འདི་ལོའི་༸གོང་ས་མཆོག་གི་སྐུའི་འཁྲུངས་སྐར་ཉིན་ནས་བཟུང་བོད་མི་མང་སྤྱི་འཐུས་ལྷན་ཚོགས་ཀྱིས་སྣེ་ཁྲིད་འོག རྒྱ་གར་རྒྱལ་ཡོངས་ཀྱི་ས་གནས་ཁག་ཏུ་བདེན་པའི་མེ་ལྕེ་སྐོར་སྐྱོད་དང་མཚན་རྟཊ་བསྡུ་རུབ་ཀྱི་ལས་འགུལ་སྤེལ་གྱིན་པ་ལྟར། ཟླ་འདིའི་ཕྱི་ཚེས་ ༣ ཉིན་རྒྱ་གར་ལྷོ་ཕྱོགས་ཁུལ་གྱི་བདེན་པའི་མེ་ལྕེ་ཧོན་སུར་ས་གནས་ནས་ཀོ་ལི་གྷལ་དོན་ལྡན་གླིང་གཞིས་ཆགས་སུ་རྩིས་སྤྲོད་གནང་ཡོད་འདུག
ཉིན་དེར་ས་གནས་འགོ་འཛིན་གཙོས་པའི་དགོན་སྡེ་ཁག་གི་སྐུ་ཚབ་དང་ས་འཐུས་ཚོགས་གཙོ། རང་བདེན་ཚོགས་གཙོ། མཉམ་འབྲེལ་ཚོགས་གཙོ་དང་མཉམ་དྲུང༌། ས་གནས་གཞོན་ནུ་དང་བུད་མེད་གཉིས་ཀྱི་ཚོགས་གཙོ། སྨན་ཁང་གཉིས་ཀྱི་འགན་འཛིན། སློབ་སྤྱི། གྲོང་སྡེ་ཉེར་གཉིས་ཀྱི་བརྒྱ་དཔོན་རྣམས་དང༌། གྲོང་སྡེ་ (T ) མི་མང་བཅས་ཀྱིས་ཕེབས་བསུ་ཞུས་ཡོད་པ་མ་ཟད། གཞིས་ལས་ཁང་མདུན་ཐང་དུ་སློབ་ཕྲུག་རྣམས་ཀྱིས་ནས་རོལ་དབྱངས་དང་བཅས་འཕགས་བོད་རྒྱལ་ཁབ་གཉིས་ཀྱི་རྒྱལ་གླུ་བཏང་བ་དང་། བོད་ཕྱི་ནང་གཉིས་ཀྱི་རྒྱས་གཅེས་དཔའ་བོ་དཔའ་མོ་རྣམས་ལ་གདུང་སེམས་མཉམ་སྐྱེད་མཚོན་ཆེད་ངག་བཅད་མྱ་ངན་དང་བདེན་ཚིགས་སྨོན་ལམ་བཏོན་རྗེས། ས་གནས་མགོ་འཛིན་ཕུན་ཚོགས་ཚེ་རིང་ལགས་དང་ཧིན་བོད་མཛའ་འབྲེལ་ཚོགས་པའི་ཚོགས་གཙོ། སྤྱི་འཐུས་ཚེ་རིང་གཡུ་སྒྲོན་བཅས་ཀྱིས་བདེན་པའི་མེ་ལྕེ་དང་འབྲེལ་བའི་གཏམ་བཤད་དང་། ས་གནས་བདེན་པའི་མེ་ལྕེ་ལས་འགུལ་ཚོགས་ཆུང་གིས་བདེན་པའི་མེ་ལྕེ་ལས་འགུལ་གྱི་གནས་ཚུལ་སྒྲོགས་སྦྱང་གནང་ཡོད་འདུག
དེ་རིང་ཕྱི་ཚེས་ ༦ ཉིན་བདེན་པའི་མེ་ལྕེ་ཀོ་ལི་གྷལ་གཞིས་ཆགས་ཀྱི་གྲོང་སྡེ་རེ་རེར་སྐོར་སྐྱོད་གནང་རྗེས། ཕྱི་ཚེས་ ༧ ཉིན་ཧིན་བོད་མཛའ་འབྲེལ་ཚོགས་པའི་ཚོགས་མི་དང་ས་གནས་མགོ་འཛིན། ས་གནས་བདེན་པའི་མེ་ལྕེ་ལས་འགུལ་ཚོགས་ཆུང་གི་ཚོགས་མི་བཅས་ཀྱིས། རྫོང་དཔོན་ལས་ཁུངས་ཀྱི་མདུན་ཐང་བར་གོམ་བགྲོད་དང་། ས་གནས་རྫོང་དཔོན་ལ་བདེན་པའི་མེ་ལྕེ་ ལས་འགུལ་གྱི་དགོས་འདུན་ཁག་ཞུ་སྙན་འབུལ་རྒྱུ་ཡིན་འདུག་ལ། ཕྱི་ཚེས་ ༨ ཉིན་ཀོ་ལི་གྷལ་དོན་ལྡན་གླིང་གི་རྒྱལ་བའི་ཕོ་བྲང་མདུན་ཐང་དུ་བསང་གསོལ་དང་མཚན་རྟགས་བསྡུ་རུབ་གནང་རྗེས་མེ་སོར་ས་གནས་ལ་རྩིས་སྤྲོད་གནང་རྒྱུ་ཡིན་འདུག
གསར་འགོད་པ། དོན་གོ
