དེ་རིང་ཕྱི་དྲོར་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་གཙོ་མཆོག་གིས་གངས་སྐྱིད་དུ་གཞུང་ཞབས་ལས་ཚོར་བོད་དོན་ཐོག་གཏམ་བཤད་སྤེལ་སོང་།
དེ་རིང་ཕྱི་དྲོའི་ཆུ་ཚོད་ ༥ དང་ཕྱེད་ཀའི་སྟེང་གངས་སྐྱིད་སྤྱི་ཐབ་ཐོག་ཁང་དུ་སྤྱི་འཐུས་རྒྱུན་ལས་ཀྱི་གོ་སྒྲིག་འོག རྒྱ་གར་ཕྱི་སྲིད་དང་དཔལ་འབྱོར་བློན་ཆེན་ཟུར་པ། ད་ལྟའི་གྲོས་ཚོགས་འཐུས་མི་དང་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཡ་ཤི་ཝན་ཊི་(YashwantSinha)ལགས་ཕེབས་ཏེ། བཀའ་ཁྲི་བློ་བཟང་སེང་གེ་མཆོག་གིས་དབུས་པའི་བཀའ་བློན་རྣམ་པ་དང་སྤྱི་འཐུས་ཚོགས་གཙོ་གཞོན་གཉིས་ཀྱིས་དབུས་པའི་སྤྱི་འཐུས་རྣམ་པ། ལྷན་ཁང་གི་ཁག་གི་དྲུང་ཆེ་དང་གཞུང་ཞབས་ལས་བྱེད། མང་ཚོགས་ཁག་ཅིག་བཅས་ལ་བོད་དོན་རྒྱབ་སྐྱོར་དང་འབྲེལ་པའི་ཐོག་གཏམ་བཤད་ཐུང་ངུ་ཞིག་གནང་སོང་།
ཡ་ཤི་ཝན་ཊི་ལགས་ཀྱིས་ཁོང་ཐེངས་འདིར་བཞུགས་སྒར་ངྷ་མར་ས་ལར་བོད་མི་ཚོའི་སེམས་ནང་གི་ན་ཟུག་དང་རེ་བ་བརྗེ་རེས་བྱ་ཆེད་ཡོང་བ་ཞིག་ཡིན་པ་དང་། ཐེངས་འདིར་ཁོང་ད་ལྟ་གངས་སྐྱིད་དུ་ཚོགས་བཞིན་པའི་གྲོས་ཚོགས་ར་བར་ཕྱིན་སྐབས། དེ་གར་འབར་བཞིན་པའི་མེ་ལྕེ་ཞིག་མཐོང་ཡོད་ཅིང་མེ་ལྕེ་དེ་བོད་མི་ཚོའི་མངོན་འདོད་མ་འགྲུབ་བར་མུ་མཐུད་འབར་དགོས་པ། བཙན་བྱོལ་བོད་མི་རྣམས་ཕྱིར་བོད་དུ་ལོག་སྟེ་བོད་ལ་དབང་སྒྱུར་བྱ་དགོས་པར་བརྗོད་སོང་།
ཡང་ཁོང་གིས་གཞིས་བྱེས་གཉིས་ཀྱི་བོད་མི་ཚོས་འདས་པའི་ལོ་ངོ་བཅུ་ཕྲག་འགའི་རིང་བོད་དོན་འཐབ་རྩོད་ཀྱི་རྒྱུན་མཐུད་ཐུབ་པའི་ཡིད་ཆེས་དང་བློ་སྟབས། ཆོད་སེམས་བརྟན་པོ་དེ་དབང་ཤུགས་གང་འདྲ་ཞིག་གིས་ཀྱང་མེད་པ་བཟོ་མི་ཐུབ་ཅིང་། བོད་མི་ཚོའི་སྙིང་ཁོངས་ན་འབར་བཞིན་པའི་མངོན་འདོད་ཀྱི་མེ་ལྕེ་གསོད་ཐུབ་པའི་ནུས་པ་ཅན་ཞིག་གང་དུའང་མེད་སྐོར་བརྗོད།
ཁོང་གིས་ “ང་བྷེ་ཇེ་པེ་(BJP) ཚོགས་པ་དང་རྒྱ་གར་གྲོས་ཚོགས་བོད་དོན་རྒྱབ་སྐྱོར་བ་བཅས་ཀྱི་འཐུས་ཚབ་བྱས་ཏེ། ཁྱེད་ཚོར་བཤད་བཤད་རྒྱུ་ཞིག་ལ། རྒྱ་གར་གཞུང་གིས་བོད་ཐོག་ལ་འཛིན་པའི་སྲིད་བྱུས་ག་རེ་ཡིན་ཡང་། རྒྱ་གར་གྲོས་ཚོགས་འཐུས་མི་མང་པོ་ཞིག་དང་རྒྱ་གར་མི་མང་ལ་སེམས་ཚོར་གཅིག་ལས་མེད། དེ་ནི་བོད་མི་ཚོར་བཟུང་པའི་སྤུན་མཆེད་ཀྱི་སེམས་ཚོར་དང་། བོད་མི་ཚོར་བདེན་པའི་མཐའ་གསལ་པའི་ཉི་མ་ཞིག་འཆར་རྒྱུ་དེ་ཡིན་”ཞེས་བརྗོད་སོང་།
མཐར་ཁོང་གིས་གདུག་རྩུབ་དང་སྲིད་དབང་སྒེར་འཛིན་པ་རྒྱ་ནག་གཞུང་ཁ་གཏད་དུ་ལྷག་ཡོད་སྟབས། འབྲེལ་བ་བྱ་རྒྱུ་ཁག་པོ་ཞིག་ཆགས་ཡོད་ཀྱང་། བོད་ཀྱི་རྩོ་དོན་རྒྱལ་སྤྱི་རང་བཞིན་གྱི་གནད་དོན་ཞིག་ཏུ་བསྒྱུར་བར་ཤུགས་གནོན་རྒྱག་དགོས་པ་དང་། ཁོང་དང་ཁོང་གི་གྲོགས་པོ་གྲོས་ཚོགས་འཐུས་མི་རྣམས་ཀྱིས་དུས་ནམ་ཡང་བོད་མི་དང་བོད་པའི་རྩ་དོན་ལ་མཐའ་གཅིག་ཏུ་རྒྱབ་སྐྱོར་ཡོད་པ། གནད་དོན་གང་འདྲ་ཞིག་གི་ཐད་རྒྱབ་སྐྱོར་དང་རོགས་འདེགས་དགོས་ཀྱང་ཚེ་འཚེར་སྣང་མེད་པའི་ཐོག་ནས་བཤད་དགོས་པར་བརྗོད་སོང་།
མཐར་བཀའ་ཁྲི་མཆོག་གིས་རྒྱ་གར་གཞུང་དམངས་གཉིས་བོད་པ་ཚོར་བཀའ་དྲིན་ཆེན་པོ་ཡིན་པ། ནང་ཆོས་དང་འཚེ་མེད་ཞི་བའི་ལྟ་གྲུབ་སོགས་བོད་ཀྱི་རིག་གཞུང་གི་ཕྱོགས་ནས་རྒྱ་གར་ནི་བོད་པའི་དགེ་རྒན་ལྟ་བུ་ཡིན་པ། བོད་པའི་རྩ་དོན་འཐབ་རྩོད་ཀྱི་ལམ་ཁ་མང་པོ་ཞིག་རྒྱ་གར་ནས་བྱུང་ཡོད་སྐོར། གཞན། ཡ་ཤི་ཝན་ཊི་ལྟ་བུའི་ཧ་ཅང་དཀོན་པའི་མི་སྣ་རླབས་ཆེན་ཞིག་བོད་པའི་གྲོགས་པོར་གྱུར་པ་ནི། བོད་མི་ཚོའི་བསོད་ནམས་ཡིན་ཚུལ་སོགས་གསུངས་སོང་།
གསར་འགོད་པ། བནྡེ་སྐྱབས།
བོད་མི་ཚོར་སྤུན་མཆེད་ཀྱི་འདུ་ཤེས་བཟུང་ཡོད། བོད་མི་ཚོ་ང་ལྟོགས་དུས་ཀྱི་ཟ་མ་ཡིན། འཁྱག་དུས་ཀྱི་གྱོན་པ་ཡིན། ང་རྒུད་དུས་ཐལ་མོ་སྦྱོར་ཡུལ་ཡིན། ང་དར་དུས་རྒྱབ་ལག་བཅའ་ས་ཡིན། །
གཅིག་གིས་སྤུན་མཆེད་གསར་པ་བཟོས། གཞན་གཅིག་བསོད་བདེ་ཆེན་པོ་གྱུར།