མེ་ལྕེ་སྐོར་སྐྱོད་ཀར་ན་ཊ་ཀར་འབྱོར་འདུག

ཟླ་འདིའི་ཕྱི་ཚེས་ ༦ ཉིན་ནས་བཟུང་བོད་མི་སྤྱི་འཐུས་ལྷན་ཚོགས་ཀྱིས་སྣེ་འཁྲིད་པའི་བདེན་པའི་མེ་ལྕེ་སྐོར་སྐྱོད་ཀྱི་ལས་འགུལ་དེ་རྒྱ་གར་གྱི་ས་གནས་ཁག་ཏུ་སྐོར་སྐྱོད་གནང་གི་ཡོད་པ་ལྟར། ཁ་སང་ཕྱི་ཚེས་ ༡༨ ཉིན་ལྷོ་ཕྱོགས་ཁུལ་གྱི་བདེན་པའི་མེ་ལྕེ་སྐོར་སྐྱོད་དེ་ཀར་ན་ཊ་ཀའི་མངའ་སྡེའི་ནང་འབྱོར་ཡོད་པ་དང་། སྐབས་དེར་མཱ་ངྷི་ར་སི་བོད་རིགས་སློབ་ཕྲུག་ཚོགས་པའི་རྒྱུན་ལས་དང་། ལྕམ་སྐུ་ཨ་ཤ་ར་ཌི་ལགས་དང་ལྕམ་སྐུ་ཕར་མཱ་ ( Padma ) ལགས། མཱ་ངྷི་ར་སི་ཉེ་ཁུལ་དུ་སློབ་སྦྱོང་བྱེད་ཀྱིན་པའི་ཧོང་ཀོང་དང་པོ་ལན་ཌི། ཁེ་ན་ཌ་བཅས་ཀྱི་སློབ་མ་དང་། རྒྱ་གར་གྱི་རྒྱབ་སྐྱོར་བ་སོགས་མི་གྲངས་བཅུ་ཕྲག་བརྒལ་བ་འདུ་འཛོམས་ཀྱིས། བདེན་ཚིག་སྨོན་ལམ་དང་བོད་རྒྱལ་ཁབ་ཆེན་པོའི་རྒྱལ་གླུ་བཏང་སྟེ་མེ་ལྕེ་སྐོར་སྐྱོད་མཇུག་སྒྲིལ་ཡོད་འདུག

དེ་རིང་དགོང་དྲོ་བོད་རིགས་སློབ་ཕྲུག་ཚོགས་པའི་སྐུ་ཚབ་གཉིས་ཀྱིས་སྣེ་འཁྲིད་འོག བདེན་པའི་མེ་ལྕེ་སྐོར་སྐྱོད་ཀྱི་ལས་འགུལ་དེ་ཀར་ན་ཊ་ཀ་ ( Karnataka ) མངའ་སྡེའི་ནང་འབྱོར་ཡོད་འདུག་ལ། སང་ཉིན་ཞོགས་པར་སྦེལ་ཀོབ་བོད་མིའི་གཞིས་ཆགས་སུ་འབྱོར་རྒྱུ་དང་། ཁུལ་དེར་ཉིན་ཤས་རིང་སྐོར་སྐྱོད་དང་མཚན་རྟགས་བསྡུ་རུབ་བྱ་འཆར་ཡོད་འདུག

 རྒྱ་གར་ལྷོ་ཕྱོགས་ཏ་མི་ན་ཊོ་མངའ་སྡེ་རྒྱལ་ས་ཅི་ཎེ་ཁུལ་གྱི་བདེན་པའི་མེ་ལྕེ་སྐོར་སྐྱོད་ཀྱི་ལས་འགུལ་དེ། ཟླ་འདིའི་ཕྱི་ཚེས་  ༡༠ ནས་ ༡༨ བར་གྱི་ཉིན་གྲངས་དགུའི་རིང་སྐོར་སྐྱོད་བྱས་ཡོད་འདུག་ལ། སྐོར་སྐྱོད་སྐབས་རྒྱ་གར་གྱི་སྲི་ཞུ་བ་ཟུར་པ་དང་དབུས་ཁྲིམས་དཔོན་ཟུར་པ། སྤྱི་ཁྱབ་སྐོར་སྲུང་ཟུར་པ། སྒྱུ་རྩལ་པ། རྩེད་འགྲན་པ། གློག་བརྙན་བཟོ་བསྐྲུན་པ། མཐོ་སློབ་ཀྱི་སློབ་དཔོན། ཆོས་ལུགས་མི་སྣ། གསར་འགོད་པ། སློབ་ཕྲུག ཤེས་ཡོན་བསྟི་གནས་ཁང་བཅས་ཀྱིས་རྒྱབ་སྐྱོར་གྱི་མཚན་རྟགས་བཀོད་ཡོད་འདུག

གསར་འགོད་པ། དོན་གོ