ཟབ་སྦྱོང་འདིའི་འགྲོ་སོང་ཚང་མ་ང་སྒེར་ངོས་ནས་གཏོང་གི་ཡོད་ཟེར།

ཧོང་ཀོང་གི་རྒྱ་རིཊ་དགེ་རྒན་ ༧ གྱིས་དང་བླངས་ཐོག་བོད་ཁྱིམ་སློབ་གྲྭ་ཁག་གི་སློབ་ཕྲུག་ ༡༠༠ ལྷག་ལ། དུས་ཡུན་ཟླ་གཅིག་དང་ཕྱེད་རིང་དེང་རབས་རི་མོ་འབྲི་ཐབས་དང་པར་རྒྱག་སྟངས། རོལ་དབྱངས་དང་གློག་བརྙན་བཟོ་སྟངས་སོགས་ཀྱི་སྐོར་ལ་ཟབ་སྦྱོང་ཞིག་སྤྲོད་བཞིན་འདུག

ཧོང་ཀོང་བོད་དོན་རྒྱབ་སྐྱོར་ཚོགས་པའི་ཚོགས་མི་ལྕམ་ཧོས་སིན་མིན་ (hui sin ming) ལགས་དང་ངྷ་སྟེང་བོད་ཁྱིམ་སློབ་གྲྭ་གཉིས་མཉམ་འབྲེལ་ཐོག ཕྱི་ཟླ་ ༡ ཚེས་ ༡༤ ནས་ཕྱི་ཟླ་ ༢ ཚེས་ ༢༥ ཉིན་བར་གྱི་དུས་ཡུན་ཟླ་གཅིག་དང་ཕྱེད་ཀའི་རིང་། ངྷ་སྟེང་བོད་ཁྱིམ་སློབ་གྲྭའི་བདེ་སྐྱིད་ཚེ་རིང་ཚོགས་ཁང་རྙིང་པའི་ནང་། བོད་རིགས་གཞོན་སྐྱེས་ཚོར་བརྒྱུད་ལམ་ལས་འཆར་ (Tibetan youth media program) ཞེས་པའི་བརྗོད་གཞིའི་ཐོག་ཟབ་སྦྱོང་ཞིག་འཚོགས་བཞིན་འདུག་ལ། ཟབ་སྦྱོང་དེར་ཧོང་ཀོང་ནས་དང་བླངས་དགེ་རྒན་ ༧ དང་ངྷ་སྟེང་བོད་ཁྱིམ་ནས་དགེ་རྒན་ ༢ བཅས་ཀྱིས་སྣེ་འཁྲིད་དེ། ངྷ་སྟེང་བོད་ཁྱིམ་གཙོས་ཅོང་ཏ་རཱ་དང་གྷོལ་པཱ་པུར། སུ་ཇཱ་བོད་ཁྱིམ་བཅས་ཀྱི་འཛིན་རིམ་མཐོ་བའི་སློབ་ཕྲུག་ ༡༠༠ ལྷག་མཉམ་ཞུགས་གནང་འདུག

ཟབ་སྦྱོང་དེའི་ཁྲིད་གཞི་གཙོ་བོ་དག་ནི་དེང་རབས་རི་མོ་འབྲི་ཐབས་དང་དེའི་སྒྱུ་རྩལ་ངོ་སྤྲོད། རི་མོའི་སྒྱུ་རྩལ་གྱི་ལམ་ནས་བོད་དོན་འཐབ་རྩོད་གནང་ཕྱོགས། ཁོར་ཡུག་དང་འཚམ་པའི་རི་མོ་འབྲི་བཞེངས། རོལ་དབྱངས་བསླབ་ཁྲིད། པར་རྒྱག་སྟངས་དང་དངོས་བྱུང་གློག་བརྙན་བཟོ་སྟངས། རྒྱ་གཞུང་གིས་བོད་དང་འབྲེལ་བའི་གློག་བརྙན་བཟོ་སྟངས་ཐོག་གི་ནོར་འཁྲུལ་ངོས་འཛིན་གནང་ཕྱོགས། དྲ་ལམ་ཁག་ཏུ་བོད་དོན་གློག་བརྙན་རྒྱ་ཁྱབ་ཏུ་བེད་སྤྱོད་གཏོང་ཕྱོགས་བཅས་ཡིན་འདུག

གསར་འགོད་པས་ཟབ་སྦྱོང་གོ་སྒྲིག་གནང་མཁན་ལྕམ་ཧོས་སིན་མིན་ལགས་སུ་ཟབ་སྦྱོང་སྐོར་ལ་བཅར་འདྲི་ཞུས་པར། རྒྱ་ནག་གཞུང་གིས་བོད་ནང་གི་བོད་མི་ཚོར་དྲག་གནོན་དང་བོད་ཀྱི་རིག་གཞུང་གཏོར་བཤིག་ཚད་མེད་བཏང་བའི་རྐྱེན་གྱིས་བོད་མི་ཚོས་རང་ལུས་མེར་བསྲེཊ་གཏོང་དགོས་བྱུང་ཡོད་ཅིང་། ཁོང་མོར་བོད་ནང་རང་སྲེག་གཏོང་བཞིན་པའི་གནས་ཚུལ་ཐོས་ཐེངས་རེར་སེམས་ནང་མ་སྐྱིད་པ་ཤུཊ་ཆེན་པོ་ཡོང་གི་ཡོད་པ། མོ་རང་གིས་བོད་ནང་རང་སྲེག་གཏོང་མཁན་བོད་མི་ཚོར་གདུང་སེམས་མཉམ་སྐྱེད་དང་རྒྱབ་སྐྱོར་མཚོན་ཆེད། ད་ཐེངས་ཆེད་དུ་ངྷ་རམ་ས་ལར་ཡོང་སྟེ་བོད་ཕྲུག་ཚོར་ཟབ་སྦྱོང་འདི་གོ་སྒྲིག་བྱས་པ་ཞིག་དང་། བོད་ནང་བོད་མི་ཚོས་རྒྱ་གཞུང་གི་བཙན་གནོན་འོག་མི་རིཊ་ཀྱི་ཐོབ་ཐང་དང་ངོ་བོ་སྲུང་སྐྱོབ་ཁག་པོ་ཆགས་ཡོད་སྟབས། བཙན་བྱོལ་ནང་གནས་སྡོད་བོད་པ་དང་ལྷག་པར་དུ་བོད་རིཊ་གཞོན་སྐྱེས་ཚོས་ངེས་པར་དུ་དེང་དུས་འཕྲུལ་ཆས་བེད་སྤྱོད་གཏོང་ཕྱོགས་དང་། བརྒྱུད་ལམ་ཁག་ཏུ་བོད་ཀྱི་དངོས་ཡོད་གནས་ཚུལ་འགྲེལ་བཤད་རྒྱག་སྟངས་བཅས་ལ་ཤུགས་སྣོན་དགོས་ཚུལ་བརྗོད་བྱུང་།

ཁོང་མོར་ཟབ་སྦྱོང་དེ་ངྷ་སྟེང་བོད་ཁྱིམ་དུ་གོ་སྒྲིག་ཞུ་དགོས་དོན་དང་འགྲོ་སོང་ག་ཚོད་བཏང་ཡོད་མེད། བོད་ཁྱིམ་སློབ་གྲྭའི་ངོས་ནས་ཟབ་སྦྱོང་དེར་རྒྱབ་སྐྱོར་ག་འདྲ་གནང་ཡོད་མེད་དྲིས་སྐབས། “ངྷ་རམ་ས་ལ་ནི་གནས་བབ་ཀྱི་ཆ་ནས་བཙན་བྱོལ་བོད་མིའི་གནས་སྟངས་ཤེས་རྟོཊ་ཡོང་སའི་ས་ཆ་གལ་ཆེན་ཞིག་ཡིན་སྟབས། ལས་ཀ་བྱེད་བདེ་བ་དང་གནས་ཚུལ་གོ་སླ་བ་ཡོང་གི་འདུག ལྷག་པར་དུ་བོད་ཁྱིམ་སློབ་གྲྭ་ངྷ་སའི་སློབ་གྲྭ་ཆེ་ཤོས་དེ་ཡིན་སྟབས། ཐོག་མར་ང་རང་གིས་ངྷ་སྟེང་བོད་ཁྱིམ་སློབ་གྲྭའི་ངེས་སྟོན་པ་ཕུན་ཚོཊ་རྣམ་རྒྱལ་ལཊ་སུ་འབྲེལ་བ་བྱས་པ་ཡིན། ཁོང་གིས་ང་ཚོར་ཟབ་སྦྱོང་སྤྲད་ཆོག་པའི་ཁས་ལེན་གནང་བ་མ་ཟད།  ཧོང་ཀོང་ནས་ཡོང་མཁན་དགེ་རྒན་ཚོར་ཁང་པ་དང་ཞལ་ལག་སོཊ་ཕྱོགས་གང་ཐད་ནས་གོ་སྒྲིག་ཡག་པོ་གནང་སོང་། མ་གཞི་ཐེངས་འདིའི་ཟབ་སྦྱོང་ཆེད་ང་རང་གིས་རི་མོ་འབྲི་བྱེད་ཀྱི་རྒྱུ་ཆ་དང་པར་ཆས། བརྙན་ལེན་འཕྲུལ་ཆས་སོཊ་ཧོང་ཀོང་ནས་ཉོས་ཡོང་བ་ཡིན། ཟབ་སྦྱོང་དེའི་ཆེད་དུ་འགྲོ་སོང་ཧོང་ཀོང་ཌོ་ལོར་འབུམ་ ༢ ལྷག་བཏང་བ་ཡིན། ཟབ་སྦྱོང་སྐབས་བོད་པའི་སློབ་མ་ཚོས་དོ་སྣང་དང་དགའ་བོ་བྱས་ཏེ་གྲུབ་འབྲས་ཐོན་ས་རེད་བསམ་པ་ཞིག་འདུག གལ་སྲིད་སློབ་ཕྲུག་ཚོར་དགའ་མོས་དང་བོད་ཁྱིམ་སློབ་གྲྭའི་ངོས་ནས་ཀྱང་ཆོག་མཆན་གནང་བ་ཡིན་ན། ལོ་རྗེས་མར་ཡང་འགྲོ་སོང་ཆ་ཚང་སྒེར་ངོས་ནས་བཏང་སྟེ། ཟབ་སྦྱོང་གཉིས་པ་གོ་སྒྲིག་བྱ་འཆར་ཡོད། སྐབས་རྗེས་མའི་ཟབ་སྦྱོིང་སྐབས་ཧོང་ཀོང་ནས་སློབ་ཕྲུག་སྐོར་ཞིག་ཁྲིད་ཡོང་སྟེ་སློབ་ཕྲུག་ཕན་ཚུན་བསམ་ཚུལ་བརྗེ་རེས་ཀྱི་ཚུལ་དུ་ཟབ་སྦྱོང་འཚོཊ་ན་བསམ་བསྡད་ཡོད། ”ཟེར།

ཟབ་སྦྱོང་དེའི་སྐོར་ལ་བོད་ཁྱིམ་འབྱུང་རིག་སྡེ་ཚན་གྱི་སློབ་མའམ་ཟབ་སྦྱོང་དེའི་སློབ་མའི་འགན་ཁུར་བ་རིན་ཆེན་དབང་རྒྱལ་ལགས་སུ་དྲིས་པར། “ མ་གཞི་ད་ལྟ་སློབ་གྲྭ་ཡོངས་གུང་གསེང་བཏང་ཡོད་པ་རེད། སློབ་གྲྭའི་འཛིན་སྐྱོང་གིས་ཟབ་སྦྱོང་དེར་སློབ་མ་རང་ངོས་ནས་འགན་འཁུར་ན་ཡག་པོ་འདུག་གསུངས་ཏེ། ང་རང་ཟབ་སྦྱོང་འདིའི་སློབ་མའི་འགན་ཁུར་བར་བསྐོས་སོང་། ཟླ་གཉིས་ཀྱི་གུང་གསེང་སྐབས་ཕྱི་ལོགས་སུ་སོང་ན་དུས་ཚོད་འཕྲོ་བརླག་ཏུ་འགྲོ་གི་ཡོད་སྟབས། ང་རང་ཟབ་སྦྱོང་འདིའི་ནང་མཉམ་ཞུགས་བྱས་ཏེ་དངོས་བྱུང་གློག་བརྙན་བཟོ་རྒྱུ་དང་པར་རྒྱག་སྟངས་སྐོར་སློབ་སྦྱོང་བྱེད་ཀྱིན་ཡོད། ཕྱི་རྒྱལ་ནས་ཕེབས་མཁན་དགེ་རྒན་ཚོའི་ཟབ་སྦྱོང་སྤྲོད་སྟངས་དེ། བོད་པ་དང་མི་འདྲ་བར་ཧ་ཅང་གུ་ཡངས་པོ་དང་ཁ་གསང་པོ་ཞེ་དྲག་རེད། ཟབ་སྦྱོང་ནང་ཞུཊ་མཁན་སློབ་ཕྲུག་ཚོར་ཆ་བཞག་ནང་ཐེངས་འདིར་རང་གི་དགའ་ཕྱོགས་ལྟར་ཟབ་སྦྱོང་སྤྲོད་ཀྱི་ཡོད་སྟབས། ཚང་མས་དགའ་མོས་ཆེན་པོ་བྱེད་ཀྱི་འདུག ”ཅེས་བརྗོད་སོང་།

གསར་འགོད་པ། དཔལ་ལྡན།