ཨ་རིའི་རྒྱལ་སྲུང་དྲུང་ཆེ་གསར་འདེམས།

ཨོ་བྷ་མས་ཨ་རིའི་རྒྱལ་སྲུང་དྲུང་ཆེ་དང་གསང་བའི་ལས་ཁུངས་ཀྱི་མགོ་གཙོ་གཉིས་གསར་དུ་མིང་འདོན་བྱས་པར། གྲོས་ཚོགས་ནང་རྒྱབ་སྐྱོར་དང་མོས་མཐུན་མི་བྱེད་མཁན་གཉིས་ཀ་འབྱུང་བཞིན་ཡོད་འདུག

ཁ་སང་ཕྱི་ཚེས་ ༧ ཉིན་སྲིད་འཛིན་ཨོ་བྷ་མས་ད་སྔའི་ཨ་རིའི་རྒྱལ་སྲུང་དྲུང་ཆེ་པཱ་ནེ་ཊ་(Leon Panetta) ཡི་ཚབ་ཏུ་གྲོས་ཚོགས་འཐུས་མི་ཟུར་པ་ཧ་གྷེལ་(Chuck Hagel ) དང་། ཨ་རིའི་གསང་བའི་ལས་ཁུངས་ཀྱི་མགོ་གཙོ་པེ་ཊི་རའུ་སི་(David Petraeus) ཡི་ཚབ་ཏུ་ཨོ་བྷ་མའི་སློབ་སྟོན་པ་བྷི་རེ་ནན་(John Brennan) གཉིས་གསར་དུ་བསྐོ་བཞག་བྱ་རྒྱུའི་མིང་འདོན་བྱས་ཡོད་ཀྱང་། ཤུགས་རྐྱེན་ཅན་གྱི་གྲོས་ཚོགས་འཐུས་མི་ཁག་ཅིག་གིས་སྐུ་ཞབས་ཧ་གྷེལ་གྱི་ཕྱི་འབྲེལ་སྲིད་ཇུས་ཀྱི་ལངས་ཕྱོགས་ཐད་སྐྱོན་བརྗོད་བྱེད་ཀྱི་ཡོད་པ་མ་ཟད། བྷི་རེ་ནན་ལའང་ཐེར་འདོན་བྱེད་མཁན་ཡོད་སྟབས། ཨོ་བྷ་མས་མིང་འདོན་བྱས་པའི་འོས་མི་ལ་གྲོས་ཚོགས་ནང་རྒྱབ་སྐྱོར་ཡོང་རྒྱུར་དཀའ་ངལ་འཕྲད་བཞིན་ཡོད་འདུག

ཟླ་སྔོན་མའི་ནང་ཨོ་བྷ་མས་ཨ་རིའི་རྒྱལ་དོན་དྲུང་ཆེ་ཧེ་ལཱ་རི་ཡི་ཚབ་ཏུ་གྲོས་ཚོགས་འཐུས་མི་ཇོན་ཀེ་རེ་(John Kerry) མིང་འདོན་བྱས་ཡོད་པ་དང་། ཨ་རིའི་རྒྱལ་དོན་དྲུང་ཆེ་དང་རྒྱལ་སྲུང་དྲུང་ཆེ། གསང་བའི་ལུས་ཁུངས་ཀྱི་མགོ་གཙོ་གསུམ་ནི་ཨོ་བྷ་མའི་སྲིད་འཛིན་སྐབས་གཉིས་པའི་རྒྱལ་ཁོངས་བདེ་འཇགས་སྲིད་ཇུས་ཀྱི་ཀ་བ་གསུམ་ཆགས་ཡོད་པ་རེད།

རང་ལོ་ ༦༦ ལ་སོན་པའི་སྐུ་ཞབས་ཧ་གྷེལ་ནི་ཨ་རིའི་མི་ཚང་དབུལ་བོ་ཞིག་ཏུ་སྐྱེས་ཤིང་། ལོ་ ༩ ཙམ་ནས་གཞན་གཡོ་བྱས་ཏེ་འཚོ་བ་རོལ་ཐབས་བྱས་ཞིང་། རྗེས་སུ་ཨ་རིའི་དམག་ལ་ཞུགས་ཤིང་ཝེ་ཊི་ནམ་དམག་འཁྲུག་སྐབས་ཤུལ་རྗེས་ཆེན་པོ་འཇོག་མཁན་ཞིག་ཡིན་པ་དང་། ཝེ་ཊི་ནམ་དམག་འཁྲུག་མཚམས་བཞག་རྗེས་ཨ་རིའི་སྤྱི་ཚོགས་ནང་ལས་རིགས་འདྲ་མིན་ཐད་ལས་དོན་བསྒྲུབས་འདུག་ལ། ༡༩༩༦ ནས་གྲོས་ཚོགས་འཐུས་མིར་འདེམས་ཐོན་བྱུང་ཡོད། ཁོང་ནི་དུས་རྒྱུན་མི་ཁ་རུ་ཁ་ཐུག་ཅིག་དང་། རྒྱལ་ཁབ་ཕན་ཚུན་བར་གྱི་དཀའ་རྙོག་རིགས་དམག་འཁྲུག་ལས་གྲོས་མོལ་བརྒྱུད་ཐག་གཅོད་བྱ་རྒྱུར་བསམ་བློ་གཏོང་མཁན་ཞིག་ཡིན་འདུག

རང་ལོ་ ༥༧ སོན་པའི་སྐུ་ཞབས་བྷི་རེ་ནན་གྱིས་ལོ་ ༢༥ རིང་རྒྱལ་ཁབ་འདྲ་མིན་ནང་གི་ཨ་རིའི་གསང་བའི་ལས་དོན་གཉེར་ཡོད་ཅིང་། ཨ་རིའི་སྲིད་འཛིན་ཟུར་པ་བྷུ་ཤི་སྐབས་ཀྱི་སའོ་ཌེ་ཨ་རབ་(Saudi Arabia)ནང་གི་གསང་བའི་མགོ་གཙོ་དང་། ཨོ་བྷ་མའི་སྲིད་འཛིན་སྐབས་དང་པོའི་ལས་རྒྱུན་ནང་འཇིགས་སྐུལ་རིང་ལུགས་པར་འགོག་རྒོལ་སྲིད་ཇུས་ཀྱི་སྲིད་འཛིན་སློབ་སྟོན་པ་གཙོ་བོ་དང་། ༢༠༡༡ ལོར་བྷེན་ལཱ་ཌན་དམར་གསོད་གཏོང་བའི་འཆར་འགོད་མི་སྣ་གཙོ་གྲས་ཤིག་ཡིན་འདུག