ཁ་སང་པེ་ཅིན་དུ་རྒྱ་དམར་སྐབས་ ༡༧ པའི་ཚོགས་འདུ་ཐེངས་ ༧ པ་ཚོགས་ཏེ། དཔོན་རིགས་གསར་རྙིང་འདེམས་སྒྲིག་ཐད་ནང་ཁུལ་གདོང་ཐུག་མཐའ་མ་དེ་རྒྱག་མགོ་བརྩམས་འདུག
ཟླ་འདིའི་ཕྱི་ཚེས་ ༡ ཉིན་པེ་ཅིན་ནུབ་ཁུལ་གསོལ་མགྲོན་ཁང་དུ། རྒྱ་གཞུང་དབུས་དམར་ཤོག་ཚོགས་པའི་འཐུས་མི ༣༧༠ དང་འཐུས་ཚབ་འཐུས་མི་བཅས་བསྡུ་སྐོང་བྱས་ཏེ། དམར་ཤོག་སྐབས་ ༡༧ པའི་ཚོགས་འདུ་ཐེངས་ ༧ པ་དེ་ཚོགས་ཡོད་ལ། ཐེངས་འདིའི་ཚོགས་ཐོག་ཏུ་རྒྱ་གཞུང་གི་དཔོན་རིགས་གསར་རྙིང་བརྗེ་སྤོར་གྱི་མཐའ་མའི་མི་འགྲོ་འདེམས་སྒྲུག་དང་། སྐབས་རྗེས་མའི་དམར་གཞུང་གི་སྲིད་ཇུས་ཁ་ཕྱོགས། ཉེ་སྔོན་ཆབ་སྲིད་ལྷན་ཁང་གི་རྒྱུན་ལས་ཁྲོད་ཕྱིར་ཕུད་བཏང་བའི་པའོ་ཞི་ལའེ་དང་ལིག་ཀྲི་ཅོན་གཉིས་ཀྱི་དམར་ཤོག་འཐུས་མིའི་རྩ་འཛུགས་གནད་དོན་ཐག་གཅོད་ཕྱོགས་སོགས་ཀྱི་ཐད། རྒྱ་གཞུང་དཔོན་རིགས་ནང་ཁུལ་ཤོག་ཁག་བར་མཐའ་མའི་དབང་ཤུགས་འཐབ་རྩོད་བྱས་ཏེ། ཟླ་འདིའི་ཕྱི་ཚེས་ ༨ ཉིན་འཚོག་འཆར་གྱི་སྐབས་ ༡༨ པའི་ཚོགས་འདུའི་གར་སྟེགས་སྟེང་། དཔོན་རིགས་གསར་རྙིང་བརྗེ་སྤོར་མི་འགྲོ་ཡོངས་ཁྱབ་དྲིལ་སྒྲོག་བྱ་རྒྱུར་སྟ་གོན་བྱེད་བཞིན་ཡོད་པ་རེད།
རྒྱ་གཞུང་གིས་གཟའ་ཕུར་བུའི་ཉིན། སྐབས་ ༡༨ པའི་ཚོགས་འདུའི་དྲ་རྒྱ་སྒོ་འབྱེད་དང་། དམར་ཤོག་པའི་དཔྱད་བརྗོད་པ་རེ་ཟུང་ཆེད་འགུགས་ཀྱིས་ཚོགས་ཆེན་དང་འབྲེལ་བའི་གླེང་གཞི་རེ་ཟུང་ཐོག་དཔྱད་གླེང་དང་། དྲ་རྒྱ་བརྒྱུད་མང་ཚོགས་དང་ཕན་ཚུན་གླེང་མོལ་བྱེད་ཁུལ་གྱི་རྣམ་པ་བསྟན་ཏེ། ཕྱི་ཚུལ་ནས་པེ་ཅིན་གྱི་ཚོགས་འདུའི་གནས་སྟངས་རྒྱུན་ལྡན་ཡིན་པའི་བཟོ་ལྟ་སྟོན་གྱིན་ཡོད། ཡིན་ནའང་། དོན་དངོས་ཐོག་ཚོགས་འདུའི་སྐབས་དཔོན་རིགས་ནང་ཁུལ་གདོང་ཐུག་འཁྲུག་ཟིང་དང་། དཔོན་རིགས་ནང་ཁུལ་ཁྱོ་ཤི་ང་གསོན་གྱི་འགལ་བའི་དབང་གིས། སྤྱི་ཚོགས་ཁྲོད་བརྒྱུད་སྐུལ་བྱས་ཏེ་མང་ཚོགས་རང་བཞིན་གྱི་ཡར་ལངས་སོགས་འབྱུང་རྒྱུར་ཧ་ཅང་བློ་འཚབ་ཆེན་པོ་ཡོང་གི་ཡོད་འདུག
ཧོང་ཀོང་མཱེན་པའོ་གསར་འགོད་པས་པེ་ཅིན་ནས་གནས་ཚུལ་སྤེལ་བ་ལྟར་ན། པེ་ཅིན་ནུབ་ཁུལ་གསོལ་མགྲོན་ཁང་གི་མཐའ་འཁོར་དུ། དམག་མི་དང་ཉེན་རྟོག་པས་ཁེངས་ཡོད་པ་མ་ཟད། མེ་གསོད་རུ་ཁག་གི་རླངས་འཁོར་དང་མྱུར་སྐྱོབ་རླངས་འཁོར་མང་པོ་སྒྲིག་ཤོམ་གྱིས་གློ་བུར་བའི་དོན་རྐྱེན་འབྱུང་ཉེན་ལ་སྟ་གོན་བྱས་ཡོད་པ་སོགས། སྐབས་ ༡༧ པའི་ཚོགས་འདུ་ཐེངས་ ༧ པ་དེ་ཧ་ཅང་ཛ་དྲག་གནས་བབ་ཅིག་གི་འོག་ཡོངས་བསྒྲགས་མིན་པའི་ཐོག་འཚོགས་བཞིན་པ་བརྗོད་འདུག
དེ་བཞིན། སྐབས་ ༡༨ པའི་ཚོགས་འདུའི་སྐབས་དང་བསྟུན་ནས། པེ་ཅིན་གྲོང་ཁྱེར་གཅིག་པུར་བདེ་འཇགས་སྲུང་སྐྱོབ་པ་ཁྲི་ ༡༤༠ ལྷག་འགྲེམས་འཇོག་གིས། པེ་ཅིན་གྲོང་ཁྱེར་ཧྲིལ་བོའི་མི་ཚོགས་འདུས་སྡོད་ཀྱི་ཁྲོམ་གཞུང་གང་སར་ལྟ་རྟོག་དང་། ཐ་ན། ཚོང་ར་ཁག་ནང་སྔོ་ཚལ་དང་ཤིང་ཏོག་གཙབས་བྱེད་ཀྱི་ཚལ་གྲི་ཡན་ཆད་བཙོང་མི་ཆོག་པའི་བཀའ་རྒྱ་བཏང་ཡོད་པ་མ་ཟད། དམར་ཤོག་འཐུས་མི་རྣམས་སྡོད་སའི་གསོལ་མགྲོན་ཁང་གི་ཉེ་འཁོར་ས་ཁུལ་ ༡༤ དང་། གྲོང་ཁྱེར་གྱི་གནད་ཡོད་སྲང་ལམ་ཁག་ ༦༤ ། ཟམ་པ་དང་འགག་སྒོ་ཁག་ ༣༢༣ བཅས་སུ་སྔོག་བཤེར་ས་ཚུགས་བཙུགས་ཏེ་དམ་དྲགས་ཤུགས་ཆེན་པོ་བྱས་ཡོད་འདུག
ཐེངས་འདིའི་ཚོགས་འདུ་ནི་ ༢༠༠༧ ལོར་འདེམས་སྒྲིག་བྱས་པའི་སྐབས་ ༡༧ པའི་རྒྱ་གཞུང་དབུས་དམར་ཤོག་ཚོགས་པའི་འཐུས་མི་ ༥༠༠ ལྷག་གི་ཆེས་མཇུག་མཐའི་ཚོགས་འདུ་ཆེ་ཤོས་དང་། རྒྱ་གཞུང་གི་དཔོན་རིགས་གསར་བའི་མི་འགྲོ་འདེམས་སྒྲིག་ཐག་གཅོད་ཐད་ཀྱི་མཐའ་མའི་ཚོགས་འདུ་དེ་ཆགས་ཡོད།
གསར་འགོད་པ། ཚེ་རིང་རྒྱལ།
རྒྱ་ནག་དམར་ཤོག་ཚོགས་པའི་སྒྔིག་འཛུགས་འདི་བཟུང་ནས་ལོ་དྲུག་ཅུ་རེ་གྲངས་འགྲོ་ཚར་བ་ཡིན་དུས་བརྒྱ་ཆ་བརྒྱ་ཐམ་པ་བདེ་བླག་ངང་ཚོགས་པ་རེད།
ཀི་ཀི་བསྭོ་བསྭོ་ལྷ་རྒྱལ་ལོ། བོད་རྒྱལ་ལོ། ད་ཡིན་ན་ལྟད་མོ་ཆེན་པོ་ཞིག་མཐོང་བ་ཤོག །
ཚེ་རིང་རྒྱལ་ལགས། ཉི་མ་རེ་རེ་བཞིན་འདིའི་སྐོར་གྱི་གསར་འགྱུར་རེ་གཏོང་རྒྱུ་ཧ་ཅང་གལ་ཆེན་རེད། ཡིན་ནའང་ཡིག་ནོར་ལ་གཟབ་དགོས་ཀྱི་འདུག