པའོ་ཨ་རིར་བྲོས་བྱོལ་གྱི་དོགས་སློང་།

གཟའ་ལྷག་པའི་ཉིན་པེ་ཅིན་ནས་ནེའུ་ཡོག་ཏུ་འཕུར་བསྐྱོད་བྱེད་པའི་གནམ་གྲུ་ཞིག་མཁའ་ལམ་ནས་ཕྱིར་ལོག་དགོས་བྱུང་ཡོད་ལ།   དབྱེ་ཞིབ་པ་ཝུ་ཧྥིན་གྱིས་དེའི་ནང་པའོ་ཞིས་ལའེ་ཡོད་སྲིད་པའི་དོགས་སློང་བྱས་འདུག

ཕྱི་ཟླ་ ༨ ཚེས་ ༢༩ ཉིན་རྒྱ་ནག་གི་ CA981 རྟགས་ཅན་གྱི་མཁའ་འགྲུལ་གནམ་གྲུ་དེ། པེ་ཅིན་ནས་ཨ་རིའི་ནེའུ་ཡོག་ཏུ་འཕུར་བསྐྱོད་བྱས་ཏེ་ཆུ་ཚོད་ ༧ རིང་བསྐྱོད་རྗེས། གློ་བུར་དུ་འཕུར་བསྐྱོད་ཀྱི་ཁ་ཕྱོགས་བསྒྱུར་ཏེ་ཕྱིར་པེ་ཅིན་གནམ་ཐང་དུ་ལོག་ཡོད་འདུག གནམ་གྲུའི་ནང་གི་འགྲུལ་བ་རྣམས་ཀྱིས་གནམ་གྲུའི་ཁ་ཕྱོགས་བསྒྱུར་བ་ཤེས་འཕྲལ། མཁའ་འགྲུལ་ཞབས་ཞུ་བར་སྐད་ཆ་དྲིས་ཡོད་ཀྱང་། ཞབས་ཞུ་བས་མཁའ་འགྲུལ་ཕྱོགས་སྟོན་བརྡ་རྟགས་ལ་སྐྱོན་ཤོར་བ་ཡིན་ཚུལ་བརྗོད་དེ། གནམ་གྲུའི་ནང་གི་འགྲུལ་བ་ཚོར་མགོ་སྐོར་བཏང་ཡོད་འདུག

རྒྱ་ནག་གཞུང་འབྲེལ་གསར་ལམ་ཁག་གིས། གནམ་གྲུ་དེར་ཛ་དྲག་ཉེན་ཁ་ཡོད་པའི་གསང་འཕྲིན་འབྱོར་བར་བརྟེན། ཨ་རར་བསྐྱོད་བཞིན་པའི་མཁའ་ལམ་ནས་ཁ་ཕྱོགས་བསྒྱུར་ཏེ་ཕྱིར་པེ་ཅིན་གནམ་ཐང་དུ་ལོག་པ་ཡིན་སྐོར་བརྗོད་འདུག ཡིན་ནའང་། རྒྱ་ནག་གི་ཝེ་པའོ་གཙོས་བརྡ་འཕྲིན་བརྒྱུད་ཁག་ཏུ། གནམ་གྲུ་དེའི་ནང་ཨ་རིར་བྲོས་བྱོལ་བྱེད་བཞིན་པའི་རྒྱ་གཞུང་ཆབ་སྲིད་ལྷན་ཁང་གི་འཐུས་མི་རིམ་པའི་མཐོ་རིམ་དཔོན་རིགས་ཤིག་ཡོད་པར་བརྟེན། རྒྱ་གཞུང་བདེ་འཇགས་ལྷན་ཁང་གིས་བཀའ་རྒྱ་བཏང་བ་ལྟར་གནམ་གྲུ་ཕྱིར་ལོག་པ་དང་། པེ་ཅིན་གནམ་ཐང་དུ་ཕྱིར་འབབ་སྐབས་གནམ་ཐང་ཡོངས་རྫོགས་དམག་མིས་སྐོར་ཡོད་པ་མ་ཟད། གནམ་གྲུའི་ནང་གི་འགྲུལ་བ་གསུམ་འཇུ་བཟུང་བཙན་འཁྲིད་བྱས་ཡོད་སྐོར་བརྗོད་འདུག 

སྐབས་དོན་དབྱེ་ཞིབ་པ་ཝུ་ཧྥིན་གྱིས་པེ་ཅིན་ནས་ནེའུ་ཡོག་ཏུ་བསྐྱོད་པའི་གནམ་གྲུ་དེའི་ནང་། ཨ་རིར་བྲོས་བྱོལ་བྱེད་མཁན་རྒྱ་གཞུང་ཆབ་སྲིད་ལྷན་ཁང་གི་འཐུས་མི་དེ་ནི། ད་ལྟ་རྒྱ་གཞུང་གི་བཀག་སྡོམ་འོག་ཡོད་པའི་པའོ་ཞིས་ལའེ་ཡིན་སྲིད་པའི་དོགས་སློང་བྱས་ཡོད་པ་རེད།   ཝུ་ཧྥིན་གྱིས་བརྗོད་རྒྱུར། “ གལ་སྲིད་གནམ་གྲུ་དེའི་ནང་ཆབ་སྲིད་ལྷན་ཁང་གི་དཔོན་རིགས་རིམ་པའི་བྲོས་བྱོལ་བ་ཞིག་ཡོད་པ་བདེན་ཚེ། ངས་ཚོད་དཔག་བྱས་ན་པའོ་ཞིས་ལའེ་རེད་བསམ། ཆབ་སྲིད་ལྷན་ཁང་གི་དཔོན་རིགས་རིམ་པར་སྲོག་ཉེན་གྱི་གནོན་ཤུགས་ཆེན་པོ་ཞིག་མ་འཕྲད་པར་བྲོས་བྱོལ་བྱ་དགོས་དོན་གང་ཡང་ཡོད་པ་མ་རེད། དེ་ལྟའི་གནོན་ཤུགས་འཕྲད་ཀྱིན་པའི་དཔོན་རིགས་དེ་པའོ་ཞིས་ལའེ་ཆགས་ཡོད། ” ཅེས་བརྗོད་ཡོད་པ་རེད།

སྐབས་དོན་དཔྱད་བརྗོད་པ་ཝུ་ཧྥིན་གྱིས། གལ་སྲིད་བྲོས་བྱོལ་བྱེད་མཁན་དེ་པའོ་ཞིས་ལའེ་ཡིན་ཚེ། རྒྱ་གཞུང་གིས་གནམ་གྲུ་ཕྱིར་ལོག་བཅུག་སྟེ་འཇུ་བཟུང་བྱས་པ་ཙམ་གྱིས་གནད་དོན་ཡོངས་སུ་ཐག་ཆོད་པ་མ་ཡིན་པར། ཉེ་ཆར་པའོ་ཞིས་ལའེ་པེ་ཅིན་གྱི་སོ་སོའི་ཁྱིམ་ནང་གུ་ཡངས་བཀག་སྡོམ་བྱས་ཡོད་པ་ལྟར། ཁོ་གསང་བའི་ཐོག་ནས་ཕྱིར་གཏོང་མཁན་གྱི་དཔོན་རིགས་དེ་སུ་ཡིན་མིན་རྙོག་ཟིང་གི་གཞི་རྩ་ཆགས་ཡོད་ལ། ཉེ་ཆར་གཞུང་དཔོན་རིགས་ནང་ཁུལ་གྲོས་བསྡུར་ཐག་གཅོད་བྱས་པའི་སྐབས་ ༡༨ པའི་ཚོགས་འདུ་ལའང་ཉེན་ཁ་ཆེན་པོ་འཕྲད་ཀྱིན་པ་མ་ཟད། རྒྱ་གཞུང་ནང་ཁུལ་འཐོར་བཤིག་ཏུ་གྱུར་ཟིན་པའི་དོགས་སློང་ངོས་འཛིན་བྱས་ཡོད་པ་རེད།

ཉེ་སྔོན་པའོ་ཞིས་ལའེ་དམར་ཤོག་ཚོགས་མིའི་གྲས་ནས་ཕུད་ཡོད་པ་མ་ཟད། ཕྱི་ཟླ་ ༨ ཚེས་ ༢༩ ཉིན་རྒྱ་གཞུང་དབུས་མི་དམངས་འཐུས་མིའི་རྒྱུན་ལས་ནང་ཁུལ་ཚོགས་འདུ་ཚོགས་ཏེ། པའོ་ཞིས་ལའེ་ཡི་མི་དམངས་འཐུས་མིའི་ཐོབ་ཐང་ཀྱང་ཕྱིར་བསྡུ་བྱས་ཡོད་འདུག