རྒྱ་གཞུང་གིས་རང་བཙན་སྦྱར་ཡིག་དང་གསང་བ་ཕྱིར་བསྒྲཊ་ཀྱི་ཉེས་མིང་འོག་སྔ་ཕྱིར་ཁམས་སོག་རྫོང་དྲིལ་མདའ་དགོན་དང་། གཙོད་དགའ་ལྡན་ཆོས་གླིང་གི་གྲྭ་པ་བདུན་འཛིན་བཟུང་བྱས་འདུག
ཟླ་སྔོན་མའི་ཕྱི་ཚེས་ ༢༦ ཉིན་རྒྱ་གཞུང་གིས་ཁམས་སོག་རྫོང་ཁྲི་རྡོ་ཤང་དྲིལ་མདའ་དགོན་པའི་རང་ལོ་ ༣༤ ཡིན་པའི་གྲྭ་ཐུབ་བསྟན་སྙན་གྲགས་དང་། རང་ལོ་ ༢༤ ཡིན་པའི་གྲྭ་ཚེ་དབང་།རང་ལོ་ ༢༧ ཡིན་པའི་གྲྭ་ཕུར་བུ་བཅས་གྲྭ་པ་གསུམ་འཛིན་བཟུང་བྱས་ཡོད་འདུག
ཁོང་གསུམ་འཛིན་བཟུང་བྱས་རྗེས་དགོན་པའི་གྲྭ་པ་ཁག་ཅིག་གིས་དེ་སྔོན་ས་གནས་སུ་རང་བཙན་སྦྱར་ཡིག་བཀྲམས་པའི་གནས་ཚུལ་བྱུང་བའི་དབང་གིས་ཡིན་ཚུལ་དང་། ཡང་ཁག་ཅིག་གིས་རྒྱལ་གཅེས་དཔའ་བོ་ཚེ་སྤོ་དང་བསྟན་འཛིན་གཉིས་མེར་བསྲེཊ་གཏོང་སའི་ས་གནས་ནས་ཡོང་བའི་དབང་གིས་ཡིན་པའི་ཚོད་དཔག་ཙམ་ལས། ད་ཆར་ཁོང་གསུམ་འཛིན་དགོས་པའི་རྒྱུ་རྐྱེན་དང་གར་ཡོད་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་འདུག
གཞན། ཟླ་འདིའི་ཕྱི་ཚེས་ ༡ ཉིན་ངྷ་ས་གནས་སྡོད་ཀླུ་སྒྲུབ་ལགས་ཀྱིས་གསར་ལམ་དུ་གནས་ཚུལ་མཁོ་སྤྲོད་གནང་བ་ལྟར་ན། འདི་ལོའི་ཕྱི་ཟླ་༨ ཚེས་ ༧ ཉིན་རྒྱལ་གཅེས་དཔའ་མོ་སྒྲོལ་དཀར་མཚོ་ལགས་ཀྱིས། ཀན་ལྷོ་གཙོད་དགོན་པའི་ཉེ་འགྲམ་དུ་རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་བྱས་ཏེ་སྐུ་གྲོངས་ཟིན་པ་ལྟར། ཉིན་དེའི་ཕྱི་ཉིན་རྒྱ་གཞུང་གིས་གསང་བ་ཕྱིར་སྒྲོག་བྱེད་མཁན་གྱི་ཉེས་མིང་འོག གཙོད་དགོན་པའི་གྲྭ་བློ་བཟང་ཆོས་འཕེལ་དང་བརྩོན་འགྲུས། བློ་གསལ། སྟོབས་ལྡན་བཅས་གྲྭ་པ་ ༤ འཛིན་བཟུང་བཀག་ཉར་བྱས་ཏེ་གློད་གྲོལ་བཏང་ཡོད་ཀྱང་། ཕྱིས་སུ་གྲྭ་བློ་བཟང་ཆོས་འཕེལ་ཡང་བསྐྱར་འཛིན་བཟུང་བྱས་ཡོད་པ་མ་ཟད། ཟླ་སྔོན་མའི་ཕྱི་ཚེས་ ༡༣ ཉིན་རྒྱལ་གཅེས་དཔའ་བོ་རྟ་མགྲིན་རྡོ་རྗེ་ལགས་ཀྱིས་ས་གནས་དེར་རང་ལུས་མེར་བསྲེཊ་ཀྱིས་སྐུ་གྲོངས་རྗེས། དེ་སྔོན་འཛིན་བཟུང་བྱས་པའི་གྲྭ་བློ་གསལ་དང་བརྩོན་འགྲུས། སྟོབས་ལྡན་བཅས་གསུམ་བསྐྱར་དུ་འཛིན་བཟུང་གིས་ད་ཆར་གར་ཡོད་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་འདུག
གསར་འགོད་པ། དོན་གོ
