སྦྲ་སོག་འབྲི་གསུམ་སྐྱིད་སྡུག་ཚོགས་པའི་ཚོགས་གཙོ་ངག་དབང་ཐར་པ་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། ཟླ་འདིའི་ཕྱི་ཚེས་ ༢༥ ཉིན་ཁམས་འབྲི་རུ་རྫོང་ནག་རོག་ཕམ་པ་གྲོང་ཚོའི་རང་ལོ་ ༢༠ ཡིན་པའི་ཚེ་སྤོ་དང་། རང་ལོ་ ༢༥ ཡིན་པའི་བསྟན་འཛིན་གཉིས་ཀྱིས། ནག་རོག་ཕམ་པ་གྲོང་ཚོའི་རུ་ཁག་གཉིས་པའི་སློབ་གྲྭའི་ཉེ་འགྲམ་དུ་རང་ལུས་མེར་བསྲེཊ་ཀྱིས་ “ བོད་རང་བཙན་ཡིན།༸རྒྱལ་བ་རིན་པོ་ཆེ་བོད་ལ་ཕེབས་འཇུག་དགོས། བོད་མི་ཚང་མ་སྤུན་མཆེད་ལྟར་ཆིག་སྒྲིལ་གནང་རོགས” ཞེས་རྒྱ་གཞུང་ལ་ངོ་རྒོལ་སྐད་འབོད་བྱས་ཏེ། ཚེ་སྤོ་ལགས་སྐབས་དེར་སྐུ་གྲོངས་ཡོད་འདུག
ཁོང་གཉིས་ནི། བོད་རང་སྐྱོང་ལྗོངས་འབྲི་རུ་རྫོང་ཁོངས་སུ་གཏོགས་པའི་ནག་རོག་ཕམ་པ་གྲོང་སྡེ་ནས་ཡིན་པ་དང་། ནག་རོག་ནི་ནག་བུག་སེར་གསུམ་ནང་ཚན་ནགས་ཤོད་ཚོ་དགུའི་ཚོ་ཆུང་གསུམ་ཟེར་བ་དེའི་ཡ་གྱལ་ཞིག་ཡིན་འདུག
རྒྱལ་གཅེས་དཔའ་བོ་ཚེ་སྤོ་ལགས་ཀྱི་ཕ་མིང་ལ་བུ་ཆུང་དང་མ་མིང་ལ་དགའ་དགའ་འབོད་ཀྱི་ཡོད་པ་དང་། བསྟན་འཛིན་ལགས་ཀྱི་ཕ་མིང་ལ་ཉི་མ་དང་མ་མིང་ལ་ལུགས་དགེ་འབོད་ཀྱི་ཡོད་འདུག ཁོང་ ༢༠༠༨ ལོར་བཙན་བྱོལ་དུ་ཡོང་རྗེས་སུ་ཇཱ་བོད་ཁྱིམ་དུ་ཟླ་ ༦ ཙམ་རིང་སྡོད་མྱོང་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། རྒྱ་གཞུང་གིས་ ༢༠༠༨ ལོ་ནས་བཟུང་འབྲི་རུ་རྫོང་དུ་དམག་མི་འགྲེམས་འཇོག་གིས་དམ་དྲག་བྱེད་ཀྱིན་པ་མ་ཟད། ཉེ་ལམ་རང་ལུས་མེར་བསྲེཊ་ཀྱི་གནས་ཚུལ་བྱུང་རྗེས་ནག་རོག་ས་ཁུལ་དུ་དམག་མི་འགྲེམས་འཇོག་གིས་དམ་དྲག་དང་། ས་གནས་ཀྱི་ཁ་པར་དང་བརྒྱུད་ལམ་ཡོངས་རྫོགས་བཀག་སྡོམ། ས་གནས་བོད་མིའི་ལག་ནས་གང་བྱུང་ཁ་པར་སོགས་བཙན་འཕྲོག་དང་འཛིན་བཟུང་བྱེད་ཀྱི་ཡོད་འདུག
གསར་འགོད་པ། དོན་གོ
རྒྱལ་གཅེས་དཔའ་བོ་ཚེ་སྤོ་ལགས་དང་བསྟན་འཛིན་ལགས་གཉིས་ཀྱི་སྐུ་མཆེད་ཁ་ཤས་ཀྱི་བདག་ལ་ལན་མང་པོ་བསྐུར་གནས་སོང། ཁོང་གཉིས་སྐུ་གྲོངས་སྐབས་འདྲ་པར་སོགས་བརྒྱབས་ཐུབ་མི་འདུག་པས་འདྲ་པར་གཏོང་ཐུབ་ཀྱིས་མི་འདུག ལྷག་པར་དེང་སྐབས་སུ་གནས་སྟངས་ཧ་ཅང་ཛ་དྲགས་ཡོད་ཙང་པར་ཚང་མ་བཀག་འདུག འོན་ཀྱང་ཁག་གཅིག་གིས་སྐབས་བབ་འཚོལ་ནས་(ནག་རོག་ནི་ནག་བུག་སེར་གསུམ་ནང་ཚན་ནགས་ཤོད་ཚོ་དགུའི་ཚོ་ཆུང་གསུམ་ཟེར་བའི་ཡ་གྱལ་ཞིག་ཡིན་)ཞེས་བཀོད་འདུག་པའི་གནད་དོན་འདི་ནི་སྔོན་ནས་རྩོད་གཞི་ཞིག་ཡིན་པས་མ་འགོད་རོགས། ཁོང་རྣམ་པ་གཉིས་ནི་བོད་བསྟན་སྲིད་ཀྱི་ཆེད་དུ་རང་ཡིན་པ་ལས་སྐབས་བབ་དང་མི་མཚམས་པའི་ཁོངས་གཏོགས་དེ་ཕྱིར་བསྡུ་གནང་རོགས་ཞེས་ཁོང་རྣམ་པ་གཉིས་ཀྱི་སྤུན་མཆེད་འགས་རེ་དོན་འདི་དུས་བབ་ལ་གཏོང་རོགས་གསུངས་པ་བཞིན་བདག་གིས་འདིར་བཀོད་པ་ཡིན།
ཨ་དཀོན་མཆོག་མཁྱེན།
ཡིན་རུང་བོད་མི་བྱིང་དང་འཛམ་གླེང་མི་དམངས་སྤྱི་ཡོངས་ནས་འདིའི་ཐད་རིམ་གྱིས་ཚོར་སྣང་རླག་འགྲོ་གི་ཡོད་པའི་ངན་ལྟས་ཤིག་མཐོང་གི་འདུག
ཚང་མས་ཐུགས་བསམ་ཞིབ་མོ་བཞེས་རོགས། ཚང་མས་རང་ཐོག་ལ་བྱུང་ཅི་འདྲ་རེད་བསམ་བློ་གཏོང་རོགས།།