གཟའ་མིག་དམར་ཉིན་ལ་དྭགས་ཁུལ་དུ་རྒྱལ་གཅེས་དཔའ་བོ་དཔའ་མོ་རྣམ་པའི་ཆེད་མཆོད་འབུལ་སྨོན་ལམ་ཞིག་ཚོགས་འདུག
ཁ་སང་ཕྱི་ཚེས་ ༢༦ ཉིན་གྱི་ཞོགས་པའི་ཆུ་ཚོད་ ༩ སྟེང་། ལ་དྭགས་བསོད་ནམས་གླིང་བོད་མིའི་གཞིས་ཆགས་ཀྱི་ས་གནས་ཆོས་དོན་ལས་ཁུངས་དང་རིག་གཞུང་ཚོགས་ཆུང་གཉིས་ཀྱི་གོ་སྒྲིག་འོག ལ་དྭགས་ཕོ་བྲང་དགེ་འཕེལ་གླིང་དུ་རྟོགས་ལྡན་རིན་པོ་ཆེ་གཙོས་རུ་ཐོག་ལྷུན་འགྲུབ་ཆོས་གླིང་དགོན་དང་། ཀརྨ་འབྲུག་རྒྱལ་ཆོས་གླིང་དགོན་བཅས་ཀྱི་དགེ་འདུན་པ་རྣམས་དབུ་བཞུགས་ཐོག ལྕོག་ལམ་སར་བོན་གྱི་རིག་གཞུང་བསྟི་གནས་ཁང་བཅས་ཀྱིས་བོད་བསྟན་པ་ཆབ་སྲིད་ཀྱི་དོན་དུ་རང་སྲོག་བློས་གཏོང་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་དུ་མཆོད་འབུལ་སྨོན་ལམ་ཞིག་ཚོགས་ཡོད་འདུག
མཆོད་འབུལ་སྨོན་ལམ་གྱི་མཛད་སྒོའི་སྟེང་ལ་དྭགས་ཁུལ་དགོན་སྡེ་ལྷན་ཚོགས་ཀྱི་ཚོགས་གཙོ་དང་། ལ་དྭགས་ནང་པའི་མཐུན་ཚོགས་ཀྱི་ཚོགས་གཙོ་གཉིས་ཀྱིས་གཏམ་བཤད་གནང་ཡོད་པ་མ་ཟད། མཆོད་འབུལ་སྨོན་ལམ་དེར་བོད་མི་ དང་ས་གནས་ཡུལ་མི་བཅས་ཁྱོན་མི་ ༢༠༠༠ ལྷག་མཉམ་ཞུགས་ཀྱིས་ཉིན་ཧྲིལ་བོར་མ་ཎི་དང་སྒྲོལ་མ་གསོག་འདོན་གནང་ཡོད་འདུག
གསར་འགོད་པ། བནྡེ་སྐྱབས།
ཤིན་ཏུ་ལེགས་སོ།།
ནམ་ཟླ་གྲང་མུ་རེད་ཀྱང་འདི་ལྟར་འགུལ་བར་ཧ་ཅང་བསྟོད་དོ།།
ང་ཚོ་ཕྱོགས་གང་ས་གང་ནས་འདི་ལྟར་འགུལ་དགོས་པ་ལས་བསྡད་ཚོད་ཡོད་པ་མ་རེད་དོ།།
གསར་འགོད་པ་ལགས། རི་ཐོག ཅེས་པ་དེ་རུ་ཐོག་ཏུ་བཅོས་དགོས་སོ།།
བཀྲིས་བདེ་ལེགས་སོ།།