ཆོས་ཚོཊ་ཀྱིས་མཉམ་རུབ་བྱས་མ་སོང་ཟེར།

བོད་མི་མངས་སྤྱི་འཐུས་ལྷན་འཚོགས་ཀྱིས་གཞི་རྒྱ་ཆེ་བའི་ལུས་འགུལ་འདི་འདྲ་ཞིག་བདེ་བླག་ངང་མཇུག་བསྒྲིལ་བར་དགའ་སྤོབ་དང་བཅས་པའི་ཡིད་རང་གིས་སྔགས་བརྗོད་ཡོད། ཡིན་ནའང་ཆེས་ཡིད་ཕམ་པ་ཞིག་ནི་བཀུར་འོས་སྤྱི་འཐུས་ཐུབ་དབང་ལགས་ཀྱིས་གསུང་བཤད་ལྟར་ཁོང་རྣམ་པ་ཚོས་ད་ལྟའི་བོད་མགོ་ནག་ཚང་གི་འཇིག་ཉེན་གྱི་མིག་ཆུ་མིག་ཆུ་དམར་པོ་ཞིག་ཕྱིར་བསྟན་ཏེ་རྒྱལ་ཁབ་དེ་དག་ཏུ་བདེན་པའི་མེ་ལྕེ་སྐོར་སྐྱོད་བྱེད་སྐབས་བོད་རིགས་ཀྱི་ཆོས་ཚོགས་ཁྲེལ་མེད་ཁག་གཅིག་གིས་རྒྱབ་སྐྱོར་མ་བྱས་པ་མ་ཟད་ད་དུང་མོས་མཐུན་མེད་པའི་རྣམ་འགྱུར་བསྟན་ཡོད་གནས་ཚུལ་བྱུང་ཡོད་པ་འདི་རེད། སྤྱིར་སྟངས་ཁོང་གིས་ཉེ་ཆར་ཚོགས་པ་དེ་དག་ནང་བདེན་པའི་མེ་ལྕེ་སྐོར་སྐྱོད་བྱེད་སྐབས། ཁོང་ཚོས་ལས་འགུལ་དེ་ཆབ་སྲིད་དང་འབྲེལ་བ་ཡོད་ཚུལ་བཤད་དེ་ང་ཚོར་མཉམ་རུབ་མི་བྱེད་པ་མ་ཟད། བོད་དོན་ལ་དོ་སྣང་དང་རྒྱབ་སྐྱོབ་མེེད་པའི་རྣམ་འགྱུར་བསྟན་སོང་ཞེས་པ་ལས་ཆོས་ཚོགས་ཐམས་ཅད་ཀྱིས་རྣམ་འགྱུར་དེ་ལྟར་བསྟན་ཡོད་པ་ཡིན་ནམ། ཡང་ན་ཆོས་ཚོགས་རེ་ཟུང་ཞིག་གིས་ལྟ་སྟངས་གང་ཡིན་གསལ་འདོན་བྱས་མེད་ཀྱང་གང་ལྟར་གནས་ཚུལ་འདིས་བོད་པའི་རུས་ཁོག་ཡོད་པའི་མི་བུ་ཁྲི་སྟོང་མང་པོའི་བྲང་ཁོགུ་ཡིད་ཆད་དང་བློ་ཕམ་གྱི་ན་ཟུག་གིས་ཇི་ལྟར་ཁེངས་སུ་བཅུག་ཡོད་པ་ནི་ཐེ་ཚོམས་མི་དགོས་པ་ཞིག་རེད། ང་ཚོས་འདི་ལྟར་ལྟས་ཡོང་དུས་ཕྱི་ཕྱོགས་ཀྱི་ཆོས་ཚོགས་དག་གི་གྲས་ན་བསྟན་འགྲོ་ལ་སྲི་ཞུ་བླ་མེད་སྒྲུབ་མཁན་ཡང་རེ་ཟུང་བྱུང་ཡོད་པས་མཐའ་གཅིག་ཏུ་དམིགས་ཡུལ་དང་ཕུག་བསམ་མི་ལེགས་པར་སྒྲུབ་མི་འོས་ཀྱང་། ཆོས་ཚོགས་ཕལ་མོ་ཆེ་དག་ནི་བྱ་སྤྱོད་ནི་ཅི་འདྲའི་སྐྱི་གཡའ་ཞིང་དགོད་བྲོ་བ་མང་པོ་ཞིག་མཆིས་འང་། ཚོགས་ངན་དེ་དག་གི་མགོ་སྔ་བར་གསུམ་ན་འདོད་ཆགས་དང་ཞེ་སྡང་གི་མེ་འབར་ཞིང་ཆུ་ཁོལ་གྱིན་པའི་བླ་རྫུན་དང་གྲུབ་རྫུན་དགེ་བཤེས་ཁྲེལ་མེད་དེ་དག་གི་ཕ་རིས་སྨུག་པོའི་ལ་རྒྱ་རྒྱ་མོའི་སྟུ་ཡིས་སླུས་སོང་ངམ། རྒྱ་སྒོར་དམར་མོར་བཙོང་ཟིན། ཁོང་ཚོས་སངས་རྒྱས་ཀྱི་བསྟན་པའི་འཇིག་ཉེན་གྱི་ཐུགས་ཚབ་དབྱིན་མོ་རག་ནས་བརྗེད་སོང་ངམ། དབྱིན་སྒོར་ལོན་པས་བརླགས་སོང་རེད། ངོ་མ་བླ་མ་དང་སྤྲུལ་སྐུ་དེ་དག་གི་དོན་དམ་གྱི་མཆོག་གི་མཛད་པ་གང་དེ་ཡིན་ནམ། བདེ་བ་ཅན་དུ་མི་གེ་བྱུང་ནས་ཁོང་ཚོ་རྒྱལ་བ་འོད་དཔགས་མེད་ཀྱིས་འཛམ་གླིང་འདིར་སྒོར་མོ་འཚོར་དུ་བཏང་བ་ཡིན་ནམ། ཡང་ན་སྣང་བ་མཐའ་ཡས་ཀྱིས་འཛམ་བུ་གླིང་འདིར་ལོག་གཡེམ་བྱེད་དུ་མངགས་པ་རེད། མིན་ན་ཁོང་རྣམ་པ་བསྟན་པ་རིན་པོ་ཆེ་ནུབ་པ་འང་སངས་རྒྱས་ཀྱི་མཛད་པར་འདྲེན་སྲོལ་ཡོད་པ་ལྟར་ཤྭཀྱྭ་ཐུབ་པས་བསྟན་པ་བསྡུ་གསོག་རྒྱག་ཏུ་བཏང་། ཁོང་ཚོར་ཕ་རེུས་སྨུག་པོར་ལ་རྒྱ་མེད་ཀྱང་ཆོག ཁོང་ཚོར་མ་རིས་སྔོན་མོར་དུང་བ་མེད་ཀྱང་འགྲིག ཁོང་ཚོར་སྤུན་ཟླའི་ཚེ་སྲོག་ལ་བརྩེ་སེམས་མེད་ཀྱང་རུང་། ཁོང་ཚོས་སངས་རྒྱས་ཀྱི་བསྟན་པའི་འཇིག་ཉེན་མི་གཟིགས་ནའང་ཆོག ད་དུང་ཆུང་མ་དང་སྒོར་མོའི་འགྲོ་དོན་ཀུན་གཟིགས་ཤིང་མགོ་སྐོར་དང་ལོག་སྤྱོད་ཀུན་མཁྱེན་པའི་སྤྲུལ་བའི་སྐུ་དང་གྲུབ་པའི་དབང་ཕྱུགས་མཁས་དབང་དགེ་བཤེས་ནམ་པ་ཁོང་ཚོས་འཇིག་རྟེན་མི་ཚུལ་ལས་འདས་པའི་མཛད་པ་ཇི་ལྟར་བསྟོན་འདོད་ཀྱང་བསྟོན་དུ་ཆུག ཡ་ཤ་རུས་ཁྲག་གསུམ་གཅིག་པའི་ཆོལ་ཁ་གསུམ་གྱི་སྤུན་གྲོགས་ཚོ་ང་ཚོ་ད་དུང་དཔུང་གདང་སྤྲེལ་ནས་འགྲོ་དང་རྒྱ་དམར་པོའི་བཙན་འོག་ན་འུ་ཚང་གི་བདེན་པ་ཤེས་ཀི། ས་ཆེན་པོའི་ཡང་རྩེ་ན་འུ་ཚང་གི་སྙིང་སྟོབས་མཐོང་ཀི།

བོད་ལ་རང་དབང་དང་རང་ས་རང་བདག་ཞིག་མ་ཐོབ་བར་དུ་བོད་རྒྱུད་ནང་བསྟན་འདི་ཡང་རླུང་ནང་གི་མར་མེ་ཞིག་ལས་གང་ཡང་མ་རེད། གནས་ལུགས་དེ་ཡང་མི་ཤེས་མཁན་གྱིས་ཆོས་ཚོང་བ་འདི་ཚོས་ཨ་སྒོར་ཡུ་སྒོར་ལས་གཞན་གང་ཡང་མི་ཤེས་པ་ཡིན་ནམ། དངོས་གནས་སེམས་སྐྱོ་དགོས་པ་རང་རེད། བོད་ནང་གི་གྲྭ་བ་དང་ཨ་ནེ་དག་གིས་བོད་མི་རིགས་དང་རྒྱལ་ཁབ་སངས་རྒྱས་ཀྱི་བསྟན་པའི་དོན་དུ་རང་ལུས་མེར་བསྲེགས་རྒྱུན་ཆད་མེད་པར་བཏང་དང་གཏོང་བཞིན་པའི་དུས་འདིར། བོད་མི་སེམས་ཡོད་གཅིག་ཡིན་ན་ཀླད་རྩ་ཚང་མཁན་ཞིག་ཡིན་ན་འགྲེལ་བཤད་བྱེད་མི་དགོས་པ་རང་ནུས་གང་ཡོད་འབད་དགོས་ངེས་རེད།

ཆོས་ཚོགས་དེ་ཚོ་རྒྱ་ནག་དང་ལག་འབྲེལ་ཡོད་རྒྱུ་རེད། ཁོང་ཚོས་རྒྱབས་སྐྱོར་མ་བྱས་ན་ཧ་སང་དགོས་དགོས་དོན་ཅི་ཡང་ཡོད་མ་རེད། ཉིན་ཞིག་ལ་རྒྱལ་བ་རིན་པོ་ཆེས་རྒྱུད་པ་འདར་དུ་བཅུག་གི་རེད།

དེ་ལས་སུད་སི་ནང་ལས་འགུལ་ལེགས་གྲུབ་བྱུང་སོང་བར་དགའ་བ་སྒོམ་ན་འགྲིག་གི་རེད། བོད་རྒྱལ་ལོ། ལྷ་རྒྱལ་ལོ། རང་བཙན་རྒྱལ་ལོ། རང་དབང་རྒྱལ་ལོ།