ཉེ་ཆར་རྒྱ་ནག་ནང་སྨན་རྫུན་བཟོ་ཚོང་བྱེད་ས་ ༡༡༠༠ དང་བཟོ་མཁན་མི་སྣ་ ༡༩༠༠ ཐོན་འདུག
ཉེ་ཆར་རྒྱ་གཞུང་ཉེན་རྟོག་སྡེ་ཁག་གིས་གསལ་བསྒྲགས་ཤིག་སྤེལ་ཏེ། རྒྱ་ནག་གི་ཞིང་ཆེན་དང་གྲོང་ཁྱེར་ཁག་ ༣༡ ལྷག་གི་ནང་སྨན་རྫུན་མ་བཟོ་བའི་གྱོད་དོན་ ༨༠༠ ལྷག་དང་། སྨན་རྫུན་མ་བཟོ་སྐྲུན་དང་བརྒྱུད་འཚོང་བྱེད་ས་ ༡༡༠༠ རྩད་གཅོད། སྨན་རྫུན་མ་བཟོ་མཁན་ཉེས་ཅན་པ་ ༡༩༠༠ ལྷག་འཇུ་བཟུང་བྱས་ཡོད་སྐོར་བརྗོད་འདུག
རྫུན་བཟོ་བྱས་པའི་སྨན་རིགས་གཙོ་བོ་ནི་ཁྲག་ཤུགས་མཐོ་བའི་ནད་དང་། གཅིན་མངར་གྱི་ན་ཚ། སྐྱི་ལྤགས་ཀྱི་ན་ཚའི་རིགས་ཀྱི་སྨན་ཡིན་པ་དང་། དེ་བཞིན། སྨན་བཟོའི་ཚོང་རྟགས་རྫུན་མ་དང་། སྨན་སྒམ། ངོ་སྤྲོད་ཡི་གེ་སོགས་ཡིག་ཆ་རྫུན་མ་ཁྲི་ ༡༤༠༠ ལྷག་བུད་ཡོད་པ་མ་ཟད། རྩ་གཅོད་བྱུང་བའི་སྨན་རྫུན་མའི་སྤྱིའི་རིན་གོང་རྒྱ་སྒོར་དུང་ཕྱུར་ ༡༡་༦ ལ་སླེབས་ཡོད་པ་རེད།
འདས་པའི་དུས་ཡུན་རིང་པོའི་ཁྲོད་རྒྱ་ནག་ནང་སྨན་རྫུན་མ་བཟོ་འགྲེམས་ཀྱི་ནག་ཉེས་བྱ་སྤྱོད་གང་སར་ཁྱབ་སྟེ། གཞི་རིམ་མང་ཚོགས་ཀྱི་འཚོ་བའི་བདེ་ཐང་ཐད་དཀའ་ངལ་ཤུགས་ཆེན་འཕྲད་ཀྱིན་ཡོད།
