ཁ་ཆེ་སློབ་ཕྲུག་ཚོའི་སྐྱབས་འཇུག

ཉེ་ལམ་ཁ་ཆེ་སློབ་ཕྲུག་གཙོས་མི་སྣ་ཁག་ཅིག་གིས་འབར་མའི་ནང་ལྷིང་འཇགས་ཡོང་ཐབས་ཐད་༸གོང་ས་མཆོག་ལ་སྐྱབས་འཇུག་ཞུས་འདུག 

ཁ་སང་ཕྱི་ཚེས་ ༡ ཉིན་སྐུ་སྒེར་དྲ་བའི་ཐོག་གནས་ཚུལ་སྤེལ་དོན།  ཉེ་ལམ་ཁ་ཆེའི་གཙུག་ལག་སློབ་གྲྭ་ཇཱ་མི་ཡ་མི་ལི་ཡ་ཨི་སི་ལཱ་མི་ཡ་(Jamia Millia Islamia University in New Delhi) ཞེས་པའི་སློབ་ཕྲུག་དང་ལས་བྱེད་ཁག་ཅིག་གཙོས།  འབྲེལ་ཡོད་ཚོགས་པའི་མི་སྣ་དག་གིས་༸གོང་ས་མཆོག་གི་མཇལ་ཁར་བཅར་ཏེ།  འབར་མའི་ནང་ལྷིང་འཇགས་ཡོང་ཆེད་༸གོང་ས་མཆོག་ནས་འབོད་སྐུལ་མཛད་གནང་ཡོང་བའི་གསོལ་འདེབས་ཞུས་ཡོད་འདུག 

སྐབས་དེར་༸གོང་ས་མཆོག་གིས་མཇལ་བཅར་བ་རྣམས་ལ།  དེ་སྔ་ཤྲི་ལང་ཀ་དང་ཏ་མིལ་མི་རིགས་གཉིས་དབར་འཁྲུག་རྩོད་ཀྱི་དོན་རྐྱེན་བྱུང་སྐབས། ༸ཁོང་གིས་ཤྲི་ལང་ཀའི་སྲིད་གཞུང་ལ་དཀའ་ངལ་དེ་དག་ཚུལ་མཐུན་བཟང་སྤྱོད་ཀྱི་ལམ་ནས་སེལ་ཐབས་གནང་དགོས་པའི་འབོད་སྐུལ་དང་། དེ་བཞིན།  ཉེ་ལམ་ལྕམ་སྐུ་ཨང་སང་སུ་ཀི་ལགས་ལ་གསུང་འཕྲིན་ཐེངས་གཉིས་སྩལ་བ་བརྒྱུད། འབར་མའི་ནང་གི་ཁ་ཆེ་སྐྱབས་བཅོལ་བ་རྣམས་ཀྱི་དཀའ་ངལ་རྣམས་འཚེ་མེད་ཞི་བའི་ཐོག་སེལ་ཐབས་ཐད་ནུས་པ་གང་ཡོད་འདོན་དགོས་པའི་འབོད་སྐུལ་མཛད་པ་མ་ཟད།  ལྡི་ལིའི་སྐུ་ཚབ་དོན་གཅོད་མཆོག་འབར་མའི་གཞུང་ཚབ་པ་དང་མཇལ་འཕྲད་གནང་ཐབས་བྱས་སྐོར་གསལ་བཤད་མཛད་ཡོད་འདུག 

གཞན་ཡང་།  སྐུ་སྒེར་དྲ་བའི་གནས་ཚུལ་ནང་། ཁ་ཆེའི་སྐུ་ཚབ་འགའ་ཤས་ཀྱིས་༸གོང་ས་མཆོག་སྐུ་དངོས་འབར་མའི་ནང་ཆིབས་སྒྱུར་བསྐྱང་སྟེ།  དེ་ཁུལ་བརྟན་ལྷིང་སྐྲུན་ཐབས་མཛད་དགོས་པའི་གསོལ་འདེབས་ཞུས་ཡོད་འདུག  འོན་ཀྱང་།  ཨེ་ཤ་ཡའི་རྒྱལ་ཁབ་ཁག་ཅིག་ནང་ཆབ་སྲིད་དམ་བསྒྲགས་ལ་བརྟེན།  ༸གོང་ས་མཆོག་ཆིབས་སྒྱུར་བསྐྱངས་ཐབས་བྲལ་བའི་རྒྱལ་ཁབ་ཀྱི་ཁོངས་སུ་འབར་མའང་ཚུད་ཡོད་པ་ལྟར།  ༸གོང་ས་མཆོག་གིས་གོ་སྐབས་ནམ་བྱུང་ལ་འབར་མའི་དཀའ་ངལ་སེལ་ཐབས་ལ་སྨན་པའི་ཐུགས་གསོའི་གསུང་འཕྲིན་མུ་མཐུད་སྩལ་གནང་མཛད་རྒྱུའི་དགོངས་བཞེད་མཛད་བཞིན་པའི་སྐོར་བཀོད་འདུག