ཁྱེད་ཚོའི་སློབ་གྲྭའི་ཤེས་ཡོན་ཐོག་བཀའ་བསྡུར་གནང་གི་ཡོད།

ཁ་སང་ཉིན་རྒྱབ་དབུས་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་བཞུགས་སྒར་ཉེ་འཁྲིས་ཤེས་རབ་དགའ་ཚལ་སློབ་གླིང་དུ་ཕེབས་ཏེ། སློབ་མ་ཚོར་དམངས་གཙོའི་འགྲོ་སྟངས་སྐོར་གྱི་གསུང་བཤད་དང་། སློབ་མའི་དྲི་བར་ལན་འདེབས་བཅས་གནང་སོང་།   

ཁ་སང་ཕྱི་ཚེས་ ༡༣ ཉིན་གྱི་ཕྱི་དྲོའི་ཆུ་ཚོད་ ༣། ༣༠ སྟེང་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་གིས་བཞུགས་སྒར་ཉེ་འཁྲིས་ཤེས་རབ་དགའ་ཚལ་སློབ་གླིང་དུ། ཁོང་གི་བཀའ་ཁྲིའི་ལས་འགན་བཞེས་རྗེས་ཀྱི་གཟིགས་སྐོར་ཐོག་མ་དེ་གནང་ཡོད་ཅིང་། སྐབས་དེར་སམ་བྷོ་ཊ་སྤྱི་ཁྱབ་ཡིག་ཚང་གི་སྤྱི་ཁྱབ་འགན་འཛིན་ཀརྨ་ཆུང་བདག་ལགས་གཙོས། ཤེས་རབ་དགའ་ཚལ་སློབ་གླིང་གི་འགན་འཛིན་བུ་དྲུ་ཤཱསྟི་ལགས་དང་སློབ་སྤྱི་ཚེ་རིང་གཡུ་སྒྲོན་ལགས། དེ་བཞིན། སློབ་གྲྭའི་དགེ་ལས་སློབ་ཕྲུག་བཅས་ཀྱིས་ལག་ཏུ་ཁ་བཏགས་བཟུང་སྟེ་ཕེབས་བསུ་ཞུས་པ་དང་། བཀའ་ཁྲི་མཆོག་གིས་དགེ་ལས་སློབ་ཕྲུག་རེ་རེ་བཞིན་ལག་པ་བཏང་སྟེ་འཚམས་འདྲི་དང་། སློབ་གྲྭའི་ལྷ་བྲིས་སྡེ་ཚན་དང་འཚེམ་པོ་སྡེ་ཚན། སློབ་གྲྭའི་དཔེ་མཛོད་ཁང་བཅས་སུ་གཟིགས་སྐོར་བཅས་གནང་གྲུབ་རྗེས། སློབ་གྲྭའི་ཚོགས་ཁང་དུ་ཕེབས་ཏེ་སློབ་མ་ཚོར་དམངས་གཙོའི་འགྲོ་སྟངས་སྐོར་གྱི་གསུང་བཤད་དང་། སློབ་མ་སྐོར་ཞིག་གི་དྲི་བར་ལན་འདེབས་བཅས་གནང་སོང་།   

ཁ་སང་བཀའ་ཁྲི་མཆོག་གིས་སློབ་གྲྭའི་སྡེ་ཚན་ཁག་གི་གཟིགས་སྐོར་གྲུབ་རྗེས་དགེ་སློབ་ཡོངས་སློབ་གྲྭའི་ཚོགས་ཁང་ནང་འཛོམས་ཏེ། བོད་དོན་ཆེད་སྐུ་གཤེགས་ཟིན་པའི་དཔའ་བོ་རྣམས་ལ་མྱ་ངན་གུས་འདུད་བཅས་ཞུས་རྗེས། སློབ་གླིང་གི་འཛིན་སྐྱོང་འགན་འཛིན་ལགས་ཀྱིས་སློབ་གྲྭའི་གནས་ཚུལ་ངོ་སྤྲོད་གནང་སྟེ། ད་ལྟའི་ཆར་སློབ་ཕྲུག་བུ་ ༡༩༤ དང་བུ་མོ་ ༡༣༢ བཅས་ཁྱོན་ ༣༢༦ དང་། དགེ་རྒན་ ༣༨ དང་ལས་བྱེད་ ༡༦ བཅས་ཁྱོན་ ༥༤ ཡོད་སྐོར་བརྗོད་སོང་ལ། ལག་ཤེས་དང་ཤེས་ཡོན་བཅས་སྡེ་ཚན་གཉིས་ཡོད་པ་ལས། ལག་ཤེས་ཁོངས་སུ་འཚེམ་བཟོ་དང་ལྷ་བྲིས་གཉིས་པ་དང་། ཤེས་ཡོན་ཁོངས་སུ་བོད་དབྱིན་ཟུང་ལྡན་ཡིན་སྐོར་བཅས་བརྗོད་བྱུང་། དེ་བཞིན།  ༡༩༩༣ ལོར་སློབ་གྲྭ་མགོ་འཛུགས་གནང་བ་ནས་ད་བར་བོད་ནས་ཁྱོན་སློབ་མ་ ༦༧༡༢ འབྱོར་བ་དང་། རྩ་དགོངས་དུ་འགྲོ་མཁན་ ༥༥༦༡ བྱུང་བ། སློབ་འཐོན་བྱུང་བ་  ༨༣༠ བཅས་ཡོད་ཚུལ་སོགས་ངོ་སྤྲོད་གནང་སོང་།

དེའི་རྗེས་བཀའ་ཁྲི་མཆོག་གིས་སྔོན་མ་ཤེས་རབ་དགའ་ཚལ་སློབ་གླིང་དུ་དང་བླངས་དགེ་རྒན་གནང་མྱོང་མཁན་དང་ད་ལྟ་དབྱིན་ཇིའི་རྒྱལ་ཁབ་དུ་ཞིབ་འཇུག་སློབ་མའི་སློབ་སྦྱོང་བྱེད་ཀྱིན་པའི་རྒྱ་གར་བ་ཝན་ཀར་ཐི་ཕར་ཀར་ཤི་ ( Venkat Prakash) ལགས་ཀྱིས་སློབ་གླིང་གི་སློབ་མར་དམིགས་ཏེ་བརྩམས་པའི་སྒྲུང་རྩོམ་ << BRICHT DREAMS  >> ཞེས་པའི་དཔེ་དེབ་དབུ་འབྱེད་གནང་རྗེས་དམངས་གཙོའི་སྐོར་ལ་གསུང་བཤད་གནང་སོང་། བཀའ་ཁྲི་མཆོག་གིས་དམངས་གཙོ་ཞེས་པ་དེ་ཁྲིམས་ཡོད་པ་དང་སྒྲིག་འཛུགས་ཡོད་པ་ཙམ་གྱིས་དམངས་གཙོ་ཆགས་ཀྱི་མེད་པར། འགྲོ་སྟངས་འགྲོ་ལུགས་ཀྱི་ཐད་ནས་དམངས་གཙོ་དགོས་པ་རེད་ཅེས་ཟེར་གྱི་ཡོད་པ་ལྟར།  རྒྱ་ནག་ལ་མཚོན་ན་ ༡༩༨༢ ལོར་གཏན་འབེབས་བྱས་པའི་བཅའ་ཁྲིམས་དང་། ༡༩༨༤ ལོར་གཏན་འབེབས་བྱས་པའི་གྲངས་ཉུང་མི་རིགས་ཀྱི་སྒྲིག་གཞི་བཅས་དམངས་གཙོའི་ལམ་ལུགས་ཡིན་ཞེས་རྗོད་ཀྱི་ཡོད་ལ། སྒྲིག་འཛུགས་ཀྱི་ཐད་ནས་དམངས་གཙོའི་ཀ་བ་གསུམ་ལྟར་བཀའ་ཤག་དང་ཁྲིམས་ཁང་། གྲོས་ཚོགས། ད་དུང་ཆབ་སྲིད་གྲོས་ཚོགས་བཅས་ཁྲིམས་དང་སྒྲིག་འཛུགས་དམངས་གཙོའི་ལམ་ལུགས་ཡིན་ཡང་། འགྲོ་སྟངས་འགྲོ་ལུགས་ཀྱི་ཐོག་ནས་བཙན་བྱོལ་བོད་མི་ལྟར། མི་མང་ལ་འོས་ཤོག་ལྡུག་པའི་ཐོབ་ཐང་དང་འོས་མིར་ལངས་ཆོག་པའི་ཐོབ་ཐང་དང་། གཏམ་བརྗོད་རང་དབང་མེད་སྐོར་དང་། དེ་བཞིན། རྒྱལ་སྤྱིའི་ནང་གི་སེ་རེ་ཡའི་ད་ལྟའི་གནས་སྟངས་སོགས་དམངས་གཙོའི་སྤྱི་ཚོགས་ཀྱི་འགྲོ་སྟངས་དང་། ༢༠༡༡ ལོར་ ༸གོང་ས་མཆོག་གིས་མ་འོངས་པར་མི་གཅིག་ལ་བརྟེན་མི་དགོས་པར་སྒྲིག་འཛུགས་ཀྱི་ཐོག་ནས་བོད་དོན་འཐབ་རྩོད་རྒྱུན་མཐུད་ཡོང་ཐབས་ལ་དམིགས་ཏེ། སྲིད་དབང་རྩིས་སྤྲོད་བྱས་ཚུལ་སོགས་ངོ་སྤྲོད་གནང་བྱུང་།  

ཡང་བཀའ་ཁྲི་མཆོག་གིས་སློབ་མ་ཚོར་སློབ་སྦྱོང་གལ་ཆེན་དུ་འཛིན་དགོས་པའི་ཐད་གསུང་དོན། “ ང་ཚོས་ག་དུས་ཡིན་ཡང་དོན་གྱི་བདག་པོ་བོད་ནང་གི་བོད་མི་ཚོ་ཡིན་ཞེས་བརྗོད་ཀྱིན་པ་ལྟར། ཁྱེད་རང་ཚོ་དངོས་སུ་འདིར་ཕེབས་བསྡད་ཡོད་པ་རེད། ཁྱེད་རང་ཚོའི་སློབ་གྲྭའི་ཤེས་ཡོན་ཐོག་ད་ལྟ་གྲོས་བསྡུར་བྱེད་ཀྱིན་ཡོད། གཅིག་བྱས་ན་མ་འོངས་པའི་ལོ་གཅིག་ནང་འགྱུར་བ་འགྲོ་སྲིད་པ་རེད། དེ་རིང་སློབ་གྲྭའི་རྒན་བདག་གིས་ཁྱེད་རང་ཚོར་ས་རཱ་དང་ནོར་གླིང་མཐོ་སློབ་བཅས་སུ་འགྲིམས་ཐབས་དང་། ལྷ་བྲིས་སྡེ་ཚན་གྱི་ལོ་རིང་དུ་གཏོང་རྒྱུ། ལག་ཤེས་སྡེ་ཚན་གཉིས་ཀྱི་ཐོག་ཁ་ལ་དང་མཛེས་བཟོ། གཞན། རོལ་དབྱངས་འཛིན་གྲྭ་དང་ལྷ་བྲིས་དགེ་རྒན་གསར་བ་བཅས་དགོས་པའི་རེ་འདུན་བཏོན་པ་ལྟར། ང་ཚོའི་ངོས་ནས་རེ་བ་དེ་དག་བསྒྲུབ་ཐབས་ལ་འབད་པ་བྱ་རྒྱུ་ཡིན་ལ། ཁྱེད་རང་ཚོའི་ངོས་ནས་ཀྱང་ད་ལྟའི་ཤེས་ཡོན་སྦྱོང་རྒྱུའི་གོ་སྐབས་དེ་རྩ་ཆེན་པོ་དེ་འཕྲོ་བརླགས་སུ་མི་གཏོང་བར་འབད་པ་བྱ་རྒྱུ་ཧ་ཅང་གལ་ཆེན་པོ་རེད།  ” ཅེས་གསུངས་སོང་། 

མཇུག་ཏུ་དྲི་བ་དྲིས་ལན་གྱི་སྐབས་སུ་སློབ་མ་ཞིག་གིས་བོད་ནང་གི་རང་ལུས་མེར་བསྲེགས་གཏོང་བཞིན་པ་དེས་བོད་དོན་ཐོག་ཁྱད་པར་ག་རེ་ཕྱིན་ཡོད་མེད་དང་། བཀའ་ཤག་གིས་ལས་འགུལ་གང་འདྲ་སྤེལ་ཆར་ཡོད་མེད་དྲིས་པའི་ལན་དུ་བཀའ་ཁྲི་མཆོག་གིས། “ བོད་ནང་གི་རང་ལུས་མེར་བསྲེགས་དང་འབྲེལ་ནས་ཨ་རིའི་གྲོས་ཚོགས་ནང་བོད་དོན་ཐོག་གྲོས་ཆོད་བཞག་པ་དེ་ལོ་ ༢༠ ལྷག་གི་ནང་ནས་ཐོག་མ་ཆགས་ཡོད། ཉེ་ཆར་ཨ་རིའི་ཕྱི་སྲིད་ལས་ཁུངས་ཀྱིས་ཆོས་དད་རང་དབང་སྐོར་ལ་སྙན་ཐོ་བཏོན་པ་སོགས་གླེང་སློང་ཤུགས་ཆེན་བྱུང་ཡོད་པ་རེད།  གྲོས་ཚོགས་དང་གནད་ཡོད་མི་སྣ་མང་པོས་རང་ལུས་མེར་བསྲེཊ་སྐོར་གླེང་སྟེ་ཁྱབ་བསྒྲགས་ཤུགས་ཆེན་པོ་འགྲོ་ཡི་འདུག བཀའ་ཤག་གིས་སྔར་ལོའི་ཕྱི་ཟླ་ ༡༠ བའི་ནང་གསར་འགོད་གསལ་བསྒྲགས་སྤེལ་ཏེ། བོད་ནང་གི་བོད་མི་ཚོར་ཉེན་ཚབས་ཆེ་བའི་ལས་འགུལ་མ་སྤེལ་རོགས་གནང་ཞེས་ཞུས་པ་ཡིན་ལ། ང་ཚོས་མི་ཞིག་ཡིན་པའི་ཆ་ནས་ཉེན་ཚབས་ཆེ་བའི་ལས་འགུལ་མི་སྤེལ་རྒྱུ་དང་། ནང་པ་ཞིག་ཡིན་པའི་ཆ་ནས་ང་ཚོའི་ངོས་ནས་རང་ལུས་མེར་བསྲེགས་གཏོང་མཁན་སུ་འདྲ་ཞིག་ཡིན་ཡང་མཆོད་འབུལ་སྨོན་ལམ་གནང་གི་ཡོད། བོད་པ་ཞིག་ཡིན་པའི་ཆ་ནས་ཁོང་རྣམ་པའི་དགོས་འདུན་དང་འབོད་སྒྲ་རྒྱལ་སྤྱིའི་སྡིངས་ཆའི་ཐོག་བསྐྱལ་ཐབས་ལ་འབད་ཀྱི་ཡོད” ཅེས་གསུངས་བྱུང་།

ཡང་སློབ་མ་ཞིག་གིས་ད་ལྟའི་བར་༸གོང་ས་མཆོག་གི་མཚན་ཐོག་ནས་རྒྱ་ནག་དང་མཉམ་དུ་འབྲེལ་མོལ་བྱས་ཡོད་པ་རེད། མ་འོངས་པར་འབྲེལ་མོལ་བསྐྱར་གསོ་བྱུང་བ་ཡིན་ན། བོད་མིའི་སྒྲིག་འཛུགས་ཀྱི་མིང་ཐོག་ནས་འབྲེལ་མོལ་བྱ་ཐུབ་མིན་དྲིས་པར། “ བཙན་བྱོལ་བོད་མིའི་བཅའ་ཁྲིམས་དོན་ཚང་དང་པོའི་ནང་གསེས་གསུམ་པའི་ནང་བཀའ་ཁྲི་དང་བཀའ་ཤག་གིས་དམིགས་བསལ་སྐུ་ཚབ་བསྐོ་བཞག་བྱ་རྒྱུ་དང་།  མཚན་༸གོང་ས་མཆོག་ལ་ཞུས་ཆོག་ཅེས་བཀོད་ཡོད་པ་ལྟར། ང་ཚོས་རྒྱ་ནག་གཞུང་ལ་དམིགས་བསལ་སྐུ་ཚབ་ག་དུས་ཡིན་ཡང་གྲ་སྒྲིག་ཡོད་ཅེས་པའི་རྒྱུ་མཚན་དེ་རེད། མ་འོངས་པར་སྐུ་ཚབ་ཀྱི་མཚན་དེ་༸གོང་ས་མཆོག་གི་དམིགས་བསལ་སྐུ་ཚབ་ཅེས་པའི་མཚན་ཡོང་གི་རེད། ” ཅེས་གསུང་བྱུང་།

ཡང་སློབ་མ་ཞིག་གིས་བོད་ནང་མི་ལྔ་བཅུར་ཉེ་བ་ཞིག་གིས་རང་བསྲེགས་བཏང་ཡང་དེ་ལ་རྣམ་འགྱུར་ཅི་གང་འཐོན་མེད་སྟབས། མ་འོངས་པར་བོད་མི་ཚོའི་བམས་བློར་འགྱུར་བ་ཞིན་ཏེ་འགད་རྫས་གཡུག་པ་སོགས་དྲག་པོའི་ལས་འགུལ་སྤེལ་ཚེ། བོད་མིའི་སྒྲིག་འཛུགས་ཀྱིས་རྒྱབ་སྐྱོར་བྱ་མིན་དྲིས་པའི་ལན་དུ་བཀའ་ཁྲི་མཆོག་གིས། “བོད་མིའི་སྒྲིག་འཛུགས་ཀྱི་ངོས་ནས་དམངས་གཙོའི་ལམ་ལུགས་དང་ཞི་བའི་ལམ་གཉིས་འགྱུར་བ་མེད་པའི་ལངས་ཕྱོགས་ཡིན་ཞེས་བཤད་ཀྱི་ཡོད། ཞི་བའི་ལམ་གྱི་སྒོ་ནས་འགྱུར་བ་འགྲོ་རྒྱུ་མེད་ཅེས་པ་དེ་དབུ་མའི་ལམ་གྱི་ཐོག་རྩ་དོན་བརྩད་པ་ཡིན་ན་འགྲུབ་རྒྱུ་ཡོད་པ་ང་ཚོས་ཤེས་ཀྱི་ཡོད་པ་རེད། ལོ་རྒྱུས་ལ་ཕྱིར་བལྟས་བྱས་པ་ཡིན་ནའང་། ཞི་བའི་ལམ་གྱི་ཐོག་ནས་རྩ་དོན་བརྩད་དེ་ལུང་པ་དང་སྤྱི་ཚོགས་ ༥༠ ལྷག་གིས་རྩ་དོན་འགྲུབ་ཡོད་པ་རེད། ཤི་རི་ལིངྒ་དང་ཡུ་གུར་གྱིས་སྔོན་མ་དྲག་པོའི་ལས་འགུལ་སྤེལ་ཡང་། ད་ལྟ་ང་ཚོར་མིག་དཔེར་ལྟ་བཞིན་ཡོད་པ་རེད།  ད་ལྟའི་ཆར་དྲག་སྤྱོད་པ་ཟེར་དུས་འཛམ་གླིང་སྤྱི་ཡོངས་ཀྱིས་ཁ་གཏད་གཅོག་ས་ཆགས་ཡོད་སྟབས། གལ་སྲིད། ང་ཚོའི་སྤྱི་ཚོགས་ནང་དྲག་པོའི་ལས་འགུལ་སྤེལ་བ་ཡིན་ན་བློ་ཕམ་གྱི་གནས་ཚུལ་རེད་མ་གཏོགས། དེ་ལ་འཛམ་གླིང་གི་རྒྱབ་སྐྱོར་ཡོང་རྒྱུར་རེ་བ་ཡོད་པ་མ་རེད” ཅེས་ལན་བསྐྱོན་སོང་།

མཐའ་མར་སློབ་མ་བུ་མོ་ཞིག་གིས་ད་ལྟའི་ཆར་བཙན་བྱོལ་བོད་མིའི་གཞུང་ཞབས་པ་དང་སློབ་མ། མི་མང་བཅས་མང་པོ་ཞིག་གིས། མ་འོངས་པའི་ཉིན་ཞིག་བོད་མི་ཚོ་རྒྱ་གར་ནང་གནས་སྡོད་བྱ་བར་དཀའ་ངལ་འཕྲད་སྲིད་པའི་ཞེ་སྣང་འོག ཁག་ཅིག་ཕྱིར་བོད་ནང་ལོག་འགྲོ་བ་དང་། ཁག་ཅིག་ཕྱི་རྒྱལ་ཡུལ་གྲུ་ཁག་ཏུ་འགྲོ་བཞིན་པ་དེ་རྒྱ་གར་གཞུང་ལ་ཡིད་མ་ཆེས་པ་ཡིན་ནམ། ཡང་ན་བཙན་བྱོལ་བོད་མིའི་སྒྲིག་འཛུགས་ལ་ཡིད་མ་ཆེས་པ་ཡིན་མིན་དྲིས་པའི་ལན་དུ། “ ཁྲིམས་ཀྱི་ཐོག་ནས་རྒྱ་གར་གཞུང་གིས་བོད་མི་ཚོར་སྐྱབས་བཙོལ་ལག་འཁྱེར་ (RC) དང་དེབ་སེར་པོ་ཚང་མ་བཟོས་ཏེ། ནམ་ཞིག་བོད་ནང་ལོག་གི་རེད་ཅེས་པར་གཞི་བཞག་ཡོད་པ་རེད་ལ། ང་ཚོ་ཚང་མ་བཙན་བྱོལ་ནང་ཡོང་དོན་ཡང་བོད་ནང་ཕྱིར་ལོག་གི་ཡིན་ཟེར་གྱི་ཡོད་པ་རེད། ད་ལྟའི་བར་རྒྱ་གར་གཞུང་གིས་ང་ཚོར་མཐུན་འགྱུར་རོགས་རམ་གནང་གི་ཡོད་སྟབས། མ་འོངས་པར་རྒྱ་གར་གཞུང་གིས་ཁྱེད་རང་ཚོ་རྒྱུག་ཞེས་བཤད་སྲིད་ཀྱི་མ་རེད།  ཁྱེད་རང་ཚོས་དེའི་ཐད་སེམས་འཚབ་དེ་འདྲ་གནང་དགོས་པ་མ་རེད་བསམ་གྱི་འདུག” ཅེས་གསུངས་བྱུང་།

གསར་འགོད་པ། དོན་གོ