བོད་པའི་སྲོལ་རྒྱུན་ཤིང་བརྐོས་ལག་རྩལ་པ་རྒྱལ་ཐང་བློ་བཟང་བརྩོན་འགྲུས་ལགས་སུ། ད་ལྟའི་བོད་ཕྱི་ནང་གཉིས་ཀྱི་སྲོལ་རྒྱུན་ཤིང་བརྐོས་རིག་གནས་ཀྱི་གནས་སྟངས་དང་། ཕྱི་རྒྱལ་བའི་བོད་པའི་སྲོལ་རྒྱུན་ལག་ཤེས་ཐད་ལྟ་སྟངས་གང་འདྲ་ཡོད་མེད་ཐོག་བཅར་འདྲི་ཞུས་ཡོད།
དྲི་བ། ཐོག་མར་ཁྱེད་གིས་བོད་ཀྱི་སྲོལ་རྒྱུན་ཤིང་བརྐོས་ལག་རྩལ་འདི་ཇི་ལྟར་ཆེད་སྦྱོང་གནང་བའི་སྐོར་ངོ་སྤྲོད་ཅིག་གནང་རོགས།
ལན། ང་རང་ཆུང་དུས་ལོ་ ༡༥ བར་དུ་རྒྱ་མིའི་སློབ་གྲྭར་སོང་བ་ཡིན། དེ་ནས་ལོ་གསུམ་ཙམ་རིང་ཕ་ལགས་མཉམ་དུ་ཤིང་བཟོའི་ལས་ཀ་བྱས་པ་དང་། ལོ་ ༡༨ ནས་བཟུང་ཕ་ཡུལ་རྒྱལ་ཐང་ན་ཤིང་བཟོ་སྐད་གྲགས་ཅན་ཞིག་ཡོད་པ་དེའི་གམ་ནས་ལོ་ ༡༠ ལྷག་གི་རིང་བོད་པའི་སྲོལ་རྒྱུན་ཤིང་བརྐོས་ལག་ཤེས་སློབ་སྦྱོང་དང་མཉམ་དུ་ལས་ཀ་བྱས་ཏེ། སོ་སོའི་ལུང་པའི་ཤིང་བརྐོས་ལག་རྩལ་ཡོངས་རྫོགས་ལ་སྦྱངས་པ་ཡིན། ༡༩༩༥ ལོར་རྒྱ་གར་དུ་སྐྱབས་བཅོལ་དུ་ཡོང་རྗེས་དགེ་ཆོས་འཛིན་ལགས་ཀྱི་ཤིང་བརྐོས་རི་མོ་དག་མཐོང་སྟེ་སྦྱོང་འདུན་ཤུགས་ཆེན་པོ་བྱུང་སྟེ། དཔེ་མཛོད་ཁང་དུ་ཁོང་གི་མདུན་ནས་ལོ་གསུམ་རིང་བསྐྱར་དུ་ཤིང་བརྐོས་ལག་རྩལ་སྦྱངས་པ་ཡིན། ཁྱོན་བོད་ནང་དུ་ལོ་ ༡༣ དང་རྒྱ་གར་ནང་ལོ་ ༡༥ ལ་ཤིང་བཟོའི་ལས་ཀ་བྱས་པ་ཡིན། ད་ལྟ་ཁེ་ན་ཌར་བོད་པའི་ཤིང་བརྐོས་ལག་རྩལ་སློབ་ཁྲིད་ཀྱི་ལས་གཞི་ཞིག་དང་ལེན་གྱིས་ལོ་གཉིས་མ་ཟིན་ཙམ་འགྲོ་བཞིན་ཡོད།
དྲི་བ། རྒྱལ་ཐང་ནི་བོད་པའི་སྲོལ་རྒྱུན་ཤིང་བརྐོས་ལག་རྩལ་དར་ཁྱབ་ཆེ་ས་ཞིག་ཡིན་རབས་གོ་མྱོང་ཡོད་པས་དེའི་སྐོར་ངོ་སྤྲོད་ཅིག་གནང་རོགས།
ལན། སྤྱིར་ང་ཚོའི་ཕ་ཡུལ་རྒྱལ་ཐང་དུ་ཤིང་བརྐོས་ལག་རྩལ་དར་བའི་ལོ་རྒྱུས་དེ། ཕྱི་ལོའི་དུས་རབས་བདུན་པ་ནས་བཟུང་ཡོད་བསྡད་པ་ཞིག་རེད། ཡིན་ནའང་། བར་སྐབས་ཤིག་ནས་འགྱུར་བཅོས་སྣ་ཚོགས་ཐེབས་ཏེ། གནའ་སྔ་མོའི་སྲོལ་རྒྱུན་ཤིང་བརྐོས་རི་མོ་ཞེ་དྲག་ལྷག་ཡོད་པ་མ་རེད། དེང་སྐབས་ཀྱི་རྒྱལ་ཐང་ཤིང་བརྐོས་ལག་རྩལ་རི་མོ་དེ་ནི། མི་རབས་ལྔའི་སྔོན་ལ་ང་ཚོའི་ཕ་ཡུལ་དུ་ཤིང་བཟོ་མཁའ་འགྲོ་ཟེར་བའི་སྐད་གྲགས་ཅན་ཞིག་བྱུང་བ་རེད། ཁོང་ལྷན་སྐྱེས་ཀྱིས་ཤིང་བརྐོས་ལག་རྩལ་ཐོག་མཁས་པ་ཞིག་ཡིན་སྟབས། ཤིང་བརྐོས་རི་མོ་སྣ་ཚོགས་གསར་གཏོད་གནང་སྟེ་དར་ཁྱབ་དང་སྙན་གྲགས་ཆེན་པོ་བྱུང་པ་རེད། ཤིང་བཟོ་མཁའ་འགྲོའི་དགེ་ཕྲུག་རིམ་པར་བརྒྱུད་ཡོང་བའི་ནང་གི་གཅིག་དེ་སྔའི་བོད་ཀྱི་དཔེ་མཛོད་ཁང་གི་ཤིང་བཟོ་ཆོས་མཛད་ལགས་རེད། ང་ཚོའི་ལུང་པར་མཚོན་ན་ཤིང་བརྐོས་ལག་རྩལ་སྙན་གྲགས་ཆེ་ཤོས་ཏེ་ཤིང་བཟོ་མཁའ་འགྲོ་ནས་བརྒྱུད་པའི་ལག་ཤེས་ཆགས་ཡོད།
དྲི་བ། ད་ལྟའི་ཆར་ཁྱེད་ཀྱིས་ཁེ་ན་ཌར་ལས་ཀ་གཙོ་བོ་ག་རེ་གནང་བཞིན་ཡོད།
ལན། ངས་ལས་ལ་བྱེད་ས་དེ་བཟོ་གྲྭ་ཆེན་པོ་ཞིག་རེད། ཁོ་ཚོས་འཛམ་གླིང་རྒྱལ་ཁབ་འདྲ་མིན་གྱི་ཤིང་བཟོ་ལག་རྩལ་པ་མང་པོ་གདན་འདྲེན་གྱིས་ཤིང་བཟོའི་ལག་རྩལ་སློབ་ཁྲིད་དང་། རྒྱལ་ཁང་དང་འགྲེམས་སྟོན་ཁང་མཛེས་བཟོ། ཤིང་བརྐོས་ལག་རྩལ་གྱི་ཅ་དངོས་གསར་བཟོ་སོགས་བྱེད་ཀྱི་འདུག བཟོ་གྲྭ་དེའི་ནང་ཨེ་ཤ་ཡའི་ཕྱོགས་ནས་བོད་དང་ཧིན་དྷི་ཉི་ཞི་ཡཱ། རྒྱ་ནག་གསུམ་གྱི་ཤིང་བཟོ་མ་གཏོགས་མི་འདུག གཞན། ཧྥ་རན་སི་དང་འཇར་མན། ཨི་ཊ་ལི། ཡའུ་ཁི་རེན། གྷ་ན་སོགས་འཛམ་རྒྱལ་ཁབ་འདྲ་མིན་ ༢༢ ཀྱི་ཤིང་བཟོའི་ལག་རྩལ་པ་འཛོམས་ཡོད་པ་དང་། གཟའ་འཁོར་གཅིག་ནང་ལག་རྩལ་པ་དག་གིས་སོ་སོའི་ཤིང་བཟོའི་ལག་ཤེས་ཆུ་ཚོད་གཅིག་རིང་སློབ་ཁྲིད་བྱེད་དགོས་ཀྱི་འདུག དེ་ལྟར་གཟའ་འཁོར་གཅིག་ནང་རྒྱལ་ཁབ་འདྲ་མིན་གྱི་ཤིང་བཟོའི་ལག་ཤེས་སློབ་ཁྲིད་དུས་ཚོད་ ༢༢ ཡོད་པ་རེད། ངས་ཁོ་ཚོར་བོད་པའི་སྲོལ་རྒྱུན་ཤིང་བརྐོས་རི་མོ་ཆོས་རྩ་དང་པདྨ། བཀྲ་ཤིས་རྟགས་བརྒྱད་སོགས་སློབ་ཁྲིད་བྱས་པ་ཡིན། ཤིང་ཚད་རྒྱག་སྟངས་དང་འབྲི་སྟངས་སོགས་འཇམ་བཟོའི་ལག་རྩལ་ཐད་ནས་ཡུ་རོབ་རྒྱལ་ཁབ་དེ་ཚོ་ཧ་ལས་པའི་མཁས་པོ་འདུག ཤིང་བརྐོས་རི་མོའི་ཕྱོགས་ནས་བོད་དང་ཧིན་དྷི་ཉི་ཞི་ཡཱ་གཉིས་ཡག་ཤོས་རེད། རྒྱ་མི་ལ་ཞེ་དྲག་ལག་ཤེས་རི་མོ་དེ་འདྲ་སློབ་རྒྱུ་དམིགས་བསལ་མི་འདུག རྗེས་ལ་རྒྱ་མིའི་ཤིང་བཟོ་ཁོ་རང་གཉའ་ཞུམ་སྟེ་ཕྱིར་རྒྱ་ནག་ཏུ་ལོག་སོང་།
དྲི་བ། ཁྱེད་རང་ཐོག་མར་བཟོ་གྲྭ་དེར་འབྲེལ་བ་ཇི་ལྟར་བྱུང་སོང་། དེ་གར་བོད་པའི་ཤིང་བརྐོས་ལག་རྩལ་ལ་བརྩི་མཐོང་ག་འདྲ་འདུག
ལན། དེ་སྔོན་བཟོ་གྲྭའི་མགོ་བ་དེས་ས་ཁུལ་ཁུག་ཀྱོག་ཏུ་ཡོད་པའི་ང་ཚོ་བོད་པའི་ཤིང་བརྐོས་ལག་ཤེས་པ་ས་ཆ་གང་སར་བཙལ་ཏེ། བཙན་བྱོལ་བོད་མིའི་སྒྲིག་འཛུགས་ཀྱི་བཀའ་ཤག་ལའང་ཐེངས་གཉིས་ལ་ཡི་གེ་བཏང་འདུག ཡིན་ནའང་། བཀའ་ཤག་གིས་བོད་ནང་ཤིང་བརྐོས་ལག་ཤེས་པ་མང་པོ་ཡོད་སྟབས། མི་གཅིག་གཏོང་ཐུབ་ཀྱི་མ་རེད་ཅེས་ལབ་ཡོད་ས་རེད། རྗེས་སུ་ཕྱི་རྒྱལ་བ་ཞིག་ང་དང་ཐུག་འཕྲད་ཀྱིས་ཁོས་ང་རང་བཟོ་གྲྭ་དེར་ཕར་མགྲོན་འབོད་ཞུས་པ་རེད། ཁོ་ཚོས་དོ་སྣང་བསླེབ་དོན་གཙོ་བོ་དེ་ནི། ༸གོང་ས་མཆོག་གིས་ནམ་རྒྱུན་ང་ཚོས་ཆོས་དང་རིག་གཞུང་བདག་པོ་རྒྱག་གི་ཡིན་གསུང་བཞིན་ཡོད་པར་བརྟེན། བཙན་བྱོལ་ནང་ཡོད་པའི་བོད་མི་ཚོས་བོད་པའི་སྲོལ་རྒྱུན་ཤིང་བརྐོས་རི་མོ་གཙང་མ་ཉར་ཡོད་པར་ཡིད་ཆེས་བྱེད་ཀྱི་འདུག དང་ཐོག་ང་རང་ཕར་བསླེབས་རྗེས་སོ་སོའི་ཤིང་བརྐོས་རི་མོའི་པར་རྣམས་བཟོ་གྲྭའི་འབྲེལ་ཡོད་མི་སྣར་བསྟན་སྐབས། ང་ཚོ་དྷ་རམ་ས་ལ་ཁུག་ཀྱོག་ནང་འདི་འདྲའི་ལས་ཀ་བྱེད་ཀྱིན་ཡོད་པར་ཁོང་ཚོ་ཧང་སང་གི་འདུག ང་རང་ཁེ་ན་ཌར་བསྡད་ཡུན་རིང་བརྐོས་རིས་ཅན་གྱི་གདན་ཁྲི་ཆེན་པོ་ཞིག་བཟོས་བ་ཡིན། ཁོ་ཚོའི་དམིགས་ཡུལ་ནི་འཛམ་གླིང་རྒྱལ་ཁབ་སོ་སོའི་ལག་ཤེས་ཅ་དངོས་རྣམས་རྒྱལ་ཁང་དེ་འདྲའི་ནང་བཞག་སྟེ་འགྲེམས་སྟོན་བྱེད་རྒྱུ་དེ་རེད། ཁེ་ན་ཌ་དང་ཕྱིའི་རྒྱལ་ཁབ་དག་གི་ནང་ཤིང་བརྐོས་ལག་རྩལ་རྙིང་པ་དེ་འདྲ་ཞེ་དྲག་མི་འདུག
དྲི་བ། བོད་པའི་སྲོལ་རྒྱུན་ཤིང་བརྐོས་རི་མོ་འཚོལ་བསྡུ་ཆེད། ཁྱེད་རང་བོད་ནང་ཐེངས་འགར་ཕྱིན་ཡོད་འདུག ད་ལྟའི་ཆར་བོད་ནང་ཤིང་བརྐོས་རིག་གནས་ཀྱི་གནས་སྟངས་ག་འདྲ་ཆགས་འདུག
ལན། ༢༠༠༨ ལོར་ང་རང་བོད་ནང་ཕྱིན་པ་ཡིན། ཁེ་ན་ཌར་མ་སོང་སྔོན་ཏེ་ ༢༠༡༠ ལོའི་ལོ་མཇུག་ཙམ་ལ་བསྐྱར་དུ་ཐེངས་གཅིག་ཕྱིན་པ་ཡིན། ལྷ་ས་དང་ཁམས་རྒྱལ་ཐང་གཙོས་པའི་བོད་ནང་ཤིང་བརྐོས་ལག་རྩལ་ཡོད་ས་ཚང་མར་ལྟ་རུ་སོང་བ་ཡིན། བོད་ནང་སོ་སོའི་སྲོལ་རྒྱུན་གྱི་ཤིང་བརྐོས་ལག་རྩལ་ངོ་མ་དེ་ད་ལྟ་ཧ་ལམ་ལྷག་མི་འདུག ང་ཚོའི་ཕ་ཡུལ་དུ་ཤིང་བརྐོས་སྦྱིན་བདག་དང་དགེ་རྒན་བོད་པ་རེ་ཟུང་མ་གཏོགས་ཤིང་བརྐོས་ལས་ཀ་བྱེད་མཁན་ཕལ་ཆེ་བ་རྒྱ་མི་རེད། ཤིང་བརྐོས་རི་མོ་ཡོད་ཚད་ཕར་དཀྲུག་ཚུར་དཀྲུག་བཏང་སྟེ། བོད་པའི་སྲོལ་རྒྱུན་ཤིང་བརྐོས་རི་མོ་བརྒྱ་ཆ་ ༢༠ ཙམ་མ་གཏོགས་བརྒྱ་ཆ་ ༨༠ ཙམ་རྒྱ་མིའི་རི་མོ་ཆགས་འདུག ང་ཚོ་བཙན་བྱོལ་དུ་ཡོད་པའི་ནོར་བུ་གླིང་གའི་ཤིང་བརྐོས་རི་མོ་ནི་ལྷ་སའི་ཤིང་བརྐོས་རི་མོའི་རྒྱུན་རེད། ཉེ་སྔོན་ང་རང་ལྷ་སར་ཕྱིན་སྐབས་ལྷ་སའི་ནང་དུའང་ཤིང་བཟོས་ལས་ཀ་བྱེད་མཁན་ཕལ་ཆེ་བ་རྒྱ་མི་རེད། ལྷ་སར་ཡང་ཧ་ལམ་བོད་རང་གི་སྲོལ་རྒྱུན་ཤིང་བརྐོས་རི་མོ་བརྒྱ་ཆ་ ༥༠ ཙམ་མ་གཏོགས་ལྷག་མི་འདུག སྔོན་ཆད་རྒྱལ་ཐང་གི་ཤིང་བརྐོས་ཅ་ལག་མང་པོ་འབྲུག་ཆུ་ཕྱོགས་སུ་ཡར་སླེབ་ཀྱིན་ཡོད་པ་དང་། རྒྱལ་ཐང་ཕྱོགས་ཀྱི་བོད་པའི་དགོན་སྡེ་ཁག་གི་ཀ་བ་དང་ཁང་པའི་བརྐོས་རིས་མང་པོ་ཞིག་འབྲུག་ཆུ་རུ་བཟོ་བཞིན་འདུག དེ་སྔོན་ཁོ་ཚོའི་ལུང་པའི་ཤིང་བརྐོས་རི་མོ་ག་འདྲ་ཡོད་མེད་ང་ལ་གསལ་ཆ་མེད་སྟབས། དེ་གར་འགྱུར་བ་ག་ཚོད་ཕྱིན་ཡོད་མེད་བརྗོད་ཐུབ་ཀྱི་མི་འདུག ས་ཁུལ་གཞན་དང་བསྡུར་ན་ལྷ་སར་བོད་པའི་ཤིང་བརྐོས་རི་མོའི་རྒྱུ་ཆ་ཏོག་ཙམ་མང་པོ་འདུག ཡིན་ནའང་བོད་ནང་གི་ས་ཆ་གང་སར་བོད་པའི་སྲོལ་རྒྱུན་ཤིང་བརྐོས་རིག་གཞུང་གཙང་མ་ཞིག་ལྷག་མི་འདུག
དྲི་བ། ཁྱོད་ཀྱི་ཕ་ཡུལ་རྒྱལ་ཐང་ལ་མཚོན་ན། སྔོན་དང་བསྡུར་ན་སྤྱི་ཚོགས་ཁྱོན་ཡོངས་ལ་འགྱུར་བ་ག་རེ་ཐེབས་འདུག
ལན། སྤྱིར་བོད་ནང་དུ་དཔལ་འབྱོར་ཡར་རྒྱས་གང་འཚམ་ཕྱིན་འདུག ལྷག་པར་དུ་རྒྱལ་ཐང་དུ་ཡར་རྒྱས་ཞེ་དྲག་ཕྱིན་འདུག ཡིན་ནའང་། ང་ཚོའི་ལུང་པར་མཚོན་ན། བོད་མི་རིགས་ཀྱི་ཡུལ་གོམས་གཤིས་ལུགས་ཡོངས་རྫོགས་འགྱུར་ཚར་ཡོད་པ་དང་། སོ་སོའི་སྐད་དང་ཡི་གེ་ཕལ་ཆེ་བ་བརླག་ཚར་འདུག ཐ་ན་ཁང་པའི་བཟོ་དབྱིབས་ཆ་ཚང་འགྱུར་ཚར་འདུག སྔོན་ཆད་ང་ཚོའི་ལུང་པའི་ནང་མི་མང་ཤོས་ཤིང་བཟོ་རེད། སློབ་གྲྭར་བསྐྱོད་མ་ཐུབ་པའི་ལོ་ ༡༤ ནས་ ༡༥ བར་གྱི་བྱིས་པ་ཕལ་ཆེ་བས་ཤིང་བཟོ་སྦྱོང་གི་རེད། ཤིང་བཟོའི་ལག་ཤེས་ཧ་ཅང་དར་ཁྱབ་ཆེན་པོ་ཡོད། དེང་སྐབས་གཞོན་སྐྱེས་མང་ཆེ་བས་རླངས་འཁོར་སྐོར་བ་དང་ཚོང་ཙག་ཙིག་བརྒྱབ་སྟེ། སོ་སོའི་ཤིང་བརྐོས་ལག་ཤེས་ཀྱི་ཐོག་ནས་དཔལ་འབྱོར་འཚོལ་སྒྲུབ་བྱེད་མཁན་ཧ་ཅང་ཉུང་ཉུང་རེད། བོད་ནང་ཆང་ཁང་དང་། ཞབས་བྲོ་ཁང་མང་པོ་ཡོད་སྟབས། གཞོན་སྐྱེས་མང་པོ་ཞིག་འཕྲོ་བརླག་ལ་འགྲོ་བཞིན་འདུག ང་ཚོའི་ཕ་ཡུལ་རྒྱལ་ཐང་རྫོང་ནས་མར་སྤྱི་ལེ་ ༨༠ ཕྱིན་ན་རྒྱ་བོད་ས་མཚམས་ལ་ཁེལ་ཡོད་པ་རེད། དེ་གར་རྡོ་ཕ་བོང་ཆེན་པོ་ཞིག་ཡོད་པ་དེའི་མདུན་ངོས་སུ། བོད་ཡིག་ཐོག་བོད་ཀྱི་ས་ཆ་ཡིན་ཞེས་བརྐོས་ཡོད་པ་དང་། རྒྱབ་ལོགས་སུ་རྒྱ་ཡིག་ཐོག་རྒྱའི་ས་ཆ་ཡིན་ཞེས་བརྐོས་ཡོད་ཀྱང་། ད་ལྟ་ཕ་བོང་ཆེན་པོ་དེའི་ངོས་ཀྱི་བོད་ཡིག་རྣམས་གཙབས་ཏེ་མེད་པ་བཟོས་ཚར་འདུག
དྲི་བ། ད་ལྟའི་བར་དུ་ཁྱེད་ཀྱིས་བོད་པའི་ཤིང་བརྐོས་ལག་ཤེས་ཐད་དགེ་ཕྲུག་ག་ཚོད་ཅིག་སྐྱེད་སྲིང་བྱས་ཡོད་དམ།
ལན། དྷ་རམ་ས་ལར་བོད་ཀྱི་ལྷ་ཤིང་བཟོ་གྲྭ་བཙུགས་ཏེ་བཙན་བྱོལ་ནང་ལོ་ ༡༥ ལྷག་ལ་ཤིང་བརྐོས་ལས་ཀ་བྱས་པའི་རིང་མིང་ཐོ་ཡོད་པའི་དགེ་ཕྲུག་ ༥༦ ལ་བོད་པའི་སྲོལ་རྒྱུན་ཤིང་བརྐོས་ལག་ཤེས་བསླབས་ཡོད། དེའི་ནང་མི་ཁ་ཤས་ཀྱིས་ལོ་ ༣ དང་ཁ་ཤས་ཀྱིས་ལོ་ ༥ ། ཡང་ཟླ་བ་འགའ་རེར་སྦྱངས་རྗེས་ཕྱིན་འགྲོ་བ་ཁ་ཤས་འདུག དེ་དག་ཁྲོད་ནས་མི་ ༣༠ ལྷག་གིས་ད་ལྟ་སོ་སོའི་ངོས་ནས་ཤིང་བཟོའི་ལས་ཀ་གཉེར་བཞིན་ཡོད་ལ། ཨ་རི་དང་ཡུ་རོབ་སོགས་སུ་ཕྱིན་ཏེ་ཤིང་བཟོའི་ལས་ཀ་བྱེད་མཁན་ཡང་འགའ་ཤས་ཡོད། ཕྱིར་བོད་ནང་ཕྱིན་པ་རེ་ཟུང་ཡོད། གང་ལྟར་མང་ཆེ་བ་སོ་སོའི་རྐང་པའི་ཁར་ལངས་ཏེ་ཤིང་བརྐོས་ལག་རྩལ་ལ་བརྟེན་ནས་འཚོ་བ་རོལ་བཞིན་འདུག སྤྱིར་བཏང་ལག་ཤེས་ཡོད་མཁན་ཞིག་ཡིན་ན། འཛམ་གླིང་ས་ཕྱོགས་གང་དུ་ཕྱིན་ཡང་སོ་སོའི་ལྟོ་གོས་མ་རག་པའི་དཀའ་ངལ་ཁྱོན་ནས་ཡོད་པ་མ་རེད། ལག་ཤེས་ཡག་པོ་ཞིག་སྦྱངས་ཚར་བའི་རྗེས་ལ་མ་མཐར་ཡང་སོ་སོའི་མི་ཚེ་ཡག་ཐག་ཆོད་འཁྱོལ་འགྲོ་བ་རེད།
དྲི་བ། བཙན་བྱོལ་སྤྱི་ཚོགས་ནང་བོད་མི་གཞོན་སྐྱེས་ལས་མེད་མང་པོ་ཞིག་ཡོད་པ་རེད། ཡིན་ནའང་ལག་ཤེས་སྦྱོང་མཁན་མང་པོ་མེད་པ་དེའི་ཐད་གཟིགས་ཚུལ་ག་རེད་ཡོད།
ལན། ང་ཚོས་ནམ་རྒྱུན་བོད་ཡིག་གི་ལྟོ་རག་གི་མ་རེད། ལག་ཤེས་སྦྱང་ནས་ཆོ་ཡོད་པ་མ་རེད་ལབ་ནས་སོ་སོའི་རིག་གཞུང་ལ་དོ་སྣང་མ་སྤྲད་པར་གཡུགས་བཞག་ན། རིམ་པས་རང་ཉིད་ཀྱི་རིག་གཞུང་བརླག་འགྲོ་རྒྱུ་རེད། ལག་ཤེས་མཐའ་འཁྱོལ་བ་ཞིག་སྦྱངས་ཚར་བའི་རྗེས་ལ། སྒོར་མོ་འབུམ་བཅུ་གྲངས་རེ་སྤྲད་དེ་ཨ་རི་དང་ཕྱི་རྒྱལ་ཁག་ལ་སྐྱོད་དགོས་ཀྱི་ཡོད་པ་མ་རེད། དཔེར་ན་ང་ལྟ་བུ་ཞིག་ལ་ཆ་བཞག་ན་ཕྱིའི་རྒྱལ་ཁབ་དེ་ཚོས་ཕར་ཡོང་རོགས་ཞེས་ཚུར་མགྲོན་འབོད་བྱས་ཡོང་གི་འདུག བཙན་བྱོལ་ནང་བོད་པའི་གཞོན་སྐྱེས་མང་པོ་ལས་མེད་དུ་ལྷག་ཡོད་པ་དང་། འགའ་རེས་དགུན་ཚོང་ལ་འགྲོ་བཞིན་ཡོད། ཡང་རེ་ཟུང་ཁྲོམ་ལ་འཁྱམས་ནས་མི་ཚེ་འཕྲོ་བརླག་ཏུ་གཏོང་བཞིན་ཡོད། འཛམ་གླིང་གང་སར་མཐོ་སློབ་ཏུ་ཡིག་ཚད་མ་ལོན་མཁན་ཁྲི་སྟོང་མང་པོ་ཡོད་པ་རེད། ཡིན་ནའང་། ལག་ཤེས་སྦྱོང་མ་ཐུབ་མཁན་གཅིག་ཀྱང་ཡོད་པ་མ་རེད། ཐོག་མར་སྦྱོང་སྐབས་ཀྱི་ལོ་གཉིས་གསུམ་རིང་ཡོང་འབབ་ཆེན་པོ་མེད་ཀྱང་། ལག་ཤེས་མཐར་ཕྱིན་པ་ཞིག་སྦྱངས་ཚར་རྗེས། འཛམ་གླིང་གང་དུ་ཕྱིན་ཡང་མི་ཚེ་འཁྱོལ་མ་ཐུབ་པའི་དཀའ་ངལ་ཡོང་མི་སྲིད་པ་ཞིག་རེད། ཕྱོགས་གཞན་ཞིག་ནས་སོ་སོ་རང་ཉིད་ཀྱི་རིག་གཞུང་ལའང་རང་བཞིན་གྱིས་བདག་པོ་བརྒྱབ་སྟེ་རྒྱུན་འཛིན་གནང་ཐུབ་ཀྱི་རེད། དེར་བརྟེན། གཞོན་སྐྱེས་ཡིག་ཚད་མ་ལོན་མཁན་ཚོས་ལག་ཤེས་ཐོག་རིག་གཅིག་རྐང་འཛིན་བྱ་རྒྱུར་འབོད་སྐུལ་ཞུ་བཞིན་ཡོད།
དྲི་བ། ཤིང་བརྐོས་གཙོས་བོད་པའི་སྲོལ་རྒྱུན་ལག་ཤེས་དར་སྤེལ་རྒྱུན་འཛིན་ཐད། བོད་མིའི་སྒྲིག་འཛུགས་ཀྱི་ངོས་ནས་ལྟ་རྟོག་རོགས་སྐྱོར་གནང་དགོས་པ་ག་རེ་མཐོང་གི་འདུག
ལན། སྔོན་ཆད་ང་ཚོས་དཔེ་མཛོད་དུ་ཤིང་བཟོ་སྦྱངས་སྐབས། ཤེས་རིག་ལས་ཁུངས་ཀྱི་ངོས་ནས་ལག་ཤེས་སྦྱོང་མཁན་མི་རེར་ཧིན་སྒོར་ ༡༠༠༠ རོགས་དངུལ་སྤྲོད་ཀྱིན་ཡོད་པ་རེད། རྗེས་ལ་ང་ཚོ་མཐར་ཕྱིན་ཏེ་ཤིང་བརྐོས་དགེ་རྒན་ཆགས་སྐབས། ང་ཚོའི་དགེ་ཕྲུག་ཚོར་སློབ་ཡོན་དེ་མེད་པ་བཟོས་པ་རེད། ནོར་གླིང་དུ་དགེ་ཕྲུག་ཉར་རྒྱུ་དང་ལག་ཤེས་སྤྲོད་པའི་ཐད་དུས་བཅད་དང་འགྲོ་སྟངས་ཤིག་ཡོད་ས་རེད། དེ་མ་གཏོགས་གཞན་པའི་ཤིང་བརྐོས་ལག་ཤེས་སྦྱོང་མཁན་དགེ་ཕྲུག་ཚོར་གཞུང་གིས་རོགས་རམ་དེ་འདྲ་ཡོད་པ་མ་རེད། རྡེ་ར་རྡུན་དུ་བོད་ཁྱིམ་ལག་ཤེས་སློབ་གྲྭར་ཤིང་ལས་འཇམ་བཟོ་སྦྱངས་ཚར་རྗེས་ང་ཚོའི་ལྷ་ཤིང་བཟོ་གྲྭར་ཡོང་སྟེ་བརྐོས་རིས་སྦྱོང་མཁན་དེ་འདྲ་ཡོང་གི་འདུག ངས་བསམ་ན་ནོར་གླིང་གཅིག་པུའི་ཤིང་བཟོར་བལྟས་བསྡད་པ་ཡིན་ན། རྒྱ་གར་ནང་ང་ཚོའི་རིག་གཞུང་ཕལ་ཆེར་ལོ་རེ་བཞིན་ཉམས་ཆག་ལ་འགྲོ་རྒྱུ་ལས་ཁྱབ་བརྡལ་ལ་འགྲོ་ཐུབ་རྒྱུ་མ་རེད། འགྲོ་ཐབས་འདུག་ཐབས་ཙམ་གྱི་ལག་ཤེས་སློབ་གཉེར་གྱིས་སོ་སོའི་ལྟོ་གོས་འགྲིག་ཙམ་ཞིག་མ་གཏོགས། བོད་པའི་རིག་གཞུང་མི་ཉམས་རྒྱུན་འཛིན་དང་རྐང་ཚུགས་ཐུབ་པ་ཞིག་བདག་པོ་རྒྱག་ཐུབ་ཀྱི་མ་རེད། བོད་མིའི་སྒྲིག་འཛུགས་ཀྱི་ངོས་ནས་བོད་པའི་སྲོལ་རྒྱུན་ལག་ཤེས་འདྲ་མིན་གྱི་དགེ་རྒན་ཚད་དང་ལྡན་པ་གོ་སྒྲིག་གནང་སྟེ། ལག་ཤེས་ཀྱི་དགེ་ཕྲུག་རིགས་གཅིག་རྐང་འཛིན་ཐོན་ཐུབ་པ་བྱ་རྒྱུ་དང་། བོད་པའི་སྲོལ་རྒྱུན་ལག་ཤེས་བཟོ་གྲྭ་སོགས་རྒྱ་སྐྱེད་དང་། འཛམ་གླིང་རྒྱལ་ཁབ་ཁག་ནང་བོད་པའི་ལག་ཤེས་ཐོན་རྫས་ཀྱི་ཚོང་ཁང་བཙུགས་ཏེ། རིག་གནས་ཚོང་རའི་གཞི་རྐང་བརྟན་པོ་ཞིག་འཛུགས་རྒྱུར་བསམ་བློ་གཏོང་དགོས་ཀྱི་འདུག ད་ལྟའི་ཆར་ང་ཚོར་སོ་སོའི་རིག་གནས་ཐོན་དངོས་ཀྱི་ཐོག་ནས་དཔལ་འབྱོར་འཚོལ་སྒྲུབ་ཐུབ་མཁན་སྨན་རྩིས་ཁང་གཅིག་པུ་རེད། མ་འོངས་རིག་གནས་ལག་ཤེས་གཞན་པའི་ཐད་ནས་ཀྱང་དཔལ་འབྱོར་འཚོལ་སྒྲུབ་བྱ་ཐུབ་པ་ཡིན་ན། གཞོན་སྐྱེས་མང་པོར་ལས་ཀ་རག་གི་རེད་ལ་གཞུང་གི་དཔལ་འབྱོར་ཐོག་ཏུ་འང་ཏན་ཏན་ཕན་ཐོགས་ཡོང་གི་རེད།
དྲི་བ། མ་འོངས་པར་བོད་པའི་ཤིང་བརྐོས་རིག་གནས་ཐོག་ལས་འཆར་གསར་པ་དེ་འདྲ་ཡོད་དམ།
ལན། ང་རང་ཁེ་ཎ་ཌར་ཡུན་རིང་པོ་འདུག་རྒྱུའི་དམིགས་ཡུལ་མེད། ད་ལྟ་ལོ་གསུམ་བཞི་ཞིག་ལ་ཁོ་ཚོར་བོད་པའི་ཤིང་བརྐོས་རི་མོ་སློབ་དགོས་ཀྱི་ཡོད་པ་རེད། ལས་ཀ་དེ་ཚར་བའི་རྗེས་ལ་ང་རང་ཕར་རྒྱལ་ཐང་ལ་ལོག་སྟེ། རང་ཉིད་ཀྱིས་མི་ཚེ་གཅིག་ནང་སྦྱངས་བརྩོན་དང་འཚོལ་བསྡུ་བྱས་པའི་བོད་པའི་སྲོལ་རྒྱུན་ཤིང་བརྐོས་རི་མོ་ཡོངས་རྫོགས་ཉར་ཚགས་བྱས་ཏེ། རྒྱལ་ཐང་དུ་བོད་པའི་སྲོལ་རྒྱུན་ཤིང་བཟོའི་ལག་རྩལ་བརྐོས་རིས་འགྲེམས་སྟོན་ཁང་ཞིག་འཛུགས་དགོས་བསམ་ཡོད། འགྲེམས་སྟོན་ཁང་འཛུགས་རྒྱུ་དེ་ངའི་མི་ཚེ་ནང་ཡིན་གཅིག་མིན་གཅིག་འགྲུབ་ཐུབ་པ་བྱ་རྒྱུ་ཡིན། ང་ཚོས་ནམ་རྒྱུན་ཆོས་དང་རིག་གཞུང་བདག་པོ་རྒྱག་གི་ཡིན་ལབ་བསྡད་ཡོད་པ་རེད། ཚང་མ་ཕྱི་རྒྱལ་ལུང་པར་ཕྱིན་ཏེ་སོ་སོའི་ཆོས་དང་རིག་གཞུང་བརླག་ཚར་ན་ཆོ་གང་ཡང་མི་འདུག ཆོས་དང་རིག་གཞུང་བདག་པོ་རྒྱག་རྒྱུ་ཡིན་ན། སོ་སོའི་ལུང་པའི་ནང་སྟོན་ཐུབ་པ་བྱེད་དགོས་པ་རེད། དེ་མ་གཏོཊ་ལག་ཤེས་པ་རྒན་པ་རྣམས་རེ་རེ་བཞིན་གྲོངས་ཚར་རྗེས། ལག་ཤེས་རིག་གནས་ཀྱང་རིམ་པས་རྫོཊ་འགྲོ་བ་རེད།
གསར་འགོད་པ། ཚེ་རིང་རྒྱལ།
༼བོད་
་་་་ ཤིང་ཚད་རྒྱག་སྟངས་དང་འབྲི་སྟངས་སོགས་འཇམ་བཟོའི་ལག་རྩལ་ཐད་ནས་ཡུ་རོབ་རྒྱལ་ཁབ་དེ་ཚོ་ཧ་ལས་པའི་མཁས་པོ་འདུག ཤིང་བརྐོས་རི་མོའི་ཕྱོགས་ནས་བོད་དང་ཧིན་དྷི་ཉི་ཞི་ཡཱ་གཉིས་ཡག་ཤོས་རེད། རྒྱ་མི་ལ་ཞེ་དྲག་ལག་ཤེས་རི་མོ་དེ་འདྲ་སློབ་རྒྱུ་དམིགས་བསལ་མི་འདུག རྗེས་ལ་རྒྱ་མིའི་ཤིང་བཟོ་ཁོ་རང་གཉའ་ཞུམ་སྟེ་ཕྱིར་རྒྱ་ནག་ཏུ་ལོག་སོང་། ཟེར།