གཟའ་ཉི་མའི་ཉིན་ཝ་ཎ་དབུས་བོད་ཀྱི་གཙུག་ལག་སློབ་གཉེར་ཁང་དུ་ཤེས་རིག་ལས་ཁུངས་ཀྱི་གོ་སྒྲིག་འོག སྒྲིག་ཞུགས་མ་ཡིན་པའི་ཉམས་ཞིབ་པ་ཚོར་ཉིན་བརྒྱད་རིང་། ཉམས་ཞིབ་དང་འབྲེལ་བའི་ཟབ་སྦྱོང་ཞིག་མགོ་འཛུགས་བྱས་ཡོད།
ཁ་སང་ཕྱི་ཚེས་ ༢༨ ཉིན་གྱི་ཞོགས་པ་ཆུ་ཚོད་ ༩ སྟེང་ཝ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་མགོན་མེད་ཟས་སྦྱིན་མགྲོན་ཁང་གི་ཚོམས་ཆེན་ནང་། དབུས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གོ་སྒྲིག་འོག སྒྲིག་ཞུགས་མ་ཡིན་པའི་ཉམས་ཞིབ་སློབ་མ་ཚོར་ཉིན་བརྒྱད་རིང་ཉམས་ཞིབ་ཐབས་ལམ་སྐོར་གྱི་ཟབ་སྦྱོང་ཐེངས་དང་པོ་མགོ་འཛུགས་བྱས་ཡོད་པ་དང་། ཟབ་སྦྱོང་དབུ་དབྱེད་མཛད་སྒོའི་སྐུ་མགྲོན་གཙོ་བོར་ཝ་ཎ་གཙུག་ལག་སློབ་གཉེར་ཁང་གི་རྒྱལ་རབས་སློབ་དཔོན་བྱམས་པ་བསམ་གཏན་ལགས་གཙོས། ཟབ་སྦྱོང་སྤྲོད་མཁན་དང་ཉམས་ཞིབ་པ་རྣམས་བཅས་མཉམ་ཞུགས་བྱས་ཡོད།
མཛད་སྒོའི་ཐོག་མར་ཤེས་རིག་ལས་ཁུངས་ཀྱི་ཤེས་ཡོན་འགན་འཛིན་ཚེ་རིང་བསམ་འགྲུབ་ལགས་ཀྱིས་ཟབ་སྦྱོང་གི་དམིགས་ཡུལ་དང་ལས་གཞི་ངོ་སྤྲོད་གནང་དོན། དྲུག་ཅུ་རེ་གྲངས་ནས་འདས་པའི་ལོ་ ༥༠ ལྷག་གི་རིང་བཙན་བྱོལ་བོད་མི་ཚོས་ཤེས་ཡོན་ཐད་ཤུགས་སྣོན་བརྒྱབ་ཡོད་ཀྱང་། འཛམ་གླིང་གི་མཁས་པའི་གྲལ་དུ་ཐོན་མཁན་དཀོན་སྟབས། ༸གོང་ས་མཆོག་གིས་རིགས་གཅིག་རྐང་འཛིན་པ་གསོ་སྐྱོང་བྱ་དགོས་པའི་བཀའ་སློབ་ནན་མོ་བསྩལ་པ་ལྟར། སྤྱི་འཐུས་ལྷན་ཁང་དང་ཤེས་རིག་ལས་ཁུངས་གཉིས་ཀྱིས་ཞིབ་འཇུག་བྱས་པ་བརྒྱུད། ༢༠༠༤ ནས་དགའ་ལྡན་ཕོ་བྲང་ཡིག་ཚང་གི་སློབ་ཡོན་བརྒྱུད་ཤེས་རིག་ལས་ཁུངས་ཀྱིས་རིགས་གཅིག་རྐང་འཛིན་ཉམས་ཞིབ་ཀྱི་ལས་གཞི་མགོ་འཛུགས་བྱས་ཏེ། ད་སྔ་བོད་པའི་ཆོས་རིག་དང་འབྲེལ་བའི་བརྗོད་གཞིའི་ཐོག་ལོ་གསུམ་རེར་ཉམས་ཞིབ་གནང་མཁན་ ༣༤ བྱུང་ཡོད་སྐོར་དང་། ད་ལྟའི་བཀའ་ཤག་གིས་ཆེད་ལས་པ་གྲངས་ངེས་ཅན་ཞིག་གསོ་སྐྱོང་བྱ་འཆར་ཡོད་པ་བརྗོད་ཡོད་པ་ལྟར། ཉམས་ཞིབ་ཀྱི་ལས་གཞི་འདི་ཤེས་རིག་གི་སློབ་ཡོན་ཚན་པའི་ནང་ལས་དོན་གལ་ཆེ་ཤོས་གྲས་ཡིན་ལ། སྒྲིག་ཞུགས་མ་ཡིན་པའི་ཉམས་ཞིབ་འདི་བོད་ནས་རྒྱ་གར་དུ་འབྱོར་རྗེས་རང་སྦྱོང་ངམ་ཤེས་ཡོན་གྱི་ཚད་གཞི་ཡག་པོ་དང་ཉམས་ཞིབ་ཀྱི་ནུས་པ་ཡོད་ཀྱང་། རྒྱ་གར་གྱི་མཐོ་སློབ་སོགས་ལ་འགྲོ་བའི་ཆ་རྐྱེན་མེད་པར་བསྐྱོད་མ་ཐུབ་པ་ཚོར་ཆེད་དུ་དམིགས་པ་ཞིག་ཡིན་པ་དང་། ཐེངས་འདིའི་ཉམས་ཞིབ་པ་ཚོའི་རྩོམ་ཤོག་རྣམས་དེང་རབས་ཀྱི་ཉམས་ཞིབ་རེ་ཡོང་རྒྱུར་རེ་བ་བཞིན་ཡོད་སྐོར་བརྗོད་སོང་།
སྐུ་མགྲོན་གཙོ་བོ་རྒྱལ་རབས་སློབ་དཔོན་བྱམས་པ་བསམ་གཏན་ལགས་ཀྱིས། བདུན་ཅུ་དོན་གྲངས་ནང་དང་དེའི་གོང་དུ་བོད་པའི་སྐོར་དང་། ལྷག་པར་དུ་བོད་པའི་གོམས་གཤིས་དང་ཉིན་རེའི་འཚོ་བ་དང་འབྲེལ་བའི་ཟ་མ་བཟའ་སྟངས། འགྲོ་སྟངས། མི་ཚེ་སྐྱེལ་སྟངས་སོགས་ཀྱི་སྐོར་ལ་ཉམས་ཞིབ་བྱས་པའི་དཔེ་དེབ་དང་རྩོམ་ཡིག་མཐོང་དཀོན་པ་དང་། རེ་ཟུང་ཡོད་པ་དག་ཀྱང་ཕྱི་རྒྱལ་མགོ་སེར་ཚོས་ཉམས་ཞིབ་བྱས་བཞག་པའི་རིགས་ཡིན་ལ། སྐབས་དེ་དུས་དེ་འདྲ་ཞིག་བོད་པ་ཚོའི་བསམ་བློར་ཡང་འཁོར་ཁག་པོ་ཆགས་ཡོད་ཀྱང་། དེང་སྐབས་དེ་འདྲའི་རིགས་མང་དུ་འགྲོ་བཞིན་པར་བརྟེན་ཕྱོགས་གཅིག་ནས་བོད་པའི་སྐོར་ལ་མི་གཞན་གྱི་རྒྱུས་ལོན་ཆེ་རུ་འགྲོ་བ་དང་། གཉིས་ནས་བོད་པ་རང་ཉིད་ཀྱི་ཐུན་མོང་མ་ཡིན་པའི་མི་ཚེ་དང་འབྲེལ་བའི་བཟའ་བཏུང་འགྲོ་འདུག་སོགས་གོམས་སྲོལ་ལ་ཉམས་ཞིབ་ཀྱིས་ཡིག་ཐོག་ཏུ་འགོད་ཐུབ་པ་བྱ་རྒྱུ་གལ་ཆེན་པོ་ཡིན་པ། ཐེངས་འདིའི་ཉམས་ཞིབ་པ་ཚོའི་ཉམས་ཞིབ་ཀྱི་བརྗོད་གཞི་ཁག་ཕལ་ཆེ་བ་བོད་པའི་དངོས་ཡོད་སྤྱི་ཚོགས་འཚོ་བའི་སྐོར་ཡིན་པ་དེ་ཧ་ཅང་ཡག་པོ་ཡོད་སྐོར་བཅས་བརྗོད་ཡོད།
ཡང་ཁོང་གིས་ཉམས་ཞིབ་ཟེར་པ་དེ་སྤྱི་ཚོགས་ནང་ཁ་གསལ་མེད་པ་དང་། འཐུས་སྒོ་མ་ཚང་པ་སོགས་སྟོང་ཆའི་རིགས་ལ་ཞིབ་འཇུག་བྱས་ཏེ་ཁ་གསལ་དང་འཐུས་སྒོ་ཚང་པ་ཞིག་བཟོ་རྒྱུ་དེ་ཡིན་པ། ཉམས་ཞིབ་པ་ཞིག་ལ་མཚོན་ན་སོ་སོའི་ཉམས་ཞིབ་ཀྱི་བརྗོད་བྱ་དང་འབྲེལ་བའི་ཉམས་ཞིབ་ཐབས་ལམ་ཀྱང་མི་འདྲ་བ་མང་པོ་ཡོང་སྲིད་པས། ཨང་རྩིས་ཀྱི་མན་ངག་(Formula) ལྟ་བུ་ཐབས་ལམ་གཅིག་གྱུར་པ་ཞིག་ལམ་སྟོན་བྱ་རྒྱུ་ཁག་པོ་ཡིན་ཡང་། ཐེངས་འདིའི་ཟབ་ཁྲིད་གནང་མཁན་ཕལ་ཆེ་བའི་མི་ཚེ་ཉམས་ཞིབ་དང་འབྲེལ་བའི་ལས་དོན་སྟེང་སྐྱེལ་སྡོད་མཁན་ཆགས་ཡོད་སྟབས། ཁོང་ཚོའི་ཉམས་མྱོང་ལེན་རྒྱུའི་གོ་སྐབས་བཟང་པོ་ཞིག་ཡིན་སྟབས། གཙོ་བོ་ཉམས་ཞིབ་པ་སོ་སོས་རང་ཉིད་ཀྱི་ལས་དོན་ལ་འཇུག་སྐྱོང་པའི་ཐོག་ཉམས་མྱོང་གསོག་གིན་གསོག་གིན་འགྲོ་དགོས་པ་ཞིག་ཡིན་སྐོར་བཅས་བརྗོད་སོང་།
ཐེངས་འདིའི་ཟབ་སྦྱོང་དུས་ཡུན་ནང་ཝ་ཎ་གཙུག་ལག་སློབ་གཉེར་ཁང་གི་རིགས་བདག་སློབ་དཔོན་དགེ་བཤེས་ངག་དབང་བསལ་གཏན་མཆོག་གིས་༼ཤར་ནུབ་ཀྱི་ཞིབ་འཇུག་གི་ཁྱད་པར༽སྐོར་དང་། རྒྱལ་རབས་སློབ་དཔོན་བྱམས་པ་བསམ་གཏན་ལགས་ཀྱིས་༼ལོ་རྒྱུས་ཞིབ་འཇུག་བྱེད་ཐབས༽། འབུམ་རམས་པ་བློ་བཟང་རྡོ་རྗེ་རབ་གླིང་ལགས་ཀྱིས་༼ཞུ་སྒྲིག་དང་མཆན། ལུང་འདྲེན། ལྷན་ཐབས་འགོད་སྟངས༽། དགེ་རྒྱལ་མཚན་རྣམ་གྲོལ་ལགས་ཀྱིས་༼ནང་ཆོས་དང་འབྲེལ་བའི་ཞིབ་འཇུག་བྱེད་ཐབས༽། བྷེང་ལོར་ཏཱ་ལའི་བླ་མ་མཐོ་སློབ་ཀྱི་སློབ་སྤྱི་གཞོན་པ་འབུམ་རམས་པ་པདྨ་དབྱངས་ཅན་ལགས་ཀྱིས་༼ཞིབ་འཇུག་རྩོམ་ཡིག་འབྲི་ཐབས༽། དགེ་བློ་བཟང་ནོར་བུ་ཤཱསྟྲཱི་ལགས་ཀྱིས་༼ཕབ་སྒྱུར་དང་འབྲེལ་བའི་ཞིབ་འཇུག༽། རིག་གནས་སློབ་དགེ་ལྷག་པ་ཚེ་རིང་ལགས་ཀྱིས་༼བརྡ་སྤྲོད་ཞིབ་འཇུག་བྱེད་ཐབས༽སོགས་ཀྱི་སྐོར་ནས་ཟབ་ཁྲིད་གནང་རྒྱུ་ཡིན་པ་དང་། ཤེས་རིག་དྲུང་འཕར་བཀྲ་ཤིས་དོན་འགྲུབ་ལགས་དང་ཤེས་ཡོན་འགན་འཛིན་ཚེས་རིང་བསམ་འགྲུབ་གཉིས་ཀྱིས་ཤེས་རིག་གི་སྒྲིག་ཞུགས་མ་ཡིན་པའི་ཉམས་ཞིབ་ལས་འཆར་དང་འབྲེལ་བའི་གནད་དོན་ཐད་ནས་ལམ་སྟོན་གནང་རྒྱུ་ཡིན་འདུག
ཟླ་འདིའི་ཕྱི་ཚེས་ ༢༨ ནས་ཕྱི་ཟླ་ ༡༡ ཚེས་ ༤ བར་གྱི་ཉམས་ཞིབ་ཟབ་སྦྱོང་སྐབས། ༢༠༡༡ དང་ ༢༠༡༢ ལོའི་ཤེས་རིག་ལས་ཁུངས་ཀྱི་སྒྲིག་ཞུགས་མ་ཡིན་པའི་ཉམས་ཞིབ་པ་ ༡༧ དང་། གཞན་དབུས་སྨན་རྩིས་ཁང་གི་སྨན་རམས་པ་ ༢། རྣམ་གྲོལ་གླིང་གི་དགེ་རྒན་ ༡། དཔེ་སྟོན་སློབ་གྲྭའི་ཆོས་དགེ་ ༡ བཅས་ཁྱོན་མི་ ༢༡ མཉམ་ཞུགས་བྱས་ཡོད་འདུག
གསར་འགོད་པ། བནྡེ་སྐྱབས།
བཀུར་འོས་འབུམ་རམས་པ་སློབ་དཔོན་རྣམ་པ་དང་། ཞིབ་འཇུག་པ་རྣམས་ལ་བཀྲིས་བདེ་ལེགས་སོ།།
དེང་རབས་ནི་ཞིབ་འཇུག་ལ་ཕྱོགས་ཤིང་། ཞིབ་འཇུག་གི་ཁྱབ་ཚད་ཀྱང་དམའ་ས་ཞིག་ཏུ་འཛུལ་ནས་ཡོད་སྟབས། སློབ་མཁན་དང་སློབ་མ་ཚང་མས་ནམ་རྒྱུན་འགྲོ་སྟངས་ལྟར་མིན་པར་དམིགས་བསལ་གྱི་ཁ་ཕྱོགས་དང་དམིགས་བསལ་གྱི་ལམ་སྟོན་དགོས་གལ་རེད་ལགས་སོ།།
་་་་་ སྒྲིག་ཞུགས་མ་ཡིན་པའི་ཉམས་ཞིབ་འདི་བོད་ནས་རྒྱ་གར་དུ་འབྱོར་རྗེས་རང་སྦྱོང་ངམ་ཤེས་ཡོན་གྱི་ཚད་གཞི་ཡག་པོ་དང་ཉམས་ཞིབ་ཀྱི་ནུས་པ་ཡོད་ཀྱང་། རྒྱ་གར་གྱི་མཐོ་སློབ་སོགས་ལ་འགྲོ་བའི་ཆ་རྐྱེན་མེད་པར་བསྐྱོད་མ་ཐུབ་པ་ཚོར་ཆེད་དུ་དམིགས་པ་ཞིག་ཡིན་པ་དང་། ཐེངས་འདིའི་ཉམས་ཞིབ་པ་ཚོའི་རྩོམ་ཤོག་རྣམས་དེང་རབས་ཀྱི་ཉམས་ཞིབ་རེ་ཡོང་རྒྱུར་རེ་བ་བཞིན་ཡོད་སྐོར་བརྗོད་སོང་། ་་་ཟེར།