དགེ་ལྡན་བྱང་རྩེ་ནས་མཆོད་འབུལ།

དེ་རིང་དགེ་ལྡན་བྱང་རྩེ་གྲྭ་ཚང་ནས་ཉེ་ཆར་རང་ལུས་མེར་བསྲེགས་གནང་རྣམས་ཀྱི་ཆེད་མཆོད་འབུལ་སྨོན་ལམ་རྒྱ་ཆེན་ཞིག་གནང་ཡོད་འདུག     

དེ་རིང་ཕྱི་ཚེས་ ༨ ཉིན་གྱི་ཕྱི་དྲོ་རྒྱ་གར་ལྷོ་ཕྱོགས་ཀྱི་གདན་ས་ཆེན་པོ་འབྲོག་རི་བོ་དགེ་ལྡན་པའི་ཡ་གྱལ་བྱང་རྩེ་གྲྭ་ཚང་གིས། ཉེ་ཆར་བོད་ནང་བསྟུད་མུར་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་དུ།  གྲྭ་ཚང་གི་དགེ་འདུན་འདུས་པ་རྒྱ་མཚོ་ལྷན་བཞུགས་ཐོག་སྨོན་ལམ་མཆོད་འབུལ་རྒྱ་ཆེན་ཞིག་ཚོགས་ཡོད་འདུག

འདི་གར་གནས་ཚུལ་མཁོ་གཏོང་བས་བརྗོད་པ་ལྟར། མཆོད་འབུལ་སྨོན་ལམ་སྐབས་བྱང་རྩེ་གྲྭ་ཚང་གི་དགེ་བསྐོས་བསམ་བློ་བློ་བཟང་ཕུན་ཚོགས་ལགས་ཀྱིས། ཉེ་ཆར་བོད་ནང་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད།  དགེ་འདུན་པ་རྣམས་ཀྱིས་ཁོང་རྣམས་འཕགས་པ་སྤྱན་རིས་གཟིགས་ཀྱིས་རྗེས་སུ་བཟུང་སྟེ་དལ་འབྱོར་གྱི་མི་ལུས་ཐོབ་པ་དང་། སླར་ཡང་གངས་ཅན་པའི་ལྗོངས་སུ་སྐྱེས་ཞིང་རང་དབང་ལོངས་སུ་སྤྱོད་པའི་སྐལ་བ་དང་ལྡན་པའི་ཐུགས་སྨོན་སྐྱབས་འཇུག་ཞུ་རྒྱུ་མ་ཟད། བོད་ཀྱི་བདེན་མཐའ་མྱུར་དུ་སེལ་བའི་སྨོན་ལམ་དང་། རྒྱལ་གཅེས་དཔའ་བོ་དཔའ་མོ་ཁོང་རྣམས་ལ་གདུང་སེམས་མཉམ་སྐྱེད་དང་ཤུལ་ལུས་ནང་མི་ཡོངས་ལ་ཐུགས་གསོ་གནང་དགོས་པ་བརྗོད་ཡོད་འདུག 

ཟླ་འདིའི་ཕྱི་ཚེས་ ༧ དང་ ༨ ཉིན་གཉིས་རིང་བོད་ནང་བོད་མི་ ༦ གིས་རང་ལུས་མེར་བསྲེགས་བཏང་སྟེ། བོད་ལ་རང་དབང་དགོས་པ་དང་། ༸རྒྱལ་བ་རིན་པོ་ཆེ་བོད་ལ་གདན་འདྲེན་དགོས་པའི་སྐད་འབོད་གནང་ཡོད་པ་རེད།