༧གོང་ས་མཆོག་གིས་ཐེངས་གཅིག་ལ་ནོར་ཆོག་གམ།

མི་ཕམ་ཚངས་ཐིག

སྐུ་མཁྱེན། གསུང་མཁྱེན། ཐུགས་མཁྱེན། རང་ཅག་གིས་མི་ལོ་གཉིས་མ་ཟིན་ཙམ་ལ་བཙན་བྱོལ་བོད་གཞུང་གི་མཚན་བྱང་ཐོག་ལ་རྩོད་ཤགས་བྱས་པ་རེད། ད་ནི་དོན་གོ་རན་ལ། གྲུབ་འབྲས་ཤིག་འབྱུང་རན། ད་ང་ཚོས་མང་པོ་ཞིག་བཤད་མི་དགོས་པར། དྲི་བ་རྡོག་པོ་ཁ་ཤས་ཀྱིས་གོ་བ་ལེན་ཐུབ་པ་བྱེད་རོགས། གཅིག བོད་ཀྱི་སྐད་ཡིག་གི་ཐོག་ཙམ་དུའང་བོད་གཞུང་ཟེར་བའི་མིང་བྱང་དེ་བཞག་ན་དཀའ་ངལ་ཞིག་འཕྲད་ཚུལ་ཡོད་དམ། གཉིས། བོད་སྐད་ཐོག་ཏུ་བོད་གཞུང་ཞེས་པའི་མིང་བྱང་བཏགས་ན་དེ་ཉིད་གློག་ནས་དཀའ་ངལ་སྤྲོད་མཁན་དེ་སུ་འདྲ་ཞིག་ཡིན། གསུམ། བོད་ཡིག་ཙམ་གྱི་མིང་བྱང་ལ་དཀའ་ངལ་སྤྲོད་ན་ཚུལ་ཇི་ལྟར་སྤྲོད་རྒྱུ་རེད། དགོས་པ་ཅི་ཞིག་གི་ཕྱིར། བཞི། ༧གོང་ས་མཆོག་གིས་བོད་ཡིག་ཙམ་གྱི་ཐོག་ཏུ་ཡང་བོད་གཞུང་ཟེར་བ་གཏན་ནས་འདོགས་མི་རུང་བར་དུས་ནམ་ཞིག་ལ་གསུངས་ཡོད་དམ། ལྔ། གལ་ཏེ་ཡོད་ན། ཡིག་ངག་གང་རུང་གི་ཐོག་ཏུ་གསུངས་པ་ལ་ར་སྤྲོད་གནང་ཐུབ་མཁན་ཡོད་དམ། ཡོད་ན་གནང་རོགས་ཞུ། འདི་ནི་ཤིན་ཏུ་གལ་ཆེ་བའི་དུས་ལ་བབ་ཡོད་པས་ཡང་དང་བསྐྱར་དུ་གླེང་བ་ཡིན། ༧གོང་ས་མཆོག་གིས་དེ་ལྟར་ཡིག་ངག་གང་རུང་ཐོག་གསུངས་ཡོིད་པ་ར་སྤྲོད་ངོ་མ་ཞིག་གནང་མ་ཐུབ་ན་བབ་ཅོལ་མི་གསུང་བར་ཞུ།

དྲུག ཕྲན་གྱིས། (Central Tibetan Administration)ཟེར་བའི་མིང་བྱང་དེ་ནི་དབྱིན་སྐད་མ་སྐད་དུ་སྨྲ་མཁན་ཆེས་མང་པོ་ཞིག་ལ་གོ་བསྡུར་བྱས་མོད། ཁོང་ཚོ་ཀུན་གྱིས་མིང་བྱང་དེ་ནི་ཁྱད་མཚར་པོ་དང་དོན་གྱིས་དབུལ་བོ་ཞིག་རེད་གསུང་གིན་འདུག བོད་མིའི་སྒྲིག་འཛུགས་ཀྱིས་དབྱིན་སྐད་མ་སྐད་པ་དང་། ཆབ་སྲིད་ཆེད་མཁས་པ་ཚོ་དང་མཉམ་དུ་མིང་བྱང་འདིའི་ཐོག་གོ་བསྡུར་གནང་ཡོད་དམ། ཡང་ན་ང་རྒྱལ་དང་འོལ་ཚོད། བབ་ཅོལ་དང་སྣང་ཆུང་གིས་བཞག་པ་ཡིན་ནམ། ཅིའི་ཕྱིར་མིང་འདི་འདམ་ག་བཟང་ཤོས་དེ་ཡིན་པ་མི་མང་ལ་གསལ་བོར་གསུང་དགོས་པའི་འགན་ཁོང་ཚོའི་ཕྲག་ཏུ་ཡོད། བདུན། བོད་ཀྱི་མ་འོངས་འབྱུང་འགྱུར་ལ་སེམས་ཁུར་ཆེར་བསྐྱེད་ཀྱིས་མཚན་བྱང་འདི་ཕྲན་གྱིས་དབྱིན་སྐད་མ་སྐད་པ་མང་པོ་དང་མཉམ་དུ་གོ་བསྡུར་ཐེངས་མང་བྱས་པས། (Council of Tibet in Exile)ཁོང་ཚོས་ཁ་གཅིག་མཐུན་གྱིས་འདི་ཉིད་དོན་ལྡན་དགོས་མཁོ་ཆེ་བའི་མིང་ཞིག་རེད་གསུང་གི་འདུག འདིའི་དོན་ནི་བཙན་བྱོལ་དུ་ཡོད་པའི་གངས་ཅན་བོད་ཀྱི་སྐུ་ཚབ་ལ་གོ་བ་རེད། ཡང་དགོས་པ་བྱུང་ཉིན་ཞིག་ལ་བོད་སྐད་དུ་བོད་གཞུང་ཟེར་བ་བཞིན་དུ་རྒྱལ་ཁབ་ཀྱི་གཞུང་དངོས་ཤིག་ལ་འགྲེལ་ཆོག་པའི་ཁྱད་ཆོས་ཡོད་པ་རེད།

དེ་བཞིན་དུ་སྐད་ཡིག་གཞན་ཁག་གི་ནང་དུ་དེ་ལྟར་བསམ་བློ་གོ་བསྡུར་གཏིང་ཟབ་གནང་དགོས་གལ་ཆེ། ང་ཚོ་བོད་པ་ལ་དབྱིན་སྐད་ཡག་པོ་ཤེས་མཁན་མི་ཁྲི་ཁ་ཤས་ནི་ཡོད་མོད། མ་ཟད་དབྱིན་སྐད་ཀྱི་སྤྱི་ཚོགས་ནང་དུ་སྐྱེས་ནས་འཚར་ལོངས་བྱུང་སྟེ་དབྱིན་སྐད་དེ་སྐད་རིགས་དང་པོར་ཆགས་ཡོད་མཁན་གྱི་བོད་མི་གཞོན་སྐྱེས་མི་ཉུང་བ་ཞིག་ཡོད་མོད།

སུ་ཡིན་ན་ཡང་ཕྲན་གྱིས་བཏགས་པའི་མིང་འདི་( Council of Tibet in Exile)མི་འགྲིག་ན་ནི་ཁྱེད་ཅག་གིས་རྒྱུ་མཚན་ཡང་དག་ལྡན་པའི་ཐོག་ནས་གསུང་རྒྱུ་ཤིན་ཏུ་གལ་ཆེ། གལ་ཏེ་འགྲིག་ན་མི་རིང་བར་འཚོགས་འཆར་གྱི་རྒྱལ་ཡོངས་ཚོགས་ཆེན་སྟེང་ནས་མིང་འདི་ཉིད་གཏན་ཁེལ་ཐུབ་པར་ཤུགས་སྣོན་བྱ་རོགས་གནང་། ཕྲན་ནི་ཚོགས་ཆེན་ལ་ཞུགས་པའི་གོ་སྐབས་མི་གནང་བར་ཡིད་ཆེས་ཀྱིས་འདིར་བྲིས་པ་ཡིན། བརྒྱད། མང་དག་ཅིག་གིས་དོན་གལ་ཆེ་བ་ལས་མིང་གལ་མི་ཆེ་ཟེར་གྱིན་འདུག་མོད། དེ་ལ་ནི་མཐའ་གཅིག་ཏུ་མོས་མཐུན་མེད། མིང་ལ་བརྟེན་ནས་དོན་ཡང་དག་ལ་གཞོལ་མི་དགོས་པ་ཞིག་འཇིག་རྟེན་འདི་ན་གཅིག་ཀྱང་མེད། རྫུན་མ་ལ་ཕུགས་མེད། ལྷག་པར་དུ་ཁྲིམས་དང་ཆབ་སྲིད་ཀྱི་དམིགས་ཡུལ་ཅན་དག་ནི་མིང་ལ་ཤིན་ཏུ་ལྟོས་ཚབས་ཆེ།

དེའི་ཕྱིར་ཕྲན་གྱིས་མིང་འདིའི་ཆེད་དུ་སྔོན་ནས་ཐེངས་མང་ཤི་འབད་བྱས་པ་ཡིན། དེ་ལ་གཟུར་གནས་བློ་ལྡན་རྣམས་ཀྱིས་རྒྱབ་སྐྱོར་གནང་བར་བཀའ་དྲིན་ཆེ། ད་དུང་མུ་མཐུད་དུ་རྒྱབ་སྐྱོར་དང་འགྲེལ་བཤད་གནང་བར་རེ་བསྐུལ་ཞུ། མིང་བྱང་ནི་གནས་སྐབས་ཙམ་ལ་དེ་ཙམ་གལ་མི་ཆེ་བར་སྣང་ཡང་། མ་འོང་པའི་ཆབ་སྲིད་ཀྱི་གནད་དང་། ནམ་ཞིག་མི་རབས་རྗེས་མ་རྣམས་ལ་འདིས་བར་ཁྱད་ཆེས་ཆེན་པོ་འགྲོ་བས་ཤིན་ཏུ་གལ་ཆེ་བ་མཁྱེན་པར་འཚལ། ༧གོང་ས་མཆོག་གིས་(Council of Tibet in Exile)ཞེས་པའི་མིང་འདི་འདོགས་མི་རུང་བ་གསུང་མི་སྲིད་སྙམ། གལ་ཏེ་སྲིད་ན། ང་ཚོས་༧གོང་ས་མཆོག་གིས་སྐུ་ཚེ་ཧྲིལ་བོར་ཐེངས་གཅིག་ཀྱང་ནོར་མི་ཆོག་པའི་བཟོ་མ་བྱས་ན་ལེགས། དེ་མིན་ང་ཚོ་ཚང་མ་སྣང་སྲིད་དག་པ་རབ་འབྱམས་པ་ཡིན་མདོག་དང་། ༧གོང་ས་མཆོག་གིས་ཅི་མཛད་ཆོས་སུ་མཐོང་མཁན་རྐྱང་བ་ཡིན་མདོག་བྱེད་རྒྱུ་ཡིན་ནམ། ཁོང་གི་གསུང་ཟུར་ཙམ་ཡང་བཀའ་བཅག་མྱོང་མེད་མདོག་བྱེད་དམ། གལ་ཏེ་གསུང་མི་སྒྲུབ་མཁན་ཞིག་གིས་སྒྲུབ་མདོག་བྱས་ན་རྩ་བའི་བླ་མ་ལ་ཟོལ་ཟོག་གཡོ་རྒྱུ་བྱས་པ་རེད། དེ་བས་བླ་མའི་དགོངས་པ་མ་རྟོགས་ན་བཀའ་འདྲི་གཅིག་དྲིས། རྒྱུ་མཚན་ལྡན་པའི་སྒོ་ནས་གོ་བསྡུར་ཞིག་གནང་མི་ཆོག་གམ།

མཚམས་རེར་དགོས་དབང་གིས་ཅི་ཡང་མི་གསུངས་པ་ཡོད་ལ། མཚམས་རེར་སྒྲ་ཇི་བཞིན་པར་མ་འགྲེལ་ན་ལེགས་པའི་དུས་ཀྱང་ཡོང་སྲིད་པ་མཁྱེན་གལ། དེའི་ཕྱིར་རྒྱུན་དུ་གཡམ་རྒྱུག་མ་བྱས་ན་ལེགས།

ཉེ་ཆར་༧གོང་ས་མཆོག་གིས་བློ་ཕམ་ཕྲན་བུ་བྱུང་ཚུལ་གསུངས་པ་ནི་རྒྱུ་མཚན་མེད་ཅིང་ཧ་ཅང་ཐལ་ཆེའི་བཤད་མཁན་གྱི་རིགས་ལ་གསུངས་པ་འདྲ། རྒྱུ་མཚན་ལྡན་པའི་དཔྱད་བསྡུར་འདི་དག་དང་འབྲེལ་བ་གང་ཡང་མེད་སྙམ།

༧གོང་ས་མཆོག་གིས་རྒྱུན་དུ་རང་ཅག་ལ་ཡང་ཡང་གསུང་བ་ནི། ནང་པ་སངས་རྒྱས་པའི་ཆོས་ཀྱི་གཙོས། ཅི་ཞིག་ཡིན་ཡང་རྟགས་དང་རིགས་པ་རྒྱུ་མཚན་གྱིས་དཔྱད་བསྡུར་བྱེད་དགོས་པ་ལས། སུ་ཞིག་གིས་བཤད་པ་ལ་དྲི་བ་ཙམ་ཡང་མ་དྲི་ཞེས་ནམ་ཡང་གསུངས་མྱོང་ངམ། ཁྱེད་ཅག་སུ་ཞིག་གིས་ཐོས་ཡོད་ན་གསུངས་རོགས་ཞུ། ༧གོང་ས་མཆོག་གིས་རྒྱུན་དུ་དཔྱད་པ་མང་དུ་གཏོང་རྒྱུ་གལ་ཆེ། བླུན་དད་དང་ལུང་རྐྱང་པ་དྲངས་ནས་མགོ་མ་འཁོར་གསུང་གིན་མེད་དམ། ནང་པ་སངས་རྒྱས་པ་ཞིག་ཡིན་ཕྱིན་འདི་ཁས་མི་ལེན་ཐབས་མེད་ཅིག་མ་རེད་དམ། དེས་མི་ཚད་གནས་ལུགས་དང་རྒྱུ་མཚན་ལ་རྒོལ་པའི་བླུན་པོ་མ་རུང་བ་ཀླ་ཀློའི་བྱ་སྤྱོད་དང་དུ་ལེན་འདོད་པ་ཡིན་ན་མ་གཏོགས། རིགས་པ་དང་། རྒྱུ་མཚན་ལ་ཉན་ཞིང་བརྩི་འཇོག་ཅུང་ཙམ་ནི་མེད་ཐབས་མེད། བདེན་པ་དང་གནས་ལུགས་ཀྱིས་ཕོངས་པ་ལ་བཀྲ་ཤིས་དོན་བཟང་ཞིག་ཡོང་སྲིད་དམ། སྲིད་ན་རྒྱ་དམར་གཞུང་གིས་བྱེད་སྟངས་དེ་དགེ་ལེགས་ཤིག་རེད་ཟེར་རྒྱུ་ཡིན་ནམ།

 ༧གོང་ས་མཆོག་དང་ང་ཚོ་གངས་ཅན་པའི་བདེན་དོན་ཉིད་ལ་རིན་ཐང་མེད་པར་ཁས་ལེན་རྒྱུ་ཡིན་ནམ། ཕྲན་ནི་༧གོང་ས་སྐྱབས་མགོན་རྒྱལ་བའི་དབང་བོ་མཆོག་ལ་དགའ་དད་དུང་གསུམ་ཆེ་ལ། ལ་རྒྱ་གཙིགས་འཛིན་དང་དམ་ཚིག་གཙང་མ་བྱེད་མཁན་ཞིག་ཡིན། འོན་ཀྱང་རིགས་པ་དང་རྒྱུ་མཚན་གྱི་སྒོ་ནས་དོན་མ་རྟོགས་པ་རེ་བྱུང་ན། བཀའ་འདྲི་ཞུས་ནས་གོ་བསྡུར་བྱེད་པ་ནི་༧གོང་ས་མཆོག་སྐུ་ཉིད་ཀྱི་དགོངས་དོན་ཡིན་པར་ཡིད་ཆེས་བྱས་ནས་ཡོད་དོ།། མཐར་ཀུན་ལ་འབོད་སྐུལ་ཞིག་ཞུ་རྒྱུ་ནི། ཚིག་ཙམ་ལ་རྩོད་པ་གཏན་ནས་མི་གནང་བར། དོན་དངོས་གནས་ལ་བསམ་གཞིག་ཞིབ་མོ་གནང་སྟེ། བློ་གཟུ་བོའི་སྒོ་ནས་བོད་ཀྱི་བསྟན་སྲིད་ཀྱི་ཆེད་དུ་གོ་བསྡུར་དང་བགྲོ་གླེང་ལྷུག་པོར་གནང་རོགས་སྙིང་ནས་ཞུ་ཞུ།། །།