོལ་ཕྱོགས་ནས་འགྱུར་བ་ཅུང་ཙམ་ཡང་གཏོང་གི་མི་འདུག་ཟེར། རེད་དེ། ཚེ་སྲོག་ལ་མཚོན་ན་ལྔ་ཅུར་ཉེ་བའི་གྲངས་ཀ་ནི་གྲངས་ཀ་ཉུང་ཉུང་ཞིག་ག་ལ་ཡིན། མ་ཟད་རང་ག་བ་ཞིག་དེ་བས་ཀྱང་མིན། འཇིག་རྟེན་ན་ཆེས་རྩ་ཆེ་ཞིང་བླ་ན་མེད་པ་ནི་ད་གཟོད་ཚེ་སྲོག་ཡིན། འོན་ཀྱང་བོད་ཀྱི་ལྷིང་འཇགས་དང་ཞི་བདེའི་འཚོ་གནས་ལ་ཅུང་ཙམ་ཡང་མ་ཕན་པར་མ་ཟད། རྐྱེན་འདི་དག་ལ་རྟེན་ཏེ་བོད་ཡུལ་དུ་རྒྱ་མི་དང་རྒྱ་དམག་ཇེ་མང་ནས་ཇེ་མང་རེད། བོད་མི་ཚོའི་འཚོ་གནས་དང་བདེ་འཇགས་ལ་ཉེན་ཁ་ཇེ་ཆེ་ནས་ཇེ་ཆེ་རེད། བོད་མིའི་སྟེང་དམ་དྲག་ཇེ་མཐུ་ནས་ཇེ་མཐུ་རེད། ད་ནི་ཕྱོགས་གང་གི་ངོས་ནས་ཀྱང་འགྱུར་བ་ཞིག་བཏང་ན་ཅི་མ་རུང་ཨང་།
ཁོང་གིས་མུ་མཐུད་དུ་གསུང་དོན། ཡུལ་མི་ཚོ་གཙོས་པའི་མི་དམངས་ཀྱིས་ཚ་བོའི་ཕུང་བོ་དེ་རིང་སྐར་མ་བྱེད་རྩིས་འདུག རྒྱ་དམག་སླེབ་བཞིན་ཡོད་པས། གལ་སྲིད་བསླེབ་ཚེ་སྐུ་ཕུང་འཕྲོག་འགྲོ་ངེས་རེད། མི་མང་གིས་སྐར་མ་མ་ཚར་བར་ལམ་ནས་རྒྱ་དམག་འགོག་རྒྱུའི་འཆར་གཞི་འདུག སྐབས་ཐོག་དེར་ཐོན་དུས་ཡང་བསྐྱར་གནས་ཚུལ་ཅི་འདྲ་ཞིག་འབྱུང་ངམ་ཟེར། ངས་ངག་ནས་ཐོན་ལ་མི་ཐོན་པའི་ངང་ཁོང་གི་ཚ་བོའི་མཚན་ལ་ཅི་ཟེར་དྲིས་པ་ཡིན། ཁོང་གིས་ཁ་པར་གྱི་ཁ་ཕྱེས་ཏེ་པར་གཉིས་སྟོན་བཞིན། འདི་རེད། མིང་ལ་བློ་འཛིན་ཟེར། ལོ་བཅོ་བརྒྱད་རེད། དེ་རིང་ཉིན་གུང་རྒྱལ་རོང་ཚོ་བདུན་དུ་རང་ལུས་བསྲེགས་ཏེ་ངོ་རྒོལ་ལས་འགལ་སྤེལ་བ་རེད་ཟེར། ཁོང་གིས་བསྟན་པའི་པར་དེ་གཉིས་ལས་གཅིག་ནི་གྲྭ་བ་ལོ་བཞོན་ཞིག་གིས་ཁ་པར་ལྟེབ་མ་ཅན་ཞིག་ཁ་ཕྱེས་ཏེ་འགྲམ་པའི་ཐད་དུ་བཟུང་འདུག་པ་དང་། པར་གཞན་དེ་ནི་མེ་ལྕེ་མཆེད་བཞིན་གཞུང་ལམ་སྟེང་དུ་འགྱེལ་ཡོད་ཅིང་པར་ཟུར་དུ་གྲྭ་བ་ཞིག་གི་གོས་ཟུར་མངོན་ཡོད་པ་ཅན་ཞིག་རེད།
ངས་པར་དེ་གཉིས་ལ་ཞིབ་ལྟ་བྱེད་བཞིན་པའི་སྐབས། རླངས་འཁོར་འབབ་ཚིགས་སུ་འབྱོར་སོང་། ངས་མྱུར་མོར་ཁོང་བཀག་སྟེ་རླངས་འཁོར་གླ་ཆ་མཉམ་དུ་རྩིས་རྒྱག་སྐབས། གྲོགས་པོ་གཞན་ཞིག་གིས་ལག་སྔ་བརྩད་སོང་། ཅང་མ་འགོར་བར་མི་སྐྱ་ཞིག་སྦག་སྦག་ཞོན་ཏེ་ཁོང་གི་མཁྲིས་སུ་སླེབས་སོང་ལ། ཁོང་གིས་བྲེལ་བྲེལ་འཚུབ་འཚུབ་ཀྱིས་ཁ་པར་ནང་ཛ་དྲག་གི་རྣམ་པ་ཆེ་བའི་སྐད་ཆ་ཞིག་ཤོད་བཞིན་སྦག་སྦག་འཕང་ལ་ཞོན་ཏེ་ཡར་བུད་སོང་། ངས་སེམས་ཁོང་ནས་མིག་ཆུ་འདོན་བཞིན་ཡལ་བཞིན་པའི་ཁོང་གི་རྒྱབ་གཟུགས་ལ་ཅེར་བསྡད་པ་ཡིན་ལ། རིག་སྟོབས་ཅན་གྱི་མི་བོ་ཞིག་ང་ཚོ་དང་གཏན་དུ་ཁ་བྲལ་སོང་བར་འཕང་སེམས་སྐྱེ་བཞིན་འགྲེང་བསྡད་པ་ཡིན།
བསྟན་འཛིན་ཤེས་རབ་ཞེསཔ་འདི་ནམ་ཡིན་རུང་བོད་གཞུང་དང་བཙན་བྱོལ་བ་ཚོས་མ་འགྲིག་མ་འཐུས་ཀྱང་བཤད་པ་ལས་རྒྱ་གཞུང་ལ་ཚིག་ཅིག་བཤད་པ་མཐོང་རྒྱུ་མེད། ད་དུང་ལྷག་བསམ་ཆེ་མདོག་གིས་སྐད་ཆ་འདི་འདྲ་བཤད་པ་ལ་ཡིད་ཆེས་མཁན་ཚོ་ནི་ལྐུགས་པ་ལྐུགས་ནག་རེད། ཤེས་སོང་ངམ།
སྤྲུལ་སྐུ་ལགས། བླ་སྤྲུལ་ཚོའི་ཆོག་ཤེས་དེས་ང་ཚོའི་ལོ་རྒྱུས་ལ་ནག་ཉེས་མང་པོ་བསགས་ཡོད་པ་རེད། ད་ཡང་ཁོང་གི་བྱམས་སེམས་སྤུ་སིལ་མ་དེ་ང་ཚོ་གནོད་བསྐྱལ་དུ་སླེབས་སོང་། ཡ་མ་བརླ་ཡི་བླ་སྤྲུལ་ཚོ་ཉན་རྒྱུ་གང་ཡང་མེད་ངོ་རྒོལ་ཡོད། སྤྱིར་སྟངས་མེ་བསྲེགས་མཚམས་འཇོག་མིན་དེ་མི་རིགས་ཀྱི་གནད་དོན་ཐུག་ཡོད་པས་སྒེར་སུ་གཅིག་ལ་སྐད་ཆ་བཤད་རྒྱུའི་ཐོབ་ཐང་མེད།།
”བོད་ཀྱི་ལྷིང་འཇགས་དང་ཞི་བདེའི་འཚོ་གནས་ལ་ཅུང་ཙམ་ཡང་མ་ཕན”
”ད་ནི་ཕྱོགས་གང་གི་ངོས་ནས་ཀྱང་འགྱུར་བ་ཞིག་བཏང་ན་ཅི་མ་རུང་ཨང་། ”
ཁྱེད་ཀྱི་སྐད་ཆ་དུམ་བུ་དེ་ཚོ་བློ་ངོར་བདེ་བོ་རང་མ་བྱུང་།
དོ་དགོང་འབྲས་སྤུངས་ཚོགས་ཆེན་གྱིས་མེར་སྲེག་འདས་པོ་རྣམས་ལ་སྨོན་ལམ་མཆོད་འབུལ་འཚོགས་སོང་། ད་དུང་མུ་མཐུད་དུ་ཉིན་གསུམ་ལ་འཚོག་རྒྱུ་ཟེར།
དམིགས་ཀྱིས་བཤད་རྒྱུ་ཞིག་ལ། རང་སྲེག་གིས་ཚེ་སྲོག་ཡལ་བཞིན་པའི་གནད་དོན་འདི་རྒྱ་ནག་ལ་འགན་མི་འདུག་ཅེས་གཏན་ནས་བཤད་མེད་པ་མ་ཟད། གནད་དོན་དེ་རྒྱ་ནག་ལ་ཐུག་ཡོད་པ་གཞིར་བཞག་གིས་སྐད་ཆ་གཞན་བཤད་བཞིན་ཡོད་པ་ཤེས་པར་གྱིས།
སྤྱིར་ཡིན་ན་ངས་རང་སྲེག་ལ་སྐུལ་མ་བྱེད་མཁན་དག་གི་མིང་དང་ཁོ་ཚོའི་སྐད་ཆ། དེ་བཞིན་དུ་རྩོམ་ཡིག་བཅས་རེ་རེ་བཞིན་མི་རྣམས་ཀྱི་མིག་མདུན་དུ་བཀྲམ་དགོས་པ་རེད་མོད། འོན་ཀྱང་ད་གཞན་ལ་དགྲ་བསགས་ན་མི་འདོད་ཀི གང་ལྟར་ངས་བཀྲམ་རུང་མ་བཀྲམ་རུང་མི་རང་རང་གིས་སོ་སོས་ག་རེ་བྱེད་ཀྱི་ཡོད་མེད་སོ་སོའི་སེམས་ན་ཁྲ་ཆིལ་ལེར་ཡོད་པ་རེད། ཡང་གཅིག་བཤད་ན། རྩོམ་ཡིག་འདིས་མི་དེ་ཚོའི་གྲས་རེ་རེ་བཞིན་ས་ཁར་དྲུད་ཡོང་གི་འདུག་ལ། མི་རིང་བར་ད་དུང་ཡང་རང་གཟུགས་ཇེ་གསལ་ངང་ཐོན་ཡོང་གི་རེད་འདོད།
ཡ་ཡ་གྲྭ་རྒན་ཁྱོད་ཀྱིས་བཤད་ས་ངོ་མ་དེ་རིན་པོ་ཆེ་ཚང་རེད་མོ། རྒྱ་ནག་གི་བཤད་བཞིན་པ་དང་བཤེད་འདོད་པ་ཚང་མ་ཁྱོད་ཀྱིས་བཤེད་འདུག
བསྟན་ཤེར་ལགས། གཞན་གྱི་ཚེ་སྲོག་གི་རྩེད་སྤྱད་བྱེད་མཁན་ཡོད་ན་རྒྱ་ནག་དམར་གཞུང་རེད་རང་ཉིད་སྐྱིད་ཉལ་རྒྱག་བཞིན་རྣམ་པ་ཅི་རིགས་པའི་སྒོ་ནས་མེར་བསྲེགས་གཏོང་བར་སྐུལ་མཁན་ཞིག་གང་དུ་འདུག་འདི་ལྟར་ཚིག་འདི་དག་གི་རིགས་བཀོལ་སྤྱོད་མ་གནང་རོགས་གཞན་མེ་བསྲེགས་འཚམས་འཇོག་གི་འབོད་སྐུར་ལ་རྒྱབ་སྐྱོར་ཡོད།
རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས་ལ་བརྟེན་ནས་རང་སྲེག་བྱུང་བ་རེད་དམ། རང་སྲེག་གཏོང་མཁན་ཚོའི་གྲས་སུ་རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས་ལ་ཐེར་འདོན་གནང་མཁན་ག་ཚོད་ཡོད་དམ། དེ་དོན་དངོས་ཤིག་རེད།
ཁོང་ཚོའི་མངོན་འདོད་གང་ཞིག་རྒྱ་ནག་གཞུང་གིས་མ་སྒྲུབ་པ་དང། དེ་སྒྲུབ་རྒྱུར་བཙན་བྱོལ་གཞུང་གི་མགོ་ཁྲིད་ཚོའི་ཅི་ཞིག་བྱེད་བཞིན་པ་ཡིན་ནམ། ཁ་གཏད་རྒྱ་ནག་གིས་མཁྲེགས་བཟུང་བྱེད་བཞིན་ནའང། བཙན་བྱོལ་གཞུང་གི་མགོ་ཁྲིད་ཚོར་རང་སྲེག་ཐད་འགན་ཁུར་གང་ཡང་མེད་པ་རེད་དམ། བཙན་བྱོལ་གཞུང་གི་མགོ་ཁྲིད་ཚོས་ཁོང་ཚོས་རང་སྲེག་གཏོང་བཞིན་པ་དེར་ལམ་སྟོན་གནང་དགོས་ཀྱི་མ་རེད་དམ། ཡིན་དང་མིན་ལབ་རྒྱུའི་ཐོབ་ཐང་མེད་ཅེས་བཤད་བསྡད་ན། ཉིན་རེ་ནས་ཉིན་རེ་ཚེ་སྲོག་རེ་མེས་འཚིགས་བཞིན་པ་དེའི་འགན་སུས་ཁུར་རམ། ཁོང་ཚོ་མགོན་མེད་གཞུང་མེད་རྐྱང་རྐྱང་རེད་དམ།
ཁོང་རྣམས་པས་རང་སྲེག་གཏོང་བ་བོད་ཀྱི་རང་དབང་དང་༧གོང་ས་མཆོག་བོད་དུ་གདན་འདྲེན་ཞུ་ཆེད་ཡིན་པ་གསལ་བ་ལྟར། བཙན་བྱོལ་གཞུང་གི་མགོ་ཁྲིད་ཚོས་ཁོང་རྣམ་པའི་ནུས་པ་རྐྱང་པར་བརྟེན་ནས་དོན་དག་དེ་གཉིས་འགྲུབ་རྒྱུར་རེ་བ་རྒྱག་གི་ཡོད་དམ། མེད་ན། ཁོང་ཚོའི་རང་སྲེག་དེ་གནས་བབ་གང་དུ་ཟགས་རྒྱུ་རེད་དམ། དེ་ལ་བཙན་བྱོལ་གཞུང་གི་མགོ་ཁྲིད་ཚོར་ཅིའི་ཕྱིར་འགན་མེད་པ་རེད་དམ། གནས་སྐབས་ནུས་པ་མི་ཐོན་ན། ག་དུས་ནུས་པ་ཐོན་གྱི་རེད་དམ། དེ་བཤད་ཚོད་མི་ཐིག་ན། ང་ཚོ་མགོ་ཁྲིད་ཀྱིས་ག་རེ་བྱེད་དམ། མི་མང་དང་གཞུང་། མི་མང་དང་མགོ་ཁྲིད་ཟེར་བའི་ཚིག་དེ་གཉིས་ལ་ཁྱད་པར་མེད་དམ། མགོ་ཁྲིད་ཀྱིས་ག་རེ་མགོ་ཁྲིད་ཀྱི་ཡོད་པ་རེད་དམ།
ག་དུས་ཡིན་ན། རྫིག་གཏམ་བཤད་བསྡད་རྒྱུར་ངོ་མི་ཚའམ། དམག་ཅིག་རྒྱག་པའི་དབང་དུ་བཏང་ན། རྒྱལ་ཁ་མི་ལོན་ན། སོ་སོའི་དམག་ལ་སྲུང་སྐྱོབ་བྱེད་ཨེ་ཐུབ་ལྟ་རྒྱུ་ནི་དམག་དཔོན་ཞིག་གི་འོས་འགན་རེད། ང་ཚོ་ཅིའི་ཕྱིར་འགན་ཁུར་མི་དགོས་པའི་མགོ་ཁྲིད་འདི་འདྲ་སླེབས་པ་རེད་དམ། ང་ཚོའི་མགོ་ཁྲིད་ཚོའི་རང་སྟེང་གི་ནུས་པ་དང་འོས་འགན་དེ་བརྗེད་འགྲོ་བ་རེད་དམ། རྦད་དེ་མེད་པ་རེད་དམ། ང་དངོས་གནས་གསལ་བསྒྲགས་འདི་འདྲ་ཀློག་རྒྱུར་སུན་སྣང་སྐྱེ་ཡི་འདུག
ངོ་མ་སེམས་སྐྱོ་དགོས་པ་ཞིག་འདུག དགྲ་དགའ་གཉེན་སྡུག་གི་སྐད་ཆ་མཚམས་བཞག་ན་རེད།
སྐད་ཆ་དེ་རྒྱ་ནག་གཞུང་ལ་ཤོད་དགོས་པ་ལས་བཙན་བྱོལ་ནང་ནས་སྐྱིད་ཉལ་བྱས་དེ་སྐད་ཆ་སྟོང་བ་བཤད་ནས་དགོས་ཕན་གང་ཡང་མེད་་་
མེ་བསྲེགས་མཚམས་འཇོག་གི་འབོད་སྐུལ་ལ་རྒྱབ་སྐྱོར་ཡོད།
ངས་ཀྱང་སྔོན་མར་འདིའི་སྐོར་ལ་བསམས་ཚུལ་ཞུ་ཡོད་།
ལུང་རྟོགས་ལག་ཁྱོད་ཀྱིས་རང་ཉིད་ཀྱི་རང་དབང་ཆ་ཚང་ལོངས་སུ་སྤྱོད་རོག་གནང་།
དེ་འདྲ་གནང་མ་ཐུབ་ན་ཁྱོད་ཀྱིས་སྐད་ཆ་སྟོང་པ་རེད།
མེ་བསྲེགས་མཚམས་འཇོག་གི་འབོད་སྐུལ་ལ་རྒྱབ་སྐྱོར་ཡོད།
ངས་ཀྱང་སྔོན་མར་འདིའི་སྐོར་གྱི་རྩོམ་ཡིག་སྔ་ཕྱི་ཚར་བཞི་ཙམ་སྤེལ་མྱོང་།
འོན་ཀྱང་ཁྱོད་ཀྱིས་བསམ་གཞིག་མ་བྱས་པའི་ཚིག་ཁ་ཤས་ཤིག་བེད་སྤྱོད་བྱས་འདུག
༼རྣམ་པ་ཅི་རིགས་པའི་སྒོ་ནས་མེར་བསྲེགས་གཏོང་བར་སྐུལ་མཁན་༽སོགས་ཀྱི་ཉན་མི་སྤྲོ་ཞིང་མཐོང་མི་འདོད་པའི་ཡིག་འབྲུ་ཁ་ཤས་རེད། རྒྱ་དམར་པོ་གཞུང་གིས་སྐད་ཆ་དང་སྒོ་ཀུན་ནས་མཚུངས་པ་མ་ཟད་་་ད་དུང་མི་དེ་དག་ཁྱོད་ཀྱིས་ངོ་གདོང་ངོས་ཟིན་མདོག་གི་གཏམ་འཆར་ཞིག་ཀྱང་སྤེལ་འདུག གཟབ་གཟབ་མ་མཛད་ན་དགྲ་དགའ་གཉེན་སྡུག་གི་སྐད་ཆ་འགྱུར་ཉེས་ཆེ་བས་རྗེས་མར་ཡིད་གཟབ་གནང་རོགས།
སྤྱིར་བཏང་ཁྱེད་རང་སྤུན་ཟླའི་ལས་དབང་ལ་མ་བཟོད་ནས་བྲིས་པ་ཞིག་ཡིན་ཀྱང་ཤ་རུས་གཅིག་པ་རྣམས་ལ་ཤ་ཚ་མེད་མཁན་མགོ་རྣ་མེད་པའི་བོད་པ་ཁ་ཤས་རེད་མ་གཏོགས་གཞན་དག་སུ་ཞིག་ཡོད།
བསྟན་འཛྀན་ཤེས་རབ་ལགས། སུ་ཞིག་གིས་ཚེ་སྲོག་ལག་རྩེད་དུ་བྱེད་ཀྱིན་འདུག རྒྱ་གཞུང་ལ་ཁ་གཏོང་མ་ཐུབ་ནའང་བོད་མི་ནང་ཁུལ་དུ་ཞལ་བཙུམ་ཐུབ་ན་མི་ལེགས་སམ། མིའི་སྲོག་ལ་ལག་རྩེད་བྱེད་མཁན་ཞིག་ཡོད་ན་དེ་ནི་རྒྱ་གུང་ཁྲན་ཡིན་པ་ཤེས་དགོས། བོད་མི་གྲངས་མེད་ཀྱིས་ཚེ་སྲོག་བཏང་ནས་ངོ་རྒོལ་བྱས་ཀྱང་ད་དུང་གནས་ཚུལ་གཅིག་ཀྱང་ལྷགས་མེད་པ་ལྟ་བུས་རྐུབ་བཀྱག་ཆེན་པོའི་སྟེང་འགྱིང་བཞྀན་པའི་རྒྱ་མིའི་དབུ་འཁྲིད་ལྟས་ངན་དེ་ཚོ་རེད། རང་གི་མི་སེར་ཚོས་ལུས་གསོན་པོར་བསྲེགས། སྡུག་བསྔལ་འཛམ་གླིང་ལ་བསྒྲགས་ཀྱང་ད་དུང་ང་ཚོ་སྐྱིད་པོ་ཡིན་ཟེར་ནས་བསྡད་མི་འདུག་གམ། ཁྱེད་ཀྱིས་སྨྱུ་གུ་རྒྱ་གཞུང་གི་སྙིང་ལ་བསྣུན་ནས་རྩོམ་ཡིག་སྤེལ་ན་ལེགས་སོ། །
ཚོར་བ་གསོན་ཉམས་ལྡན་པ་ཞིག་བྲིས་འདུག འོན་ཀྱང་༼ སྐབས་འདིར་ཁོང་གི་སྐྱོ་ཉམས་དང་ལྷན་དུ་ངའི་མིག་ལམ་ལ་ངོ་གདོང་གཞན་མང་བོ་ཞིག་ཀྱང་འཇིགས་སུ་རུང་བའི་ཚུལ་གྱིས་ཤར་བྱུང་། དེ་དག་ནི་གཞན་གྱི་ཚེ་སྲོག་ལ་རྩེད་སྤྱད་བྱེད་མཁན་དག་གི་ངོ་གདོང་རེད། གཞན་གྱི་སྡུག་བསྔལ་གྱིས་རང་གི་སེམས་ཚོར་སྒྲུབ་པར་བྱེད་འདོད་མཁན་དག་གི་ངོ་གདོང་རེད། མདོར་བསྡུས་ནས་བཤད་ན། རང་ཉིད་སྐྱིད་ཉལ་རྒྱག་བཞིན་གཞན་ལ་རྣམ་པ་ཅི་རིགས་པའི་སྒོ་ནས་མེར་བསྲེགས་གཏོང་བར་སྐུལ་མཁན་དག་གི་ངོ་གདོང་རེད། འདི་དག་གི་ངོ་གདོང་ནི་ཇི་འདྲའི་འཇིགས་སུ་རུང་བ་ཞིག་རེད་ཨང་། ཅི་འདྲའི་གདུག་རྩུབ་ཅིག་ལྡན་འདུག་ཨང་། ༽ ཞེས་པའི་ཚིག་འདི་དག་མཐོང་ན་མི་འདོད་ཅིང་བཀླག་ན་སེམས་ན་བྱེད་ཅིག་རེད། དོན་དངོས་དེ་འདྲའི་ཁུངས་ལྡན་མིག་མཐོང་ལག་ཟིན་ཡོད་ན་དེ་དག་གི་མིང་འདི་དང་དེ་ཞེས་ངོ་གདོང་བྱི་དགོས་པ་རེད། གཞན་ཚོར་བ་ཙམ་དང་རྣམ་རྟོག་ཙམ་གྱིས་དགྲ་དགའ་གཉན་སྡུག་ལས་མ་འདས་སོ།།
མེ་བསྲེགས་མཚམས་འཇོག་བྱེད་དགོས་ན་དང་པོ་རྒྱ་དམར་གཞུང་གི་དྲག་གནོན་མཚམས་འཇོག་བྱེད་ཆུག དེ་མིན་སྐད་ཆ་སྟོང་པ་རེད། ཕྱི་ལོགས་ཀྱི་མི་མང་པོས་རང་ཉིད་ཀྱིས་རང་དབང་ཆ་ཚང་ལོངས་སུ་སྤྱོད་བཞིན། བོད་ནང་གི་བོད་མི་ཚོའི་གཞན་དབང་འོག་གི་དཀའ་སྡུག་གཏན་ནས་མི་གཏོགས་པའི་སྐད་ཆ་ཀྱང་ཀྱང་བཤད་ཀྱི་འདུག ཡང་མི་ཁ་ཤས་ལ་ནི་དམིག་ཡུལ་གཞན་དག་ཀྱང་ཡོད་སྲིད་པ་རེད།