བླ་སྤྲུལ་ཚོ་བེད་སྤྱོད་གཏོང་སའི་ལམ་ཁ་རྙིང་བ་དེ་ད་དུང་ཡོད་པ་ཧ་གོ་ཡོད།

མི་འགྱངས་པར་བཞུགས་སྒར་དུ་འཚོགས་འཆར་གྱི་དམིགས་བསལ་ཚོགས་ཆེན་ཐེངས་གཉིས་པའི་གྲོས་གཞི་དང་འབྲེལ་ཏེ། བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཞོན་ཨ་ཚོགས་ཀླུ་མཁར་བྱམས་ལགས་སུ་བཅར་འདྲི་ཞུས།  

དྲི་བ། བོད་ནང་གི་ཛ་དྲག་གནས་སྟངས་ཐོག་བོད་གཞུང་དམངས་གཉིས་ཀྱིས་གདོང་ལེན་ཇི་ལྟར་གནང་དགོས།

ལན། བསམ་བློའི་ཆ་ནས་བོད་ནང་གི་དཀའ་ངལ་དང་། ཛ་དྲག་རང་བཞིན་དེ་ང་ཚོའི་སེམས་ཤུགས་ཀྱི་འབྱུང་ཁུངས་ཡིན་དགོས་པ་ལས། གཞིས་ལུས་མི་མང་གི་འཐབ་རྩོད་ལ་ཕྱི་ལོགས་ན་མི་ཆོས་རིང་ལུགས་ཀྱི་རྒྱབ་སྐྱོར་བྱེད་མཁན་དང་། གདུང་སེམས་བྱེད་མཁན་ཡོད་པ་དེ་ཚོ་གཞུང་སྒེར་གང་རུང་གིས་བེད་ལོག་གཏོང་མི་རུང་བ་མ་མཐའི་ཆ་རྐྱེན་རེད། གཉིས་པ། སྲིད་བྱུས་ཀྱི་ཆ་ནས་བོད་ནང་གི་ཛ་དྲག་གནས་སྟངས་ལ་གདོང་ལེན་བྱ་ཕྱོགས་ཐད། བོད་གཞིས་བྱེས་གཉིས་ནས་རང་བཙན་གྱི་དམ་བཅའ་སེམས་ལ་དམ་པོར་ཉར་ཏེ། རྒྱ་གཞུང་ལ་མི་བསྟུན་པའི་འཐབ་བྱུས་འཛིན་རྒྱུ་གཙོ་འདོན་དགོས་པ་རེད། མ་གཏོགས་རྒྱ་གཞུང་གི་མི་རིགས་ས་གནས་རང་སྐྱོང་ལག་བསྟར་དོན་འཁྱོལ་དགོས་སྐོར་དང་། ཞི་མོལ་བྱ་དགོས་ཞེས་ཕར་རེ་འདུན་བཏོན་པ་དང་། ཡང་ན་ཁ་བརྡུང་བཏང་བ་ཙམ་ཀྱིས་ཅི་གང་ཕན་རྒྱུ་མ་རེད། གཙོ་བོ་ཕ་རོལ་བོར་བསྟུན་མ་དགོས་པའི་ཐོག་ནས་སོ་སོའི་རང་འགུལ་གྱིས་ཅི་ཞིག་བྱ་ཐུབ་པ་དང་། རང་སྟེང་ན་ནུས་པ་གང་ཡོད་ངེས་ཟིན་པ་དགོས་པ་གཙོ་བོ་རེད། གསུམ་པ། ལས་འགུལ་གྱི་ཆ་ནས་དེང་སྐབས་གཡུལ་ས་མདུན་མ་བོད་ནང་ཆགས་འདུག་པ་དང་། འདི་ནས་རྒྱབ་སྣོན་མཁོ་སྤྲོད་བྱེད་མཁན་ཙམ་ལས་དངོས་གཞིའི་གཡུལ་སར་སླེབ་ཐབས་མེད་པའི་གནས་སྟངས་དངོས་ལ་གཞིགས་ཏེ། གཞིས་ལུས་མང་ཚོགས་ཀྱི་སེམས་ཤུགས་མི་གཅོག་རྒྱུ་གཙོ་འདོན་དང་། རྒྱབ་སྐྱོར་བྱེད་སྐབས་ཅི་ཞིག་བྱེད་ཐུབ་མིན་ལས་ཀྱང་། ཅི་ཞིག་བྱེད་རུང་མིན་དང་བརྗོད་རུང་མིན་ལ་བསམ་བློ་གཏོང་དགོས་པ་རེད། ཐ་ན་དམངས་ཀྱི་འབོད་ཚིག་ཡན་ཆད་བརྗེ་བོ་བརྒྱབ་ན་དཔེ་མི་སྲིད་པའི་སྐྱོ་བོ་རེད། 

དྲི་བ། དེ་སྔའི་དམིགས་བསལ་ཚོགས་ཆེན་དང་རྒྱལ་ཡོངས་ཚོགས་ཆེན་དག་གི་གྲོས་ཆོད་དང་། ཐེངས་འདིའི་ཚོགས་ཆེན་ཐོག་གི་གྲོས་ཆོད་རིགས་ལག་བསྟར་ཐུབ་མིན་ཐད་དགོངས་ཚུལ་ག་རེ་ཡོད།

ལན། ལོ་འགའི་གོང་དམིགས་བསལ་ཚོགས་ཆེན་དང་པོ་འཚོགས་གྲུབ་རྗེས། ༸གོང་ས་མཆོག་གིས་ཚོགས་ཆེན་ལ་ཐོག་མའི་རེ་བ་བརྒྱབ་པ་ནང་བཞིན་ཡོང་མ་སོང་མོད། ལོ་འཁོར་ལས་བསྡོམས་ཚོགས་ཆེན་འདྲ་བོ་བྱུང་འདུག་གསུངས་ཡོད། དེ་དངོས་གནས་རེད། ཚོགས་ཞུགས་པ་ཚོས་ཀླད་པ་བརྡར་བའི་བསམ་ཚུལ་ལ་བདག་པོ་རྒྱག་མཁན་མེད་པར། ཚོགས་འདུ་ཚང་མ་གཞུང་འཛིན་པ་ཁ་མར་ལ་འཁོར་ནས་ལས་བསྡོམས་སྐྱོར་ས་འདྲ་བོ་ཞིག་དང་། ལྷག་པར་དུ་ཁོ་ཚོས་སྔོན་ནས་ཐག་བཅད་ཟིན་པ་ཞིག་ཚོགས་ཆེན་ཐོག་བསྣམས་ཏེ་ཕྱི་ཚུལ་ནས་ཁྲིམས་མཐུན་བཟོ་ས་ལྟ་བུ་ཞིག་ཆགས་པ་རེད། མི་མང་པོས་འགྲོ་སོང་འཕྲོ་ལྷག་རེད་ཟེར་ནས་སྐད་བརྒྱབ་པ་རེད། ད་ནི་ཚོགས་ཆེན་ཐེངས་འགར་ཚོགས་པའི་ཉམས་མྱོང་གཞིར་བཞག་ཐོག ཚོགས་ཆེན་ལ་ཁྲིམས་སྒྲིག་གི་དབང་ཚད་ཡོད་པ་ཞིག་དང་། གྲོས་ཆོད་ཁག་ལག་བསྟར་བྱེད་ཐབས་ལ། གཞུང་གིས་སྒྲུབ་ཐུབ་པ་ཁག་གཞུང་ལ་སྤྲད། གྲོས་ཚོགས་ཀྱིས་སྒྲུབ་ཐུབ་པ་ཁག་གྲོས་ཚོགས་ལ་སྤྲད། ཚོགས་སྐྱིད་ཁག་གིས་སྒྲུབ་ཐུབ་པ་ཚོགས་པ་ཚོར་སྤྲད་ཡོད་ཟེར་བ་སོགས་ཁྲལ་ལས་ཀྱི་འགྲོ་སྟངས་དེ་མ་ཡིན་པར། གྲོས་ཆོད་ཁག་ལག་བསྟར་བྱེད་མཁན་དང་། བརྡ་འདེད་གཏོང་མཁན་གྱི་སྡེ་ཚན་དམིགས་འཛུགས་དང་། བྱུང་ན་དེ་ལ་འབབས་པའི་སྔོན་རྩིས་དགོས་པ་རེད། སྤྱིར་ཆོས་པ་ཚོས་ཁྲ་ཁྲ་ཟང་ཟིང་གི་ཆོ་ག་ཕྱག་ལེན་ལ་བརྟེན་ནས་མང་ཚོགས་བློ་འགུག་བྱེད་པ་དང་། དབང་བསྒྱུར་བ་ཚོས་གནའ་སྲོལ་ཁ་འཁྱེར་དང་། ཚོགས་འདུ་འདྲ་མིན་ལ་བརྟེན་ནས་དབང་ཆ་རྒྱུན་གནས་ཡོང་ཐབས་ལ་འབད་པ་ནི་འགྲོ་སྟངས་རྙིང་བ་ཞིག་རེད། མ་གཏོགས་ཆོ་ག་ཕྱག་ལེན་ཙམ་ཀྱིས་ཆོས་རྣམ་དག་འགྲུབ་མི་ཐུབ་པ་ནང་བཞིན། གནའ་སྲོལ་ཙམ་དེ་རིང་གི་དབང་ཆའི་ཁྲིམས་མཐུན་གྱི་སྒྲུབ་བྱེད་ལ་མི་འགྲོ་ཁར། ཚོགས་འདུ་རྐྱང་རྐྱང་གིས་དམངས་ཀྱི་དཀའ་ངལ་ཡང་སེལ་ཐབས་མེད།  

དྲི་བ། བོད་ཕྱི་ཕྱོགས་ཀྱི་དགོན་སྡེ་ཆོས་ཚོགས་ཁག་དང་བླ་སྤྲུལ་ཚོའི་ངོས་ནས་བོད་ནང་གི་ཛ་དྲག་གནས་སྟངས་ཐོག་འགན་ལེན་སྟངས་ཐད་དགོངས་ཚུལ་ག་རེ་ཡོད།

ལན། ཚོགས་པ་ཁག་གི་དམིགས་ཡུལ་ཁ་ཁ་ཡིན་དུས་ཞུ་ཐུབ་པ་མི་འདུག དགོན་སྡེ་དང་། བླ་སྤྲུལ་རྣམ་པའི་སྲིད་དོན་གྱི་གནང་སྒོའི་ཐད། དེ་སྔ་རྒྱ་དམར་གཞུང་ལ་བོད་ཀྱི་ཆོས་དང་རིག་གཞུང་རྩ་མེད་གཏོང་རྒྱུའི་ཀུན་སློང་ཡོད་པར་ཆ་བཞག་ཀྱང་། ད་ཆ་ནུས་པ་དེ་ཁོ་རང་ཚོར་མེད་པ་ཧ་གོ་བ་དང་ཆབས་ཅིག བོད་ཀྱི་ཆོས་རིག་ཚོང་རྫས་བྱེད་ཐུབ་པ་དང་། བླ་སྤྲུལ་ཚོ་བེད་སྤྱོད་གཏོང་སའི་ལམ་ཁ་རྙིང་བ་དེ་ད་དུང་ཡོད་བསྡད་པ་ཧ་གོ་ཡོད་པ་རེད། དེ་ནི་མེ་མདའི་ཁ་ནས་རིག་གཞུང་བསྣུབས་པ་ལས་ཀྱང་ཉེན་ཁ་རེད། དེར་བརྟེན་རྒྱ་དམར་གཞུང་གིས་པཎ་ཆེན་རྫུན་མ་ཞིག་འཁྲིད་ཡོང་ཡོད་ཁར། ཏཱ་ལའི་བླ་མའི་ཡང་སྲིད་གཙོས་སྤྲུལ་སྐུ་ངོས་འཛིན་བྱེད་ཕྱོགས་སམ། མདོར་ན་བེད་སྤྱོད་གཏོང་ཐབས་ཀྱི་ཡིག་ཆ་ཨང་ལྔ་བ་ཟེར་བ་བཟོས་པའི་རྒྱུ་མཚན་ཡང་དེ་རེད།  ཁོ་ཚོས་བོད་ཀྱི་བླ་སྤྲུལ་ཚོ་བེད་སྤྱོད་གཏོང་ཐུབ་པ་དང་། གཏོང་སའི་ཚོང་ར་ཡོད་པར་མཐོང་ནས་དེ་ལྟར་བྱས་པ་རེད། དེར་བརྟེན། བླ་སྤྲུལ་ཚོས་རང་ཉིད་ཆབ་སྲིད་ཀྱི་ལག་ཆ་མ་ཆགས་པ་ཞིག་ཅིས་ཀྱང་ཐུབ་དགོས་ཚོད་རེད། གཞན་དུས་རབས་འདིའི་ཤེས་རིག་གི་ཁྲོམ་ར་ནས་བོད་ཀྱིོ་ཆོས་དང་རིག་གཞུང་ལ་རང་སྟེང་ན་སྐྱེས་སྟོབས་ཀྱི་ནུས་པ་དང་། ཚོང་ཟོག་གི་རིན་ཐང་ཡོད་པར་བརྟེན། ཕར་ཙམ་ཀྱི་རིང་སུ་གང་གིས་མེད་པ་བཟོ་ཐུབ་རྒྱུ་མ་རེད། དཔེར་ན། བོད་བརྒྱུད་ནང་བསྟན་བོད་ནང་བཀག་ཀྱང་རྒྱ་ནག་དང་། སོག་ཡུལ། ཐའེ་ཝན་སོགས་ཀྱི་ནང་འགོག་ཐུབ་ཀྱི་མེད་པ་ལྟ་བུ་རེད། དེ་རིང་བོད་ཀྱི་ཤེས་རིག་ལ་འཕྲད་པའི་དཀའ་ངལ་དངོས་ནི་སུས་བསྣུབ་ཐུབ་མིན་དེ་མ་ཡིན་པར། སུས་བཙོང་ཐུབ་མིན་དང་། བཙོང་བའི་ཡོང་འབབ་དེས་སོ་སོ་བོད་པར་ཁ་ཡོད་ལག་ཡོད་ཀྱི་ཕན་ཞིག་ཐོགས་མིན་དེ་རེད། བལ་ཡུལ་ནང་ལྟོས་དང་། བོད་ཀྱི་རིག་དངོས་ཚོང་གཉེར་བྱེད་མཁན་མང་ཆེ་བ་གོར་ཁ་ཆགས་འདུག་པ་ལྟར། ད་ཆ་བོད་ནང་དུའང་བོད་ཀྱི་ཤེས་རིག་ཐོན་དངོས་དང་། ཡུལ་སྐོར་སྤྲོ་འཆམ། དཔར་སྐྲུན། ཐ་ན་བོད་སྨན་ཡན་ཆད་རྒྱ་མིའི་ཚོང་ལས་ཆགས་འགྲོ་བཞིན་ཡོེད་པ་གསལ་བོ་རེད།  བླ་སྤྲུལ་ཚོས་སྲིད་དོན་ལས་ཀྱང་ཕྱོགས་འདིར་དོ་སྣང་གནང་གི་ཡོད་ཤག་དང་། གནང་དགོས་པ་རེད་བསམ་སོང་།

གཞན་ལོ་རྒྱུས་ཐོག་ཤར་ཙོང་ཁ་བ་བློ་བཟང་གྲགས་པ་ལྟ་བུ་རེ་གཉིས་མ་གཏོགས། ཏཱ་ལའི་བླ་མ་དང་པཎ་ཆེན་ཨེར་ཏི་ནི་ཞེས་པའི་མཚན་གནས་ཀྱི་མཇལ་སའི་མཚོན། ས་དགེ་བཀའ་རྙིང་གི་བླ་ཆེན་ཁག་གིས་རྒྱ་ཐོབ་བོད་ཐོབ་བཅོ་བརྒྱད་ཁུར་ཡོང་བའི་མཇུག་འབྲས་མཁྱེན་གསལ་རེད། དེ་སྔར་རྒྱ་སོག་གང་རུང་གིས་དབང་བསྒྱུར་གྱི་དགོས་མཁོར་དམིགས་ཏེ། བོད་ཀྱི་བླ་ཆེན་དང་། མི་ཆེན་ཚོར་ནོ་མོ་ཧན་དང་། ཧོ་ཐོག་ཐུ། ཐོའུ་ཀོན་སོགས་ཀྱི་མཚན་གནས་སྤྲད་པ་དེ་ཚོ་ད་དུང་ངོམ་སོར་འཁྱེར་ནས། དེ་རིང་གི་བླ་སྤྲུལ་ཚོས་ཀྱང་སོ་སོའི་མིང་གི་འགོར་བཙན་གྱིས་འདོགས་བཞིན་པ་ལྟ་བུ་ལོ་རྒྱུས་ཀྱི་སླབ་བྱའི་མ་འདེངས་པའི་སྐྱོན་ཅིག་ཏན་ཏན་རེད་འདོད། 

གསར་འགོད་པ། བནྟེ་སྐྱབས།