གཟའ་ཕུར་བའི་ཉིན་དབྱིན་ཇིའི་ཁྲིམས་དཔོན་ལཱེ་ཝེ་སན་གྱིས་བརྒྱུད་ལམ་ཉམས་ཞིབ་སྙན་ཐོ་ཞིག་ཁྱབ་བསྒྲགས་བྱས་ཏེ། མ་འོངས་པར་དབྱིན་ཡུལ་ནང་གི་གསར་ལམ་ཐོག་ཁྲིམས་གཞི་གསར་པ་གཏན་འབེབས་དང་། བརྒྱུད་ལམ་ལ་ལྟ་རྟོག་དང་ཁྲིམས་གཞི་ལག་བསྟར་བྱེད་མཁན་གྱི་སྒྲིག་འཛུགས་གསར་འཛུགས་བྱ་དགོས་པའི་བསམ་ཚུལ་བཏོན་ཡོད་འདུག
ཟླ་སྔོན་མའི་ཕྱི་ཚེས་ ༢༩ ཉིན་དབྱིན་ཇིའི་མཐོ་རིམ་ཁྲིམས་ཁང་གི་ཁྲིམས་དཔོན་སྐུ་ཞབས་ལཱེ་ཝེ་སན་(Lord Justice Leveson)ལགས་ཀྱིས་འདས་པའི་ཟླ་ངོ་ ༡༦ རིང་རིང་དབྱིན་ཡུལ་ནང་གི་གསར་འགྱུར་བརྒྱུད་ལམ་ཐོག་ཞིབ་འཇུག་བྱས་པའི་ལཱེ་ཝེ་སན་སྙན་ཐོ་(Leveson report)ཞེས་པ། ཤོག་གྲངས་ ༢༠༠༠ ཅན་ཞིག་དབྱིན་ཇིའི་སྲིད་བློན་ལ་ཕུལ་བ་དང་སྦྲགས་ཡོངས་ཁྱབ་ཐོག་ཕྱིར་བསྒྲགས་གནང་ཡོད་འདུག གནས་ཚུལ་དེ་རྒྱལ་སྤྱིའི་གསར་ལམ་ཁག་གིས་ཐད་གཏོང་བྱས་ཡོད་པ་མ་ཟད། གནས་ཚུལ་དེ་ཐོན་རྗེས་སྨྲ་བརྗོད་རང་དབང་དང་ཁྲིམས་གཞི་བཀག་སྡོམ་བར་གྱི་གླེང་གཞི་ཆེན་པོ་ཞིག་ཏུ་གྱུར་ཡོད།
སྙན་ཐོ་དེའི་ཚན་པ་དང་པོའི་ནང་དབྱིན་ཡུལ་གྱི་གསར་འགྱུར་བརྒྱུད་ལམ་གྱི་གནས་སྟངས་དང་། གསར་འགོད་ལས་དོན་གཉེར་ཕྱོགས། གསར་འགོད་པའི་ཀུན་སྤྱོད་སོགས་ལ་ཞིབ་འཇུག་བྱས་ཏེ། དོན་རྐྱེན་རིགས་ཀྱི་ཐད་གསར་འགྱུར་བརྒྱུད་ལམ་ཁག་དང་གསར་འགོད་པ་ཚོས་གནས་ཚུལ་རྫུན་བཟོ་དང་། ནོར་འཁྲུལ་ཅན་སྤེལ་ཏེ་སྤྱི་ཚོགས་ནང་ལ་བརྡབ་གསིག་བཏང་པ་དངོས་སུ་མཐོང་ཐོས་ཡོད་མཁན་མི་ ༣༣༧ ཙམ་གྱི་བདེན་དཔང་སྐད་ཆ་ལུང་འདྲེན་དང་། མི་ ༢༩༧ ཙམ་གྱི་སྙན་ཞུའི་ཡིག་ཆ་བཅས་བསྡུ་བསྒྲིགས་གནང་ཡོད་འདུག
ཚན་པ་གཉིས་པའི་ནང་། གསར་ཁང་ངམ་གསར་འགོད་པ་རེ་ཟུང་དང་ཉེན་རྟོག་པ་ངན་པ་ལག་འབྲེལ་བྱས་པ་དང་། གསར་ཁང་ངམ་གསར་འགོད་པ་དང་ཆབ་སྲིད་མི་སྣ་ངན་པ་ལག་འབྲེལ་བྱས་པ། གསར་ཁང་ངམ་གསར་འགོད་པ་དང་མང་ཚོགས་བར་གྱི་འབྲེལ་བ་བཅས་སྡེ་ཚན་གསུམ་དུ་བཀར་ཏེ། མ་འོངས་པར་གསར་ཁང་ངམ་གསར་འགོད་པ་དང་སྡེ་ཚན་དེ་དག་བར་གྱི་འབྲེལ་བར་སྟངས་འཛིན་བྱེད་པའི་ཁྲིམས་གཞི་གསར་བཟོ་དང་། བརྒྱུད་ལམ་ཐོག་ལྟ་རྟོག་བྱེད་མཁན་གྱི་སྒྲིག་འཛུགས་ཤིག་དགོས་པའི་དགོངས་འཆར་བཏོན་ཡོད་འདུག
སྙན་ཐོ་དེ་ཕྱིར་བསྒྲགས་སྐབས་ཞིབ་འཇུག་ཚོགས་ཆུང་གི་ཚོགས་གཙོ་སྐུ་ཞབས་ལཱེ་ཝེ་སན་ལགས་ཀྱིས། དམངས་གཙོའི་རྒྱལ་ཁབ་རྙིང་ཤོས་དབྱིན་ཡུལ་ལྟ་བུར་མཚོན་ན། སྨྲ་བརྗོད་རང་དབང་ལ་ཧ་ཅང་གཙིགས་ཆེན་བྱེད་ཀྱི་ཡོད་པ་ལྟར། ལྷག་པར་དུ་གསར་འགྱུར་བརྒྱུད་ལམ་གྱིས་དམངས་གཙོ་ལག་བསྟར་དང་སྤྱི་ཚོགས་ལ་གོ་རྟོགས་སྤེལ་བ། ལྐོག་ཟ་རུལ་སུངས་བྱེད་མཁན་དང་། ཆབ་སྲིད་པ་དང་གཞུང་འཛིན་མི་སྣར་ཐེར་འཐོན་སོགས་ལས་དོན་རླབས་ཆེན་གཉེར་གྱི་ཡོད་པ་དང་། ཁོང་རང་ཉིད་ལོ་ ༣༠ ལྷག་གི་རིང་ཁྲིམས་རྩོད་པ་དང་ཁྲིམས་དཔོན་བྱས་པའི་ཉམས་མྱོང་ཁྲོད། གསར་འགྱུར་བརྒྱུད་ལམ་ནི་ཁྲིམས་ཁང་གི་ཉིན་རེའི་ལས་དོན་ནང་ཅི་ཙམ་གལ་ཆེན་པོ་ཡིན་པ་ཤེས་རྟོགས་ཡོད་སྐོར་བརྗོད་འདུག
ཡང་ཁོང་གིས་སྐབས་འགའ་རེ་དང་དོན་རྐྱེན་བྱེ་བྲག་པ་འགའ་རེའི་ཐོག གསར་ཁང་དང་གསར་འགོད་པ་རེ་ཟུང་གིས། གསར་ཁང་དང་གསར་འགོད་པའི་རྩ་འཛིན་སྒྲིག་གཞི་སྣང་མེད་བྱས་ཏེ་གནས་ཚུལ་རྫུན་བཟོ་དང་། ནོར་འཁྲུལ་ཅན་སྤེལ་བའི་ཉེར་ལེན་ལ་བརྟེན་ཏེ་སྤྱི་ཚོགས་ནང་བརྡབ་གསིག་དང་ཉེས་མེད་ལ་ཕོག་ཐུག་ཚབས་ཆེན་ཐེབས་ཀྱི་ཡོད་སྟབས། གསར་འགྱུར་བརྒྱུད་ལམ་དང་གཞུང་མཉམ་འབྲེལ་ཐོག་གསར་ལམ་སྤྱི་ལ་ཁྱབ་པའི་ཁྲིམས་གཞི་གསར་བ་གཏན་འབེབས་བྱ་དགོས་པ་དང་། དེ་ལག་བསྟར་བྱེད་མཁན་གྱི་སྒྲིག་འཛུགས་ཤིག་གསར་དུ་འཛུགས་དགོས་སྐོར་བརྗོད་འདུག་ལ། ཁྲིམས་གཞི་དེ་ནི་ངེས་པར་དུ་གསར་འགོད་རང་དབང་ལ་འགོག་རྐྱེན་མི་འགྲོ་བ་དང་། མང་ཚོགས་ཀྱི་འདོད་བློ་སྐོང་ཐུབ་པ་ཞིག་ཡིན་དགོས་པ་མ་ཟད། ཆབ་སྲིད་པ་དང་གཞུང་གི་ཤུགས་རྐྱེན་མི་ཐེབས་པ་ཞིག་ཡིན་དགོས་པའི་བསམ་དགོངས་ཚུལ་གསུངས་འདུག
ཉིན་དེའི་ཕྱི་དྲོར་དབྱིན་ཇིའི་སྲིད་བློན་ཀཱམ་མཱེ་རོན་(David Cameron) གྱིས་གྲོས་ཚོགས་སུ་སྙན་ཐོ་དེའི་ཐད་གཏམ་བཤད་ཅིག་སྤེལ་ཏེ། བརྒྱུད་ལམ་ཞིབ་འཇུག་ཚོགས་ཆུང་དེ་ཐོག་མར་འཛུགས་དགོས་པའི་རྒྱུ་རྐྱེན་དང་ལས་དོན་བྱེད་ཕྱོགས་གསལ་བཤད་དང་སྦྲགས། ཁྲིམས་དཔོན་སྐུ་ཞབས་ལཱེ་ཝེ་སན་གྱི་དགོངས་འཆར་ལ་རྒྱབ་སྐྱོར་དང་། དེའི་ཐད་གྲོས་ཚོགས་ནང་བགྲོ་གླེང་ཡག་པོ་བྱ་དགོས་སྐོར་བརྗོད་ཡོད་འདུག
གསར་ལམ་སྤྱི་ལ་ཁྱབ་པའི་ཁྲིམས་གཞི་གཏན་འབེབས་དང་དེ་ལག་བསྟར་བྱེད་མཁན་སྒྲིག་འཛུགས་གསར་བཟོའི་ཐད། ཁོང་གིས་དབྱིན་ཇི་རྒྱལ་ཁབ་ནི་དུས་རབས་དུ་མའི་རིང་ནས་དམངས་གཙོའི་ལམ་སྲོལ་ལག་བསྟར་བྱེད་མཁན་ཞིག་ཡིན་སྟབས། ཐེངས་འདིའི་གནད་དོན་ཐད་ཧ་ཅང་གཟབ་ནན་བྱ་དགོས་པ་དང་། གལ་སྲིད་ཁྲིམས་སྒྲིག་གསར་པ་གཏན་འབེབས་བྱས་རྗེས། དེ་ལག་བསྟར་བྱེད་མཁན་སྒྲིག་འཛུགས་ལ་གཞུང་གི་ཐེ་ཇུས་ཡོད་པ་ཞིག་ཆགས་ཚེ། གསར་འགྱུར་བརྒྱུད་ལམ་ནི་ཆབ་སྲིད་པ་ཚོའི་ལག་ཆར་འགྱུར་པའི་ཉེན་ཁ་ཡོད་སྟབས། སྒྲིག་འཛུགས་དེ་ནི་གསར་ཁང་ཁག་གི་རྩོམ་སྒྲིག་པ་དག་ལས་གྲུབ་པ་ཞིག་གམ། ཡང་ན་ཐབས་ལམ་གཞན་ཞིག་བཙལ་ཏེ་གཞུང་གི་ཐེ་ཇུས་མེད་པར་རང་དབང་ཅན་གྱི་སྒྲིག་འཛུགས་ཤིག་ཡིན་དགོས་པའི་དགོངས་ཚུལ་གསུངས་འདུག
མཐར་ཁོང་གིས་ “ ང་ཚོས་སོ་སོའི་ལུང་པརསྤོབས་པ་ཆེན་པོ་བྱེད་ས་ནི། འཛམ་གླིང་གི་དམངས་གཙོ་རྙིང་ཤོས་ཀྱི་རྒྱལ་ཁབ་ཅིག་ཡིན་པ་མ་ཟད། སྨྲ་བརྗོད་རང་དབང་དང་གསར་འགོད་རང་དབང་ཚད་ཡོད་པ་འདི་དག་ཡིན། འོན་ཀྱང་། ཞིབ་འཇུག་སྙན་ཐོ་འདིའི་ནང་ད་ལྟའི་ང་ཚོའི་གསར་འགོད་ལམ་སྲོལ་ཐོག་གས་ཆག་ཚབས་ཆེན་ཤོར་ཏེ། སྤྱི་ཚོགས་དང་མི་སྒེར་ལ་ཕོག་ཐུག་ཆེན་པོ་འབྱུང་བཞིན་ཡོད་པ་བསྟན་དོན་ལྟར་ང་ཚོར་དེ་སྙོམ་སྒྲིག་བྱ་རྒྱུའི་ལས་འགན་ཡོད་” ཅེས་བརྗོད་དེ། གསར་འགོད་བརྒྱུད་ལམ་གྱི་ཁྲིམས་གཞི་ལག་བསྟར་བྱེད་མཁན་དེ་གཞུང་དང་མཉམ་འབྲེལ་དགོས་པའི་རྣམ་འགྱུར་བསྟན་ཡོད་འདུག
ཉིན་དེའི་གཏམ་བཤད་རྗེས་སུ། སྲིད་བློན་ཀཱམ་མཱེ་རོན་གྱི་བཀའ་ཁྱབ་ལྟར། སྲིད་བློན་གཞོན་པ་གཙོས་གྲོས་ཚོགས་གོང་འོག་གཉིས་དང་། ཁ་གཏད་ཚོགས་པ་བཅས་ལྷན་འཛོམས་ཐོག་ལཱེ་ཝེ་སྙན་ཐོ་དང་བསམ་ཚུལ་ལམ་སྟོན་ཐད་གྲོས་བསྡུར་བྱེད་མགོ་ཚུགས་ཡོད་ཅིང་། འབྱུང་འགྱུར་ཟླ་གཅིག་གི་ནང་ཚུན་གནད་དོན་ཐག་གཅོད་ཡོང་ཐབས་བྱ་འཆར་ཡོད་འདུག
གོང་གི་གསར་འགོད་ཁྲིམས་གཞི་གསར་པ་དེ་དང་། དེ་ལག་བསྟར་བྱེད་མཁན་གྱི་སྒྲིག་འཛུགས་ཐད། སྤྱི་ཚོགས་ནང་གླེང་སློང་ཤུགས་ཆེན་ཡོང་གི་ཡོད་པ་དང་། དེར་རྒྱབ་སྐྱོར་བྱེད་མཁན་ནི་གཞུང་འཛིན་མི་སྣ་དང་དེ་སྔོན་བརྒྱུད་ལམ་ནས་ཕོག་ཐུག་འགྲོ་མྱོང་མཁན་དག་ཡིན་ཞིང་། དེ་ལ་ངོ་རྒོལ་བྱེད་མཁན་ནི་གསར་འགྱུར་བརྒྱུད་ལམ་ཁག་དང་སྨྲ་བརྗོད་རང་དབང་དང་སྤྱི་དམངས་ཀྱི་ཐོབ་ཐང་བརྩོན་ལེན་བྱེད་མཁན་དག་ཡིན་འདུག
གནས་ཚུལ་འདི་རྒྱལ་སྤྱིའི་གསར་འགྱུར་བརྒྱུད་ལམ་མང་པོ་ཞིག་ཏུ་སྤེལ་འདུག ཆབ་སྲིད་པ་དང་རྩོམ་སྒྲིག་པ་ཚོས་རྩོད་གླེང་ཆེན་པོ་བྱེད་ཀྱི་འདུག
སྦྱིར་བཏང་གསར་ལམ་ཁག་རེ་ཟུང་གིས་གནས་ཚུལ་རྫུན་མ་སྤེལ་བ་དང་། དོན་དག་ཆུང་ཆུང་ཆེན་པོ་བཟོ་པ་སོགས་ཀྱི་སྐྱོན་ཆ་ཏན་ཏན་ཡོད་པ་རེད། ལྷག་པར་དུ་རྒྱ་ནག་གི་གསར་ལམ་ཁག་ལ་མཚོན་ན་མང་ཚོགས་ལ་མགོ་བསྐོར་བསླུ་བྲིད་གཏོང་བྱེད་གཙོ་བོ་ཞིག་གསར་ལམ་ཆགས་བསྡད་ཡོད་པ་རེད། ཡིན་ནའང་དམངས་གཙོའི་ལུང་པ་ཁག་ལ་མཚོན་ན་སྐྱོན་ཆ་དང་ལེགས་ཆ་གཉིས་བསྡུར་བ་ཡིན་སྡབ་བརྒྱ་ཕྲག་གིས་གསར་ལམ་ཁག་ཏུ་རང་དབང་ཆེན་པོ་དང་སྨྲ་བརྗོད་རང་དབང་གི་ཐོབ་ཐང་ཆེན་པོ་ཡོད་ན། དེ་ལ་འབབ་པའི་སྤྱི་ཚོགས་སྤུས་དག་པོ་དང་ཡར་རྒྱས་ཆེན་པོ་ཡོང་གི་རེད། རྒྱ་གར་ལུང་པ་ལྟ་བུར་མཚོན་ན། དབུས་དང་ས་གནས་ཀྱི་ཁྲིམས་ཁང་ཁག་ལས་གསར་འགྱུར་ལས་ཁུངས་ཁག་གིས་སྤྱི་ཚོགས་དང་གཞུང་ལ་ནུས་པ་འདོན་ཐུབ་ཀྱིན་ཡོད་ཟེར་ནས་བཤད་སྲོལ་ཡོད་པ་རེད།
ད་ལྟའི་དབྱིན་གཞུང་གི་སྲིད་བློན་ཁོང་ནི་རྒྱལ་སྤྱིའི་ཐོག་ལྟ་སྟངས་སྣ་ཚོགས་ཡོད་མཁན་ཞིག་ཡིན་པ་མ་ཟད། སྒེར་གཅོད་ཀྱི་འདུ་ཤེས་ཆེན་པོ་ཡོད་པ་དང་། དྲག་པོ་དང་རྩུབ་སྤྱོད་ཕྱོགས་ལ་མོས་མཁན་ཞིག་ཡིན་རབས་ཤོད་ཚུལ་ཡོད་པ་རེད།