དེ་རིང་ཉིན་རྒྱབ་བོད་ཨ་མདོ་རྔ་པ་ཁུལ་མཛོད་དགེ་འབྲིང་བའི་སུམ་མདོ་དགོན་པའི་གྲྭ་དཀོན་མཆོག་འཕེལ་རྒྱས་ཀྱིས་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་སྟེ་སྐུ་གྲོངས་ཡོད་འདུག
ད་ལྟ་རིང་བཞུགས་སྒར་ཀིརྟི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་གྲྭ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་གནས་ཚུལ་བཏང་འབྱོར་ལ། དེ་རིང་ཕྱི་ཚེས་ ༨ ཉིན་གྱི་བོད་ནང་གི་ཕྱི་དྲོའི་ཆུ་ཚོད་ ༥།༢༠ ཐོག་བོད་མདོ་སྨད་རྔ་པ་རང་སྐྱོང་ཁུལ་མཛོད་དགེ་རྫོང་འབྲིང་བའི་སུམ་མདོ་དགོན་གྱི་རང་ལོ་ ༢༤ ཡིན་པའི་གྲྭ་དཀོན་མཆོག་འཕེལ་རྒྱས་སྟག་ཚང་ལྷ་མོ་ཀིརྟི་དགོན་པའི་ཚོགས་ཆེན་འདུ་ཁང་མདུན་དུ་ “༧རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཁྲི་ལོ་བརྟན་པར་ཤོག རྒྱལ་བ་བསྟན་འཛིན་རྒྱ་མཚོ་བོད་ལ་གདན་འདྲེན་ཞུ་དགོས། ཀིརྟི་སྐྱབས་མགོན་རིན་པོ་ཆེ་བོད་ལ་གདན་འདྲེན་ཞུ་དགོས། བོད་གཞིས་བྱེས་ལྷན་འཛོམས་ཡོང་དགོས” ཞེས་པའི་འབོད་ཚིག་སྒྲོག་བཞིན་ལག་གཉིས་ཐལ་མོ་སྦྱར་ནས་རང་ལུས་མེར་བསྲེགས་བཏང་སྟེ། རྒྱ་གཞུང་གི་དྲག་རྩུབ་ཀྱི་སྲིད་བྱུས་ལ་ངོ་རྒོལ་གནང་སྟེ་འདས་གྲོངས་སུ་གྱུར་ཡོད་འདུག
ཁོང་གིས་རང་ལུས་མེར་བསྲེགས་གཏོང་བཞིན་པའི་སྐབས་དེར་མཐའ་འཁོར་དུ་གྲྭ་མང་གིས་བསྐོར་ནས་རྒྱལ་གཅེས་དཔའ་བོ་ཁོང་གི་མིང་ནས་བཟུང་སྟེ་སྐད་ཤུགས་ཆེན་པོས་འབོད་བརྡ་བཏང་ཞིང་། དེ་བཞིན་གྲྭ་མང་གིས་ “བློ་བཟང་རྒྱལ་བ་ཀུན་གྱི་སྙིང་རྗེའི་གཏེར།། གངས་ཅན་བསྟན་འཛིན་ཀུན་གྱི་གཙུག་གི་རྒྱན། འཇིགས་མེད་ཡེ་ཤེས་རྒྱལ་བ་རྒྱ་མཚོའི་སྡེ།། བླ་མ་སྤྱན་རས་གཟིགས་ཀྱིས་རྗེས་བཟུང་ནས།། གནས་སྐབས་མཐར་ཐུག་བསམ་དོན་ལྷུན་འགྲུབ་ཤོག” ཅེས་པ་སྐད་ཤུགས་ཆེན་པོས་འུར་འདོན་གནང་ཡོད་འདུག དེ་རྗེས་ཁོང་གི་སྐུ་ཕུང་ཁོ་རང་གི་གྲྭ་ཤག་ཏུ་གདན་དྲངས་ཏེ་གྲྭ་མང་བརྒྱ་ཕྲག་མང་པོས་སྨོན་ལམ་གསུངས་དང་གསུང་མུས་ཡིན་འདུག
ཁོང་ནི་མཛོད་དགེ་རྫོང་འབྲིང་བ་ཞང་གོས་བརྡ་སྡེ་བའི་ཕ་དཀོན་མཆོག་སྐྱབས་དང་མ་སྒྲོལ་མ་མཚོ་གཉིས་ཀྱི་བུ་ཡིན་པ་དང་། ཆུང་ཆུང་སྐབས་ནས་འབྲིང་བའི་སུམ་མདོ་དགོན་དུ་ཆོས་ཞུགས་བྱས་ཤིང་། ཕྱི་ལོ་ ༢༠༡༠ ལོར་སྟག་ཚང་ལྷ་མོ་ཀིརྟི་དགོན་པར་དཔེ་ཆ་ལྟ་རུ་ཡོང་ནས་མཚན་ཉིད་ཀྱི་འཛིན་གྲྭ་ཁ་དོག་གོང་མའི་ནང་དུ་སྒྲིག་ཞུགས་ཀྱིས་མཚན་ཉིད་ཀྱི་གཞུང་ལ་སློབ་སྦྱོང་གནང་མུས་ཡིན་འདུག ཁོང་ལ་ཕ་མ་གཉིས་དང་སྤུན་སྲིང་སོགས་ནང་མི་དགུ་ཡོད་འདུག
རང་གི་སྐྱེ་ཡུལ་གཅིག་པའི་རྒྱལ་གཅེས་པ་དང་མི་དམངས་ལྷན་རྒྱས་ལགས།
ཁྱེད་ཅག་གི་སྙིང་སྟོབས་དང་རྒྱལ་ཞེན་འཛམ་གླིང་ན་འཕྱུར་བཞིན་ཡོད།
ཁྱེད་ཅག་གིས་སྙིང་སྟོབས་དེས་འུ་ཅག་གི་བདེ་མཐའ་གསལ་ལ་ཉེ།
༸གོང་ས་མཆོག་དང་སྲིད་སྐྱོང་གཙོ་བོ་གྱུར་བའི་ཁྱེད་ཅག་གི་སྙིང་སྟོབས་འཛམ་གླིང་ན་གླེང་བཞིན་ཡོད། ད་དུང་ཕྱི་སྡོད་བོད་མི་སྟོང་ཕྲག་མང་པོའི་ཁྱེད་ཅག་གིས་མཛད་རྗེས་མིག་ཆུས་གླེང་བཞིན་ཡོད།
གཞིས་བཞུགས་བོད་རྒྱ་ཆེའི་མི་དམངས་ཀྱི་རིགས་ཞེན་དཀར་བོས་ཀུན་ནས་བསླངས་ཏེ། ཉིན་རེར་བཞིན་བོད་མི་རིགས་དང་བོད་ཀྱི་རིག་གཞུང་གི་ཐོབ་ཐང་དང་རང་དབང་གི་ཆེད་དུ་སྐུ་ལུས་མེར་སྲེག་བཏང་དང་གཏོང་བཞིན་པའི་གནས་ཚུལ་འདི། སྐྱབས་བཅོལ་བོད་མི་རྣམས་ཀྱིས་བདག་པོ་གང་འདྲ་ཞིག་རྒྱག་བཞིན་ཡོད་དམ།
ད་ཡིན་ན། བོད་མི་རིགས་ཀྱིས་འཚེ་མེད་ཞི་བའི་འཐབ་རྩོད་བྱེད་ཕྱོགས་ལ་འཇུག་རིམ་ཡོད་པའི་ལམ་སྟོན་གྱི་གཞུང་ཤིང་ཞིག་དགོས་པའི་དུས་ཚོད་གནད་འགག་ཅན་ཞིག་ཐོན་སོང་།
དེའི་སྟབས་ཀྱིས། གཞིས་བཞུགས་བོད་མི་དམངས་ཀྱི་ངོས་ནས། འདི་ལྟར་འཚེ་མེད་ཞི་བའི་ལམ་ནས་རྒྱ་གཞུང་དང་དེའི་སྲིད་བྱུས་གཏིང་ནག་ལ་རང་ལུས་མེར་སྲེག་གིས་ཞི་རྒོལ་བྱེད་རིམ་ཞིག་ཡོད་ན་ཅི་མ་རུང་།
གང་ལྟར། གཞིས་བཞུགས་བོད་མིའི་ཆོད་སེམས་དང་བློས་གཏོང། སྙིང་སྟོབས་བཅས་ནི། ཉིན་རེར་བཞིན་ཇེ་ངར་དུ་འགྲོ་བཞིན་པའི་སྐབས་འདིར། སྐྱབས་བཅོལ་བོད་མིའི་སྒྲིག་འཛུགས་དང་ཚོགས་པ་ཁག་མཉམ་འབྲེལ་གྱིས་སྒོ་ནས་འཛམ་གླིང་འགུལ་ཐུབ་པའི་ལས་འགུལ་གཞི་རྒྱ་ཆེ་བ་ཞིག་སྤེལ་རོགས།
གཤམ་གསལ་མིའི་རིགས་དང་ཁོར་ཡུག་སོགས་ཀྱི་དཀའ་རྙོག་རྣམས་སེལ་ཐབས་ཀྱི་ཐབས་བྱུས་བོད་བསྒྱུར་དང་འབྲེལ་ནས་མིག་རྒྱང་རིང་པོར་ཕྱོགས་ཐུབ་པའི་འཐབ་རྩོད་བྱེད་སྟངས་ཤིག་གསལ་སྟོན་རོགས་ཞུ།
《འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས།》
《འཛམ་གླིང་མི་བུའི་ཐོབ་ཐང་གསལ་བསྒྲགས།》
《མཉམ་འབྲེལ་རྒྱལ་ཚོགས་ཀྱི་རྩ་འཛིན།》
《མི་སེར་སྤེལ་ཡུལ་རྒྱལ་ཁབ་དང་མི་དམངས་ལ་འབོགས་པའི་རང་བཙན་གསལ་བསྒྲགས།》
《རྒྱལ་སྤྱིའི་ཁྲིམས་ལུགས་རྩ་དོན་གསལ་བསྒྲགས།》
《རང་བྱུང་ཐོན་ཁུངས་ཡུན་གཏན་མངའ་དབང་ཐད་ཀྱི་གསལ་བསྒྲགས།》
《སྤྱི་དམངས་ཀྱི་ཐོབ་ཐང་དང་ཆབ་སྲིད་ཀྱི་ཐོབ་ཐང་ཐད་ཀྱི་རྒྱལ་སྤྱིའི་སྤྱི་ཆིངས།》
《དཔལ་འབྱོར་དང་སྤྱི་ཚོགས། རིག་གནས་བཅས་ཀྱི་ཐོབ་ཐང་ཐད་ཀྱི་རྒྱལ་སྤྱིའི་སྤྱི་ཆིངས། 》
《མི་དམངས་དང་མི་རིགས་ཀྱི་རང་ཐག་རང་གཅོད་ཐད་ཀྱི་གྲོས་ཆོད།》
《བདེན་པའི་ཨུ་ཚུགས།》