གཟའ་ཕུར་བུའི་ཉིན་ཝཱ་ཎ་ས་གནས་རང་བདེན་དང་སུད་ཚོང་མཉམ་འབྲེལ་ཐོག རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་བསྔོ་སྨོན་མཆོད་འབུལ་གནང་འདུག
འདི་གར་གནས་ཚུལ་བཏང་འབྱོར་བྱུང་དོན། ཟླ་འདིའི་ཕྱི་ཚེས་ ༡༥ ཉིན་ཝཱ་ཎ་ས་གནས་རང་བདེན་ཚོགས་ཆུང་དང་སུད་ཚོང་ཚོགས་པ་ཐུན་མོང་གི་གོ་སྒྲིག་འོག བོད་བསྟན་སྲིད་ཆེད་ལུས་དང་ལོངས་སྤྱོད་ཡོངས་རྫོགས་བློས་གཏོང་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ལ་གདུང་སེམས་མཉམ་སྐྱེད་མཚོན་ཆེད་བསྔོ་སྨོན་མཆོད་འབུལ་ཞིག་གནང་སྟེ། སྔ་དྲོ་སུད་ཚོང་རྭ་བར་བསང་གསོལ་དང་དར་ཤིང་བསྒྲེངས་འཛུགས་བྱས་ཏེ། བཟང་སྤྱོད་སྨོན་ལམ་དང་༸རྒྱལ་བའི་ཞབས་བརྟན་གསོལ་འདེབས། སྒྲོལ་མ་སོགས་གསོག་སྒྲུག་བྱས་ཡོད་འདུག
དེ་བཞིན། ཉིན་རྒྱབ་ཝཱ་ཎ་བོད་དགོན་འདོད་རྒུ་འཁྱིལ་དུ་སྤྱི་འཐུས་སློབ་དཔོན་རྣམ་དག་གཙུག་ཕུད་གཙོས། ཝཱ་ཎ་གཙུག་ལག་སློབ་གཉེར་ཁང་གི་དགེ་ལས་སློབ་གཉེར་བ་རྣམས་དང་ས་གནས་བོད་མི་བཅས་ནས། བོད་ཀྱི་བདེན་པའི་འཐབ་རྩོད་ཆེད་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་སྐུ་པར་གྱི་འཕྲེད་དར་མདུན་མར་མེ་མཆོད་འབུལ་གནང་ཐོག སྒྲོལ་མ་དང་བཟང་སྤྱོད་སྨོན་ལམ། སྨོན་ལམ་རྣམ་གསུམ་སོགས་གསོག་སྒྲུབ་གནང་སྟེ། རྒྱལ་གཅེས་དཔའ་བོ་དཔའ་མོ་རྣམས་ཀྱི་ཐུགས་ཀྱི་བཞེད་དོན་ཡིད་བཞིན་འགྲུབ་པའི་གསོལ་བ་སྨོན་ལམ་བཏབ་ཡོད་འདུག
