རྒྱ་ནག་གི་ཚོགས་ཆེན་བཅོ་བརྒྱད་དང་བོད་དོན།

ཟླ་བ་བཀྲིས།    རྡ་རམ་ས་ལ།

རྒྱ་ནག་དམར་ཤོག་ཚོགས་པའི་ཏང་གི་རྒྱལ་ཡོངས་ཚོགས་ཆེན་བཅོ་བརྒྱད་པ་དེ། འདི་ཟླའི་ཚེས་  ༨  ཉིན་ནས་སྐོང་འཚོགས་བྱ་བཞིན་ཡོད་ཅིང།  ད་ལྟ་རྒྱལ་ཡོངས་ཀྱི་བརྙན་འཕྲིན་དང།  རླུང་འཕྲིན།  ཚགས་པར།  དུས་དེབ།  དྲ་རྒྱ་སོགས་དྲིལ་བསྒྲགས་ཀྱི་འཕྲུལ་འཁོར་ཡོད་ཚད་སྒོ་ཕྱེ་ནས་ཚོགས་ཆེན་བཅོ་བརྒྱད་པ་བདེ་བླག་ཡོང་ཆེད་དང།  ཐ་ན་བྱིས་པ་ལོ་བརྒྱད་ཀྱིས་ཀྱང་ད་ཐེངས་ཀྱི་ཚོགས་ཆེན་དེར་དོ་སྣང་དང་། མ་མཐར་ཡང་ཀླད་པའི་ནང་བག་ཆགས་ཡོང་ཐབས་བྱེད་ཀྱི་ཡོད།  དེང་སྐབས་རྒྱལ་སྤྱི་དང་རྒྱ་ནང་གང་སར་ཚོགས་ཆེན་དེ་དང་འབྲེལ་བའི་གླེང་ཕྱོགས་སྣ་ཚོགས་ཡོད་ཅིང།  ཕྱོགས་གཅིག་གིས་ད་རེས་ཀྱི་ཚོགས་ཆེན་དེ་བརྒྱུད་གོམས་པ་རིམ་བགྲོད་ཀྱིས་ཞི་ཅིན་ཕེན་གཙོ་བོ་བྱས་པའི་མི་རབས་ལྔ་པའི་དབང་འཛིན་པའི་དཔུང་ཁག་གིས་རྒྱ་ནག་ནང་ལོ་རྒྱུས་རང་བཞིན་གྱི་དམངས་གཙོའི་གོམས་སྟབས་ཆེན་པོ་ཞིག་སྤོ་སྲིད་པའི་ངོས་འཛིན་བྱེད་མཁན་ཡོད་པ་དང།  ཡང་རིགས་འགའ་ཤས་ཀྱིས་ཚོགས་ཆེན་དེ་བརྒྱུད་ནས་རྒྱ་ནག་གི་མི་རིགས་སྲིད་ཇུས་དང་ཆོས་ལུགས་སྲིད་ཇུས་སོགས་ལའང་བཟང་ཕྱོགས་ཀྱི་འགྱུར་ལྡོག་ཡོང་རྒྱུའི་རེ་སྒུག་བྱེད་མཁན་ཡང་ཡོད།  བཙན་བྱོལ་བོད་མི་ནི་རེ་སྒུག་དེ་ལྟར་བྱེད་མཁན་གྱི་གྲས་ཤིག་རེད།

དང་པོ།   མི་རབས་ལྔ་པའི་དབང་འཛིན་དཔུང་ཁག

ཚོགས་ཆེན་བཅོ་བརྒྱད་པའི་ཐོག་ད་ལྟའི་ལས་ཐོག་སྲིད་འཛིན་གཞོན་པ་ཞི་ཅིན་ཕིང་དང།  སྲིད་བློན་གཞོན་པ་ལིས་ཁི་ཆཱང་ཕུད་པའི་དེ་མིན་ཚང་མ་རྒན་ཡོལ་འགྲོ་གི་ཡོད་པར་བརྟེན།  མི་རབས་ལྔ་པའི་དབང་འཛིན་པའི་དཔུང་ཁག་ནང་མི་སྣ་ག་ཚོད་བསླེབ་ཀྱི་ཡོད་པ་དང་།  སུ་ཞིག་བསླེབ་ཀྱི་ཡོད་མེད་ཀྱི་གནད་དོན་དེར་དོ་སྣང་དང་། དེའི་ཐད་མི་སྣ་མང་པོ་ཞིག་གིས་ཚོད་དཔག་སྣ་ཚོགས་བྱེད་ཀྱི་ཡོད་ཅིང།  ཞི་ཅིན་ཕེན་དང་ལིས་ཁི་ཆཱང་གཉིས་ཀྱི་ཐད་རྩོད་པ་དེ་ཙམ་མེད་པ་ལས།  དེ་མིན་གྱི་མི་སྣ་ཞན་དག་སུ་ཞིག་སླེབས་མིན་ཐད་རྩོད་པ་རྒྱག་གི་ཡོད།  ང་རང་གི་ལྟ་ཚུལ་ལྟར་ན་ཞི་ལིས་གཉིས་ཕུད་པའི་དེ་མིན་ལི་ཡོན་ཁྲའོ་དང།  ཀྲང་ཏིག་ཅང།  ཝང་ཡང །  ཝང་ཆིས་ཧྲན།  ཡུས་ཀྲན་ཧྲན།  ལེའུ་ཡུན་ཧྲན།  ཀྲང་ཀའོ་ལིན་བཅས་རེད།  གལ་ཏེ།  མི་བདུན་ལ་ཉུང་འཕྲི་བྱས་པའི་དབང་དུ་བཏང་ན།  དྲིལ་བསྒྲགས་དྲུང་ཆེ་ལེའུ་ཡུན་ཧྲན་དང་།  ཐན་ཅིང་དམར་ཤོག་དྲུང་ཆེ་ཀྲང་ཀའོ་ལིན་ཕྱིར་འབུད་རྒྱུའི་ཉེན་ཁ་ཡོད།   ཡང་མི་མང་པོས་ད་ལྟའི་མི་དགུ་ནས་མི་བདུན་ལ་ཉུང་འཕྲི་བྱས་ཏེ།  དབུས་སྲིད་ཁྲིམས་ལྷན་ཁང་དང་དྲིལ་བསྒྲགས་ལྷན་ཁང་གཉིས་ཁུ་བསྡུ་བྱ་རྒྱུ་ཡིན་པ་དང།  དེ་ནི་བཟང་ཕྱོགས་ཀྱི་འགྱུར་བ་ཆེན་པོ་ཞིག་ཡིན་པ་མ་ཟད།  པའོ་ཞི་ལའེ་གཏོར་ཕམ་བཏང་བ་དེ་ནི་དཔེ་མཚོན་ཞིག་དང་།  ཧུའུ་ཅིན་ཐའོ་དང་ཝུན་ཅཱ་པའོ་ཡིས་སྣེ་ཁྲིད་བྱས་པའི་བསྒྱུར་བཅོས་ཤོག་ཁག་གི་རྒྱལ་ཁ་ཆེན་པོ་ཞིག་ལ་ངོས་འཛིན་བྱེད་ཀྱི་ཡོད།  ཡང་སྙིང་རྒྱ་ནག་ནང་འབྱུང་འགྱུར་མི་རྣམས་ཀྱིས་རེ་བའི་ཚོད་དཔག་ལྟ་བུའི་བཟང་ཕྱོགས་ཀྱི་འགྱུར་བ་དེ་འདྲ་ཞིག་ཡོང་སྲིད་དམ།  ཞེ་ན།  གཙོ་ཆེ་ཤོས་དེ་འབྱུང་འགྱུར་ལོ་ལྔའམ་བཅུའི་ནང་རྒྱ་ནང་དང་རྒྱལ་སྤྱིའི་འགྱུར་ལྡོག་སོགས་རྒྱུ་རྐྱེན་མང་པོ་དང་འབྲེལ་བ་ཡོད་པས།  འདི་ལྟར་ཡོང་གི་རེད་།  འདི་ལྟར་ཡོང་གི་མ་རེད་ཅེས་སུས་ཀྱང་ལུང་བསྟན་བམ་པོ་ཞིག་རྒྱག་མི་ཐུབ།  ཡིན་ནའང།  དམར་ཤོག་རང་ངོས་ནས་བཤད་ན་མི་རྣམས་ཀྱིས་རེ་བ་བྱས་པ་ལྟ་བུའི་འགྱུར་བ་དེ་འདྲ་ཞིག་གཏོང་མི་སྲིད།

རྒྱ་ནག་གཞུང་གི་བཤད་སྟངས་ལྟར་བྱས་ན།   བརྟན་ལྷིང་དང་འཕེལ་རྒྱས་ནི་ལྟེ་བའི་གནད་དོན་ཡིན་པ་དང།  འཕེལ་རྒྱས་ལ་བརྟེན་ནས་བརྟན་ལྷིང་ཡོང་ཐབས་བྱེད་དགོས་པ་དང།  བརྟན་ལྷིང་གི་ཁོར་ཡུག་ཞིག་མེད་ན་འཕེལ་རྒྱས་ཡོང་མི་སྲིད་པའི་ངོས་འཛིན་བྱེད་ཀྱི་ཡོད།   རྒྱ་ནང་གི་བརྟན་ལྷིང་དང་བདེ་འཇགས་ཀྱི་གནད་དོན་ཡིན་ནའང་འདྲ།   རྒྱལ་སྤྱིའི་མཚན་སྙན་གྱི་ཐོག་ནས་བཤད་ནའང་འདྲ་།   སྲིད་ཁྲིམས་ལྷན་ཁང་དང་དྲིལ་བསྒྲགས་ལྷན་ཁང་གཉིས་ནི་ལྷན་ཁང་གཞན་དག་ལས་དགོས་མཁོ་ཆེ་བ་མེད་ནའང་ཆུང་བ་མེད།  བརྟན་ལྷིང་དང་བདེ་འཇགས་ཀྱི་འགྲོ་སོང་དེ་རྒྱལ་སྲུང་གི་འགྲོ་སོང་ལས་མང་བ་གཏོང་དགོས་པའི་ཚད་ལ་བསླེབས་ཟིན་པས།  འདི་ལྟ་བུའི་གཉན་འཕྲང་ཆེ་བའི་སྐབས་སྲིད་ཁྲིམས་ལྷན་ཁང་ཁུ་བསྡུ་བྱ་རྒྱུའི་གནད་དོན་དེ་བས་ཀྱང་ཡོང་མི་སྲིད།   ཅི་སྟེ་ལྷན་ཁང་དེ་གཉིས་ཁུ་བསྡུ་བྱས་པའི་དབང་ཏུ་བཏང་ནའང།  དེ་ནི་ཐབས་བྱུས་རང་བཞིན་གྱི་རྣམ་པ་ཞིག་སྟེ།  ཕྱི་ཡི་རྣམ་པ་འགྱུར་བ་ལས་ནང་གི་ངོ་བོ་འགྱུར་མི་སྲིད་ལ།  མི་ལ་འགྱུར་བ་བཏང་བ་ཙམ་ལས་སྲིད་ཇུས་ལ་འགྱུར་བ་ཡོང་མི་སྲིད།

 དཔེར་ན།  བོད་ཚུད་པའི་གྲངས་ཉུང་མི་རིགས་ཙམ་མ་ཟད།  རྒྱ་ནག་ནང་ཁུལ་གྱི་ཞིང་ཆེན་དང།  གྲོང་ཁྱེར།  ས་གནས་གང་སར་སྤྱི་ཚོགས་བརྟན་སྲུང་གི་ཚན་པ་དང་ལས་ཁུངས་རྒྱ་སྐྱེད་བྱེད་བཞིན་པའི་སྒང་ཡིན་པ་ལས་ཁུ་བསྡུ་བྱེད་པའི་དུས་ཚོད་མ་རེད།   དཔེར་ན།  སྤྱི་ལོ  ༢༠༡༡  ལོར་བོད་གཅིག་པུར་ཉེན་རྟོག་ས་ཚིགས་  ༡༣༤  གསར་འཛུགས་བྱས་ཡོད་པ་དང།  དེ་མིན་གྱི་གཞིས་རྩེ་དང།  ལྷོ་ཁ།  ནག་ཆུ།  ཉིང་ཁྲི།  ཆབ་མདོ།  མངའ་རིས་བཅས་ཀྱི་ནང་ ༦༧༦ གསར་འཛུགས་བྱ་རྒྱུའི་འཆར་གཞི་ཡོད།  ཐ་ན་ད་ལྟའི་དུས་སྐབས་སུ་རྒྱ་ནག་གི་པེ་ཅིང་གྲོང་ཁྱེར་གཅིག་པུའི་ནང་ས་གནས་བདེ་སྲུང་གི་མི་སྣ་ཁྲི་ཚོ་  ༡༤༠ ལྷག་ཙམ་འགྲེམས་འཇོགས་བྱས་ཡོད་པ་མ་ཟད།  པེ་ཅིང་གྲོང་མིས་ཁང་པའི་སྒེའུ་ཕྱེ་མི་ཆོག་པ་དང།  ཚལ་འཚོང་མཁན་ཚོས་ཚལ་གྲི་ཉར་མི་ཆོག་པ།  རླང་འཁོར་གྱི་སྒེའུ་ཁུང་ཕྱེ་མི་ཆོག་པ།  ཁྲོམ་རྭའི་ཐོག་ཕྲུ་གུའི་རྩེད་ཆས་ཀྱི་གནམ་གྲུའི་རིགས་ཀྱང་འཚོང་མི་ཆོག་པ་བཅས། ད་ལྟའི་བ་ཉལ་སྟངས་ལ་བལྟས་ན་འབྱུང་འགྱུར་བེའུ་གང་འདྲ་ཞིག་སྐྱེ་སྲིད་པ་ཤེས་ཐུབ།

གནད་དོན་གཞན་ཞིག་ནི་དྲིལ་བསྒྲགས་ལས་དོན་རེད།   རྒྱ་ནག་དམར་ཤོག་ཚོགས་པའི་གསར་བརྗེ་དང་།  འཛུགས་སྐྲུན།  བསྒྱུར་བཅོས་བཅས་ཀྱི་ནང་དྲིལ་བསྒྲགས་ལས་དོན་ཀྱིས་ནུས་པ་ངེས་ཅན་ཞིག་ཐོན་ཡོད་ལ།  རྒྱ་ནག་དམར་ཤོག་ཚོགས་པ་ད་བར་གནས་ཐུབ་པ་དེ་ནི་ཕྱོགས་གཅིག་ནས་དྲིལ་བསྒྲགས་ཀྱི་ལས་དོན་དང་འབྲེལ་བ་ཡོད་པར་ངོས་འཛིན་བྱེད་མཁན་མང་པོ་ཡོད་ལ།   དེར་རྒྱུ་མཚན་ཡང་ངེས་ཅན་ཞིག་ཡོད།   གཞུང་འབྲེལ་གྱི་བརྙན་འཕྲིན་དང།  རླུང་འཕྲིན།  ཚགས་པར།  དུས་དེབ།  དྲ་རྒྱ་ཙམ་མ་ཟད།  ཟློས་གར་དང།  རོལ་དབྱངས།  སྒྱུ་རྩལ།  གཏམ་བརྗོད།  གློག་བརྙན་སོགས་རིག་གནས་ཀྱི་ཁྱབ་ཁོངས་ཚང་མ་དྲིལ་བསྒྲགས་ལས་དོན་གྱི་ཁྱབ་ཁོངས་ཡིན་པ་དང།  ཁོང་ཚོས་སོ་སོའི་ལས་རིགས་མི་འདྲ་བ་དང་ངོ་བོ་མི་འདྲ་བའི་ཐོག་ནས་རྒྱ་ནག་དམར་ཤོག་ཚོགས་པར་སྲུང་སྐྱོབ་བྱེད་དགོས་པ་སྟེ།  རྩོམ་པ་པོ་ཞིག་ཡིན་ན་རང་གི་རྩོམ་ཡིག་གི་ལམ་ནས་དམར་ཤོག་ཚོག་པར་བསྟོད་ཚིག་འབྲི་དགོས་པ་དང།   གཞས་པ་ཞིག་ཡིན་ན་རང་གི་སྙན་འཇེབས་ལྡན་པའི་གླུ་དབྱངས་ལ་བརྟེན་ནས་དམར་ཤོག་ཚོགས་པར་བསྟོད་གླུ་ལེན་དགོས་པ།   རི་མོའི་སྒྱུ་རྩལ་མཁན་ཞིག་ཡིན་ན་རང་གི་ལག་པའི་པིར་རྩལ་ལ་བརྟེན་ནས་དམར་ཤོག་ཚོགས་པར་བསྟོད་གླུ་ལེན་པའི་རི་མོ་འབྲི་དགོས་པ།  དགོད་བྲོའི་གཏམ་བརྗོད་མཁས་པ་ཞིག་ཡིན་ཚེ།   རང་གི་ལུས་ངག་ཡིད་གསུམ་གྱི་སྒྱུ་རྩལ་ལ་བརྟེན་ནས།   དམར་ཤོག་ཚོགས་པར་བསྟོད་བསྔགས་ཀྱི་གཏམ་བརྗོད་འཁྲབ་སྟོན་བྱེད་དགོས་པ་སོགས་ལུས་ངག་ཡིད་གསུམ་གྱིས་དམར་ཤོག་ཚོགས་པར་བསྟོད་གླུ་ལེན་དགོས། 

དེའི་རྐྱེན་གྱིས་དྲིལ་བསྒྲགས་ལྷན་ཁང་ནི་ཞི་བའི་ཐབས་ལ་བརྟེན་ནས་དམར་ཤོག་སྲུང་སྐྱོབ་བྱེད་མཁན་དང།  སྲིད་ཁྲིམས་ལྷན་ཁང་ནི་དྲག་ཤུགས་ལ་བརྟེན་ནས་དམར་ཤོག་སྲུང་སྐྱོབ་བྱེད་མཁན་ཞིག་རེད།  ཞི་དྲག་ཟུང་འབྲེལ་གྱི་མ་ལག་དེ་གཉིས་མེད་ན།  དམར་ཤོག་ཚོགས་པའི་ལས་དབང་དེ་ད་ལྟ་གནས་སྟངས་གཞན་ཞིག་ཡིན་སྲིད་ལ།  ད་བར་རྒྱུན་གནས་ཐུབ་པ་དེ་ཡང་ཞི་དྲག་གི་མ་ལག་དེ་གཉིས་དང་འབྲེལ་བ་ཡོད།  རྒྱལ་ཡོངས་རང་བཞིན་གྱི་དྲིལ་བསྒྲགས་ཀྱི་འཕྲུལ་ཆས་དག་སྒོ་ཕྱེ་བ་ཙམ་གྱིས་རྒྱ་ནག་གི་གནམ་སའི་ཁྱོན་ལ་དམར་ཤོག་ཚོགས་པ་ནི་རྒྱལ་སྲས་བྱང་ཆུབ་སེམས་དཔའ་ལྟ་བུའི་གཟུགས་བརྙན་ཞིག་བསྐྲུན་ཐུབ་ཀྱི་ཡོད་ལ།  མི་སྣ་མང་པོ་ཞིག་ཀྱང་རྣམ་པ་འདྲ་མིན་གྱིས་དམར་ཤོག་ལ་བསྟོད་གླུ་ལེན་པའི་གསར་བརྗེའི་བྱེད་སྒོའི་ནང་བློ་འགུག་ཐུབ་ཀྱི་ཡོད།  དེའི་རྐྱེན་གྱིས་མི་བདུན་ལ་ཉུང་འཕྲི་བྱས་ཏེ་དབུས་སྲིད་ཁྲིམས་ལྷན་ཁང་དང་དྲིལ་བསྒྲགས་ལྷན་ཁང་གཉིས་ཁུ་བསྡུ་བྱས་པའི་དབང་དུ་བཏང་ནའང།  ཞི་དྲག་ཟུང་འབྲེལ་གྱི་མ་ལག་ལྡན་པའི་ལམ་ལུགས་དེ་གཉིས་ཁུ་བསྡུ་བྱེད་མི་སྲིད་པར།  དེ་ལས་ལྡོག་ཏེ་དེའི་སྔར་ཡོད་ཀྱི་ནུས་པ་ཆེ་རུ་གཏོང་ངེས་རེད།

གཉིས་པ།  འཐབ་རྩོད་དང་མཉལ་ལས།

དམར་ཤོག་རྒྱལ་ཁབ་མང་པོ་ཞིག་འཐོར་བཤིག་སོང་ཡོད་ཀྱང།  རྒྱ་ནག་དམར་ཤོག་ཚོགས་པ་ད་དུང་ཡང་འཐོར་བཤིག་ཕྱིན་མེད་པར་དེ་ལས་ལྡོག་སྟེ་དེའི་ཤུགས་རྐྱེན་གྱི་ནུས་པ་ཆེ་རུ་འགྲོ་ཐུབ་པ་ནི།  གོང་གི་ཞི་དྲག་ཟུང་འབྲེལ་གྱི་ཐབས་བྱུས་དེ་གཉིས་ཕུད།  ད་དུང་གལ་ཆེའི་གནད་དོན་གཞན་ཞིག་ནི།  རྒྱ་ནག་གཞུང་གིས་ཚོགས་པ་གཅིག་གིས་སྲིད་དབང་སྒེར་གཅོད་བྱས་ཡོད་ཀྱང།  སྲིད་འཛིན་དང།  སྲིད་བློན།  གྲོས་ཚོགས་ཀྱི་ཚོགས་གཙོ་ཙམ་མ་ཟད།  ཁོང་ཚོའི་ལས་རོགས་ཀྱི་དབུས་ཆབ་སྲིད་ལྷན་ཁང་གི་རྒྱུན་ལས་མི་སྣ་ཚང་མ་དུས་ཡུན་ལོ་ལྔའི་ཐོག་བརྗེ་རེས་བྱེད་པའི་ལམ་ལུགས་གསར་འཛུགས་བྱས་པ་དེས།   མི་གཅིག་གིས་ཚེ་གང་མགོ་ཁྲིད་བྱེད་པའི་དཀའ་ངལ་སེལ་ཐུབ་པ་མ་ཟད།  དེ་ཡང་ལོ་ན་  ༦༨  ཡན་རྒྱལ་ཁབ་ཀྱི་སྲིད་འཛིན་ཙམ་མ་ཟད།  དབུས་རྒྱུན་ནང་འགྲོ་མི་ཆོག་པའི་གཏན་འབེབས་བཟོས་པ་དེས་ལོ་ན་རྒས་དྲགས་པའི་དབང་གིས་འབྱུང་སྲིད་པའི་དཀའ་ངལ་དང་ལས་འཛོལ་ལས་གཡོལ་ཐུབ་ཀྱི་ཡོད།  གནད་དོན་འདིས་རྒྱ་ནག་མི་མང་གི་ཁྲོད་དུ་དམངས་གཙོའི་ལམ་ལུགས་ལག་ལེན་བྱས་པའི་ཚོར་སྣང་སྐྲུན་གྱི་ཡོད་པ་མ་ཟད།  དེ་ཡང་ལོའི་ཚད་གཞི་དང་དུས་ཚོད་ཀྱི་ཚད་གཞི་གཏན་འབེབས་བྱས་པ་དེས་དེ་བས་ཀྱང་མི་མང་གི་བསམ་བློའི་ནང་གསར་གཏོད་ཀྱི་བག་ཆགས་བསྐྲུན་གྱི་ཡོད།

དེ་དང་ཆབས་ཅིག་ཏུ་ད་ཡོད་ཀྱི་རྒྱུན་ལས་མི་སྣ་ཚང་མའི་ལོ་རྒྱུས་ཀྱི་རྒྱབ་ལྗོངས་དང་འབྱུང་ཁུངས་གཅིག་པ་ཡིན་པའི་ཁར།  ཁོང་ཚོའི་ཐུན་མོང་གི་ཁེ་ཕན་ཡང་སྡིངས་ཆ་གཅིག་གི་ཐོག་ལ་གནས་ཡོད་ཅིང།  སྡིངས་ཆ་དེ་ཤོར་ན་སྡིངས་ཆ་གཞན་ཞིག་གི་ཐོག་ནས་ཁེ་ཕན་ལེན་ས་མེད་པ་མ་ཟད།  ཐ་ན་སོ་སོའི་ནང་མི་བུ་ཕྲུག་གི་ཁེ་ཕན་ཡང་སྡིངས་ཆ་དེ་རང་གི་ཐོག་གནས་ཡོད་པར་བརྟེན།  ཐུན་མོང་གི་ཁེ་ཕན་སྲུང་སྐྱོབ་བྱ་རྒྱུ་གཙོ་བོ་དང་བསམ་ཚུལ་མི་མཐུན་པ་ཕལ་པ་ཙམ་རེད།   ཅི་སྟེ་སྡིངས་ཆ་དེ་ཤོར་ན་རང་ཉིད་ཀྱི་ཁེ་ཕན་ཤོར་བ་ཙམ་མ་ཟད།  རང་གི་ཚེ་སྲོག་བདེ་འཇགས་ལའང་ཉེན་ཁ་ཡོད་པར་བརྟེན།   སྡིངས་ཆ་དེའི་དོན་དུ་བློས་གཏོང་ག་རེ་ཡིན་ནའང་བྱེད་སྲིད།  པའོ་ཞི་ལའེ་གཏོར་ཕམ་བཏང་དེ་ནི་དཔེ་མཚོན་ཡག་ཤོས་ཞིག་རེད།  པའོ་ཞི་ལའེ་གཏོར་ཕམ་གཏོང་རྒྱུར་ཧུའུ་ཅིན་ཐའོ་དང་ཝན་ཅཱ་པའོ་ཡིས་འཛེམ་ཟོན་གང་ཡང་བྱས་མེད་ལ།  ཐ་ན་ཁོ་པའི་ཕྱོགས་གཏོགས་ཅང་ཙེ་མཱེན་དང་ཀྲིག་ཡུང་ཁཱང་གིས་ཀྱང་པའོ་ཞི་ལའེ་སྲུང་སྐྱོབ་བྱ་རྒྱུ་དང།  དམར་ཤོག་སྲུང་སྐྱོབ་བྱ་རྒྱུ་གཉིས་ཀྱི་ནང་ནས་དམར་ཤོག་སྲུང་སྐྱོབ་བྱ་རྒྱུ་གཙོ་བོར་བཞག་ཡོད་པ་དེ་ཁོ་ནས་ཀྱང་ར་སྤྲོད་བྱས་ཡོད།  དམར་ཤོག་ཚོགས་པ་ནི་ཁོང་ཚོའི་ཚེ་སྲོག་གི་བརྟེན་ས་ཡིན་པ་དང།  དམར་ཤོག་འཆི་ན་ཁོ་ཚོ་རང་ཉིད་ཀྱང་འཆི་ལམ་དུ་འགྲོ་གི་ཡོད།  དེའི་རྐྱེན་གྱིས་དམར་ཤོག་ཚོགས་པའི་ནང་ཁུལ་དུ་འཐབ་རྩོད་ཇི་ཙམ་ཡོད་ཀྱང།  ཁོང་ཚོའི་ཐུན་མོང་གི་ཁེ་ཕན་སྲུང་སྐྱོབ་བྱ་རྒྱུའི་ཐད་འཛེམ་ཟོན་གང་ཡང་བྱེད་མི་སྲིད།

རྒྱལ་ཁབ་ཀྱི་དོན་ཆེན་ཚང་མ་ཁོང་ཚོས་ཐག་གཅོད་བྱེད་ཀྱི་ཡོད་པ་མ་ཟད།  ཁ་གཏད་ཀྱི་ཚོགས་པ་མེད་པར་བརྟེན།  མི་སྣ་དགུ་བོ་ཙམ་མ་ཟད་རྒྱལ་ཡོངས་ཀྱི་སྟོབས་ཤུགས་ཚང་མ་རྡོག་རྩ་ཆིག་སྒྲིལ་ཐུབ་ཀྱི་ཡོད་སྟབས།  སྟོབས་ཤུགས་ཁ་འཐོར་འགྲོ་བའི་གནས་ཚུལ་སྔོན་འགོག་བྱུང་ཡོད།  དམངས་གཙོའི་ནང་མ་མཐར་ཡང་ཆབ་སྲིད་ཀྱི་ཚོགས་པ་གཉིས་སམ་གསུམ་དང་།  ཐ་ན་བཞི་ལྔ་སོགས་ཡོད་པའི་དབང་གིས་འབྱུང་སྲིད་པའི་གནས་ཚུལ་གཅིག་ནི། ཚོགས་པ་ཕན་ཚུན་དང་ཤོག་ཁག་ཕན་ཚུན་དབར་ཁེ་ཕན་འཕྲོག་རེས་དང་མཚན་སྙན་རྩོད་རེས་ཀྱི་ཆེད་ཕན་ཚུན་སྐྱོན་མེད་སྐྱོན་འདོགས་བྱེད་པའི་གནས་ཚུལ་རྟག་ཏུ་འཕྲད་མུས་ཡིན་པ་དང།  ཐ་ན་སོ་སོའི་ཤོག་ཁག་གི་མི་མང་བེད་སྤྱོད་བྱས་ཏེ་གང་སར་ངོ་རྒོལ་དང་སྐྱོན་བརྗོད་བྱེད་པའི་གནས་ཚུལ་ཐོན་མུས་རེད།  གཞུང་འཛིན་ཚོགས་པས་དྲང་བཞག་ལུགས་མཐུན་གྱི་སྲིད་ཇུས་ཇི་འདྲ་ཞིག་ལག་སྟར་བྱས་ནའང།   ཁ་གཏད་ཚོགས་པས་སྐྱོན་མེད་སྐྱོན་འདོགས་དང།  ཐ་ན་གཞུང་འཛིན་ཚོགས་པའི་ལས་གཞིའི་གོ་རིམ་དཀྲུག་པ་སོགས་རྒྱལ་ཁབ་ཀྱི་ལས་དོན་ལ་བར་ཆད་ཡོང་བ་དེ་ཡང་རྒྱུན་མཐོང་གི་གནས་ཚུལ་ཞིག་རེད།  གནས་ཚུལ་འདི་རིགས་ཀྱི་ཐོག་ནས་བལྟས་ན་བོད་དོན་འཐབ་རྩོད་ཀྱི་ལས་དབང་དེ་སྔར་བཞིན་རབ་རིབ་ཀྱི་སྣང་བ་ཙམ་ལས་མེད།