རྭ་རྒྱ་བློ་བཟང་དཔལ་ལྡན།
བོད་གངས་ཅན་པ་རྒྱ་ནག་དམར་གཞུང་གིས་བཙན་བཟུང་བྱས་ནས་ད་ལྟའི་བར་དུ་རྒྱལ་གཅེས་དཔའ་པོ་གྲངས་ལས་འདས་པ་ཞིག་གིས་མི་རིགས་ཀྱི་བདེ་སྐྱིད་དང་། ལོ་རྒྱུས་ཀྱི་ཁེ་དབང་སླད་དུ་ཚེ་སྲོག་བཏང་དང་གཏོང་བཞིན་པ་སྤྱི་དང་། ལྷག་པར་དུ་ཉེ་བའི་ལོ་ཤས་ནས་བཟུང་རང་ཉིད་ཀྱི་ལུས་པོ་དམར་པོ་མེ་ལ་མཆོད་དེ་མི་རིགས་ཀྱི་བདེན་དོན་ཚེ་སྲོག་ཁོ་ནས་གླེང་བའི་རྒྱལ་གཅེས་དཔའ་བོ་བཞི་བཅུ་ཞེ་གྲངས་ཤིག་བྱུང་བ་འདིས་འཛམ་གླིང་ལ་སྔར་བྱུང་མ་མྱོང་བའི་ཟིན་ཐོ་གསར་པ་ཞིག་བསྐྲུན་པ་དང་། ལོ་རྒྱུས་ནང་མཐོང་དཀོན་པའི་ཞི་བའི་འཐབ་རྩོད་ཀྱི་རྣམ་པ་ཞིག་བོད་ཡུལ་ནས་ཐོན་ཞིང་། རླབས་ཆེ་བའི་སྙིང་སྟོབས་དང་ཆོད་སེམས་འདིས་བོད་མི་རིགས་ཀྱི་མ་འོངས་པ་གསལ་བར་བྱས་ཡོད་པ་མ་ཟད། མདོ་དབུས་མཐོ་སྒང་སླར་ཡང་སྲིད་འབྱོར་རིག་གསུམ་གྱི་རང་དབང་ཡུལ་གྲུ་ཞིག་ཏུ་འཕོ་ངེས་པའི་བདེན་རྟགས་གསལ་བོར་བསྟན་པ་རེད། ཁོང་ཚོའི་ཟླ་མེད་སྙིང་སྟོབས་དང་དྲི་བྲལ་ལྷག་བསམ་དཀར་པོས་རང་སྲོག་མེད་ལ་བསྒྲོན་པ་ལ་བརྟེན་ཏེ་ད་ལྟའི་ཆར་ཉམ་ཆུང་ཞིང་། རང་ས་གཞན་ལ་ཤོར་བའི་ང་ཚོའི་མི་རིགས་ཀྱི་བདེན་དོན་ལ་སྔ་ན་མེད་པའི་ཆེ་མཐོང་དང་། རིན་ཐང་ལྡན་པར་གྱུར་ཏེ་འཛམ་གླིང་གི་གཟུར་གནས་སྲིད་གཞུང་དང་། ཚོགས་སྡེ། མི་སྒེར་བ་བཅས་ཀྱིས་ཤ་ཚ་དང་རྒྱབ་སྐྱོར་སྔར་ལྷག་ཐོབ་བཞིན་པ་མ་ཟད། ཡུ་རོབ་སྤྱི་མཐུན་གྱིས་བཙན་བྱོལ་སྒྲིག་འཛུགས་ནི་བོད་མི་རིགས་ཀྱི་ཚབ་མཚོན་དུ་གྲོས་ཆོད་ལམ་ནས་ངོས་འཛིན་བྱས་པ་སོགས་རླབས་ཆེ་བའི་རྒྱལ་ཁ་ཇི་སྙེད་ཅིག་བྱུང་ཡོད་ལ། ༸གོང་ས་སྐྱབས་མགོན་ཆེན་པོའི་མཛད་འཕྲིན་དང་། བཙན་བྱོལ་སྒྲིག་འཛུགས་ཀྱི་ཡང་དག་པའི་སྲིད་ཇུས་ཀྱི་ཁ་ཕྱོགས་སྟངས། གཞུང་སྒེར་ཚོགས་པ་དང་མི་སྒེར་དག་གི་རྣམ་པ་འདྲ་མིན་གྱི་ལས་འགུལ་དང་དྲིལ་བསྒྲགས་བཅས་ལ་བརྟེན་ནས་ང་ཆེ་ང་བཙན་གྱི་རྒྱ་གཞུང་གི་དྲིལ་བསྒྲགས་རྫུན་མ་དང་། འཁྲབ་སྟོན་བཅོས་མ་དག་གི་རྫུན་རྐུབ་རྡོལ་བཞིན་ཡོད་དེ། བོད་ཡུལ་ཧྲིལ་བོར་དམག་རྒྱ་བསྡམས་པ་ལྟ་བུའི་གནས་སྟངས་དང་། བོད་ཀྱི་སྐད་ཡིག་རིག་གཞུང་གི་སློབ་གསོ་བཀག་འགོག སྐྱེ་དངོས་གཏོར་བཅོམ་དང་། ཞིང་འབྲོག་མང་ཚོགས་ཀྱི་འཚོ་སྡོད་རང་དབང་ཕྲོགས་དང་འཕྲོག་བཞིན་པ་དག་སྨྲ་ལྕེ་སྟོང་དུ་སྤྲུལ་ཀྱང་འཛམ་བུ་གླིང་ལ་གསལ་བཤད་བྱ་ཐབས་བྲལ་བའི་ཚོད་དུ་ལྷུང་བཞིན་ཡོད། ད་དུང་རྒྱ་ནག་ནང་ལོགས་ཀྱི་ལྐོག་ཟ་རུལ་སུངས་དང་། དབུལ་ཕྱུག་གི་ཁྱད་པར། ལས་མེད་ཀྱི་མི་འབོར། དམངས་གཙོ་དང་དད་མོས་ཀྱི་ཐོབ་ཐང་ཉམས་རྒུད་ནས་རྩ་བྲལ་དུ་འགྲོ་ལ་ཉེ་བ་སོགས་སྲིད་དབང་གཅིག་སྡུད་ཀྱི་གདུག་རྩུབ་སྔར་ལས་ཀྱང་མངོན་གསལ་ཇེ་དོད་དུ་འགྲོ་བཞིན་ཡོད། ཕྱོགས་གཞན་ནས་རྒྱ་གཞུང་གིས་སྔར་རྒྱུན་བཞིན་༸གོང་ས་མཆོག་ལ་མཚན་སྨོད་ཞུ་རྒྱུ་དང་ཁ་བྲལ་བའི་ངན་སྐུལ་འོག་བོད་ཀྱི་བདེ་འཇགས་དཀྲུགས་ཚུལ་སོགས་འུར་སྒྲོག་བྱེད་བཞིན་ཡོད་པ་དང་། སྒོར་མོ་མང་པའི་སྲིད་གཞུང་དེས་རྒྱུ་ཤུགས་མི་ཤུགས་འདང་ཚོད་སྤྱད་དེ་དྲིལ་བསྒྲགས་ཀྱི་འགྲན་ཟླར་༸གོང་ས་ཐམས་ཅད་མཁྱེན་པ་བཞད་མོ་ལྷང་ལྷང་གིས་ཕེབས་བཞིན་ཡོད་ལ། གླིང་ཆེན་ཨ་རི་དང་ཡུ་རོབ་གཙོས་པའི་འཛམ་གླིང་ས་ཕྱོགས་གང་སར་༸གོང་ས་མཆོག་གི་འཕྲིན་ལས་ནི་མེ་ལྕེ་བཞིན་མཆེད་བཞིན་ཡོད་པ་འདིས། བསྙད་འདོགས་སྐུར་འདེབས་ཀྱི་རྒྱ་གཞུང་གི་དྲིལ་བསྒྲགས་ལ་འཛམ་གླིང་ཁྲོད་ནུས་པ་ཇི་འདྲ་ཐོན་བཞིན་ཡོད་མེད་སུས་ཀྱང་ཤེས་ནུས་པ་ཞིག་རེད།
ཧུའུ་ཅན་ཐོ་དམར་གཞུང་གི་སྲིད་ཁྲིར་ལངས་པ་ནས་བཟུང་འཆམ་མཐུན་སྤྱི་ཚོགས་འཛུགས་དགོས་པ་དང་། དེ་ཡང་ནང་སེམས་ནས་མགོ་འཛུགས་དགོས་སོགས་ཀྱི་གླེང་གཞི་བསླངས་ཏེ་ལས་འགུལ་སྣ་ཚོགས་སྤེལ་མོད། ཁོའི་སྲིད་འཛིན་དུས་ཡུན་གྱི་ལོ་ངོ་བཅུ་ལ་ཕྱིར་ལྟ་ཞིག་བྱས་ན། འཆམ་མཐུན་དང་། བདེ་འཇགས་སོགས་ནི་ནེ་ཙོའི་མི་སྐད་ཀྱི་དཔེ་རུ་སོང་འདུག་སྟེ། ལོ་ངོ་འདི་སྙེད་རིང་རྒྱ་ནག་གི་སྤྱི་ཚོགས་མི་གཤིས་ཀྱི་ཉམ་ཉེས་དང་། སྒྲིག་ཁྲིམས་ཀྱི་ཉམས་ཉེས། ལམ་ལུགས་ཀྱི་ཉམས་ཉེས་འདི་ལྟ་བུ་ནི་དེ་སྔའི་དམར་གཞུང་ལོ་རྒྱུས་ནང་མཐོང་དཀོན་པའི་ཚོད་དུ་ཡོད། ཐ་ན་རིག་གནས་གསར་བརྗེ་ཞེས་པའི་སྨྱོན་པའི་དུས་རབས་དེའི་ནང་ལ་ཡང་དམར་གཞུང་གི་དཔོན་རིགས་ཕལ་མོ་ཆེའི་སོ་སོའི་ཀུན་སྤྱོད་བདག་གཅེས་བྱེད་ཐུབ་ཡོད། འོན་ཀྱང་། ད་ལྟ་ནི་ཆེས་མཐོ་རྒྱལ་སྲིད་སྤྱི་ཁྱབ་ཁང་ནས་དམའ་ཞིང་འབྲོག་གི་དམར་དཔོན་གྱི་བར་ལྐོག་ཟ་དང་ལྐོག་ལས་ཀྱི་དྲ་བ་ཟླུམ་པོ་གཅིག་གི་ནང་དུ་ལྷུང་ཟིན་ལ། སྤྱི་ཚོགས་ཀྱི་འཆམ་མཐུན་དང་སྒྲིག་ལམ་ནི་སྨོས་མ་དགོས་པར་འཛམ་གླིང་མི་དམངས་ཧང་སང་དགོས་པའི་གནད་དོན་མང་པོ་རིམ་བསྟུད་དུ་བྱུང་དང་འབྱུང་གིན་ཡོད་དེ། དེའི་ནང་ཆོས་ལུགས་ཀྱི་གནད་དོན་དང་། མི་རིགས་ཀྱི་གནད་དོན། དབུལ་ཕྱུག་གི་ཧེ་བག་སོགས་དམག་རྒྱ་མ་བསྡམས་ན་མི་གནོན་པའི་ཚོད་དུ་ལྷུང་ཡོད།
སྔར་ཞིག་ནས་བཟུང་རྒྱ་གཞུང་གི་རྩ་ཁྲིམས་སུ་ཚོགས་པ་འཛུགས་རྒྱུ་དང་། གཏམ་གླེང་འདུ་འཛོམས་ཀྱི་རང་དབང་སོགས་མང་ཞིག་བཤད་ཡོད་ཀྱང་དོན་ངོ་མའི་ཐོག་དེ་རིགས་བཤད་ས་མེད་པར་རྒྱ་ཁབ་ཁ་བྲལ་གྱི་ཉེས་མིང་འོག་བཙོན་ཁང་དུ་བཅུག་རྐྱང་བྱེད་ཀྱིན་ཡོད། རིག་གནས་གསར་བརྗེའི་རྙིང་བཞི་རྩ་མེད་དང་། གྲལ་རིམ་འཐབ་རྩོད་སོགས་ནི་ཇི་ལྟར་བཤད་ཀྱང་སྨྱོས་ཟིན་པའི་མི་རབས་ཤིག་གི་བྱས་རྗེས་རང་ལ་བརྩི་རྒྱུ་ལས་བྱ་ཐབས་མེད་མོད། ཕྱི་ཕྱོགས་སྒོ་འབྱེད་ཀྱི་སྲིད་བྱུས་མགོ་བརྩམས་ཤིང་། རྒྱལ་ཁབ་ཀྱི་དཔལ་འབྱོར་དང་རིག་གནས་ལག་རྩལ་ཀྱང་འཕེལ་རྒྱས་བྱུང་ལ། འཛམ་གླིང་གི་ཡུལ་གྲུ་ཆེན་པོ་དག་གི་སྲིད་སྐྱོང་ལམ་ལུགས་དང་། རང་དབང་གི་གནས་བབ་སོགས་གསལ་གསལ་ཐང་ཐིང་དུ་མཐོང་དང་སྣང་བཞིན་དུ་མི་རིགས་དང་། ཆོས་ལུགས། རིག་གནས་སྲུང་སྐྱོབ་སོགས་ཀྱི་སྐོར་ལ་ཚུལ་མཐུན་གྱི་འབོད་སྐུལ་ཙམ་ཡང་རྒྱལ་ཁབ་ཁ་བྲལ་ཞེས་མང་ཚོགས་ལ་མ་ཉེས་ཁག་འདོགས་ཀྱི་སྡུག་པོ་གཏོང་དྲགས་ན་མི་རིགས་མི་གཅིག་པ་ཁག་ཁ་བྲལ་དུ་འགྲོ་རྒྱུའི་བསམ་བློ་འཁོར་སྲིད་པ་ཙམ་དུ་མ་ཟད། མི་རིགས་གཅིག་ཡིན་ཀྱང་ཁ་བྲལ་དུ་འགྲོ་འདོད་པ་ཆོས་ཉིད་ཡིན་ལ། ཧུའུ་ཅན་ཐོའི་སྲིད་སྐྱོང་གི་ལོ་རྒྱུས་ནང་རྒྱ་ནག་གི་ས་གཞི་ཆེན་པོར་ཁ་བྲལ་དང་། འཐོར་ཞིག་གི་ས་བོན་མང་པོ་བཏབ་པ་མ་ཟད། མང་པོ་ཞིག་ལ་འབྲས་བུའང་སྨིན་ལ་ཉེ།
མི་གཤིས་ཀུན་སྤྱོད་ནི་དེ་ལས་ཉམ་ཉེས་དང་རྒུད་པ་མཐར་ཐུག་གི་ཚོད་དུ་ལྷུང་ཞིང་། བུ་མོ་ལོ་བཅུ་གཉིས་ཅན་ཞིག་རླངས་འཁོར་གྱིས་བརྫིས་ཏེ་རྨས་སྐྱོན་བཟོས་རྗེས་མི་བཅོ་བརྒྱད་ཀྱིས་མཐོང་ཡང་སྣང་མེད་བྱས་པ་དེ་གཅིག་པུས་ཀྱང་རྒྱ་ནག་གི་ད་ལྟའི་སྤྱི་ཚོགས་ལ་གསལ་འགྲེལ་རྒྱག་བཞིན་ཡོད། གང་ལྟར་ཧུའུ་ཅན་ཐོ་དམར་གཞུང་གི་སྲིད་སྟེགས་སུ་ལངས་པ་ནས་བསྒྲགས་པའི་འབོད་ཚིག་སྟེ། འཆམ་མཐུན་ཞེས་པ་ནི་མཐར་གཏུགས་ན་མེ་མདའ་དང་འཇིགས་ཟིལ་ལ་བརྟེན་ནས་ཡོང་ཐབས་བྱས་ཡོད་ལ། མཐའ་མར་མེ་མདས་ཀྱང་མ་ཁོག་པར་སྤྱི་ཚོགས་ཧྲིལ་བོ་ངན་གཤིས་དང་ཧམ་སྲེད་ཀྱིས་ཁེངས་པ་ཞིག་བྱུང་ཡོད།
མའོ་ཙེ་ཏུང་གིས་སྤྱི་ཚོགས་ནང་ཁུལ་ཀྱི་གནད་དོན་ཡིན་ཚེ་ཡང་དག་པའི་ཐག་གཅོད་བྱེད་དགོས་པ་དང་དགྲ་དང་རང་ཕྱོགས་གི་གནད་དོན་ཡིན་ཚེ་མདུང་རྩེ་ཁ་སྤྲོད་ཀྱིས་ཁྱོད་ཤི་ང་གསོན་གྱི་འཐབ་རྩོད་བྱེད་དགོས་ཞེས་བཤད་ཡོད་ལ། ཡང་དག་པར་ན་དེ་ནི་མི་ཆོས་ཀྱི་འགྲོ་སྟངས་སམ་ཉམ་ལེན་གཤའ་མ་ཞིག་ཡིན་མོད། ད་ལྟའི་དམར་གཞུང་གིས་ནང་ཁུལ་མི་རིགས་ལ་ཁྱོད་ཤི་ང་གསོན་གྱི་འཐབ་རྩོད་བྱེད་བཞིན་ཡོད། དེ་ནི་དྲུག་བཞིའི་དོན་རྐྱེན་དང་བོད་ཀྱི་གནད་དོན། ཤིན་ཅང་གི་གནད་དོན་བཅས་ཐག་གཅོད་སྟངས་ལས་ཟུར་བལྟས་ལེབ་མཐོང་ཡིན།
མའོ་ཙེ་ཏུང་སོགས་དམར་གཞུང་སྔོན་རབས་པ་དག་གིས་ངལ་བ་ཁྱད་དུ་བསད་ནས་གསར་བརྗེ་བྱས་པའི་དམིགས་ཡུལ་ནི་སྲིད་དབང་སྒེར་གཅོད་པ་དང་། བྲན་གཡོག་ལམ་ལུགས་མེད་པ་བྱས་ཏེ། ཞིང་བྲན་མང་ཚོགས་ཀྱི་རང་དབང་བརྩོན་ལེན་བྱེད་དགོས་པ་དང་། མངའ་བདག་གྲལ་རིམ་གྱིས་མང་ཚོགས་ཀྱི་རྒྱུ་དངོས་བག་མེད་ལོངས་སྤྱོད་བྱེད་བཞིན་ཡོད་ཚུལ་གླེང་ཡོད། དྲང་མོར་བཤད་ན་དེའི་སྐབས་ཀྱི་རྒྱ་བོད་ཀྱི་ཁེ་ལས་པ་དང་ཕྱུག་བདག་རྣམས་ནི་བརྒྱ་ཆའི་དགུ་བཅུ་ཐམ་པ་ནི་མི་རབས་ནས་མི་རབས་བརྒྱུད་ནས་སོ་སོས་དཀའ་ལས་བརྒྱབ་སྟེ་བསགས་པའི་རྒྱུ་དངོས་ཡིན་པ་ལས་ད་ལྟའི་དམར་ཤོག་ཚོགས་ཁག་གི་དཔོན་ངན་ཁག་གི་ལྐོག་དངུལ་དུང་ཕྱུར་མང་པོ་དང་བསྡུར་ཐབས་རྩ་ནས་མེད། བཅིང་གྲོལ་བྱེད་དགོས་ངེས་ནི་ད་ལྟའི་རྒྱ་ནག་དམར་གཞུང་དང་དམར་པོ་ཕྱོགས་ཁག་རྣམས་ཡིན། ལྐོག་ཟ་རུལ་སུངས་མགོ་མཇུག་ཚང་མར་ཁྱབ་ཡོད་པར་མ་ཟད། དམར་ཤོག་མགོ་གཙོ་རྣམས་ཀྱི་ཁྱིམ་ཚང་ཉེ་རྒྱུད་དང་བཅས་པ་ནི་ད་ལྟའི་རྒྱ་ནག་ས་གཞི་ཆེན་མོའི་ཕྱུག་བདག་གྲལ་རིམ་དང་། མངའ་བདག་གྲལ་རིམ་བཀྲུས་ན་མི་དག་པ་དེ་ཡིན་ལ། ཁོ་ཚོས་འཛམ་གླིང་གི་ས་ཕྱོགས་གང་སར་གཞན་ལ་འགྲེལ་བཤད་རྒྱག་མི་ཤེས་པའི་དངུལ་ས་ཡ་མང་པོ་ཉར་འཇོག་བྱས་ཡོད་པ་དང་། ད་ལྟའི་ཀྲུང་གོ་རྒྱལ་ཁབ་ཀྱི་ཁེ་ལས་པ་ཆེ་གྲས་དང་ཕྱི་རྒྱལ་དུ་ཁང་ས་ཉོ་ཚོང་བྱེད་མཁན་གཙོ་བོ་ནི་ཁོ་ཚོ་ཡིན། འདི་ཚོ་ནི་ལྕགས་ཐེག་ལག་སྤྲེལ་ཡིན་པས་གཅིག་འཐེན་ན་གཅིག་ཀྱང་སྡོད་ཐབས་མེད་པས་ཡོངས་རྫོགས་རུལ་སུངས་སུ་གྱུར་ཟིན་ཡོད།
རྒྱ་གཞུང་གིས་བཤད་ཚུལ་གཅིག་ནི་དམར་ཕྱོགས་འོག་གི་གཅིག་སྡུད་དམངས་གཙོའི་ལམ་ལུགས་ལས་གཞན་གུ་ཡངས་དམངས་གཙོའི་ལམ་ལུགས་ནི་མི་རིགས་འདི་དང་ཡང་ན་དུས་ཚོད་འདི་ལ་ཀྲུང་གོའི་མི་རིགས་ལ་འོས་འཚམ་མིན་ཞེས་པའམ། ཡང་ན་དམངས་གཙོ་ཁ་ལ་ཁྱེར་ནས་ཀྲུང་གོའི་ནང་སྲིད་ལ་གཏོར་བཤིག་གཏོང་བ་སོགས་སྒྲོག་གི་ཡོད་མོད། ད་ལྟ་འཛམ་གླིང་ཁྲོད་མངོན་གསལ་དུ་མཐོང་ཐུབ་པ་ནི་རྒྱ་ནག་གི་མང་ཚོགས་སྤྱི་དང་རྒྱ་རིགས་ཤེས་ལྡན་པའི་ཁྲོད་དུ་དམངས་གཙོ་ཇི་ཙམ་འདོད་མོས་ཡོད་པ་དང་། དེ་ལ་ཇི་ཙམ་གྱིས་བརྩོན་པ་བྱེད་པ་ནི་དྲུག་བཞིའི་སློབ་ཕྲུག་གི་འོས་ལངས་ལས་ར་འཕྲོད་ནུས་པ་ཞིག་རེད། མི་རིགས་ཀྱི་གཤིས་ཁམས་དང་རིག་གཞུང་གི་དར་སྲོལ་སྟེང་ནས་དམངས་གཙོ་མི་འོས་པའམ་ཡང་ན་དམངས་གཙོ་ནི་ནུབ་ཕྱོགས་ཀྱི་སྲིད་སྐྱོང་ལམ་ལུགས་ཡིན་སྟབས་ཤར་ཕྱོགས་ལ་མི་འཚམ་སོགས་ལ་ཐེ་ཝན་དང་ཧོང་ཀོང་གཉིས་ཀྱིས་གསལ་བཤད་བྱས་ཡོད་པ་རེད། མི་སེར་ལ་བྱམས་སྐྱོང་མེད་པའི་དཔོན་པོ་གང་དུ་ཡོད་ན་འབངས་མིའི་འདོད་བློ་མ་ཁེངས་པའི་སྐད་འབོད་བྱེད་པ་ཆོས་ཉིད་ཡིན་པས་སྐད་འབོད་བྱེད་མཁན་རྣམས་ཀྱིས་ཐོག་མར་ཞི་བའི་སྐད་འབོད་དང་རིམ་བཞིན་དྲག་པོ་ངོ་རྒོད་བྱེད་སྲིད་པ་ནི་དཀྱིལ་ཤར་ཡུལ་གྲུའི་མི་མང་གི་ལས་འགུལ་གྱིས་དཔེ་མཚོན་གསལ་བོར་བསྟན་ཡོད་ལ། སྤྱིར་བཏང་ནས་ཀྱང་འུ་ཐུག་ན་ཅི་ཡང་ལག་ཏུ་འདེབས་ཕོད་པ་ནི་སྲོག་ལྡན་ཀུན་གྱི་ཁྱད་ཆོས་ཤིག་ཏུ་བརྩིས་ཀྱང་ཆོག་པར་སྙམ། བོད་གངས་ཅན་པར་མཚོན་ན་སྔོན་མ་ལས་འགུལ་སླེལ་མཁན་རྣམས་དངངས་སྐྲག་དང་འཇིགས་སྣང་ཆེན་པོ་ཡོད་ཀྱང་ད་ཆ་དངངས་སྐྲག་དང་འཇིགས་སྣང་མེད་པར་མ་ཟད། རང་ཉིད་ཀྱི་སྐུ་གཟུགས་མེ་རུ་བསྲེགས་ནས་ཚེ་སྲོག་གི་འབོད་སྐུལ་བྱེད་ཀྱིན་ཡོད། འདི་ནི་ཧ་ཅང་གི་ཉེན་ཁའི་རང་བཞིན་ཅན་ཞིག་ཡིན། འདི་རྣམས་ཀྱིས་དྲག་སྤྱོད་པ་ལྟར་མི་མང་ལ་འཇིགས་སྣང་བསྐུར་ཡོད་ཚེ་ད་ལྟའི་རྒྱ་ནག་ལ་བདེ་འཇགས་ག་ཚོད་ཡོད་དམ། ད་ལྟའི་གནས་ཚུལ་ལ་བལྟས་ན་ང་ཚོ་བོད་གངས་ཅན་པའི་སྐྱེ་བོ་ཕོ་མོ་རྒན་གཞོན་སུ་ཞིག་ཀྱང་འུ་ཐུག་ཐབས་ཟད་ཚེ་རང་སྲོག་གཏོང་རྒྱུར་འཇིགས་སྣང་མེད་པ་གསལ་བཤད་བྱས་ཡོད། ད་ལྟའི་རང་ལུས་མེར་བསྲེགས་ཀྱི་ལས་འགུལ་འདི་དོན་ཕན་ལྡན་པའི་གྲུབ་འབྲས་ཞིག་མ་སོན་ཚེ་འདིའི་ཁ་ཕྱོགས་གཞན་དུ་འགྱུར་རྒྱུར་བར་ཐག་རིང་བོ་ཡོད་མི་སྲིད་ལ། ལོ་རྒྱུས་ཀྱི་ཕུ་ཐག་རིང་ཞིང་ཆོས་དང་རིག་གཞུང་གིས་ཕྱུག་པའི་རྒྱ་མི་རིགས་ཀྱི་འོད་སྟོང་ལྡན་པའི་མདུན་ལམ་ལ་དམར་ཕྱོགས་པས་གང་འདོད་ལྟར་གཏོར་བརླགས་བྱེད་བཞིན་ཡོད་པ་རྒྱ་མི་རིགས་ཤེས་ལྡན་པ་ཚོས་གཅིག་མིན་དུ་གླེང་གི་ཡོད་མོད། དམར་ཕྱོགས་པ་ཚོགས་དེ་ལ་ཡ་ལན་མེ་མདའ་དང་བཙོན་ཁང་གིས་རྒྱག་གི་ཡོད། གོང་དུ་བཤད་པ་བཞིན་གོ་མཚོན་དང་བཙོན་ཁང་ནི་གནས་སྐབས་ཙམ་ཡིན་པ་ལས་མི་སེར་འུ་ཐུག་ཚེ་དེ་ནི་བྱེད་ཐབས་ཡང་དག་པ་ཞིག་མིན་པ་མ་ཊིན་ལི་ཐར་ཁན་གྱི་སྣེ་ཁྲིད་པའི་ཨ་རིའི་མི་རིགས་ནག་པོའི་ཐོབ་ཐང་རྩོད་སྐབས་དང་། རྒྱ་གར་གྱི་གན་དྷིའི་སྣེ་ཁྲིད་པའི་དབྱིན་གཞུང་ལ་རྒོལ་བའི་མི་མང་གི་ལས་འགུལ་སོགས་འཛམ་གླིང་རང་དབང་འཐབ་རྩོད་ཀྱི་ལོ་རྒྱུས་ཕལ་མོ་ཆེའི་ནང་མཐར་སྒེར་གཅོད་པའི་བཙོན་ཁང་གི་སྒོ་མོ་དེ། ལག་ཏུ་མཚོན་ཆ་ཁབ་རྩེ་ཙམ་མེད་ཅིང་། རང་དབང་ལ་དུང་བའི་མི་སེར་གྱིས་སྐད་འབོད་དང་རྟུལ་ཕོད་ཀྱིས་ཕྱེས་ཡོད། མའོ་ཙེ་ཏུང་ལྟ་ད་ཡོད་ཚེ་དམར་ཤོག་པའི་ནང་ཁུལ་གྱི་འགལ་ཟླ་དང་ལྐོག་ཟ་རུལ་སུངས་ཀྱི་གནས་ཚུལ་སོགས་མཐོང་ན་ཁོ་ལ་ཁྲག་གི་མིག་ཆུ་ཡོང་རྒྱུ་ཐེ་ཚོམ་མེད། དེས་ན་ང་ཚོ་རྒྱ་བོད་ཀྱི་མི་རིགས་ཤེས་ལྡན་པ་ཚང་མའི་མི་རིགས་ཀྱི་མདུན་ལམ་ནག་བསུབ་གཏོང་མཁན་ནི་མི་རིགས་ཀྱི་དགྲ་བོར་ངོས་ཟིན་ཐོག་དམར་ཤོག་སྲིད་དབང་སྒེར་གཅོད་ཚོགས་ཁག་འདི་ལ་གསར་བརྗེ་བྱེད་པའི་དུས་ལ་བབས་ཡོད་ཤེས་པར་གྱིས་ཤིག
ཕྱི་ལོ་ ༢༠༡༢ ཟླ་ ༧ ཚེས་ ༢༢ ཉིན།
