དེ་རིང་གཟའ་ཉི་མའི་ཉིན་བོད་ནང་གི་ཆུ་ཚོད་ ༡༠ དང་སྐར་མ་ ༢༠ སྟེང་། རེབ་གོང་དུ་རྒྱལ་གཅེས་དཔའ་བོ་རྡོ་རྗེ་ལྷུན་འགྲུབ་ལགས་ཀྱིས་རང་ལུས་མེར་བསྲེགས་བཏང་སྟེ། རྒྱ་གཞུང་གི་དྲག་གནོན་དབང་སྒྱུར་སྲིད་ཇུས་ལ་ངོ་རྒོལ་གྱིས་སྐུ་གྲོངས་ཡོད་འདུག
འདི་གར་གནས་ཚུལ་བཏང་འབྱོར་བྱུང་པ་ལྟར་ན། དེ་རིང་ཕྱི་ཚེས་ ༤ ཉིན་བོད་ནང་གི་ཆུ་ཚོད་ ༡༠ དང་སྐར་མ་ ༣༠ སྟེང་། རེབ་གོང་ཆུ་མ་སྡེ་བརྒྱད་ཚོ་དགུའི་གྲས་ཀླུ་གཤོང་སྡེ་བ་ནས་ཡིན་པ་རྡོ་རྗེ་ལྷུན་འགྲུབ་ལགས་ཀྱིས་རང་ལུས་མེར་བསྲེགས་བཏང་སྟེ། རྒྱ་གཞུང་གི་དྲག་གནོན་དབང་སྒྱུར་སྲིད་ཇུས་ལ་ངོ་རྒོལ་གྱིས་སྐུ་གྲོངས་ཡོད་པ་དང་། ཆུ་ཚོད་ ༡༡ སྟེང་དཔའ་བོ་ཁོང་གི་སྐུ་ཕུང་གདོང་རྒྱལ་ཀླད་དུ་གདན་འདྲེན་ཞུས་ཏེ། ཆུ་ཚོད་ ༣ པ་ཡས་མས་ལ་སྐུ་ཕུང་ཞུགས་འབུལ་ཞུས་ཡོད་པ་དང་། སྐབས་དེར་དགེ་འདུན་པ་དང་མང་ཚོགས་སྟོང་ཕྲག་དྲུག་བརྒལ་བ་འཛོམས་སྟེ། བསྔོ་བ་སྨོན་ལམ་གསུང་པ་དང་མ་ཎི་དབྱངས་རྟ་གྱེར་བ། ཀི་བསྭོ་ལྷ་རྒྱལ་སོགས་ཀྱི་སྐད་འབོད་བྱས་ཡོད་འདུག
རྒྱལ་གཅེས་དཔའ་བོ་རྡོ་རྗེ་ལྷུན་འགྲུབ་ལགས་ནི་ད་ལྟ་རང་ལོ་ ༢༥ ཡིན་པ་དང་། རྒྱལ་གཅེས་དཔའ་བོ་ཁོང་གིས་བོད་ལ་རང་དབང་དགོས། རྒྱལ་བ་བསྟན་འཛིན་རྒྱ་མཚོ་བོད་ལ་ཕེབས་དགོས། ད་ངའི་རེ་བ་འགྲུབ་སོང་ཞེས་མེ་ཕུང་དཀྱིལ་ནས་སྐད་འབོད་བྱས་ཡོད་འདུག དཔའ་བོ་ཁོང་ནི་ལྷ་བྲིས་སྒྱུ་རྩལ་གྱི་ཕྱག་ལས་གནང་མཁན་ཞིག་ཡིན་པ་དང་། ཁོང་གི་ཕ་མིང་ལ་འབྲུག་ཐར་རྒྱལ་འབོད་པ་དང་ད་ལྟ་ལོ ༥༠ དང་། ཨ་མའི་མིང་ལ་ཤ་བོ་གཡང་མོ་ཟེར་ཞིང་ལོ་ ༤༤ ། ཁོང་གི་བཟའ་ཟླའི་མིང་ལ་གཡང་མོ་མཚོ་ཟེར་ཞིང་ལོ་ ༢༦ ཡིན་འདུག ཁོང་བཟའ་ཟླ་གཉིས་ལ་བུ་དང་བུ་མོ་གཉིས་ཡོད་པ་ལས། རྒན་པ་བུ་ཀུན་བཟང་རྡོ་རྗེ་ལོ་ ༤ དང་། ཆུང་བ་བུ་མོ་ཏིང་འཛིན་སྒྲོལ་མ་ལོ་ ༢ ཡིན་འདུག
རྒྱལ་གཅེས་དཔའ་བོ་རྡོ་རྗེ་ལྷུན་འགྲུབ་ལགས་ཀྱིས་རང་ལུས་མེར་བསྲེག་གཏོང་ས་ནི། རྨ་ལྷོ་བོད་རིགས་རང་སྐྱོང་ཁུལ་གྱི་སྲིད་འཛིན་ལྟེ་གནས་རོང་བོ་རྒྱལ་ཐང་གི་གྲོང་ཁྱེར་ལ་ལམ་ཆེན་འགག་མདོ་ཁ་ཤས་ཡོད་པ་ལས། ནུབ་ཁུལ་བྱ་ཁྱུང་ལམ་ཁུལ་གྱི་སུམ་མདོ་ཡིན་འདུག་ལ། ཁོང་གིས་རང་ལུས་མེར་བསྲེག་གིས་ངོ་རྒོལ་ལས་འགུལ་སྤེལ་བའི་གནས་ཚུལ་ལམ་འགྲོ་མང་ཚོགས་ཀྱིས་ཤེས་རྟོགས་བྱུང་འཕྲལ། སྐུ་ཕུང་རྒྱ་དམག་གི་ལག་ཏུ་ཤོར་མ་བཅུག་པར། དུས་ཡུན་ཐུང་ངུའི་ནང་རོང་པོ་དགོན་པའི་དགེ་འདུན་པ་རྣམས་དང་། ཐག་ཉེ་རིང་གི་མང་ཚོགས་མང་པོ་ག་ས་གང་ནས་འདུ་འཛོམས་བྱུང་སྟེ་སྐུ་ཕུང་ལ་ཁ་བཏགས་འཐེན་པ་དང་། སྐུ་ཕུང་རེབ་གོང་རོང་པོ་དགོན་པའི་རྒྱབ་རིའི་མདུན་གྱི་གདོང་རྒྱལ་ཀླད་དུ་གདན་གྱིས་ཞུགས་འབུལ་བྱས་ཡོད་འདུག
ས་གནས་ནས་གནས་ཚུལ་བཏང་འབྱོར་ལྟར་ན། ད་ནངས་མེར་བསྲེག་ལས་འགུལ་བྱུང་པའི་རྗེས་ཙམ་ནས། ཉེན་རྟོག་པ་དང་དམག་མིས་སྲང་ལམ་དག་ལ་སྐོར་གཡེང་དང་། དམ་དྲག་བྱེད་མགོ་ཚུགས་ཡོད་ནའང་། དེ་རིང་མང་ཚོགས་ཀྱིས་སྐད་འབོད་བྱས་སྐབས་དང་། སྐུ་ཕུང་ཞུགས་འབུལ་ཞུ་ཡུལ་དུ་གདན་ཞུས་སྐབས། ཞུགས་འབུལ་དངོས་གཞིའི་སྐབས་བཅས་ལ་མང་ཚོགས་འཛིན་བཟུང་དང་། གཅར་རྡུང་། དྲག་གནོན་སོགས་ཀྱི་གནས་སྟངས་བྱུང་མེད་ཀྱང་། གནས་ཚུལ་འདིའི་སྐོར་ཕྱིར་བསྒྲགས་མི་ཆོག་པ་མང་ཚོགས་ནང་དྲིལ་སྒྲོག་ཁྱབ་སྤེལ་ཤུགས་ཆེ་བྱེད་ཀྱིན་ཡོད་འདུག
དཔའ་བོ་ཁོང་གི་སྐུ་ཕུང་ཞུགས་འབུལ་ཞུ་ཡུལ་གདོང་རྒྱལ་ལ་ཁ་ནི་རེབ་གོང་གི་ལོ་རྒྱུས་ནང་དམིགས་བསལ་ས་ཆ་ཞིག་ཆགས་ཡོད་ལ། དེར་བླ་ཆེན་དག་སྐུ་གཤེགས་པའི་སྐབས་སྐུ་གདུང་ཞུགས་འབུལ་བྱ་ཡུལ་ཞིག་ལས། དུར་ཁྲོད་ཀྱི་མིང་དང་ངོས་འཛིན་ཡོད་པ་ཞིག་མིན་པ་མ་ཟད། སྤྱིར་བཏང་གི་བླ་མ་དང་གྲྭ་པ། ལྷག་པར་དུ་མང་ཚོགས་དཀྱུས་མའི་རིགས་འདས་གྲོངས་སྐབས་སྐུ་ཕུང་ཞུགས་འབུལ་ཞུ་ཡུལ་ཞིག་མིན་པ་རེད། ཡིན་ནའང་། འདི་ལོའི་ཕྱི་ཟླ་ ༣ ཚེས་ ༡༧ ཉིན་རེབ་གོང་ཤ་སྦྲང་ནས་ཡིན་པ་རྒྱལ་གཅེས་དཔའ་བོ་བསོད་ནམས་དར་རྒྱས་ལགས་ཀྱིས་རང་ལུས་མེར་བསྲེག་གིས་རྒྱ་གཞུང་ལ་ངོ་རྒོལ་གནང་སྟེ་སྐུ་གྲོངས་པའི་རྗེས། ཁོང་གི་སྐུ་ཕུང་གདོང་རྒྱལ་ལ་ཁ་ནས་ཞུགས་འབུལ་ཞུས་ཡོད་ལ། དེ་ནི་རེབ་གོང་གི་ལོ་རྒྱུས་ནང་ས་གནས་འདིར་མི་སྐྱ་ཞིག་གི་སྐུ་ཕུང་ཞུགས་འབུལ་ཞུས་པ་ཐོག་མ་དང་། དེ་རིང་དཔའ་བོ་རྡོ་རྗེ་ལྷུན་འགྲུབ་ལགས་ཀྱི་སྐུ་ཕུང་ས་གནས་དེར་ཞུགས་འབུལ་ཞུས་པ་ནི་ཐེངས་གཉིས་པ་དེ་ཆགས་ཡོད། འདི་ནི་མང་ཚོགས་ཀྱི་ངོས་ནས་དཔའ་བོ་ཁོང་ཅག་གི་མཛད་རྗེས་ལ་བླ་ན་མེད་པའི་གུས་བརྩི་ཞུས་པའི་རྣམ་པ་ཞིག་ཆགས་ཡོད་པར་འགྲེལ་བརྗོད་གནང་གི་འདུག
ས་གནས་ནས་འབྲེལ་ཡོད་ཁག་ཅིག་ནས་བརྗོད་གསལ་ལ། ཉེ་སྔོན་ནས་ས་གནས་གཞུང་གི་ལས་ཁུངས་ཁག་ནང་གློག་ཀླད་རིགས་དྲ་རྒྱའི་སྐུད་ལམ་དུ་ཐད་ཀར་མཐུད་སྦྱོར་མི་ཆོག་པ་དང་། དྲ་ལམ་དུ་གང་བྱུང་འཛུལ་ཞུགས་ཐད་དམ་དྲག་བྱེད་བཞིན་ཡོད་ལ། དེ་རིང་ཉིན་རྒྱབ་ནས་རེབ་གོང་ལ་འབྲེལ་བ་བྱེད་ཁག་ཏུ་སོང་སྟེ། ད་ལྟའི་ཆར་གློག་ཀླད་དྲ་ལམ་ཆ་ཚང་བཀག་ནས་ཕྱི་ལོགས་སུ་འབྲེལ་བ་བྱེད་པར་བཀག་སྡོམ་ཤུགས་ཆེ་བྱེད་ཀྱིན་པའི་གནས་སྟངས་ཆགས་འདུག
གསར་འགོད་པ། ཚེ་རིང་རྒྱལ།
བླ་མེད་དཔའ་བོའི་ཞབས་ལ་གུས་ཕྱག་འབུལ།
སླར་ཡང་བོད་ནས་འཁྲུངས་པའི་གཞེན་བསྐུལ་ཞུ།
སྟོང་གསུམ་འཇིག་རྟེན་འགོ་འཇུག་མ་ལོག་བར།
གཟིམས་མེད་གངས་ལྗོངས་དཔའ་བོ་དུས་ཀྱི་རྔ་།
འཇམ་གཅེས་ཀྱི་འབོད་སྐུལ་འདི། ཐད་ཀར་པེ་ཅིང་གི་ཚེ་རིང་འོད་ཟེར་ལ་བསྐུར་དགོས། བུད་མེད་འདིས་ཧ་ཅང་འབྱོན་མདོག་གིས་པར་གང་རེག་པ་ལམ་སང་འབྲེལ་བཤད་ཅི་ཡང་མེད་པར་བརྒྱུད་ལམ་དུ་གཏོང་གི་ཡོད། ག་ལེར་ག་ལེར་དེའི་རྗེས་སུ་འབྲེལ་བཤད་འདྲ་བོ་བྲིས་ཡོང་གི་ཡོད།
དེ་སྔ་གསར་འགོད་པའི་གཟེངས་རྟགས་ཤིག་རེག་ཡོད་པས། མེར་བསྲེགས་ལས་འགུལ་ལ་བརྟེན་ནས་ཡང་ཁོང་མོའི་སྒེར་དོན་སྒྲུབ་འདོད་པ་འདྲ། དེ་མིན་ཚེ། བུད་མེད་འདིས་ལག་སྔ་གང་མགྱོགས་བྱེད་དགོས་དོན་མི་འདུག
རང་རེའི་གསར་འཕྲིན་ཁག་གི་རྩོམ་སྒྲིག་པ་ཡོངས་དང་། དྲ་གྲོགས་ཡོངས་ལ་ཆེད་ཞུ།
ང་ཚོའི་དཔའ་བོ་ཕོ་མོ་དག་གིས་བླ་ན་མེད་པའི་མཛད་རྗེས་དེ་དག་ལ་བབ་པའི་ཁྱབ་བསྒྲགས་ཤིག་ཡོང་གི་མེད་པའི་རྒྱུ་རྐྱེན་གཙོ་བོ་གཅིག་ནི་ང་ཚོས་གནས་ཚུལ་བྱུང་མ་ཐག་ང་རང་ཚོའི་ནང་ཁུལ་གྱི་གསར་འགྱུར་ཁག་ཏུ་བཀོད་ཐལ་ཤོར་པ་དང་། ལྷག་པར་དུ་ངོ་དེབ་སོགས་སུ་བསྒྲགས་པའི་དབང་གིས་རེད།
བོད་ནང་དུ་དཔའ་བོ་༦༣་ཀྱིས་རང་སྲེག་གནང་ཡོད་ན་ད་བར་དུ་རྒྱལ་སྤྱིའི་གསར་ལམ་ཁག་ཏུ་ཐོན་
པ་ག་ཚོད་འདུག རྒྱལ་སྤྱིའི་གསར་འགྱུར་ཆེ་ཁག་གིས་མ་བླངས་ན་དེ་ཙམ་ཁྱབ་བསྒྲགས་འགྲོ་ཐུབ་ཀྱི་མེད། ཁྱེད་ཅག་གིས་སྔོན་མ་བོད་རང་བཙན་ཆེད་སློ་ཕྲུག་ཚོགས་པ་དང་། རྗེས་སུ་བཙན་བྱོལ་བོད་གཞུང་དཔལ་ལྡན་སྲིད་སྐྱོང་མཆོག་གིས་འདི་འདྲ་གནས་ཚུལ་སུ་ལ་རག་ན་ལམ་སང་ངོ་དེབ་སོགས་སུ་བཀོད་རྒྱུར་མ་བྲེལ་བར་བྱུང་ན་རྒྱལ་སྤྱིའི་གསར་འགྱུར་ཆེ་ཁག་CNN BBC སོགས་ལ་སྐུལ་རོགས། དེ་མ་བྱུང་ན་ཁོང་ཅག་ལ་སྐུར་རོགས་ཞེས་འབོད་སྐུལ་གནང་ཡོད་པ་གསན་ཡོད་ཤག གང་ལགས་ཤེ་ན་ང་ཚོས་འདི་ལྟར་ཁྱབ་བསྒྲགས་བྱས་རྗེས་རྒྱལ་སྤྱིའི་གསར་འགྱུར་ཆེ་ཁག་BBB དང་ CNN ABC སོགས་ཀྱིས་གནས་ཚུལ་རྙིང་པ་རེད་ཅེས་ངོས་ལེན་བྱེད་ཀྱི་མེད། དེ་ལྟར་ང་ཚོའི་རང་སྲེག
་
གི་དཔའ་བོའི་མཛད་རྗེས་དེ་ཚོ་ཁྱབ་བསྒྲགས་དགོས་ངེས་ཤིག་འགྲོ་ཐུབ་ཀྱི་མེད།
མཐའ་ན་ལམ་ཐོག་ཏུ་མོ་ཊ་ཞིག་བརྡབ་སྐྱོན་བྱུང་བ་ཡང་གསར་འགྱུར་དུ་ཇི་ལྟར་ཁྱབ་བསྒྲགས་འགྲོ་གི་ཡོད་པ་ལྟར་དུ་རང་ཅག་གི་དཔའ་བོ་ཕོ་མོ་དག་གི་མཛད་པ་རླབས་ཆེན་འདི་དག་དེ་ལྟར་འགྲོ་གི་འདུག་གམ། དཔའ་བོ་དཔའ་མོ་དེ་སྙེད་ཅིག་གིས་རང་སྲེག་བྱས་པའི་ཁྱབ་བསྒྲགས་ཅི་ཙམ་སོང་འདུག་ཁྱེད་ཅག་གིས་གཟིགས་དང་མཁྱེན་ཐུབ། ཁྱེད་ཅག་གིས་དགོང་པ་བཞེས་དང་།
འོ་ན་ང་ཚོས་གང་ཞིག་བྱེད་དགོས་ཤེ་ནཿ གནས་ཚུལ་འདི་འདྲ་བྱུང་བའི་གནས་ཚུལ་སུ་ལ་ཡང་རག་མ་ཐག བྱུང་ན་ལམ་སང་ BBC སོགས་ལ་གནས་ཚུལ་གསར་བ་སྐུར་དགོས། དེ་མ་ཐུབ་ན་བོད་རང་བཙན་ཆེད་སློབ་ཕྲུག་ཚོགས་པར་སྐུར་དང་ཁོ་ཚོས་མ་ནོར་བར་ཁྱབ་བསྒྲགས་བྱེད་ཐུབ། དེ་མ་བྱུང་ན་བོད་གཞུང་ལ་སྐུར་དང་འགྲིག དེ་མ་བྱུང་བར་དུ་ནང་ཁུལ་ཚགས་པར་ཁག་གིས་ཀྱང་བཀོད་མི་ཉན། རྒྱལ་སྤྱིའི་གསར་འགྱུར་ཆེ་ཁག་གིས་མ་བཀོད་པར་དུ་སྒུག་རོགས། ལྷག་པར་དུ་ངོ་དེབ་དུ་དེ་བས་མི་ཉན།
རྒྱལ་སྤྱིའི་གསར་ལམ་ཁག་ཏུ་ཐོན་ཟིན་པ་དང་། ངོ་དེབ་སོགས་ཀྱིས་ནུས་ཤུགས་ཡོད་རྒུ་བཏོན་ནས་ཁྱབ་བསྒྲགས་བྱེད་དགོས།
ངས་ཞུས་པ་དེ་མ་འོངས་པར་ཐུགས་ལ་འཇོག་རོགས། ཁྱེད་ཅག་གི་གྲོགས་པོ་དག་ལ་ཡང་གནད་དོན་འདི་གསུང་རོགས། གོང་གསལ་འབོད་སྐུལ་འདི་བཞིན་ཁ་བརྡ་དྲ་ནང་དུ་ཨ་མཆོད་འཇམ་དཔལ་ཚུལ་ཁྲིམས་གྱིུས་སྤེལ་འདུག་པས་རྒྱུན་མཚན་ལྡན་པ་ཞིག་མཐོང་ནས་འདིར་བསྐྱར་འགོད་ཞུས་པ་ཡིན། །
བོད་ཀྱི་དུས་བབ་གསར་ཁང་གིས་འགྲེལ་བཤད་གནང་བ་དེ་རེད། གནས་ཚུལ་ཁ་གསལ་རག་པ་དང་བཀོད་སྤེལ་གནང་ཡོད་པ་དེ་གལ་ཆེན་པོ་རེད། བོད་ཀྱི་དུས་བབ་དང་བོད་ཀྱི་བང་ཆེན་དྲ་ཚིགས་གཉིས་ཀྱིས་ཁ་སང་གནས་ཚུལ་འདི་བཀོད་ཡོད། གསར་ཁང་གཉིས་ལ་བཀའ་དྲིན་ཞུ་དགོས་པ་ཞིག་ཆགས་ཡོད།
བོད་གཞུང་གི་དྲ་ཚིགས་སྟེང་ལ་ལྟོས་དང་། ༼ཟླ་བ་བཅིུག་པ། ཚེས ༥ ༢༠༡༢ དུས་ཚོད ༡༠:༢༨ སྔ་དྲོ།༽དུས་ཚོད་འདིའི་ཐོག་གཞི་ནས་བཀོད་འདུག མ་གཞི་ཁ་སང་གཟའ་ཉི་མ་ལ་བོད་གཞུང་གུང་སེང་རེད། གུང་སེང་ཉིན་གསར་འགྱུར་གང་ཡང་སྤེལ་གྱི་མེད་པ་འདྲ།
བོད་མི་མང་སྤྱི་འཐུས་ཀྱི་དྲ་ངོས་ན་ད་དུང་ཡང་སླེབས་མི་འདུག སྤྱི་འཐུས་ཚོས་ཁ་ནས་རྫིག་པོ་བཤད་པ་ཙམ་རེད། དོན་ལ་ཙོར་བ་གང་ཡང་ཡོང་གི་མེད་ཚོད་རེད། བོད་ནང་ནས་རང་ལུས་མེར་བསྲེག་གཏོང་གི་ཡོད་པའི་གནས་ཚུལ་ཛ་དྲག་འདི་འདྲའི་སྐབས་ལའང་་ཁྱབ་བསྒྲགས་ཐད་ཐུགས་སྣང་ཁྱོན་ནས་མེད་པ་འདི་བློ་ཕམ་གྱི་གནས་རེད་དྲན།
དྲ་གྲོགས་བསོད་ཚེ་ལགས།
ཕྲན་ལ་ཆུ་ཚོད་ ༡༢ སྟེང་ནས་གནས་ཚུལ་གང་ཡང་འབྱོར་མ་སོང་། ཕྲན་གྱི་ཡིག་ཟམ་ཁ་བྱང་ནི་ tseringgysl2008@gmail.com འདི་ཡིན། དེ་བཞིན། ཉིད་ཀྱི་ཞལ་པར་ཡང་འབྱོར་མ་སོང་། ཕྲན་གྱི་ཁ་པར་ཨང་། 91 9882640641 འདི་ཡིན།
གཞན། གཟའ་ཉི་མའི་ཆུ་ཚོད་ ༡༡ ཙམ་ལ་མདོ་སྨད་རེབ་གོང་དུ་བྱུང་བའི་མེར་བསྲེགས་གནས་ཚུལ་དེ་གོ་ཐོས་བྱུང་སོང་། དེར་བརྟེན། འདི་ག་དྷ་སར་གནས་བཞུགས་རེབ་གོང་གི་མི་སྣ་ཁག་ཅིག་ལ་འབྲེལ་བ་ཞུས་སྐབས། ཁོང་ཚོས་གནས་ཚུལ་ཞིབ་རྒྱས་བསྡུ་སྒྲུག་བྱས་རྗེས་འདི་གར་མཁོ་སྤྲོད་གནང་རྒྱུ་ཡིན་པ་ཞལ་བཞེས་གནང་སོང་སྟབས། ཝེ་ཆ་ཌི་སོགས་ཀྱི་ཐོག་གི་ལ་ཐོས་ལུང་ཐོས་ཀྱི་གནས་ཚུལ་ཐ་ཐོར་དག་སྔ་འདོན་མ་བྱས་པ་ཡིན།
མཐར། ཉིད་ཀྱིས་ཐུགས་སྣང་དང་བསམ་འཆར་བཏོན་པར་བཀའ་དྲིན་ཆེ་ཞུ། གསར་འགོད་པ་ཚེ་རིང་རྒྱལ་ནས།
ཨོཾ་མ་ཎི་པདྨེ་ཧཱུཾ།
ཨོཾ་མ་ཎི་པདྨེ་ཧཱུཾ།
ཨོཾ་མ་ཎི་པདྨེ་ཧཱུཾ།
དཔའ་བོ་ཁོང་ལ་མྱ་ངན་གུས་འདུད་གྲངས་མེད་ཞུ།
རྒྱལ་གཅེས་དཔའ་བོ་རྡོ་རྗེ་ལྷུན་གྲུབ་མཆོག་ལ་གུས་འདུད་ཞུ། མ་ཟད་བཀུར་འོས་མི་མང་ཡོངས་ལ་བཀྲིན་ཆེ་ཞུ་འདི་ནི་འུ་ཚོ་བོད་མི་རིགས་ཀྱི་རྩ་དོན་ཆེད་དུ་སྐུ་ལུས་མེ་མཆོད་ཕུལ་བ་ཡིན་པ་ངོ་ཤེས་པ་གནང་པ་དེ་དགའ་འོས་པ་ཞིག་རེད་བཀྲིན་ཆེ་ཞུ།
གསར་འགྱུར་འདི་བྱུང་ནས་དུས་ཚོད་ 12 ་ཙམ་སོང་བའི་རྗེས་སུ་དུས་བབ་དྲ་ཐོག་ལ་གཞི་ནས་བཀོད་སོང་ངོ་ཐབས་སྐྱོ་བོ་རེད། ངས་ད་ནིང་དུས་ཚོད་ཅུ་གཉིས་ཐོག་ཏུ་དུས་བབ་ལ་ཁ་པར་བཏང་བ་ཡིན་ཏེ་རྩོམ་སྒྲིག་པ་ཕྱོགས་སྐྱོད་གནང་གི་འདུག དེ་ནས་རྩོམ་སྒྲིག་ཕྱག་རོགས་ལ་ཁ་པར་ཇི་ལྟར་བཏང་ཀྱང་ཡ་མེད་བཏང་སོང་། སྔོན་མ་བོད་ནང་གི་མེར་སྲེག་གནས་ཚུལ་ཚང་མ་དུས་བབ་སྔ་ཤོས་འཐོན་ཡོང་ས་ཞིག་ཡིན་། ཐུགས་རྗེས་གཟིགས་རྩོམ་སྒྲིག་ཕྱག་རོགས་ཀྱིས་ལས་ཀ་འཐུས་ཤོར་ལ་གཏོང་གི་འདུག
དྲ་གྲོགས་འཇམ་གཅེས་ལགས། དངོས་གནས་རེད་་ རང་དབང་ལུང་པ་མེད་རུང་ འཛོམས་རྒྱུ་ཧ་ཅང་འཛོམས་འདུག་ རྡ་སའི་མར་མེ་ཁྲོམ་སྐོར་ལ་བལྟོས་དང་ མི་མགོ་བརྒྱ་ཁ་མི་ལོང་གི་
སྐུ་པར་དེར་ཕྱག་འཚལ་ཞུ་རྒྱུ་ཙམ་དང་། མིག་ཆུའི་སྐྱེལ་མ་ཞིག་ལས་གང་ཡང་ཞུ་ཕོད་མ་སོང་།
དཔའ་བོ་ཁོང་ལ་མྱ་ངན་གུས་འདུད་དང་ལྷན་དུ་གསར་འགོད་པ་ལ་ཞུ་རྒྱུར། འོག་གི་དཔའ་རྒོད་ཁོང་གི་མཚན་ལ་རྡོ་རྗེ་དོན་འགྲུབ་ཞེས་འཁོད་པ་དེ་རྡོ་རྗེ་ལྷུན་འགྲུབ་ལ་བཟོ་བཅོས་གནང་རོགས།
༧པཎ་ཆེན་གློད་རེ་མི་འདུག།
༧རྒྱལ་བ་ལོག་རེ་མི་འདུག།
༧མེ་མཆོད་མཚམས་རེ་མི་འདུག།
༧གངས་ལྗོངས་མེ་ཡིས་མཆེད་སོང་།།
དཔའ་བོ་ཁོང་ལ་རྗེས་སུ་ཡིད་རངས་ཡོད་ལ། འདིར་འདུས་པས་དགེ་འདུན་པ་དང་མི་མང་ཚངས་མ་ལ་སྙིང་ཁོངས་རུས་པས་གཏིང་ནས་ཡིད་རངས་ཞུ། འདི་འདྲ་འདུར་འཛོམས་གནང་ཡ་ལས་སླ་པོ་གང་ནས་ཡིན། བཙན་བྱོལ་བ་ཚོས་གཟིགས་དང་།