དཔེ་སྟོན་ན་ཆུང་ཚགས་པར་དང་ན་ཆུང་རྩོམ་པ་པོ།

འདི་ལོའི་ཕྱི་ཟླ་བདུན་པ་ནས་བཟུང་མེས་དབོན་དཔེ་སྟོན་སློབ་གྲྭས་ཟླ་རེའི༼དཔེ་སྟོན་ན་ཆུང་ཚགས་པར༽ཞེས་པའི་སློབ་མའི་རྩོམ་ཡིག་ཚགས་པར་ཞིག་བཏོན་ཏེ་འགྲེམས་སྤེལ་བྱས་ཡོད། བཙན་བྱོལ་སྤྱི་ཚོགས་ནང་བོད་རང་གི་སྐད་ཡིག་རིག་གནས་ལ་ཤ་ཚ་དང་རྩོམ་རིག་ལ་དུང་ཞེན་ཡོད་མཁན། ལྷག་པར་དུ་ནམ་རྒྱུན་སློབ་གསོའི་ལས་དོན་ཐད་དོ་སྣང་དང་། བྱིས་པའི་འཚར་ལོངས་ཀྱི་བརྒྱུད་རིམ་ལ་ཐུགས་ཁུར་གནང་མཁན་མང་པོ་ཞིག་གིས་ཚགས་པར་དེར་གདེང་འཇོག་དང་བསྟོད་བསྔགས་ཆེན་པོ་གནང་གི་ཡོད་ལ། དེ་དང་འབྲེལ་ནས་རྩོམ་ཡིག་དེ་དག་སློབ་མ་རང་ཉིད་ཀྱིས་བྲིས་པ་ཡིན་མིན་གྱི་སྐོར་ལའང་དྲ་ལམ་ཁག་ཏུ་གླེང་སློང་འབྱུང་བཞིན་ཡོད། 

            འདི་གའི་གསར་འགོད་པ་ཆེད་དུ་མེས་དབོན་དཔེ་སྟོན་སློབ་གྲྭར་སོང་སྟེ།  སློབ་ཕྲུག་ཚོས་ནམ་རྒྱུན་རྩོམ་ཡིག་འབྲི་སྦྱོང་བྱེད་སྟངས་དང་། དཔེ་སྟོན་ན་ཆུང་ཚགས་པར་འགྲེམས་སྤེལ་གྱི་དམིགས་ཡུལ་སྐོར་ལ་རྒྱུས་ལོན་བྱས། སྤྱིར་བཙན་བྱོལ་ནང་འཚར་ལོངས་བྱུང་བའི་སློབ་མ་མང་ཆེ་བར་བོད་ཡིག་དེ་ཙམ་ཡག་པོ་མེད་པའི་ལྟ་ཚུལ་ཞིག་སྤྱི་ཚོགས་ནང་ཡོངས་ཁྱབ་ཡིན་ཡང་། དཔེ་སྟོན་སློབ་གྲྭའི་སློབ་ཕྲུག་ཚང་མ་བཙན་བྱོལ་ལུང་པ་ནས་སྐྱེས་པ་ཤ་སྟག་ཡིན་པ་མ་ཟད། འཛིན་རིམ་ ༦ ནས་ ༩ བར་གྱི་སློབ་ཕྲུག་ཕལ་ཆེ་བ་ནི་གཞིས་ཆགས་ཁག་ནས་བསླེབས་པའི་ཕྲུ་གུ་ཤ་སྟག་རེད། དཔེ་སྟོན་ན་ཆུང་ཚགས་པར་དེ་ད་ལོའི་ཕྱི་ཟླ་ ༧ པ་ནས་འདོན་མགོ་བརྩམས་ཏེ་ད་བར་འདོན་ཐེངས་གསུམ་ཙམ་འགྲེམས་སྤེལ་བྱས་ཡོད་པ་དང་།  ཚགས་པར་སྟེང་གཙོ་བོ་རྩོམ་ཡིག་དང་བསྒྱུར་རྩོམ། རི་མོར་དགའ་མཁན་ཚོར་ཆེད་དུ་རི་མོའི་ས་མིག་གཅིག་བཅས་འདུག

སློབ་ཕྲུག་རེར་རྩོམ་འབྲི་སྦྱོང་གི་སྒྲུང་སྙན་མོ་རེ་འདུག

གསར་འགོད་པས་འཛིན་གྲྭ་ ༦ ནས་ ༩ བར་གྱི་སློབ་ཕྲུག་བཅུ་གྲངས་ཤིག་ལ་བསམ་ཚུལ་དྲིས་སྐབས།  སློབ་ཕྲུག་ཚང་མས་འཛེམ་དོགས་མེད་པར། སོ་སོས་རྩོམ་ཡིག་ག་རེ་བྲིས་ཡོད་མེད་དང་། རྩོམ་འབྲི་སྐབས་བསམ་བློ་ཇི་ལྟར་བཏང་མིན། དཀའ་ཁག་ག་རེ་འཕྲད་མིན་སོགས་ཀྱི་སྒྲུང་སྙན་མོ་རེ་བཤད་རྒྱུ་ཡོད་པ་མ་ཟད།  སོ་སོའི་སེམས་ནང་གི་མྱོང་ཚོར་རྣམས་བརྗོད་འདོད་ཀྱི་གྲུང་རིག་རིག་གི་རྣམ་འགྱུར་དེ་དག་གིས་ཁོ་ཚོས་རང་ཉིད་ཀྱི་རྩོམ་ཡིག་ལ་རྩིས་འདང་ཆེན་པོ་ཞིག་བཟུང་ཡོད་པའང་མཚོན་ཐུབ་ཀྱི་འདུག ཁོ་ཚོ་ཚང་མར་གཅིག་མཐུན་གྱི་རེ་སྙེག་ཅིག་ཡོད་པ་ནི། དཔེ་སྟོན་ན་ཆུང་ཚགས་པར་བརྒྱུད་དེ་སོ་སོའི་བྲིས་པའི་རྩོམ་ཡིག་རྣམས་མི་མང་པོ་ཞིག་གིས་ཀློག་ཐུབ་ན་བསམ་པ་དེ་རེད།  

འཛིན་རིམ་དགུ་བའི་སློབ་ཕྲུག་ཕུར་བུ་སྒྲོལ་མ་ལགས་ཀྱིས། དཔེ་སྟོན་ན་ཆུང་ཚགས་པར་འདོན་ཐེངས་དང་པོའི་སྟེང་དུ་ ༼ངའི་ཕ་ཡུལ་གངས་ཅན་ལྗོངས༽དང་། འདོན་ཐེངས་གཉིས་པའི་སྟེང་སྒྱུར་རྩོམ་ཞིག་སྤེལ་ཡོད་པ་མ་ཟད། འདོན་ཐེངས་གསུམ་པའི་སྟེང་དུའང་རྩོམ་ཡིག་ཅིག་སྐུར་ཡོད་ཟེར། ཁོ་མོས་བརྗོད་ན། རྩོམ་ཡིག་གི་བརྗོད་བྱ་དགེ་རྒན་གྱིས་སྤྲད་པ་དང་སོ་སོའི་བདམས་པ་གཉིས་བསྡུར་ན།  དགེ་རྒན་གྱིས་སྤྲད་པའི་བརྗོད་བྱ་དེར་དང་ཐོག་སོ་སོར་འཆར་སྣང་གང་ཡང་མེད་པར། གཞི་ནས་འཆར་སྣང་ཞིག་གཏོང་དགོས་དུས་ཅུང་ཁག་པོ་ཡོད་པ་དང་།  སོ་སོས་བདམས་པའི་བརྗོད་བྱ་དེར་སྔོན་ནས་བསམ་བློ་བཏང་སྟེ། སོ་སོས་འཆར་སྣང་ཞིག་བཟོས་ཡོད་སྟབས་འབྲི་དུས་ལས་སླ་བོ་ཡོད་པར་བཤད།

ཁོ་མོར་སྒྱུར་རྩོམ་དེ་བསྒྱུར་རྒྱུའི་བསམ་བློ་ཇི་ལྟར་འཁོར་ཚུལ་དྲིས་པར།  “ཉིན་ཞིག་ངས་དབྱིན་ཡིག་གི་སྒྲུང་ཞིག་བཀླགས་པ་ཡིན། སྒྲུང་དེ་སྙན་པོ་ཞིག་ཏུ་མཐོང་སོང་། རྗེས་ལ་དགེ་རྒན་གྱིས་ང་ལ་སྒྲུང་དེ་བོད་ཡིག་ཏུ་བསྒྱུར་ཐུབ་ན་ཡག་པོ་འདུག་གསུངས་པར་བརྟེན།  ངས་བོད་ཡིག་ཐོག་བསྒྱུར་བ་ཡིན། དབྱིན་ཡིག་ཐོག་ཡོད་པའི་ཚན་པ་རེ་བཀླགས་རྗེས་དེའི་ནང་དོན་ཧྲིལ་བོ་བོད་ཡིག་ཐོག་སྒྱུར་ན་ཅུང་ཙམ་སླ་བོ་འདུག ཚིག་རྐང་རེ་རེ་བཞིན་བསྒྱུར་ན་དཀའ་ལས་ཁག་པོ་འདུག ” ཅེས་ཧ་ཅང་གཟབ་ནན་གྱིས་ངོ་སྤྲོད་གནང་སོང་། 

འཛིན་གྲྭ་བརྒྱད་པའི་སློབ་ཕྲུག་བུ་མོ་བསྟན་འཛིན་ཚེ་བརྟན་ལགས་ཀྱི་སློབ་ཚན་དགའ་ཤོས་ནི་སྤྱི་ཚོགས་རིག་གནས་དང་ཚན་རིག་གཉིས་རེད། ཁོ་མོ་སློབ་ཚན་དེར་དགའ་བའི་རྒྱུ་མཚན་གཙོ་བོ་ནི། ཚན་རིག་ནང་བརྟག་དཔྱད་བྱས་ཏེ་བསམ་བློ་གཏོང་རྒྱུ་མང་པོ་ཡོད་པ་དང་། སྤྱི་ཚོགས་རིག་གནས་ནང་ལོ་རྒྱུས་སྐོར་གྱི་ཤེས་བྱ་མང་པོ་ཡོད་པས་ཡིན་འདུག

ཁོ་མོས་སོ་སོའི་རྩོམ་ཡིག་ཚགས་པར་སྟེང་ཐོག་མར་བཏོན་དུས་ཀྱི་སེམས་ཚོར་བརྗོད་དོན། “ང་ཚོ་སློབ་གྲྭའི་ཚགས་པར་འདོན་ཐེངས་དང་པོའི་སྟེང་། ༼ང་དང་ངའི་དཔེ་སྟོན་སློབ་གྲྭ༽ཞེས་པའི་རྩོམ་ཡིག་དེ་ཚུད་ཡོད་སྟབས། ང་རང་སེམས་པ་ཧ་ཅང་དགའ་བོ་བྱུང་། སྤྱིར་བཏང་ང་རང་རྩོམ་ཡིག་འབྲི་རྒྱུར་ཞེ་དྲགས་དགའ་བོ་མེད། ཡིན་ནའང་། རྩོམ་ཡིག་ཀློག་རྒྱུར་དགའ་བོ་ཡོད། ནམ་རྒྱུན་སྒྲུང་དེབ་དང་། མཚམས་རེར་ཚགས་པར་ཀློག་གི་ཡོད། མང་ཆེ་བ་དབྱིན་ཡིག་ཐོག་ཀློག་གི་ཡོད། བོད་ཡིག་ཐོག་ཟུར་ཞིག་ཞེས་པའི་སྒྲུང་དེབ་དེ་བཀླགས་པ་ཡིན། མཚམས་རེར་ཚིག་མགོ་མ་འཚོས་པ་དང་། དག་ཆ་རྣམས་བློ་ལ་མ་ངེས་པའི་དཀའ་ཁག་ཏོག་ཙམ་འཕྲད་ཀྱི་འདུག ”ཟེར།

ཁོ་མོར་མཚོན་ན་རྩོམ་ཡིག་འབྲི་རྒྱུ་དེ་ལས་སླ་བོ་ཞིག་ཏུ་ཚོར་འདུག་ལ། ནམ་རྒྱུན་སྒྲུང་དེབ་སོགས་བཀླགས་དུས་ཚིག་གསར་པ་རྣམས་ཟིན་དེབ་ནང་ཕབ་རྗེས་དགེ་རྒན་ལ་འགྲེལ་བཤད་བསྐྱོན་བཅུག་གི་ཡོད་པ་དང་། སོ་སོའི་ཡིད་དབང་འཕྲོག་པ་དང་སྙན་ཆ་ལྡན་པའི་ཚིག་རྣམས་འབྲི་དེབ་སྟེང་བཤུས་ཏེ། དེ་དག་སྤྱད་ནས་རྩོམ་ཐུང་འབྲི་སྦྱོང་བྱེད་བཞིན་ཡོད་འདུག སོ་སོས་བྲིས་པའི་རྩོམ་ཡིག་རྣམས་སློབ་གྲོགས་གཞན་ལ་བསྟན་ཏེ་བསམ་ཚུལ་འདོན་བཅུག་རྗེས། བསྐྱར་བཅོས་ཡང་ཡང་གཏོང་གི་ཡོད་འདུག  ཁོ་མོས་སློབ་གྲྭའི་ཚགས་པར་དེ་ནི་རང་ཉིད་ཀྱི་རྩོམ་ཡིག་འབྲི་སྦྱོང་བྱེད་སའི་སྟེགས་བུ་གལ་ཆེན་ཞིག་ཏུ་ངོས་འཛིན་བྱེད་ཀྱི་ཡོད་པ་མ་ཟད། རྗེས་ཕྱོགས་སྔར་ལས་ལྷག་པར་རྩོམ་ཡིག་ཡག་པོ་འབྲི་ཐུབ་པར་འབད་བརྩོན་བྱ་རྒྱུའི་འདུན་པ་ཡོད་ཟེར།

འཛིན་གྲྭ་དགུ་པའི་སློབ་ཕྲུག་བསྟན་འཛིན་ཆོས་སྐྱིད་ནི་ཨ་ཕ་མེད་པའི་དྭ་ཕྲུག་ཅིག་རེད།  ཆུང་དུས་ནས་ཕ་ལགས་གྲོངས་ཡོད་སྟབས་ཨ་མ་གཅིག་པུའི་གཉེར་སྐྱོང་ལ་བརྟེན་ནས་ནར་སོན་པ་དང་། ཁོ་མོས་ཚགས་པར་འདོན་ཐེངས་དང་པོའི་སྟེང་ ༼ང་དྭ་ཕྲུག་ཏུ་གྱུར་པའི་མི་ཚེ༽ཞེས་པ་དང་། འདོན་ཐེངས་གཉིས་པའི་སྟེང་ ༼ཨ་རིའི་སྤུན་ཉེ༽ཞེས་པའི་སོ་སོའི་དཀའ་སྡུག་གི་མི་ཚེ་འཚོ་བ་དངོས་དང་འབྲེལ་བའི་རྩོམ་ཡིག་གཉིས་སྤེལ་འདུག

ཁོ་མོས་སོ་སོའི་རྩོམ་ཡིག་གི་ནང་དོན་ངོ་སྤྲོད་གནང་དོན། “ང་ཆུང་དུས་ནས་ཕ་ལགས་གྲོངས་པ་རེད། ད་ལྟའི་བར་ང་རང་གསོ་སྐྱོང་གནང་སྟེ་ནར་སོན་དུ་འཇུག་མཁན་ཨ་མ་ལགས་ཡིན།  དེར་བརྟེན། རྩོམ་ཡིག་དང་པོའི་ནང་ཨ་མའི་བཀའ་དྲིན་དང་། ཕ་ལགས་གྲོངས་པའི་སྐྱོ་སྣང་གི་སྐོར་བྲིས་ཡོད། རྩོམ་ཡིག་གཉིས་པའི་ནང་། ཨ་རིར་ཡོད་པའི་སྤུན་ཉེ་ཚང་མ་ངའི་ཕ་ལགས་ཀྱི་ཕ་མ་གཅིག་པ་དེ་འདྲ་རེད། ཡིན་ནའང་། ངའི་ཕ་ལགས་གྲོངས་རྗེས་ཁོ་ཚོས་ང་ཚོར་ལྟ་སྐྱོང་རོགས་རམ་མི་བྱེད་པ་མ་ཟད། ངའི་ཨ་མ་ལགས་ལ་བརྙས་བཅོས་བཏང་ཡོད་པ་རེད། ཁོ་ཚོར་དངུལ་ཡོད་པའི་རྗེས་ལ་སོ་སོའི་ཤ་ཁྲག་གཅིག་པའི་གཉེན་ཉེ་ལའང་ཡ་བྱེད་ཀྱི་མེད་པའི་སྐོར་དང་། ང་རང་ཆེན་པོ་ཆགས་རྗེས་ཨ་མ་ལགས་ལ་དྲིན་ལན་གཞལ་རྒྱུ་ཡིན་པ་སོགས་བྲིས་ཡོད།” ཟེར། 

ཁོ་མོས་སོ་སོའི་རྩོམ་ཡིག་འབྲི་སྦྱོང་གི་བརྒྱུད་རིམ་བརྗོད་པ་ལྟར་ན། མོ་རང་ཆུང་ཆུང་སྐབས་བསམ་བློ་གཅིག་ཀྱང་མ་བཏང་པར་ཤར་རྒྱག་འབྲི་བཞིན་ཡོད་སྟབས། མཚམས་རེར་སྙིང་དོན་གང་ཞིག་འབྲི་དགོས་མིན་བསམ་བློ་མ་འཁོར་བ་དང་། ཚིག་གསར་སྙན་པོའི་རིགས་མ་རྙེད་པ་བཅས་ལ་བརྟེན་ནས། ཡིག་ཕྲེང་གཉིས་གསུམ་ཙམ་བྲིས་རྗེས་འབྲི་རྒྱུ་མ་རག་པའི་དཀའ་ངལ་འཕྲད་མྱོང་ཡོད་འདུག ཁོ་མོས་བརྗོད་རྒྱུར། “རྩོམ་མ་བྲིས་གོང་ལ་དོན་གྱི་སྙིང་པོ་འདི་དང་འདི་འབྲི་རྒྱུ་ཡིན། ཚིག་གསར་འདི་དག་བེད་སྤྱོད་བྱ་རྒྱུ་ཡིན་ཞེས་སོ་སོས་བསམ་བློ་ཡག་པོ་བཏང་རྗེས། གཞི་ནས་རྩོམ་ཡིག་བྲིས་ན་རྩོམ་ཡག་པོ་ཡོང་གི་འདུག དགེ་རྒན་གྱི་ལམ་སྟོན་དང་སྒྲུང་དེབ་སོགས་བཀླགས་པར་བརྟེན་ནས། དེང་སྐབས་རྩོམ་འབྲི་རྒྱུའི་འདོད་པ་ཤུགས་ཆེན་པོ་སླེབ་ཀྱི་འདུག  ང་རང་གིས་བཀླགས་མྱོང་བའི་སྒྲུང་དེབ་ལས།  རི་རྩེ་སྤྲིན་དཀར་ཞེས་པའི་དེབ་ནང་གི་སློབ་ཕྲུག་གི་འདུ་ཤེས་ཞེས་པ་དེ་སྙན་ཤོས་སུ་མཐོང་སོང་། ” ཞེས་བརྗོད་སོང་། དེ་སྔོན་གངས་སྐྱིད་དུ་འོད་དཀར་དྲ་ཚིགས་ཀྱིས་གོ་སྒྲིག་གནང་བའི་་སྙན་ངག་འགྲན་བསྡུར་སྐབས། དཔེ་སྟོན་སློབ་གྲྭའི་སློབ་ཕྲུག་བུ་མོ་གཉིས་ལ་ཨང་དང་པོ་ཐོབ་པའི་གྲས་ཀྱི་གཅིག་ཁོ་མོ་རེད་འདུག

བྱིས་རྩོམ་དེབ་ཅིག་བཟོ་འཆར་ཡོད།

སློབ་སྤྱི་བསྟན་འཛིན་རྡོ་རྗེ་ལགས་སུ་༼དཔེ་སྟོན་ན་ཆུང་ཚགས་པར་༽སྐོར་ལ་བཅར་འདྲི་ཞུས་པར། ཁོང་གིས་ “སློབ་མ་ཚོའི་འབྲི་དེབ་རྙིང་པ་དེ་ཚོར་བལྟས་ཡོང་དུས། རྩོམ་ཧ་ཅང་ཡག་པོ་དེ་འདྲ་མང་པོ་འདུག ཡིན་ནའང་། རྩོམ་དེ་དག་ཕྱི་ལོག་ལ་འགྲེམས་སྤེལ་གང་ཡང་བྱས་མེད་སྟབས།  རྩོམ་ཡིག་གི་ཚགས་ཤོག་ཅིག་འདོན་ཐུབ་པ་ཡིན་ན། དཔེ་སྟོན་གྱི་རྣམ་པ་སྤྱི་ཚོགས་ནང་ལ་ཁྱབ་ཐུབ་པ་དང་། བྱིས་པ་ཚོའི་རྩོམ་འབྲི་བའི་ནུས་པ་ཡང་རང་བཞིན་གྱིས་གོང་མཐོར་གཏོང་ཐུབ་པ་མ་ཟད། རྩོམ་ཡིག་འབྲི་བ་བརྒྱུད་དེ་གསར་གཏོད་ཀྱི་རྣམ་པ་བསླེབ་ཐུབ་པ་དང་། བསམ་བློའི་ནུས་ཚད་མཐོ་རུ་འགྲོ་བ་བཅས་ལ་དམིགས་ཏེ་ཚགས་ཤོག་འདི་བཏོན་པ་ཡིན།” ཅེས་བརྗོད་དེ།  བྱིས་པ་སོ་སོའི་འབྲི་དེབ་སྟེང་ཡོད་པའི་རྩོམ་ཡིག་རྣམས་བོར་བརླག་འགྲོ་ཉེན་ཡོད་སྟབས།  མ་འོངས་པར་རྩོམ་ཡིག་ཆ་ཚང་དག་སྒྲིག་བྱས་ཏེ་དེབ་ཅིག་བཟོ་འཆར་ཡོད་སྐོར་བརྗོད་བྱུང་།    

དཔེ་སྟོན་སློབ་གྲྭར་སློབ་མར་ཤེས་ཡོན་སྤྲོད་ཕྱོགས་ཐད་དམིགས་ཡུལ་བཞི་ཡོད་པ་ནི།  རང་དབང་དང་གསར་གཏོད། རྒྱུན་འཛིན། གཞན་ཕན་བཅས་ཡིན་འདུག ཉེ་སྔོན་དགེ་རྒན་དང་སློབ་ཕྲུག་མཉམ་དུ་གོ་བསྡུར་གནང་མཐར། ཕྱི་ཟླ་ ༩ ནས་བཟུང་བོད་ཡིག་གཅིག་པུ་མིན་པར་དབྱིན་ཡིག་གི་ཚགས་པར་ཞིག་ཀྱང་འདོན་འཆར་ཡོད་པ་དང་། སློབ་མའི་ནུས་པ་སྐྱེད་སྲིང་ཡོང་ཆེད།  རྩོམ་ཡིག་གློག་ཀླད་དུ་འཇུག་པ་སོགས་ལས་ཀ་ཆ་ཚང་སློབ་མ་ཚོ་རང་ངོས་ནས་བསྒྲུབ་འཇུག་གི་ཡོད་འདུག སློབ་སྤྱི་བསྟན་འཛིན་རྡོ་རྗེ་ལགས་ཀྱིས་ “ འགྲན་བསྡུར་དང་ཚགས་པར་གྱི་ཆེད་དུ་རྩོམ་ཡིག་འབྲི་བ་མ་ཡིན་པར། སློབ་མར་རྩོམ་འབྲིའི་འདུ་ཤེས་དང་དགའ་སྣང་སྐྱེད་སྲིང་གི་ཆེད་དུ་ཡིན།   དེར་བརྟེན། ངས་ནམ་རྒྱུན་དགེ་རྒན་ཚོར་བྱིས་པའི་རྩོམ་འབྲིའི་དགའ་སྣང་དྲག་པོ་དེ་ཉམས་ཆག་ལ་གཏོང་མི་རུང་བའི་སྐུལ་མ་གཏོང་གི་ཡོད། ”ཅེས་བརྗོད།

རྩོམ་འབྲིའི་དགའ་སྣང་སྐྱེད་སྲིང་།

དཔེ་སྟོན་སློབ་གྲྭར་བསླབ་གཞི་རྩ་འཛིན་དེབ་མ་གཏོགས། འཛིན་རིམ་རེ་རེར་དམིགས་བསལ་གྱི་གཏན་འཁེལ་སློབ་དེབ་ཅིག་མེད་པར། དགེ་རྒན་སོ་སོའི་ངོས་ནས་རྩོམ་ཡིག་དང་སློབ་ཚན་བདམས་སྒྲིག་ཐོག  སློབ་ཕྲུག་ཚོར་སློབ་ཚན་དཔེ་ཁྲིད་དང་རྩོམ་ཡིག་འབྲི་སྦྱོང་བྱེད་བཞིན་འདུག

ཚགས་པར་གྱི་ལག་བསྟར་རྩོམ་སྒྲིག་པ་བོད་དགེ་རྡོ་སྦིས་ཟླ་བ་ཚེ་རིང་ལགས་སུ།  ཚགས་པར་སྟེང་སློབ་མའི་རྩོམ་ཡིག་འདེམས་སྒྲུག་བྱེད་སྟངས་དང་། ཚགས་པར་གྱིས་སློབ་ཕྲུག་ཚོའི་རྩོམ་འབྲིའི་ཐད་ཤུགས་རྐྱེན་གང་འདྲ་ཐེབས་ཀྱི་ཡོད་མེད་དྲིས་སྐབས།  ཁོང་གིས་ “རྩོམ་ཡིག་མང་ཆེ་བ་སློབ་མ་ཚོའི་འབྲི་དེབ་སྟེང་ནས་ཚུར་བདམས་པ་ཡིན། ཚགས་པར་འདོན་ཐེངས་དང་པོ་འདོན་སྐབས།  བྱིས་པ་ཚོའི་རྩོམ་ཡིག་མང་པོའི་ནང་ནས་ཡག་ཤོས་གྲས་བདམས་ཏེ་འགྲེམས་སྤེལ་བྱས་པ་རེད། ཚགས་པར་སྟེང་བྱིས་པ་ཁ་ཤས་ཀྱི་རྩོམ་ཡིག་ཚུད་ཐུབ་མེད་སྟབས། རྩོམ་ཡིག་ཚུད་ཡོད་མཁན་དང་མེད་མཁན་བྱིས་པ་སོ་སོར་རྣམ་འགྱུར་སྟོན་སྟངས་ལོགས་ག་རེ་འདུག  རྩོམ་ཡིག་ཚུད་མེད་པའི་བྱིས་པ་ཚོའི་ཁྲོད་ངུ་མཁན་ཡང་ཁ་ཤས་འདུག དེར་བརྟེན། བྱིས་པ་ཚོས་བསམ་པར་རྩོམ་ཡིག་སྤྲད་ཀྱང་ཚགས་པར་སྟེང་ཚུད་རྒྱུ་མ་རེད་བསམ་པའི་ཡི་ཆད་མི་འབྱུང་ཆེད། འདོན་ཐེངས་གཉིས་པའི་སྟེང་རྩོམ་ཡིག་གི་བཟང་ངན་ཁོ་ནར་མ་བལྟས་པར།  གཙོ་བོ་དང་ཐོག་ཚུད་མེད་པའི་བྱིས་པ་གཞན་པ་ཚོའི་རྩོམ་ཡིག་བཀོད་ཡོད།” ཅེས་བརྗོད་བྱུང་།  

ནམ་རྒྱུན་སློབ་ཕྲུག་ཚོར་རྩོམ་ཡིག་འབྲི་སྦྱོང་ཇི་ལྟར་བྱེད་འཇུག་གི་ཡོད་མེད་ཐད།  བོད་དགེ་ཟླ་བ་ཚེ་རིང་ལགས་ཀྱིས་བརྗོད་ན།  བདུན་ཕྲག་རེའི་ནང་སློབ་ཕྲུག་ཚོར་ཉུང་མཐའ་ཡང་རྩོམ་ཡིག་གཅིག་གཉིས་རེ་འབྲི་འཇུག་གི་ཡོད་པ་དང་།  དེའང་དགེ་རྒན་གྱིས་རྩོམ་བྱང་གཉིས་ཙམ་སྤྲད་རྗེས་སློབ་མར་འདེམས་འཇུག་པ་དང་།  སློབ་མ་རང་ངོས་ནས་རྩོམ་བྱང་དང་བརྗོད་གཞི་འཚོལ་ཐུབ་པ་ཡིན་ན། སོ་སོར་རང་མོས་ལྟར་འབྲི་འཇུག་གི་ཡོད་འདུག  དེ་བཞིན།  ཁོང་གིས་ང་ཚོའི་ངོས་ནས་ཚགས་པར་གྱི་རྩོམ་ཡིག་གི་རིན་ཐང་དང་།  སྤྱི་ཚོགས་ཐོག་རྩོམ་ཡིག་ལེགས་ཉེས་ཀྱི་གདེང་འཇོག་ཡོང་མིན་གལ་ཆེར་འཛིན་གྱི་མེད་པར།  བྱིས་པ་མང་པོ་ཞིག་གིས་རྩོམ་འབྲི་ཐུབ་པ་དང་། རྩོམ་འབྲིའི་དགའ་སྣང་སྐྱེད་སྲིང་བྱ་རྒྱུ་དམིགས་ཡུལ་གཙོ་བོར་བཟུང་ཡོད་ཟེར།

དཔེ་སྟོན་སློབ་གྲྭར་རེ་བ་ཆེན་པོ་ཞིག་བཟུང་འདུག

སྤྱི་ཚོགས་ཐོག་དཔེ་སྟོན་ན་ཆུང་ཚགས་པར་ལ་གདེང་འཇོག་དང་དོ་སྣང་གང་འདྲ་ཡོད་མེད་རྒྱུས་ལོན་ཆེད།  དུས་རྒྱུན་བོད་རང་གི་སྐད་ཡིག་རིག་གནས་ལ་དོ་སྣང་དང་། ལྷག་པར་རྩོམ་འབྲིའི་ལས་ལ་མྱོང་གོམས་ལྡན་པའི་གཞོན་སྐྱེས་རྩོམ་པ་པོ་ལྷ་ཆབ་སྦྱིན་པ་ལགས་སུ།  དཔེ་སྟོན་ན་ཆུང་ཚགས་པར་གྱི་སྐོར་ལ་བསམ་ཚུལ་དྲིས་པར།  ཁོང་གིས་ “དཔེ་སྟོན་སློབ་གྲྭའི་ཚགས་པར་སྟེང་གི་རྩོམ་ཡིག་ཁ་ཤས་བཀླགས་མྱོང་ཡོད། ངའི་ཚོར་སྣང་ལ་དཔེ་སྟོན་སློབ་གྲྭའི་བྱིས་པ་ཚོས་བྲིས་པའི་རྩོམ་ཡིག་འདི་འདྲ། ཧ་ལམ་བོད་ཁྱིམ་སློབ་གྲྭའི་འཛིན་རིམ་བཅུ་གཉིས་ཀྱི་སློབ་མ་ཚོས་ཀྱང་འབྲི་ཐུབ་རྒྱུ་ཁག་པོ་རེད་དྲན་སོང་། ཚིག་སྦྱོར་སྤེལ་སྟངས་དང་ནང་དོན་གང་ཅིའི་ཐད་ནས་ཡག་པོ་འདུག  དེ་བཞིན། ལོ་སྔོན་མའི་སྙན་ངག་གྱེར་འདོན་འགྲན་བསྡུར་སྐབས། དྷ་སའི་ཉེ་ཁུལ་གྱི་སྔོན་འགྲོའི་འགྲན་སྡུར་ཁྲོད་དཔེ་སྟོན་སློབ་གྲྭའི་སློབ་ཕྲུག་ཁག་ཅིག་འཛུལ་ཞུགས་བྱས་ཏེ། ཨང་དང་པོ་དཔེ་སྟོན་སློབ་གྲྭའི་སློབ་ཕྲུག་བུ་མོ་གཉིས་ཀྱིས་བླངས་སོང་། དེ་དུས་ང་རང་དཔྱད་འདེམས་པ་ཡིན་པའི་ཁུལ་རེད། ཉིན་དེར་སློབ་ཕྲུག་བུ་མོ་གཉིས་ཀྱིས་གྱེར་འདོན་སྐབས། རྣམ་འགྱུར་སྟོན་སྟངས་དང་ཚིག་ཁ་ནང་ལ་ལེན་སྟངས་སོགས་ཕྱོགས་གང་ཐད་ནས་ཧ་ལས་པའི་ཡག་པོ་འདུག སློབ་ཕྲུག་རང་ངོས་ནས་རྩོམ་ཡིག་འབྲི་སྦྱོང་གི་ལམ་ལ་ཞུགས་བཞིན་པའི་ཚོར་བ་འགོག་མེད་དུ་སྤྲོད་ཀྱི་འདུག” ཅེས་བརྗོད་སོང་།

དེ་བཞིན།  རྩོམ་པ་པོ་ལྷ་ཆབ་སྦྱིན་པ་ལགས་ཀྱིས་བཙན་བྱོལ་སློབ་གྲྭ་ཁག་ནང་བོད་ཡིག་ལ་གཙིགས་འཛིན་དེ་ཙམ་གནང་གི་མེད་པའི་སྐོར་ལ། “སྤྱིར་བཏང་བཙན་བྱོལ་སློབ་གྲྭ་ཚང་མའི་ནང་བོད་ཡིག་ཡོད་པ་རེད་དེ། བོད་ཡིག་ནི་ཟུར་ཁྲིད་ལྟ་བུ་ཞིག་ཆགས་བསྡད་པའི་བཟོ་ཡོད་པ་རེད། མ་གཞི་དཔེ་སྟོན་སློབ་གྲྭར་མཚོན་ན་སོ་སོའི་སྐད་ཡིག་དང་རིག་གཞུང་གཞི་རྩར་བཟུང་བའི་ཐོག་ནས།  གཞན་ལ་དཔེ་སྟོན་ས་ཞིག་ཡིན་པའི་ཆ་ནས་མིང་ཡང་དཔེ་སྟོན་དུ་བཏགས་ཡོད་པ་རེད། སློབ་གྲྭའི་ནང་གི་དགེ་རྒན་དང་སློབ་མ་གང་ཡིན་ཡང་། ད་ལྟའི་གཞི་རྐང་འདི་བཟུང་ནས་མུ་མཐུད་མཇུག་སྐྱོང་གནང་སྟེ།  བོད་རང་གི་སློབ་མ་ངོ་མ་ཞིག་སྐྱེད་སྲིང་བྱེད་ཐུབ་པ་ཡིན་ན། མ་འོངས་པར་དངོས་གནས་ཡག་པོ་ཡོང་ས་རེད།” ཅེས་བརྗོད་དེ།  དཔེ་སྟོན་སློབ་གྲྭའི་བོད་ཡིག་གི་གནས་ཚད་ལ་གདེང་འཇོག་དང་རེ་བ་ཆེན་པོ་བཟུང་ཡོད་པའི་རྣམ་པ་བསྟན་སོང་། 

དཔེ་སྟོན་སློབ་གྲྭ་ནི་ ༢༠༠༥ ལོར་གསར་རྒྱག་གིས་དབུ་བརྙེས་ཤིང་། རྗེས་སུ་གངས་སྐྱིད་ཉིན་མོའི་སློབ་གྲྭའང་དཔེ་སྟོན་སློབ་གྲྭའི་ཁོངས་སུ་བཅུག་སྟེ། ད་ལྟ་སྟེང་འོག་སློབ་གྲྭ་གཉིས་སུ་ཁྱོན་བསྡོམས་སློབ་ཕྲུག་ ༣༠༠ ལྷག་ཡོད་པ་དང་། ཕྱི་དྲོའི་སློབ་གསེང་སྐབས་སློབ་ཕྲུག་རྣམས་ལ་སོ་སོའི་དགའ་མོས་ལྟར།  གཞས་དང་སྒྲ་སྙན། རྩེད་མོ་སོགས་རྩེད་འཇུག་གི་ཡོད་ཀྱང་།  སློབ་གྲྭའི་གཞི་ཁྱོན་ཧ་ཅང་ཆུང་སྟབས། རྩེད་ཐང་དང་ལྡུམ་ར་སོགས་མེད་པའི་དཀའ་ངལ་འཕྲད་ཀྱི་ཡོད་འདུག  

གསར་འགོད་པ། ཚེ་རིང་རྒྱལ།

༼བོད་ཀྱི་དུས་བབ་ཚགས་ཤོག་སྤྱིའི་འདོན་ཐེངས་ ༥༦༦ ལས་བདམས་བཀོད་བྱས།༽