ཉེ་ཆར་རྒྱ་ནག་གཞུང་གིས། བོད་ཀྱི་གླུ་བ་ཨ་མཆོག་ཕུལ་བྱུང་ལགས་ཀྱི་ཆེད་བསྒྲིགས་འོད་སྡེར་ལྔ་པ་༼ ཁུར་གྱིས་གནོན་པའི་ང་ཚོ༽ཞེས་པའི་ནང་། ༧གོང་ས་མཆོག་དང་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་རྣམ་གཉིས་ལ་བསྟོད་གླུ་དང་། ད་ལྟའི་བོད་ནང་གི་དཀའ་སྡུག་གི་གནས་སྟངས་དངོས་གསལ་འདོན་བྱས་ཡོད་པར་རྐྱེན་བྱས་ཏེ། འཇུ་བཟུང་བཀའ་རྒྱ་བཀྲམས་སྟབས། གླུ་བ་ཕུལ་བྱུང་ལགས་རི་སྒང་དང་ས་གནས་གཞན་དུ་ཉེན་ཡོལ་བྱས་ཡོད་ཀྱང་། ཟླ་འདིའི་ཕྱི་ཚེས་ ༣ ཉིན་གྱི་བོད་ནང་གི་དགོང་དྲོའི་ཆུ་ཚོད་ ༨།༠༠ ཡས་མས་སུ་ས་གནས་ཉེན་རྟོག་པས་ཁོང་འབར་ཁམས་གྱི་ཇ་ཁང་ཞིག་གི་ནང་འཇུ་བཟུང་བཙན་འཁྲིད་བྱས་ཏེ། ད་ལྟའི་ཆར་གར་ཡོད་ཀྱི་གནས་ཚུལ་ཅི་ཡང་མ་ཤེས་པར་ལྷག་ཡོད་འདུག
རང་ལོ་ ༣༠ ཡས་མས་ཡིན་པའི་ཨ་མཆོག་གླུ་བ་ཕུལ་བྱུང་ལགས་ནི། རྔ་པ་བོད་རིགས་རང་སྐྱོང་ཁུལ་ཁྱུང་མཆུ་རྫོང་ཨ་མཆོག་ཡུལ་ཚོ། ཨ་མཆོག་སྟོད་མ་སྡེ་བའི་ཕ་སྒྲོལ་མ་སྐྱབས་དང་མ་སྒྲོལ་མ་གཉིས་ཀྱི་བུ་ཡིན་ཞིང་། ཆུང་དུས་སློབ་གྲྭ་ཆུང་འབྲིང་འགྲིམས་མྱོང་མཁན་ཞིག་ཡིན་པ་མ་ཟད། ཁོང་གི་ལྷན་སྐྱེས་ཀྱི་སྐད་ངག་སྙན་མོས་རྒྱ་གཞུང་གི་བཙན་གནོན་ལ་མ་འཛེམས་པར་བོད་མི་རིགས་ཀྱི་བདེ་སྡུག་དང་ལ་རྒྱུའི་སྐོར་གྱི་གླུ་གཞས་མང་པོ་བླངས་སྟབས། ས་གནས་བོད་མི་ཚོས་ ༼ལ་རྒྱའི་གླུ་བ༽ཞེས་པའི་མཚན་སྙན་ཡང་ཕུལ་ཡོད་འདུག ད་ལྟའི་བར་སྔ་ཕྱི་ཆེད་སྒྲིག་འོད་སྡེར་ལྔ་ལྷག་འགྲེམས་སྤེལ་བྱས་ཏེ། བོད་ཕྱི་ནང་གཉིས་ཀྱི་བོད་རིགས་མང་པོས་དགའ་བསུ་བྱེད་ཀྱིན་པའི་གླུ་བ་ཞིག་ཡིན་འདུག
གསར་འགོད་པ། དོན་གོ
སེམས་གཏིང་ནས་གླུ་བ་ཕུལ་བྱུང་ལགས་ཀྱི་བློ་སྟོབས་ལ་གུས་འདུད་དང་། ད་ལྟའི་གནས་བབ་ལ་གདུང་སེམས་མཉམ་སྐྱེད་ཞུ།
མི་ཚེ་འདི་གྲང་ཤུལ་ཤུལ།།
དྲང་བདེན་གྱི་སྙིང་ཁྲག་དམར་ལྷོག་ལྷོག།
བསྟོད་གླུ་ཡི་རྒྱ་མཚོ་ཐ་གྲུ་ཡངས།།
སྨྲེ་ངག་གི་བཞུར་རྒྱུན་སྟོང་དུ་བདེན།།
ལ་རྒྱའི་གླུ་བ་ལ་རྒྱའི་དཔའ་བོ་དང་།།
ལ་རྒྱའི་རྩོམ་པ་ལ་རྒྱའི་བོད་མི་ཀུན།།
ལ་རྒྱའི་དོན་དུ་རང་སྲོག་བཏང་བ་ནས།།
ལ་རྒྱའི་ངར་སྐད་ཁ་བའི་ལྗོངས་ནས་མཆེད།།
ལ་རྒྱ་མེད་ལ་ལ་རྒྱ་མི་དགའ་མཁན།།
ལ་རྒྱའི་སྐད་ཆ་ཐོས་ན་ཟུག་རྔུ་ཞེས།།
ལ་རྒྱའི་སྲོག་ལ་རིན་ཐང་མི་བརྩི་མཁན།།
ལ་རྒྱ་མེད་པའི་བོད་མི་འདི་ན་མང་།།